About Us Advertise with us Be a Reporter E-Paper

ಅಂಕಣಗಳು

ನೀರು ನಿಲ್ಲಿಸುವ ಬೆದರಿಕೆ

ಸಂಪಾದಕೀಯ

ಪಾಕಿಸ್ತಾನ ಕೃಪಾಪೋಷಿತ ಭಯೋತ್ಪಾದನೆಯ ಹೊಸ ಮಜಲನ್ನು ತೆರೆದಿಟ್ಟ ಪುಲ್ವಾಮಾ ಘಟನೆಗೆ ವಿವಿಧ ರೀತಿಯ ಪ್ರತಿಕ್ರಿಯೆಗಳು ಬರುತ್ತಲಿವೆ, ಬಂದಿವೆ. 40ಕ್ಕೂ ಹೆಚ್ಚಿನ ರಕ್ಷಣಾ ಸಿಬ್ಬಂದಿಯನ್ನು ಬಲಿ ತೆಗೆದುಕೊಂಡ ಆ ಬಾಂಬ್ ದಾಳಿಯ ರೂವಾರಿಗಳು ಪಾಕಿಸ್ತಾನ ಮೂಲದವರು ಎಂದು ಖಚಿತವಾದ ನಂತರ, ಅವರನ್ನು ಹಣಿಯಲು ಹಲವು ಕ್ರಮಗಳನ್ನು ತೆಗೆದುಕೊಳ್ಳಲು ಕೇಂದ್ರಸರಕಾರ ಮುಂದಾಗಿದೆ. ಬಸ್ ಸಂಚಾರ ಸ್ಥಗಿತ, ಪಾಕ್‍‍‍‍ನಿಂದ ಆಮದು ಮಾಡುವ ವಸ್ತುಗಳಿಗೆ ಶೇಕಡ 200 ಸುಂಕ ಮೊದಲಾದ ಕ್ರಮಗಳ ಜೊತೆಯಲ್ಲಿ, ಪಾಕಿಸ್ತಾನಕ್ಕೆ ಹರಿಯುತ್ತಿರುವ ನದಿ ನೀರನ್ನು ನಿಲ್ಲಿಸಲಾಗುವುದು ಎಂಬರ್ಥದ ಬೆದರಿಕೆಯ ಮಾತುಗಳನ್ನು ಸಹ ಹೇಳಲಾಗಿದೆ.

ಕೇಂದ್ರ ಸಚಿವರಾದ ನಿತಿನ್ ಗಡ್ಕರಿಯವರು ‘ರಾವಿ, ಬಿಯಾಸ್ ಮತ್ತು ಸಟ್ಲೆಜ್ ನದಿಗಳ ನೀರನ್ನು ಸಂಪೂರ್ಣವಾಗಿ ಬಳಸಿಕೊಂಡು ಜಮ್ಮು ಮತ್ತು ಕಾಶ್ಮೀರ ಮತ್ತು ಪಂಜಾಬಿನ ಜನರಿಗೆ ಸರಬರಾಜು ಮಾಡಲಾಗುವುದು. ನಮ್ಮ ಪಾಲಿನ ನೀರನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಲು ಅಗತ್ಯ ಎನಿಸಿರುವ ಅಣೆಕಟ್ಟುಗಳ ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ’ ಎಂದು ಹೇಳಿದ್ದಾರೆ. ಗಮನ ಸೆಳೆಯುವ ವಿಚಾರವೆಂದರೆ 2016ರ ಉರಿ ಸೇನಾ ಶಿಬಿರದ ದಾಳಿ ನಡೆದ ಕೂಡಲೇ, ಈ ರೀತಿಯ ನಿರ್ಣಯವನ್ನು ತೆಗೆದುಕೊಳ್ಳಲಾಗಿತ್ತು. ಸಿಂಧೂ ನದಿಕೊಳ್ಳದ ನದಿಗಳ ನಮ್ಮ ಪಾಲಿನ ನೀರನ್ನು ಪೂರ್ಣವಾಗಿ ಬಳಸಿಕೊಳ್ಳುವ ಮೂಲಕ ಪಾಕಿಸ್ತಾನಕ್ಕೆ ವ್ಯರ್ಥವಾಗಿ ಹರಿದು ಹೋಗುತ್ತಿರುವ ನೀರನ್ನು ಬಳಸಿಕೊಳ್ಳಲು ಯಾರೂ ಬೇಡವೆನ್ನುವಂತಿಲ್ಲ.

ಇದೇ ನದಿ ಪಾತ್ರದ ಪಶ್ಚಿಮದ ನದಿಗಳಾದ ಸಿಂಧೂ, ಜೀಲಂ ಮತ್ತು ಜೇನಬ್‍ನ ನೀರನ್ನು ಪಾಕಿಸ್ತಾನಕ್ಕೆ ಹರಿಸಬೇಕು ಎಂಬ ಒಪ್ಪಂದಕ್ಕೆ 1960 ರಲ್ಲೇ ಭಾರತ ಮತ್ತು ಪಾಕಿಸ್ತಾನ ಸಹಿ ಹಾಕಿದ್ದವು. ಪೂರ್ವದ ಮೂರು ನದಿಗಳ ನೀರನ್ನು ಸಂಪೂರ್ಣವಾಗಿ ಬಳಸಿಕೊಳ್ಳುವ ಅವಕಾಶ ಭಾರತಕ್ಕೆ ಇದೆ. ಈ ಅವಕಾಶವನ್ನು ಈಗ ಕೇಂದ್ರ ಸಚಿವರು ಪುನರುಚ್ಚರಿಸುವ ಮೂಲಕ, ಪಾಕಿಸ್ತಾನಕ್ಕೆ ಅಷ್ಟರಮಟ್ಟಿಗೆ ನಷ್ಟವನ್ನು ಉಂಟುಮಾಡುವ ಇಂಗಿತ ಸೂಚಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆಯಾಗಿ ಪಾಕಿಸ್ತಾನವು ‘ಪೂರ್ವದ ನದಿಗಳಾದ ರಾವಿ, ಬಿಯಾ ಮತ್ತು ಸಟ್ಲೆಜ್ ನೀರನ್ನು ಭಾರತ ಉಪಯೋಗಿಸಿಕೊಂಡರೆ ನಮ್ಮ ಅಭ್ಯಂತರವಿಲ್ಲ. ನದಿ ನೀರಿನ ಒಪ್ಪಂದದಲ್ಲಿ ಅದಕ್ಕೆ ಅವಕಾಶವಿದೆ. ಇದರಲ್ಲಿ ಹೊಸತೇನಿದೆ’ ಎಂಬರ್ಥದ ಮಾತುಗಳನ್ನು ಹೇಳಿದೆ.

ಪೂರ್ವದ ನದಿಗಳ ನೀರನ್ನು ಸಂಪೂರ್ಣವಾಗಿ ಬಳಸುತ್ತೇವೆ ಎಂಬ ನಮ್ಮ ದೇಶದ ಬೆದರಿಕೆ ಮತ್ತು ಅದಕ್ಕೆ ಪಾಕಿಸ್ತಾನದ ನೀರಸ ಪ್ರತಿಕ್ರಿಯೆಯನ್ನು ಕಂಡಾಗ, 1960ರಿಂದಲೇ ಜಾರಿಯಲ್ಲಿದ್ದ ಒಪ್ಪಂದದಂತೆ ಮೂರು ನದಿಗಳ ನೀರನ್ನು ಪೂರ್ತಿಯಾಗಿ ಉಪಯೋಗಿಸಿಕೊಳ್ಳಲು ಇಷ್ಟು ವಿಳಂಬ ಏಕಾಯಿತು ಎಂಬ ಪ್ರಶ್ನೆ ಏಳುತ್ತದೆ. 1960ರಿಂದಲೇ ಆ ನೀರನ್ನು ಸಂಗ್ರಹಿಸುವ ಯತ್ನ ನಡೆದು, ಭಾರತದ ಜನರಿಗೆ, ಭೂಮಿಗಳಿಗೆ ನೀಡಲು ನಿರ್ಲಕ್ಷ್ಯ ಮಾಡಿದವರು ಯಾರು ಮತ್ತು ಏಕೆ? ದೇಶವನ್ನು ಬಹು ಕಾಲ ಆಡಳಿತ ನಡೆಸಿದ ಪಕ್ಷವು ಈ ಪ್ರಶ್ನೆೆಗೆ ಉತ್ತರಿಸಿದರೆ, ಈ ಕಾಲಘಟ್ಟದಲ್ಲಿ ಸಮಂಜಸ ಎನಿಸೀತು.

Tags

Related Articles

Leave a Reply

Your email address will not be published. Required fields are marked *

Language
Close