China Open: 17 ವರ್ಷದ ಉನ್ನತಿ ಹೂಡಾ ವಿರುದ್ಧ ಸೋತ ಸಿಂಧು
Unnati Hooda: ಶುಕ್ರವಾರ ನಡೆಯುವ ಕ್ವಾರ್ಟರ್‌ ಫೈನಲ್‌ನಲ್ಲಿ ಉನ್ನತಿ ಹೂಡಾ ಅವರು ವಿಶ್ವದ 4ನೇ ಶ್ರೇಯಾಂಕಿತೆ, ಜಪಾನ್‌ನ ಅಕಾನೆ ಯಮಾಗುಚಿ ಅವರ ಕಠಿಣ ಸವಾಲು ಎದುರಿಸಲಿದಾರೆ. ಈ ಸವಾಲನ್ನು ಗೆದ್ದದ್ದೇ ಆದಲ್ಲಿ ಹೂಡಾ ಮೇಲೆ ಪ್ರಶಸ್ತಿ ನಿರೀಕ್ಷೆಯೊಂದನ್ನು ಮಾಡಬಹುದಾಗಿದೆ.
Abhilash BC
Jul 24, 2025 5:09 PM
ಗ್ವಾಂಗ್‌ಝೊ (ಚೀನಾ): ಅವಳಿ ಒಲಿಂಪಿಕ್ಸ್‌ ಪದಕ ವಿಜೇತೆ ಪಿ.ವಿ. ಸಿಂಧು(PV Sindhu), ಚೀನಾ ಓಪನ್ ಸೂಪರ್ 1000 ಟೂರ್ನಮೆಂಟ್‌ನಲ್ಲಿ(China Open) ತಮ್ಮ ಅಭಿಯಾನ ಕೊನೆಗೊಳಿಸಿದ್ದಾರೆ. ತನ್ನದೇ ದೇಶದ, 17 ವರ್ಷದ ಉನ್ನತಿ ಹೂಡಾ(Unnati Hooda) ವಿರುದ್ಧ ಮೂರು ಗೇಮ್‌ಗಳ ತೀವ್ರ ಹೋರಾಟದ ಮಧ್ಯೆಯೂ ಸೋಲು ಕಂಡರು. ಅಮೋಘ ಗೆಲುವು ಸಾಧಿಸಿದ ಉನ್ನತಿ ಹೂಡಾ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರು.
ಗುರುವಾರ ನಡೆದ ಫ್ರೀ-ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಸಿಂಧು ಅವರು ಉನ್ನತಿ ವಿರುದ್ಧ 16-21, 21-19, 21-13 ಪರಾಭವಗೊಂಡರು. ಈ ಮೂಲಕ ಮತ್ತೊಮ್ಮೆ ಸಿಂಧು ತಮ್ಮ ಕಳಪೆ ಪ್ರದರ್ಶನ ಮುಂದುವರಿಸಿದರು. ಮೊದಲ ಸುತ್ತಿನ ಪಂದ್ಯದಲ್ಲಿ ಬಲಿಷ್ಠ ಆಟಗಾರ್ತಿ ಜಪಾನ್‌ನ ಟೊಮೋಕಾ ಮಿಯಝಾಕಿ ಅವರನ್ನು ಮಣಿಸಿದಾಗ ಸಿಂಧು ಮೇಲೆ ಭಾರೀ ನಿರೀಕ್ಷೆ ಇರಿಸಲಾಗಿತ್ತು. ಆದರೆ ಈ ನಿರೀಕ್ಷೆ ಇದೀಗ ಹುಸಿಯಾಗಿದೆ.
ಶುಕ್ರವಾರ ನಡೆಯುವ ಕ್ವಾರ್ಟರ್‌ ಫೈನಲ್‌ನಲ್ಲಿ ಉನ್ನತಿ ಹೂಡಾ ಅವರು ವಿಶ್ವದ 4ನೇ ಶ್ರೇಯಾಂಕಿತೆ, ಜಪಾನ್‌ನ ಅಕಾನೆ ಯಮಾಗುಚಿ ಅವರ ಕಠಿಣ ಸವಾಲು ಎದುರಿಸಲಿದಾರೆ. ಈ ಸವಾಲನ್ನು ಗೆದ್ದದ್ದೇ ಆದಲ್ಲಿ ಹೂಡಾ ಮೇಲೆ ಪ್ರಶಸ್ತಿ ನಿರೀಕ್ಷೆಯೊಂದನ್ನು ಮಾಡಬಹುದಾಗಿದೆ.
ಸಾತ್ವಿಕ್‌-ಚಿರಾಗ್ ಜೋಡಿ ಕ್ವಾರ್ಟರ್‌ ಫೈನಲ್‌ಗೆ
ದಿನದ ಮೊದಲು ನಡೆದಿದ್ದ ಪುರುಷರ ಡಬಲ್ಸ್ 16ರ ಸುತ್ತಿನ ಪಂದ್ಯದಲ್ಲಿ ಭಾರತದ ಅಗ್ರಮಾನ್ಯ ಜೋಡಿ ಸಾತ್ವಿಕ್‌ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಇಂಡೋನೇಷ್ಯಾದ ಲಿಯೋ ರೋಲಿ ಕಾರ್ನಾಂಡೋ ಮತ್ತು ಬಾಗಸ್ ಮೌಲಾನಾ ಅವರನ್ನು 21-19, 21-19 ನೇರ ಗೇಮ್‌ಗಳಿಂದ ಹಿಮ್ಮೆಟ್ಟಿಸಿ ಕ್ವಾರ್ಟರ್‌ಫೈನಲ್‌ ಪ್ರವೇಶಿಸಿತ್ತು. ಆದರೆ ಪುರುಷರ ಸಿಂಗಲ್ಸ್‌ನಲ್ಲಿ ಎಚ್‌ಎಸ್ ಪ್ರಣಯ್ ಸೋತು ತಮ್ಮ ಸವಾಲು ಮುಗಿಸಿದರು.
ವಿಶ್ವದ 9 ನೇ ಶ್ರೇಯಾಂಕದ ಎಚ್.ಎಸ್. ಪ್ರಣಯ್ ಚೈನೀಸ್ ತೈಪೆಯ ಚೌ ಟಿಯೆನ್ ಚೆನ್ ವಿರುದ್ಧದ ಹೋರಾಟದಲ್ಲಿ 21-18, 15-21, 8-21 ಅಂತರದಿಂದ ಸೋತರು. ಪ್ರಣಯ್ ಅವರ ನಿರ್ಗಮನವು ಪುರುಷರ ಸಿಂಗಲ್ಸ್‌ನಲ್ಲಿ ಭಾರತದ ಅಭಿಯಾನವನ್ನು ಕೊನೆಗೊಳಿಸಿತು.
ಇದನ್ನೂ ಓದಿ IND vs ENG: ವಾಷಿಂಗ್ಟನ್‌ ಸುಂದರ್‌ಗೂ ಮುನ್ನ ಶಾರ್ದುಲ್‌ ಠಾಕೂರ್‌ ಆಡಿದ್ದಕ್ಕೆ ದಿನೇಶ್‌ ಕಾರ್ತಿಕ್‌ ಆಕ್ರೋಶ!