ಕರ್ನಾಟಕದ ಆಗಸದಲ್ಲಿ ‘ಆತ್ಮನಿರ್ಭರ’ ಕ್ರಾಂತಿ: ಟಾಟಾ-ಏರ್‌ಬಸ್ ಸಹಯೋಗದಲ್ಲಿ ‘ಮೇಡ್ ಇನ್ ಇಂಡಿಯಾ’ H125 ಹೆಲಿಕಾಪ್ಟರ್ ನಿರ್ಮಾಣ

ಬೆಂಗಳೂರು: ಭಾರತದ ವೈಮಾನಿಕ ಉತ್ಪಾದನಾ ಕ್ಷೇತ್ರದಲ್ಲಿ ಹೊಸ ಶಕೆ ಆರಂಭವಾಗಿದ್ದು, ಜಾಗತಿಕ ವಾಯುಯಾನ ದೈತ್ಯ ಏರ್‌ಬಸ್ ಮತ್ತು ಭಾರತದ ಪ್ರತಿಷ್ಠಿತ ಟಾಟಾ ಸಮೂಹದ ಅಂಗಸಂಸ್ಥೆಯಾದ ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (TASL) ಸಹಯೋಗದಲ್ಲಿ, ದೇಶದ ಪ್ರಥಮ ಖಾಸಗಿ ವಲಯದ ಹೆಲಿಕಾಪ್ಟರ್ ಅಂತಿಮ ಜೋಡಣಾ ಘಟಕವು ಕರ್ನಾಟಕದ ಕೋಲಾರ ಜಿಲ್ಲೆಯ ವೇಮಗಲ್ ಕೈಗಾರಿಕಾ ಪ್ರದೇಶದಲ್ಲಿ ಸ್ಥಾಪನೆಯಾಗಲಿದೆ. ಈ ಮಹತ್ವಾಕಾಂಕ್ಷಿ ಯೋಜನೆ ಯು ‘ಆತ್ಮನಿರ್ಭರ ಭಾರತ’ ಮತ್ತು ‘ಮೇಡ್ ಇನ್ ಇಂಡಿಯಾ’ ಪರಿಕಲ್ಪನೆಗಳಿಗೆ ಗಣನೀಯ ಶಕ್ತಿ ತುಂಬಲಿದೆ.

ಈ ಅತ್ಯಾಧುನಿಕ ಘಟಕದಲ್ಲಿ, ವಿಶ್ವದಾದ್ಯಂತ ಅಧಿಕ ಬೇಡಿಕೆ ಮತ್ತು ಮಾರಾಟವನ್ನು ಹೊಂದಿ ರುವ ಏರ್‌ಬಸ್‌ನ H125 ಹೆಲಿಕಾಪ್ಟರ್‌ಗಳನ್ನು ನಿರ್ಮಿಸಲಾಗುವುದು. ಈ ಮಹತ್ವದ ಒಪ್ಪಂದವು ಭಾರತವನ್ನು ಕೇವಲ ಹೆಲಿಕಾಪ್ಟರ್ ಬಳಕೆದಾರನ ಸ್ಥಾನದಿಂದ ಉತ್ಪಾದಕನ ಸ್ಥಾನಕ್ಕೆ ಏರಿಸಲಿದ್ದು, ದಕ್ಷಿಣ ಏಷ್ಯಾದ ವೈಮಾನಿಕ ಮಾರುಕಟ್ಟೆಯಲ್ಲಿ ಹೊಸ ಅವಕಾಶಗಳ ಬಾಗಿಲನ್ನು ತೆರೆಯಲಿದೆ. ಮೊದಲ 'ಮೇಡ್ ಇನ್ ಇಂಡಿಯಾ' H125 ಹೆಲಿಕಾಪ್ಟರ್ 2027ರ ಆರಂಭದಲ್ಲಿ ಆಗಸಕ್ಕೆ ಹಾರುವ ನಿರೀಕ್ಷೆಯಿದೆ.

ಇದನ್ನೂ ಓದಿ: Bangalore News: ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ ವತಿಯಿಂದ ಗ್ರಾಹಕರಿಗಾಗಿ "ಕ್ವಿಕ್‌ ಇಂಡಿಯಾ ಮೂವ್‌ಮೆಂಟ್‌ ಘೋಷಣೆ

ನಾಗರಿಕ ಮತ್ತು ರಕ್ಷಣಾ ಕ್ಷೇತ್ರಕ್ಕೆ ಬಲ 

ಈ ಘಟಕದಲ್ಲಿ ನಿರ್ಮಾಣವಾಗುವ H125 ಹೆಲಿಕಾಪ್ಟರ್‌ಗಳು ಕೇವಲ ನಾಗರಿಕ ಬಳಕೆಗೆ ಸೀಮಿತ ವಾಗಿಲ್ಲ. ತುರ್ತು ವೈದ್ಯಕೀಯ ಸೇವೆ (ಏರ್ ಆಂಬುಲೆನ್ಸ್), ವಿಪತ್ತು ನಿರ್ವಹಣೆ, ಪ್ರವಾಸೋದ್ಯಮ ಮತ್ತು ಕಾನೂನು ಪಾಲನೆಯಂತಹ ಕ್ಷೇತ್ರಗಳಲ್ಲಿ ಇವು ನಿರ್ಣಾಯಕ ಪಾತ್ರ ವಹಿಸಲಿವೆ. ವಿಶೇಷ ವಾಗಿ, ಭಾರತೀಯ ಸಶಸ್ತ್ರ ಪಡೆಗಳ ಅಗತ್ಯಗಳನ್ನು ಪೂರೈಸಲು, ಹಿಮಾಲಯದಂತಹ ಅತಿ ಎತ್ತರದ ಮತ್ತು ಕಠಿಣ ಪರಿಸರದಲ್ಲಿ ಕಾರ್ಯಾಚರಿಸಬಲ್ಲ H125M ಎಂಬ ಸೇನಾ ಆವೃತ್ತಿಯನ್ನೂ ಸಹ ಇಲ್ಲಿಯೇ ತಯಾರಿಸಲಾಗುವುದು. ಇದು ಭಾರತದ ಹಳೆಯ 'ಚೀತಾ' ಮತ್ತು 'ಚೇತಕ್' ಹೆಲಿಕಾಪ್ಟರ್‌ ಗಳಿಗೆ ಸೂಕ್ತ ಉತ್ತರಾಧಿಕಾರಿಯಾಗಲಿದೆ.

"ರಾಷ್ಟ್ರ ನಿರ್ಮಾಣದ ಅವಿಭಾಜ್ಯ ಅಂಗ"
ಈ ಸಹಯೋಗದ ಬಗ್ಗೆ ಮಾತನಾಡಿದ ಏರ್‌ಬಸ್ ಇಂಡಿಯಾ ಮತ್ತು ದಕ್ಷಿಣ ಏಷ್ಯಾದ ಅಧ್ಯಕ್ಷ ಜುರ್ಗೆನ್ ವೆಸ್ಟ್‌ಮಿಯರ್, "ಭಾರತವು ಹೆಲಿಕಾಪ್ಟರ್‌ಗಳ ಬಳಕೆಗೆ ಅತ್ಯಂತ ಸೂಕ್ತವಾದ ದೇಶ. 'ಮೇಡ್ ಇನ್ ಇಂಡಿಯಾ' ಹೆಲಿಕಾಪ್ಟರ್ ಈ ಮಾರುಕಟ್ಟೆಯನ್ನು ವಿಸ್ತರಿಸುವುದಲ್ಲದೆ, ರಾಷ್ಟ್ರ ನಿರ್ಮಾಣದ ಅವಿಭಾಜ್ಯ ಅಂಗವಾಗಿ ರೂಪುಗೊಳ್ಳಲಿದೆ. ನಮ್ಮ ವಿಶ್ವಾಸಾರ್ಹ ಪಾಲುದಾರರಾದ ಟಾಟಾ ಅವರೊಂದಿಗೆ ಈ ಹೊಸ ಅಧ್ಯಾಯವನ್ನು ಆರಂಭಿಸಲು ನಮಗೆ ಅತೀವ ಸಂತಸವಿದೆ," ಎಂದು ಹೇಳಿದರು.
ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್‌ನ ಸಿಇಒ ಸುಕರನ್ ಸಿಂಗ್, "ಹೆಲಿಕಾಪ್ಟರ್‌ಗಳನ್ನು ನಿರ್ಮಿಸುವ ಭಾರತದ ಪ್ರಪ್ರಥಮ ಖಾಸಗಿ ಕಂಪನಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವುದು ನಮಗೆ ಹೆಮ್ಮೆಯ ವಿಷಯ. ಇದು ದೇಶದ ನಾಗರಿಕ ಮತ್ತು ರಕ್ಷಣಾ ಅಗತ್ಯಗಳನ್ನು ಪೂರೈಸಲಿದೆ. ಏರ್‌ಬಸ್‌ನೊಂದಿಗೆ ಇದು ನಮ್ಮ ಎರಡನೇ ಜೋಡಣಾ ಘಟಕವಾಗಿದ್ದು, ನಮ್ಮ ಬಾಂಧವ್ಯವನ್ನು ಮತ್ತಷ್ಟು ದೃಢಪಡಿಸಿದೆ," ಎಂದರು.

H125 ಹೆಲಿಕಾಪ್ಟರ್‌ನ ಅನನ್ಯತೆ
H125, ಏರ್‌ಬಸ್‌ನ 'ಎಕ್ಯುರಿಯಲ್' (Ecureuil) ಕುಟುಂಬಕ್ಕೆ ಸೇರಿದ, ಜಗತ್ತಿನಾದ್ಯಂತ 4 ಕೋಟಿಗೂ ಹೆಚ್ಚು ಗಂಟೆಗಳ ಕಾಲ ಹಾರಾಟ ನಡೆಸಿರುವ ದಾಖಲೆ ಹೊಂದಿರುವ ಅತ್ಯಂತ ಯಶಸ್ವಿ ಹೆಲಿಕಾಪ್ಟರ್ ಆಗಿದೆ. ಇದು ಒಂದೇ ಎಂಜಿನ್ ಹೊಂದಿರುವ, ಬಹುಮುಖ ಬಳಕೆಯ ಹೆಲಿಕಾಪ್ಟರ್ ಆಗಿದ್ದು, ಅತಿ ಎತ್ತರದ ಮತ್ತು ಉಷ್ಣ ವಾತಾವರಣದಂತಹ ಕಠಿಣ ಪರಿಸರದಲ್ಲಿಯೂ ಕಾರ್ಯ ನಿರ್ವಹಿಸುವ ಅಪ್ರತಿಮ ಸಾಮರ್ಥ್ಯ ಹೊಂದಿದೆ. ಮೌಂಟ್ ಎವರೆಸ್ಟ್ ಶಿಖರದ ಮೇಲೆ ಯಶಸ್ವಿ ಯಾಗಿ ಇಳಿದ ಏಕೈಕ ಹೆಲಿಕಾಪ್ಟರ್ ಎಂಬ ಹೆಗ್ಗಳಿಕೆಯು ಇದರ ಕಾರ್ಯಕ್ಷಮತೆಗೆ ಸಾಕ್ಷಿಯಾಗಿದೆ.

ಗುಜರಾತ್‌ನ ವಡೋದರಾದಲ್ಲಿ C295 ಸೇನಾ ಸಾರಿಗೆ ವಿಮಾನಗಳ ತಯಾರಿಕಾ ಘಟಕದ ನಂತರ, ಭಾರತದಲ್ಲಿ ಟಾಟಾ ಸ್ಥಾಪಿಸುತ್ತಿರುವ ಏರ್‌ಬಸ್‌ನ ಎರಡನೇ ಬೃಹತ್ ಜೋಡಣಾ ಘಟಕ ಇದಾಗಿದೆ. ಈ ಯೋಜನೆಯು ಕರ್ನಾಟಕವನ್ನು ಜಾಗತಿಕ ವೈಮಾನಿಕ ಉತ್ಪಾದನಾ ಭೂಪಟದಲ್ಲಿ ಮತ್ತಷ್ಟು ಎತ್ತರಕ್ಕೇರಿಸಲಿದೆ.