Pralhad Joshi: ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಸಂಶೋಧನೆ, ನಾವೀನ್ಯತೆ; 1.27 ಲಕ್ಷ ಕೋಟಿ ಯೋಜನೆಗೆ ಕೇಂದ್ರ ಅಸ್ತು
Pralhad Joshi: ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಸಂಶೋಧನಾ ಅಭಿವೃದ್ಧಿ ಮತ್ತು ನಾವೀನ್ಯತೆ (RDI) ಗಾಗಿ ₹1.27 ಲಕ್ಷ ಕೋಟಿ ಬಜೆಟ್‌ನ ಯೋಜನೆಗೆ ಕೇಂದ್ರ ಸರ್ಕಾರ ಅನುಮೋದನೆ ನೀಡಿದೆ ಎಂದು ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವ ಪ್ರಲ್ಹಾದ್ ಜೋಶಿ ತಿಳಿಸಿದ್ದಾರೆ. ಈ ಕುರಿತ ವಿವರ ಇಲ್ಲಿದೆ.
Siddalinga Swamy
Jul 15, 2025 9:43 PM
ನವದೆಹಲಿ: ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಸಂಶೋಧನಾ ಅಭಿವೃದ್ಧಿ ಮತ್ತು ನಾವೀನ್ಯತೆ (RDI) ಗಾಗಿ ₹1.27 ಲಕ್ಷ ಕೋಟಿ ಬಜೆಟ್‌ನ ಯೋಜನೆಗೆ ಕೇಂದ್ರ ಸರ್ಕಾರ ಅನುಮೋದನೆ ನೀಡಿದೆ ಎಂದು ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವ ಪ್ರಲ್ಹಾದ್ ಜೋಶಿ (Pralhad Joshi) ಹೇಳಿದರು. ಮುಂಬೈನ IIT ಯಲ್ಲಿರುವ ರಾಷ್ಟ್ರೀಯ ಫೋಟೊವೋಲ್ಟಾಯಿಕ್ ಸಂಶೋಧನೆ ಮತ್ತು ಶಿಕ್ಷಣ ಕೇಂದ್ರ (NCPRE)ಕ್ಕೆ ಇಂದು ಭೇಟಿ ನೀಡಿ ಇದರ ಸಲಹಾ ಮಂಡಳಿ ಸದಸ್ಯರೊಂದಿಗೆ ಸಭೆ ನಡೆಸಿ ಈ ಬಗ್ಗೆ ಮಾಹಿತಿ ನೀಡಿದರು.
ಕೇಂದ್ರ ಸಚಿವ ಸಂಪುಟ ಎರಡು ವಾರಗಳ ಹಿಂದೆಯಷ್ಟೇ ಸಂಶೋಧನಾ ಅಭಿವೃದ್ಧಿ ಮತ್ತು ನಾವೀನ್ಯತೆ (RDI) ಯೋಜನೆಯನ್ನು ಅನುಮೋದಿಸಿದೆ. ಅಂತೆಯೇ ಸಂಶೋಧನೆ ಮತ್ತು ಅಭಿವೃದ್ಧಿಗಾಗಿ ಒಟ್ಟು ₹1.27 ಲಕ್ಷ ಕೋಟಿ ಅನುದಾನ ಒದಗಿಸಿದೆ. ಭಾರತ ಶುದ್ಧ ಇಂಧನಕ್ಕಾಗಿ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಅಳವಡಿಸಲು ಬದ್ಧವಾಗಿದೆ ಎಂದರು.
ಭಾರತ ನವೀಕರಿಸಬಹುದಾದ ಇಂಧನ ಶಕ್ತಿಯನ್ನು ಅಳವಡಿಸಿಕೊಳ್ಳುವ ಜತೆಗೆ ಹೊಸ ಹೊಸ ತಂತ್ರಜ್ಞಾನಗಳ ಅಭಿವೃದ್ಧಿ ಮತ್ತು ಸಂಶೋಧನೆಗೆ ಉತ್ತೇಜನ ನೀಡುತ್ತಿದೆ. ಇದರ ಪ್ರತಿಫಲವಾಗಿ ಬಾಂಬೆ ಐಐಟಿಯು ಇಂಧನ ಪರಿವರ್ತನೆಯಲ್ಲಿ ಹೆಚ್ಚಿನ ದಕ್ಷತೆ ಪ್ರದರ್ಶಿಸುವ 2 ಟರ್ಮಿನಲ್‌ ಮೊನೊಲಿಥಿಕ್ ಸಿಲಿಕಾನ್/CdTe-ಪೆರೋವ್‌ಸ್ಕೈಟ್ ಟ್ಯಾಂಡೆಮ್ ಸೌರ ಕೋಶವನ್ನು ಅಭಿವೃದ್ಧಿಪಡಿಸಿದೆ. ಇದು ದೇಶದ ಅತ್ಯುನ್ನತ ಕಾರ್ಯಕ್ಷಮತೆ ಉಳ್ಳದ್ದಾಗಿದೆ ಎಂದು ತಿಳಿಸಿದರು.
ಹೆಚ್ಚಿನ ದಕ್ಷತೆ ಮತ್ತು ಕಡಿಮೆ ಬೆಲೆಯ ಸಿಲಿಕಾನ್-ಪೆರೋವ್‌ಸ್ಕೈಟ್ ಟಂಡೆಮ್ ಸೌರ ಕೋಶಗಳನ್ನು ಅಭಿವೃದ್ಧಿಪಡಿಸುವ ಮೂಲಕ ಬಾಂಬೆ IITಯ NCPRE ಭವಿಷ್ಯದಲ್ಲಿ ಭಾರತದ ಸೌರಶಕ್ತಿ ದಿಕ್ಕನ್ನೇ ಬದಲಾಯಿಸಲಿದೆ. ಸೌರಶಕ್ತಿ ಕಾರ್ಯಾಚರಣೆಗೆ ಸಂಶೋಧನೆ, ಅಭಿವೃದ್ಧಿ ಮತ್ತು ಶಿಕ್ಷಣ ಬೆಂಬಲ ನೀಡುತ್ತಿದೆ ಎಂದು ಹೇಳಿದರು.
ಬಾಂಬೆ ಐಐಟಿಗೆ ₹ 200 ಕೋಟಿ ನೆರವು
ಕೇಂದ್ರ ಸರ್ಕಾರ 2010ರಲ್ಲೇ ಬಾಂಬೆ IITಯಲ್ಲಿ NCPRE ಆರಂಭಿಸಿದ್ದು, ದೇಶದ ಮಹತ್ವಾಕಾಂಕ್ಷೆಯ 100 GW ಸೌರಶಕ್ತಿ ಕಾರ್ಯಾಚರಣೆಗೆ ಸಂಶೋಧನೆ, ಅಭಿವೃದ್ಧಿ ಮತ್ತು ಶಿಕ್ಷಣಕ್ಕೆ ಬೆಂಬಲ ನೀಡುವುದು ಇದರ ಮುಖ್ಯ ಉದ್ದೇಶ. ಇದಕ್ಕಾಗಿ ನವೀಕರಿಸಬಹುದಾದ ಇಂಧನ ಇಲಾಖೆ ಕಳೆದ 15 ವರ್ಷಗಳಲ್ಲಿ NCPRE, IIT ಬಾಂಬೆಗೆ ₹200 ಕೋಟಿಗೂ ಹೆಚ್ಚು ಅನುದಾನ ಒದಗಿಸಿದೆ ಎಂದು ತಿಳಿಸಿದರು.
ಐಐಟಿ-ಬಿ ಕ್ಯಾಂಪಸ್‌ನಲ್ಲಿ ಅತ್ಯಾಧುನಿಕ ಪೈಲಟ್ ಉತ್ಪಾದನಾ ಸೌಲಭ್ಯಕ್ಕಾಗಿ ART-PV ಇಂಡಿಯಾಕ್ಕೆ $10 ಮಿಲಿಯನ್ (₹83 ಕೋಟಿ) ನೀಡುತ್ತಿದೆ. ಭಾರತದ ನವೀಕರಿಸಬಹುದಾದ ಇಂಧನ ವಲಯದಲ್ಲಿ ನಾವೀನ್ಯತೆ ಮತ್ತು ಸ್ವಾವಲಂಬನೆ ಸಾಧಿಸಲು MNRE ನೀತಿ ಮತ್ತು ಆರ್ಥಿಕ ಬೆಂಬಲವನ್ನು ಮುಂದುವರಿಸುತ್ತದೆ ಎಂದು ಸಚಿವ ಪ್ರಲ್ಹಾದ್ ಜೋಶಿ ಹೇಳಿದರು.
ಇದೇ ವೇಳೆ ಮಾಧ್ಯಮದವರೊಂದಿಗೆ ಸಂವಾದ ನಡೆಸಿದ ಸಚಿವರು, ನಮ್ಮ ಸೌರಶಕ್ತಿ ಯೋಜನೆಗಳು ಭವಿಷ್ಯದಲ್ಲಿ ಭಾರತದ ಕ್ರಾಂತಿಕಾರಿ ಬದಲಾವಣೆಗೆ ನಾಂದಿ ಹಾಡಲಿದೆ. ಜಗತ್ತು ದಕ್ಷ, ಕೈಗೆಟುಕುವ ಮತ್ತು ಸ್ಕೇಲೆಬಲ್ ಸೌರಶಕ್ತಿ ಪರಿಹಾರ ಹುಡುಕುತ್ತಿರುವ ವೇಳೆ ನಮ್ಮ ಹೊಸ ಹೊಸ ಆವಿಷ್ಕಾರ ಭಾರತಕ್ಕೆ ನಾಯಕತ್ವದ ಬಲ ನೀಡಲಿದೆ ಎಂದು ಪ್ರತಿಪಾದಿಸಿದರು.
ಬಾಂಬೆ IITಯ NCPRE ಅಭಿವೃದ್ಧಿಪಡಿಸಿದ ಪೆರೋವ್‌ಸ್ಕೈಟ್ ಟಂಡೆಮ್ ಸೌರ ಕೋಶ ತಂತ್ರಜ್ಞಾನ ನವೀಕರಿಸಬಹುದಾದ ಇಂಧನದಲ್ಲಿ ಶೇ.30ಕ್ಕಿಂತ ಹೆಚ್ಚು ದಕ್ಷತೆ ಸಾಧಿಸುವ ಸಾಮರ್ಥ್ಯ ಹೊಂದಿದೆ. ಸಾಂಪ್ರದಾಯಿಕ ಸೌರ ಫಲಕಗಳನ್ನು ಮೀರಿಸುತ್ತದೆ. ಇದು ಕೇವಲ ಪ್ರಯೋಗಾಲಯವಲ್ಲ, ಶುದ್ಧ, ಸ್ಕೇಲೆಬಲ್ ಮತ್ತು ಆತ್ಮನಿರ್ಭರ ಇಂಧನ ಉತ್ಪಾದನೆಗೆ ನೀಲನಕ್ಷೆಯಾಗಿದೆ ಎಂದು ಸಚಿವ ಜೋಶಿ ಹೇಳಿದರು.
ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಸುಧಾರಿತ ತಂತ್ರಜ್ಞಾನಗಳೊಂದಿಗೆ ದಕ್ಷತೆ ಹೆಚ್ಚಿಸುವುದಲ್ಲದೆ ಬಲವಾದ ನಾವೀನ್ಯತೆ ಪರಿಸರ ವ್ಯವಸ್ಥೆ ನಿರ್ಮಿಸುತ್ತೇವೆ. ಸಂಶೋಧನೆ, ಅಭಿವೃದ್ಧಿ ಮತ್ತು ವಾಣಿಜ್ಯೀಕರಣಕ್ಕೆ MNRE ಕಾರ್ಯತಂತ್ರ ಬೆಂಬಲವಾಗಿದೆ ಎಂದು ತಿಳಿಸಿದ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಅವರು, ಪೆರೋವ್‌ಸ್ಕೈಟ್ ಟ್ಯಾಂಡೆಮ್ ಸೌರ ಕೋಶಗಳು ಸ್ಕೇಲೆಬಲ್ ಮಾತ್ರವಲ್ಲದೆ ಲಾಭದಾಯಕವೂ ಆಗಿವೆ ಎಂಬುದನ್ನು ವಾಣಿಜ್ಯಿಕವಾಗಿ ಪ್ರದರ್ಶಿಸಬೇಕೆಂದು IIT ಬಾಂಬೆ-ART PV ತಂಡವನ್ನು ಒತ್ತಾಯಿಸಿದರು.
ಈ ಸುದ್ದಿಯನ್ನೂ ಓದಿ | Pralhad Joshi: ಪಳೆಯುಳಿಕೆಯೇತರ ಇಂಧನದಲ್ಲಿ 5 ವರ್ಷ ಮೊದಲೇ ಗುರಿ ಸಾಧಿಸಿದ ಭಾರತ: ಪ್ರಲ್ಹಾದ್ ಜೋಶಿ ಸಂತಸ
ಈ ಸಂದರ್ಭದಲ್ಲಿ ಐಐಟಿ ಬಾಂಬೆ ನಿರ್ದೇಶಕ ಪ್ರೊ. ಶಿರೀಶ್ ಕೇದಾರೆ, ಎನ್‌ಸಿಪಿಆರ್‌ಇ ಪ್ರಧಾನ ತನಿಖಾಧಿಕಾರಿಗಳು (ಪಿಐಗಳು) ಪ್ರೊ.ಬೇಲಾನ್ ಜಿ.ಫರ್ನಾಂಡಿಸ್ ಮತ್ತು ಪ್ರೊ.ಚೇತನ್ ಸಿಂಗ್ ಸೋಲಂಕಿ, ಎಆರ್‌ಟಿ-ಪಿವಿ ಇಂಡಿಯಾ ಸಹ-ಸಂಸ್ಥಾಪಕ ಪ್ರೊ.ದಿನೇಶ್ ಕಬ್ರಾ ಉಪಸ್ಥಿತರಿದ್ದರು.