About Us Advertise with us Be a Reporter E-Paper

ಅಂಕಣಗಳು

ಮಂತ್ರಿಯಾಗಲು ಏಳನೇ ಕ್ಲಾಸ್ ಬೇಕು, ವೈದ್ಯರಾಗಲು ಸೊನ್ನೆ ಸಾಕು!

ಕಳಕಳಿ: ದಯಾನಂದ ಲಿಂಗೇಗೌಡ

ಕರ್ನಾಟಕದ ರಾಜ್ಯದ ಮಂತ್ರಿ ಮಂಡಲದ ಹೆಸರುಗಳು ಪ್ರಕಟವಾದಾಗ ವ್ಯಂಗ್ಯ ಚಿತ್ರವೊಂದು ಸುದ್ದಿ ಮಾಡಿತ್ತು. ಅದರಲ್ಲಿ ತಂದೆಯೊಬ್ಬ ತಮ್ಮ  ಏಳನೇ ತರಗತಿಯಲ್ಲಿ ಫೇಲ್ ಆಗಿದ್ದಕ್ಕೆ ಖುಷಿ ಪಡುತ್ತಾ ‘ಮುಂದೆ ನನ್ನ ಮಗ ಸಚಿವನಾಗುತ್ತಾನೆ’ ಎಂದು ಚಿತ್ರಿಸಲಾಗಿತ್ತು. ಇದಕ್ಕೆ ಕಾರಣ(ಸ್ಪೂರ್ತಿ!) ಕರ್ನಾಟಕದ ಸಚಿವರ ವಿದ್ಯಾಭ್ಯಾಸ ಏಳನೇ ಅಥವಾ ಹತ್ತನೇ ತರಗತಿ ಸುತ್ತಮುತ್ತಲೇ ಇದ್ದದ್ದು. ಇದಕ್ಕೆ ಹೊಸ ಜೋಕು ಸೇರಿಸಬಹುದು.‘ನನ್ನ ಮಗ ಭೌತಶಾಸ್ತ್ರದಲ್ಲಿ  ಸೊನ್ನೆ ಅಂಕ ಗಳಿಸಿದ್ದಾನೆ. ಮುಂದೆ ವೈದ್ಯನಾಗಬಹುದು ಅನ್ನಿಸುತ್ತೆ’!

ಈ ಮೇಲಿನೆರಡೂ ಹಾಸ್ಯಸ್ಪದವಾದರೂ ನಿರ್ಲಕ್ಷ್ಯ ಮಾಡುವಂತಹದ್ದಲ್ಲ. ರಾಷ್ಟ್ರೀಯ ನೀಟ್ ಪ್ರವೇಶ ಪರೀಕ್ಷೆಯಲ್ಲಿ ಭೌತ ಮತ್ತು ರಸಾಯನ ಶಾಸ್ತ್ರದಲ್ಲಿ ಶೂನ್ಯ  ಆದಿಯಾಗಿ ಋಣ ಸಂಖ್ಯೆ ಗಳಿಸಿದವರೂ ಎಂಬಿಬಿಎಸ್ ಪ್ರವೇಶಕ್ಕೆ ಅರ್ಹತೆ ಗಳಿಸಿರುವುದು ಬಹು ಚರ್ಚಿತ ವಿಷಯ.

ನ್ಯಾಷನಲ್ ಎಲಿಜೆಬಿಲಿಟಿ ಕಮ್ ಎಂಟ್ರೆನ್‌ಸ್ ಟೆಸ್‌ಟ್ (ನೀಟ್)ನ ನ್ಯೂನ್ಯತೆ ಅರಿಯಲು ಪ್ರವೇಶ ಪರೀಕ್ಷೆಗಳ ಇತಿಹಾಸದ ಬಗ್ಗೆ ಕೊಂಚ ತಿಳಿದುಕೊಳ್ಳಲೇಬೇಕು. ಮೊದಲು ಸರಕಾರಿ ವೈದ್ಯ ಕಾಲೇಜುಗಳ ಪ್ರವೇಶಕ್ಕೆ ರಾಜ್ಯಮಟ್ಟದ ಸಾಮಾನ್ಯ ಪ್ರವೇಶ ಪರೀಕ್ಷೆಯಿತ್ತು. ಅದರಲ್ಲಿ  ವೈದ್ಯ ಶಿಕ್ಷಣ ಪ್ರವೇಶಕ್ಕೆ ಕನಿಷ್ಠ 50 ಅಂಕ ಗಳಿಸಬೇಕಾಗಿತ್ತು. ಪದವಿ ಪೂರ್ವ ತರಗತಿಯಲ್ಲಿ ತೆಗೆದ ಅಂಕಗಳೂ ಗಣನೆಗೆ ಬರುತ್ತಿದ್ದವು.

 ವೈದ್ಯ ಕಾಲೇಜುಗಳು ಹುಟ್ಟಿಕೊಂಡ ನಂತರ ಹೊಸ ಸಮಸ್ಯೆಗಳು ಹುಟ್ಟಿಕೊಂಡವು. ಮೊದಮೊದಲು ಬಹುತೇಕ ಸೀಟುಗಳನ್ನು ಸಾಮಾನ್ಯ ಪ್ರವೇಶ ಪರೀಕ್ಷೆಯ ಮೂಲಕವೇ ತುಂಬಿಕೊಳ್ಳುತಿದ್ದ ಖಾಸಗಿ ಕಾಲೇಜುಗಳು, ನಂತರ ತಕರಾರು ತೆಗೆಯಲಾರಂಭಿಸಿದವು. ತಮ್ಮದೇ ಪ್ರವೇಶ ಪದ್ಧತಿಯನ್ನು ಜಾರಿಗೆ ತಂದವು.  ತಮಗೆ ಬೇಕಾದಂತೆ ಪರೀಕ್ಷೆಗಳನ್ನು ಮಾಡಿ, ತಮಗೆ ಬೇಕಾದವರಿಗೆ ವೈದ್ಯ ಕೋರ್ಸ್ ಸೀಟು ಕೊಡಲಾಂಭಿಸಿದವು. ಇದರಿಂದ ವೈದ್ಯ ಶಿಕ್ಷಣದ ವ್ಯಾಪಾರೀಕರಣ ಒಂದೆಡೆಯಾದರೆ, ಒಂದು ಸೀಟು ಗಳಿಸಲು ಹಲವಾರು ಪರೀಕ್ಷೆಗಳನ್ನು  ವಿದ್ಯಾರ್ಥಿಗಳು  ಮತ್ತು ಪೋಷಕರು ಎದುರಿಬೇಕಾಯಿತು.  ಎಲ್ಲ ಸಮಸ್ಯೆಗಳಿಗೆ ಪರಿಹಾರ ಕೊಡಬಹುದು ಎಂಬ ಆಶಯದಿಂದ  ಹುಟ್ಟಿಕೊಂಡ ಪದ್ಧತಿಯೇ ‘ನೀಟ್’.

ರಾಷ್ಟ್ರೀಯ ಪ್ರವೇಶ ಪರೀಕ್ಷೆ ‘ನೀಟ್’ ನಲ್ಲಿ ಮೊದಲಿದ್ದ ಕನಿಷ್ಠ  50 ಪರ್ಸೆಂಟೇಜ್ ಬದಲಾಗಿ ಪರ್ಸೆಂಟೈಲ್ ಪದ್ಧತಿ ತರಲಾಯಿತು. ಪರ್ಸೆಂಟೇಜ್ ಪದ್ಧತಿಯಲ್ಲಿ ಗರಿಷ್ಠ ಅಂಕದ ಆಧಾರದಲ್ಲಿ ಮೆರಿಟ್ ನಿರ್ಧಾರವಾದರೆ, ಪೆರ್ಸೆಂಟೈಲ್ ಪದ್ಧತಿಯಲ್ಲಿ ಇತರ ಎಷ್ಟು ವಿದ್ಯಾಥಿಗಳು ಗಳಿಸಿದ ಅಂಕಗಳ ಆಧಾರದಲ್ಲಿ ಮೆರಿಟ್ ನಿರ್ಧರಿಸಲಾಗುತ್ತದೆ. ಸುಲಭದಲ್ಲಿ ಹೇಳುವುದಾದರೆ  ಪರ್ಸೆಂಟೇಜ್‌ಗೆ ಸ್ಥಿರವಾದ  ಗರಿಷ್ಠ ಅಂಕಗಳೇ ಆಧಾರ, ಪೆರ್ಸೆಂಟೈಲ್ ಎಂದರೆ ತುಲನಾತ್ಮಕ  ಹೋಲಿಕೆಯ ಪದ್ಧತಿ. ಅಂದರೆ 50 ಪೆರ್ಸೆಂಟೇಜ್ ಮತ್ತು 50 ಪರ್ಸೆಂಟೈಲ್ ಒಂದೇ ಅಂಕವನ್ನು ಸೂಚಿಸುವುದಿಲ್ಲ.

 ವೈದ್ಯ ಶಿಕ್ಷಣ ಪ್ರವೇಶಕ್ಕೆ ನೀಟ್ ಪರೀಕ್ಷೆಯಲ್ಲಿ ಕನಿಷ್ಠ 50 ಪರ್ಸೆಂಟೈಲ್ ಗಳಿಸಬೇಕು. ಇದರಿಂದ ಸಾಧಾರಣವಾಗಿ ಶೇಕಡಾ 35ಕಿಂತ ಕಡಿಮೆ ಅಂಕ ಗಳಿಸಿದ ವಿದ್ಯಾಥಿಗಳು ಕೂಡ ಅರ್ಹತೆ ಪಡೆವ ಸಂಭವವಿರುತ್ತದೆ. ನೀಟ್ ಪರೀಕ್ಷೆಯಲ್ಲಿ ಪ್ರತಿ ವಿಷಯವಾರು ಕನಿಷ್ಠ ಅಂಕದ ನಿಯಮವಿಲ್ಲ. ಹೀಗಾಗಿ ಭೌತಶಾಸ್ತ್ರ ಮತ್ತು ರಸಾಯನ ಶಾಸ್ತ್ರದಲ್ಲಿ ಸೊನ್ನೆಗಿಂತಲೂ ಕಡಿಮೆ ಅಂಕ ಗಳಿಸಿದ ವಿದ್ಯಾರ್ಥಿಗಳೂ  ಸೀಟು ಗಳಿಕೆಯ ಅರ್ಹತೆ ಗಳಿಸಿರುವುದು ಕಂಡು ಬಂದಿದ್ದು,  ಇದರ ಜತೆಗೆ ಪದವಿ ಪೂರ್ವ ಶಿಕ್ಷಣದಲ್ಲಿ ಪಡೆದ ಅಂಕಗಳು ಗಣನೆಗೆ ಬಾರದಂತಾದವು.  ಮೊದಲ ಸುತ್ತಿನಲ್ಲಿ 50 ಪರ್ಸೆಂಟೈಲ್ ಕನಿಷ್ಠ ಅಂಕದ ಆಧಾರದಲ್ಲಿ ಸ್ಥಾನಗಳು ತುಂಬಿದಿದ್ದರೆ, ಇನ್ನೂ ಕಡಿಮೆ ಪೆರ್ಸೆಂಟೈಲ್ ಅಂಕವನ್ನು ನಿರ್ಧರಿಸಲಾಗುತ್ತದೆ. ಇದರಿಂದ ಶೇಕಡಾ 25ಕಿಂತ ಕಡಿಮೆ ಅಂಕ ಗಳಿಸಿದವರೂ ಅರ್ಹತೆ ಗಳಿಸುವ ಸಂಭವ ಹೆಚ್ಚಾಗುತ್ತದೆ.

ಇದನ್ನೆಲ್ಲ ಸೂಕ್ಷ್ಮವಾಗಿ ನೋಡಿದರೆ, ನೀಟ್ ಪರೀಕ್ಷೆಯ ಪದ್ಧತಿಯಲ್ಲೇ ಸಮಸ್ಯೆ ಇರುವಂತೆ ತೋರುತ್ತದೆ.  ಹಾಗೆಯೇ  ಸಮಸ್ಯೆ ನೀಟ್ ಮಾತ್ರವಲ್ಲದೇ ಅದಕ್ಕಿಂತಲೂ ಹೆಚ್ಚಿನ ನ್ಯೂನ್ಯತಾ ಪ್ರವೇಶ ಪರೀಕ್ಷೆ ಆಚೆಗೆ ನೆಡೆಯುವ ಪ್ರಕ್ರಿಯೆಗಳವರೆಗೂ ಕಾಣಸಿಗುತ್ತದೆ. 60,000 ವೈದ್ಯ ಶಿಕ್ಷಣ ಸೀಟುಗಳು 80 ಪೆರ್ಸೆಂಟೈಲ್‌ಗಿಂತ ಹೆಚ್ಚು ಅಂಕ ಗಳಿಸಿರುವ ವಿದ್ಯಾರ್ಥಿಗಳಿಗೆ ಮಾತ್ರ ಸಿಗಬೇಕು. ಏಕೆಂದರೆ 80 ಪೆರ್ಸೆಂಟೈಲ್ ಪಡೆದವರು ಎರಡು ಲಕ್ಷಕ್ಕಿಂತಲೂ ಹೆಚ್ಚಿನ ವಿದ್ಯಾರ್ಥಿಗಳಿದ್ದಾರೆ.

 ಆದರೆ ಹೆಚ್ಚು ಅಂಕ ಗಳಿಸಿರುವ ವಿದ್ಯಾರ್ಥಿಗಳಿಗೆ ಖಾಸಗಿ ಕಾಲೇಜುಗಳ ಶಿಕ್ಷಣ ಶುಲ್ಕ  ಕೈಗೆಟುಕದು. ವರ್ಷಕ್ಕೆ ಐದು ಲಕ್ಷದಿಂದ ಇಪ್ಪತೈದು ಲಕ್ಷದವರೆಗೂ ಶಿಕ್ಷಣ ಶುಲ್ಕ  ಖಾಸಗಿ ಕಾಲೇಜುಗಳು, ಬಡ ಮತ್ತು ಮಧ್ಯಮ ವರ್ಗದ ಜನರನ್ನು ಹತ್ತಿರಕ್ಕೆ ಬಾರದಂತೆ ಮಾಡಿವೆ.  ಸರಾಸರಿ ಲೆಕ್ಕದಲ್ಲಿ ಖಾಸಗಿ ವೈದ್ಯ ಕಾಲೇಜುಗಳಲ್ಲಿ ಎಂಬಿಬಿಎಸ್ ಶಿಕ್ಷಣಕ್ಕೆ 50.ಲಕ್ಷ  ಹಣ ಬೇಕೇಬೇಕು. ದುಬಾರಿ ಎಂಬ ಕಾರಣಕ್ಕೆ ಖಾಲಿ ಉಳಿದ ಸೀಟುಗಳು ಅನಾಯಾಸವಾಗಿ ಕಡಿಮೆ ಅಂಕ ಗಳಿಸಿದ ಶ್ರೀಮಂತರ ಮನೆಯ ವಿದ್ಯಾರ್ಥಿಗಳಿಗೆ ಸುಲಭವಾಗಿ ಕೈಗೆಟುಕುತ್ತಿವೆ. ಎಲ್ಲ ವೈದ್ಯ ಸೀಟುಗಳು ತುಂಬುವವರೆಗೂ ಕನಿಷ್ಠ ಅಂಕ ಕಡಿಮೆ ಮಾಡುವುದರಿಂದ ಸೊನ್ನೆ ಅಂಕ ಗಳಿಸಿದವರಿಗೂ ವೈದ್ಯ ಪ್ರವೇಶ ಸಿಗುವ

ಇದನ್ನು ನೀಟ್ ಪರೀಕ್ಷೆಯ ಸೋಲು ಎಂದೇ ಎಲ್ಲೆಡೆ ಬಿಂಬಿಸಲಾದರೂ, ಎಷ್ಟರ ಮಟ್ಟಿಗೆ ಸರಿ ಪರೀಕ್ಷಾ ಪದ್ಧತಿ ಎಂದು ಹೇಳುವುದು ಕಷ್ಟ.  ಏಕೆಂದರೆ ಇದು ಹೊಸ ಸಮಸ್ಯೆಯೇನಲ್ಲ. ನೀಟ್ ಪರೀಕ್ಷೆಯ ಮುಂಚೆ ಯಾರ ಗಮನಕ್ಕೂ ಬಾರದಂತೆ ನಡೆಯುತ್ತಿದ್ದ ವಿಷಯ, ನೀಟ್ ಪರೀಕ್ಷೆಯ ಪ್ರಾರಂಭದಿಂದ ಬಯಲಿಗೆ ಬಂದಿದೆ ಅಷ್ಟೇ.

 ಖಾಸಗಿಯರು ನಡೆಸುತ್ತಿದ್ದ ನೀಟ್ ಪರೀಕ್ಷೆ ಮೊದಲೆಲ್ಲ ಪಾರದರ್ಶಕವಾಗಿರಲಿಲ್ಲ. ಅವರಿಗೆ ಬೇಕಾದಂತೆ ನಡೆಯುತ್ತಿದ್ದ ಪ್ರವೇಶ  ಪ್ರಕ್ರಿಯೆಯಲ್ಲಿ ಪರೀಕ್ಷೆಗೆ ಮೊದಲೇ ಪ್ರಶ್ನೆ ಪತ್ರಿಕೆಗಳನ್ನು ಕೊಟ್ಟಿರುವ,  ಪತ್ರಿಕೆ ತಿದ್ದುವ, ಶ್ರೇಣಿಗಳನ್ನೇ ಬದಲಿಸುವ, ಹರಾಜಿನಲ್ಲಿ ಸೀಟು ಹಂಚಿದ ಉದಾಹರಣೆಗಳೂ ಸಾಮಾನ್ಯವಾಗಿದ್ದವು. ಆಗ ಚಾಪೆಯ ಕೆಳಗೆ, ಕಪ್ಪು ಹಣದ ಮೂಲಕ  ನೆಡೆಯುತ್ತಿದ್ದ ಕೆಲಸಗಳು, ಈಗ ನೀಟ್ ಮೂಲಕ ಎಲ್ಲರ ಕಣ್ಣಿಗೆ ಕಾಣುವಂತೆ ಅನಾಯಾಸವಾಗಿ ನಡೆಯುತ್ತಿದೆ.

ಮೊದಲು ಕಡಿಮೆ ಶಿಕ್ಷಣ ಶುಲ್ಕವನ್ನು ಡೊನೇಷನ್ ಎಂದು ಪಡೆಯುತ್ತಿದ್ದ ಕಾಲೇಜುಗಳು, ಈಗ ದುಬಾರಿ ಶಿಕ್ಷಣ ಶುಲ್ಕ ವಿಧಿಸಿ ಹಣ ವಸೂಲಿ ಮಾಡುತ್ತಿವೆ. ನೀಟ್ ಪರೀಕ್ಷೆಯ ಮೂಲಕ ಸಮಸ್ಯೆಯ ಗಾತ್ರ ಮತ್ತು ಗಂಭೀರತೆ ಲೆಕ್ಕಕ್ಕೆ  ಪರೀಕ್ಷೆಯಿಂದಾದ ಲಾಭವೆಂದರೆ ತಪ್ಪಾಗದು.

ಒಬ್ಬ ಮಧ್ಯಮ ವರ್ಗದ ವಿದ್ಯಾರ್ಥಿ ,ಖಾಸಗಿ ಕಾಲೇಜಿನಲ್ಲಿ ಶಿಕ್ಷಣ ಪಡೆಯಲು ಯೋಚಿಸಿಸದನೆಂದರೆ ಲಾಭ ನಷ್ಟದ ಲೆಕ್ಕಾಚಾರ ಸರಿಯಾಗಿ ಮಾಡಬೇಕು.  ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ ಒಬ್ಬ ವಿದ್ಯಾರ್ಥಿ ಎಮ್‌ಬಿಬಿಎಸ್ ಪದವಿ ಮುಗಿಸಬೇಕಾದರೆ ಸರಾಸರಿ 50 ಲಕ್ಷ ಹಣ ಖರ್ಚು ಮಾಡಬೇಕು.ಈಗಿನ ಕಾಲದಲ್ಲಿ ಎಮ್ ಬಿ ಬಿ ಎಸ್ ಏನೂ ಅಲ್ಲ. ಒಂದು ವೇಳೆ ಅಷ್ಟೇ ಸಾಕು ಎಂದುಕೊಂಡರೆ, ಒಂದು ವೇಳೆ ಬ್ಯಾಂಕಿನಿಂದ ಸಾಲ ಪಡೆದಿದ್ದರೆ, ಎಮ್‌ಬಿಬಿಎಸ್  ಸಿಗುವ ಸರಾಸರಿ ಸಂಬಳ 60,000 ರು, ಬ್ಯಾಂಕಿನ ಇ ಎಮ್ ಐ ತುಂಬಿಸಲು ಮಾತ್ರ ಸಾಕಾಗುತ್ತದೆ.ಇನ್ನು ಜೀವನ ನಿರ್ವಹಣೆಗೆ ಏನು ಮಾಡಬೇಕು?. ಒಂದು ವೇಳೆ ಎಮ್ ಡಿ ಅಥವಾ ಎಮ್ ಎಸ್ ಮಾಡಲು ನಿರ್ಧರಿಸಿದರೆ ,ಮತ್ತು ಒಂದು ಕೋಟಿ ರೂ  ಖರ್ಚು ಮಾಡದೇ ವಿಧಿ ಇಲ್ಲ.ಅಂದರೆ ಸ್ನಾತಕೋತ್ತರ ಪದವಿ ಮುಗಿಸುವ ವೇಳೆಗೆ ,ವಿದ್ಯಾರ್ಥಿಯ  ಮೇಲೆ ತಿಂಗಳಿಗೆ ಒಂದೂವರೆ  ಲಕ್ಷಕ್ಕಿಂತಲೂ ಹೆಚ್ಚಿನ ಇಎಮ್‌ಐ ತುಂಬಿಸುವ ಒತ್ತಡ ನಿರ್ಮಾಣ ವಾಗಿರುತ್ತದೆ. ಇವೆಲ್ಲಾ  ಕೊನೆಗೆ ರೋಗಿಗಳಿಂದಲೇ ಗಳಿಸಬೇಕು. ಇಷ್ಟೊಂದು ಸಾಲದ ಒತ್ತಡದಲ್ಲಿರುವರಿಂದ ಸೇವೆಯನ್ನು ನಿರೀಕ್ಷಿಸುವುದು ಸಾಧ್ಯವಿಲ್ಲ.ಎಲ್ಲ ಲೆಕ್ಕಗಳು  ಕೊನೆಗೆ ದುಬಾರಿ ವೈದ್ಯಕೀಯ ವೆಚ್ಚದಲ್ಲಿ  ಕೊನೆಗೊಳ್ಳುತ್ತವೆ.

ಈ ಎಲ್ಲ ತಪ್ಪುಗಳನ್ನು ಖಾಸಗಿ ಕಾಲೇಜುಗಳದ್ದು ಎಂದು ದೂರುವಂತೆಯೂ ಇಲ್ಲ. ಹೊಸ ಕಾಲೇಜು ಆರಂಭಿಸಲು ಇರುವ ನಿಯಮಾವಳಿಗಳು, ಮೂಲಸೌಕರ್ಯಗಳು , ಸಂಬಳ, ಕಾಲೇಜು ನಿರ್ವಹಣಾ ವೆಚ್ಚ ಗಣನೀಯವಾಗಿ ಹೆಚ್ಚಿವೆ. ಸಂಸ್ಥೆಯ ಹಣ ಖರ್ಚುಮಾಡಿ ಕಡಿಮೆ ದರದಲ್ಲಿ ಶಿಕ್ಷಣ ನೀಡುವ ಸಲಹೆ ಆಚರಿಸಲಾಗದ ಕೆಲಸ. ನೂರಾರು ಕೋಟಿ ರೂಪಾಯಿ  ಹೂಡಿದವರು ಕೋಟಿಗಳಲ್ಲೇ ಲಾಭ ನಿರೀಕ್ಷಿಸುವದು ಸ್ವಾಭಾವಿಕ.  ಹಾಗಾಗಿ ಈ ಸಮಸ್ಯೆಗೆ ಹೆಚ್ಚಿನ ಸರಕಾರಿ ಕಾಲೇಜುಗಳನ್ನು ಆರಂಭಿಸುವುದೇ ವ್ಯವಹಾರಿಕವಾಗಿ ಪರಿಹಾರವೆನ್ನಬಹುದು.

ದುಬಾರಿ ಶಿಕ್ಷಣ ವೆಚ್ಚದ ಕಾರಣ ಪ್ರತಿಭಾವಂತ ಮಕ್ಕಳು ದೂರವುಳಿದು, ಕಡಿಮೆ ಅಂಕ ಗಳಿಸಿದ ಶ್ರೀಮಂತ ವಿದ್ಯಾರ್ಥಿಗಳೇ ಅವಕಾಶ ಪಡೆದರೆ, ವೈದ್ಯ ಶಿಕ್ಷಣದ ಗುಣಮಟ್ಟ ಕುಸಿಯುವುದರಲ್ಲಿ ಅನುಮಾನವಿಲ್ಲ. ಯಾವುದೇ ದೇಶ ಅಥವಾ ಸಂಸ್ಥೆಯನ್ನು ನಾಶ ಮಾಡಲು ನಿಮಗೆ ಕ್ಷಿಪಣಿ, ಅಟಾಮಿಕ್ ಬಾಂಬುಗಳು ಅಥವಾ ಸೈನ್ಯದ ಅವಶ್ಯವಿಲ್ಲ. ಬದಲಾಗಿ ಶಿಕ್ಷಣದ ಗುಣಮಟ್ಟ  ಮಾಡಿದರೂ ಸಾಕು.

ಕಳಪೆ ಎಂಜಿನಿಯರ್‌ಗಳಿಂದ ನಿರ್ಮಾಣವಾದ ಕಟ್ಟಡಗಳು, ಸೇತುವೆಗಳು ತಾವೇ ಬಿದ್ದು ಹೋಗುತ್ತವೆ. ಕಳಪೆ ಹಣಕಾಸು ತಜ್ಞರು, ಅಧಿಕಾರಿಗಳು ದೇಶದ ಆರ್ಥಿಕ ವ್ಯವಸ್ಥೆಯೇ ಬಿದ್ದು ಹೋಗುವಂತೆ ಮಾಡುತ್ತಾರೆ. ಮಾನವೀಯತೆಯನ್ನು ಸಂಕುಚಿತ ಮತಾಂಧರು ಹಾಳು ಮಾಡುತ್ತಾರೆ. ಭ್ರಷ್ಟ ರಾಜಕಾರಣಿಗಳು ಆಡಳಿದ ಯಂತ್ರ ಕುಸಿಯುವಂತೆ ಮಾಡುತ್ತಾರೆ. ಹಾಗೆಯೇ ಕಳಪೆ ವೈದ್ಯರು ಹೆಚ್ಚಾದರೆ ಸಮಾಜದ ಪರಿಸ್ಥಿತಿ ಏನಾಗಬಹುದು ಎಂದು ಯೋಚಿಸಲೇಬೇಕು.

ಹೃದಯದ ಸ್ಟೆಂಟ್‌ಗಳ ಗರಿಷ್ಠ ಬೆಲೆ ನಿಗದಿ ಪಡಿಸಿ, ಜನೌಷಧಿ ಕೇಂದ್ರ ಸ್ಥಾಪಿಸಿ,  ವೆಚ್ಚ ಕಡಿಮೆ ಮಾಡಲು ಗಂಭೀರ ಪ್ರಯತ್ನಮಾಡುತ್ತಿರುವ ಕೇಂದ್ರ ಸರಕಾರ,  ವೈದ್ಯ ಶಿಕ್ಷಣದ ಸಮಸ್ಯೆಯ ಮೂಲದತ್ತಲೂ ಗಮನ ಹರಿಸಬೇಕಿದೆ.ಕೋಟ್ಯಂತರ ಹಣ ಖರ್ಚು ಮಾಡಿ ವೈದ್ಯರಾಗುವರಿಗೆ, ಅದನ್ನು ಮರಳಿ ಆ ಹಣ ಪಡೆಯುವ ಒತ್ತಡ ಸಹಜವಾಗಿ ಸೃಷ್ಟಿಯಾಗುತ್ತದೆ. ಇದು ಕೊನೆಗೆ ಪರಿವರ್ತನೆಯಾಗುವುದು ದುಬಾರಿ ಚಿಕಿತ್ಸಾ ದರದಲ್ಲಿ.

ಈ ಸಂದರ್ಭದಲ್ಲಿ ಚುನಾವಣಾಧಿಕಾರಿ ಶೇಷನ್ ಅವರು ನೆನಪಾಗುತ್ತಾರೆ. ಕೋಟ್ಯಂತರ ಖರ್ಚು ಮಾಡಿ ಚುನಾವಣೆ ಎದುರಿಸುವ ರಾಜಕಾರಣಿಗಳಿಗೆ, ಅದನ್ನು ಮರಳಿ ಪಡೆಯುವ ಒತ್ತಡ ಸಹಜವಾಗಿ ಬರುತ್ತದೆ.  ರಾಜಕಾರಣಕ್ಕೆ ಮೂಲವೇ ‘ದುಬಾರಿ’ ಚುನಾವಣೆಗಳು. ಇದನ್ನು ಮನಗಂಡ ಅವರು ಚುನಾವಣಾ ವೆಚ್ಚ ತಗ್ಗಿಸುವತ್ತ ಹೆಜ್ಜೆ ಇಟ್ಟಿದ್ದರು. ಹಾಗೆಯೇ ವೈದ್ಯ ಶಿಕ್ಷಣದ ಶುಲ್ಕಕ್ಕೆ ಕೊಂಚ ಮಿತಿ ಹಾಕಿದರೆ, ಸರಕಾರಿ ವೈದ್ಯ ಕಾಲೇಜುಗಳನ್ನು ಆರಂಭಿಸಿದರೆ ಕಾಲಾಂತರದಲ್ಲಿ ವೈದ್ಯ ವೆಚ್ಚವನ್ನು ತಗ್ಗಿಸುವುದರಲ್ಲಿ ಅನುಮಾನವಿಲ್ಲ.  ವೈದ್ಯ ಶಿಕ್ಷಣವು ಮಧ್ಯಮ ಮತ್ತು ಬಡ ವಿದ್ಯಾರ್ಥಿಗಳ ಕೈಗೆಟುವಂತಾದರೆ, ಪ್ರತಿಭಾವಂತರಿಗೆ ನೀಟ್ ಮೂಲಕ ಪ್ರವೇಶ ಪಡೆಯುವ ಅವಕಾಶ ಹೆಚ್ಚಾಗಿ, ಶಿಕ್ಷಣದ ಗುಣಮಟ್ಟವೂ ಹೆಚ್ಚುವುದರ ಜೊತೆಗೆ ಜನರಿಗೆ ಕಡಿಮೆ ದರದಲ್ಲಿ  ಚಿಕಿತ್ಸೆಯೂ ಸಿಗಬಹುದು.

Tags

Related Articles

Leave a Reply

Your email address will not be published. Required fields are marked *

Language
Close