IND vs ENG: ಸೋಲಿನ ಭೀತಿಯಲ್ಲಿರುವ ಭಾರತಕ್ಕೆ ಕೆಎಲ್‌ ರಾಹುಲ್‌, ಶುಭಮನ್‌ ಗಿಲ್‌ ಆಸರೆ!

ಮ್ಯಾಂಚೆಸ್ಟರ್‌: ಇಂಗ್ಲೆಂಡ್ ವಿರುದ್ಧದ ಮ್ಯಾಂಚೆಸ್ಟರ್ ಟೆಸ್ಟ್ ಪಂದ್ಯದಲ್ಲಿ(IND vs ENG) ಭಾರತ ತಂಡ ಬಲಿಷ್ಠವಾಗಿ ಕಮ್‌ಬ್ಯಾಕ್‌ ಮಾಡಿದೆ. ಪ್ರಥಮ ಇನಿಂಗ್ಸ್‌ನಲ್ಲಿ 311 ರನ್‌ಗಳ ಹಿನ್ನಡೆಯಲ್ಲಿದ್ದ ಭಾರತ, ದ್ವಿತೀಯ ಇನಿಂಗ್ಸ್‌ನ ಮೊದಲ ಓವರ್‌ನಲ್ಲಿ ಎರಡು ವಿಕೆಟ್‌ಗಳನ್ನು ಕಳೆದುಕೊಂಡಿತು. ಯಶಸ್ವಿ ಜೈಸ್ವಾಲ್ ಮತ್ತು ಸಾಯಿ ಸುದರ್ಶನ್ ಖಾತೆ ತೆರೆಯದೆಯೇ ಔಟಾದರು. ಇದರ ನಂತರ, ಶುಭಮನ್ ಗಿಲ್ (Shubman Gill) ಮತ್ತು ಕೆಎಲ್ ರಾಹುಲ್ (KL Rahul) ಕ್ರೀಸ್‌ನಲ್ಲಿಯೇ ಇದ್ದರು. ನಾಲ್ಕನೇ ದಿನದ ಎರಡನೇ ಮತ್ತು ಮೂರನೇ ಸೆಷನ್‌ಗಳಲ್ಲಿ ಇಂಗ್ಲೆಂಡ್ ತಂಡ ಒಂದೇ ಒಂದು ವಿಕೆಟ್ ಪಡೆಯಲು ಸಾಧ್ಯವಾಗಲಿಲ್ಲ. ನಾಲ್ಕನೇ ದಿನದಾಟದ ಅಂತ್ಯಕ್ಕೆ ಭಾರತ ತಂಡ 2 ವಿಕೆಟ್‌ಗಳಿಗೆ 174 ರನ್‌ಗಳಿಸಿದೆ. ಆದಾಗ್ಯೂ, ಇಂಗ್ಲೆಂಡ್ ಇನ್ನೂ 137 ರನ್‌ಗಳ ಮುನ್ನಡೆಯಲ್ಲಿದೆ. ಭಾರತ ಪ್ರಥಮ ಇನಿಂಗ್ಸ್‌ನಲ್ಲಿ 358 ರನ್‌ಗಳನ್ನು ಗಳಿಸಿತ್ತು. ನಾಲ್ಕನೇ ದಿನದ ಮೊದಲ ಸೆಷನ್‌ನಲ್ಲಿ ಇಂಗ್ಲೆಂಡ್‌ನ ಪ್ರಥಮ ಇನಿಂಗ್ಸ್‌ನಲ್ಲಿ 669 ರನ್‌ಗಳನ್ನು ಕಲೆ ಹಾಕಿತ್ತು. ಬೆನ್ ಸ್ಟೋಕ್ಸ್ 141 ರನ್ ಗಳಿಸಿದರೆ, ಜೋ ರೂಟ್ 150 ರನ್ ಗಳಿಸಿದರು.

ಭಾರತ ತಂಡ ಶೂನ್ಯ ಮೊತ್ತಕ್ಕೆ ಎರಡು ವಿಕೆಟ್‌ಗಳನ್ನು ಕಳೆದುಕೊಂಡ ನಂತರ, ಕೆಎಲ್ ರಾಹುಲ್ ಮತ್ತು ಶುಭ್‌ಮನ್ ಗಿಲ್ ಇನಿಂಗ್ಸ್‌ ಅನ್ನು ಮುಂದಕ್ಕೆ ಕೊಂಡೊಯ್ದರು. ಇಬ್ಬರೂ ಬ್ಯಾಟ್ಸ್‌ಮನ್‌ಗಳು ಬಹಳ ಎಚ್ಚರಿಕೆಯಿಂದ ಬ್ಯಾಟ್‌ ಮಾಡಿದರು. ಪಂದ್ಯದ ಐದನೇ ದಿನದಂದು ಇಬ್ಬರೂ ಶತಕ ಗಳಿಸುವ ಅವಕಾಶವನ್ನು ಹೊಂದಿದ್ದಾರೆ. ಗಿಲ್ 72 ಎಸೆತಗಳಲ್ಲಿ ತಮ್ಮ 8ನೇ ಟೆಸ್ಟ್ ಅರ್ಧಶತಕವನ್ನು ಗಳಿಸಿದರು. ಆದಾಗ್ಯೂ, ಕೆಎಲ್ ರಾಹುಲ್ ಹೆಚ್ಚು ಎಚ್ಚರಿಕೆಯಿಂದ ಆಡುತ್ತಿದ್ದರು. ಅವರು 141 ಎಸೆತಗಳಲ್ಲಿ 50 ರನ್‌ಗಳನ್ನು ಪೂರ್ಣಗೊಳಿಸಿದರು. ದಿನದಾಟ ಮುಗಿಯುವ ಹೊತ್ತಿಗೆ ಗಿಲ್ 78 ರನ್ ಮತ್ತು ರಾಹುಲ್ 87 ರನ್ ಗಳಿಸಿ ಅಜೇಯರಾಗಿದ್ದರು.

IND vs ENG 4th Test: 669 ರನ್‌ ಕಲೆ ಹಾಕಿದ ಇಂಗ್ಲೆಂಡ್‌, ಇನಿಂಗ್ಸ್‌ ಸೋಲಿನ ಭೀತಿಯಲ್ಲಿ ಭಾರತ!

ಈ ಸರಣಿಯಲ್ಲಿ ಕೆಎಲ್ ರಾಹುಲ್ ಕೂಡ 500 ರನ್ ಪೂರೈಸಿದ್ದಾರೆ. ನಾಯಕ ಶುಭಮನ್ ಗಿಲ್ ಕೂಡ 700 ರನ್‌ಗಳ ಸಮೀಪದಲ್ಲಿದ್ದಾರೆ. ಇಂಗ್ಲೆಂಡ್‌ ಟೆಸ್ಟ್ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಏಷ್ಯನ್ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ವಿದೇಶದ ಸರಣಿಯಲ್ಲಿ 500 ಕ್ಕೂ ಹೆಚ್ಚು ರನ್ ಗಳಿಸಿದ ಭಾರತೀಯ ಆರಂಭಿಕರು

774 - ಸುನೀಲ್ ಗವಾಸ್ಕರ್, ವೆಸ್ಟ್ ಇಂಡೀಸ್, 1971

542 - ಸುನೀಲ್ ಗವಾಸ್ಕರ್, ಇಂಗ್ಲೆಂಡ್, 1979

508* - ಕೆ.ಎಲ್ ರಾಹುಲ್, ಇಂಗ್ಲೆಂಡ್, 2025

ಗಿಲ್‌ಗೆ ಜೀವದಾನ ನೀಡಿದ ಡಾಸನ್

ಭಾರತೀಯ ನಾಯಕ ಶುಭ್‌ಮನ್ ಗಿಲ್‌ಗೆ ಇಂಗ್ಲೆಂಡ್ ಕೂಡ ಜೀವದಾನ ನೀಡಿತು. 25ನೇ ಓವರ್‌ನ ಕೊನೆಯ ಎಸೆತದಲ್ಲಿ ಗಿಲ್ ಔಟ್ ಆಗಬಹುದಿತ್ತು. ಆದರೆ ಲಿಯಾಮ್ ಡಾಸನ್ ತಮ್ಮ ಕ್ಯಾಚ್ ಅನ್ನು ಕೈಬಿಟ್ಟರು. ಬ್ಯಾಕ್‌ವರ್ಡ್ ಪಾಯಿಂಟ್‌ನಲ್ಲಿ ಎರಡೂ ಕೈಗಳಿಂದ ಚೆಂಡನ್ನು ಹಿಡಿಯುವ ಅವಕಾಶ ಅವರಿಗೆ ಸಿಕ್ಕಿತ್ತು, ಆದರೆ ಡಾಸನ್ ಅದನ್ನು ಕೈ ಚೆಲ್ಲಿಕೊಂಡರು. ಆ ಸಮಯದಲ್ಲಿ ಶುಭ್‌ಮನ್ ಗಿಲ್ 46 ರನ್ ಗಳಿಸಿದ್ದರು. ಇದರ ನಂತರ, ಭಾರತೀಯ ನಾಯಕ ಇಂಗ್ಲೆಂಡ್‌ಗೆ ಯಾವುದೇ ಅವಕಾಶ ನೀಡಲಿಲ್ಲ ಮತ್ತು ಭಾರತವನ್ನು ಪಂದ್ಯದಲ್ಲಿ ಉಳಿಸಿಕೊಂಡರು.

ಬೆನ್‌ ಸ್ಟೋಕ್ಸ್ ಬೌಲಿಂಗ್‌ಗೆ ಅಲಭ್ಯ

ನಾಯಕ ಬೆನ್ ಸ್ಟೋಕ್ಸ್ ಇಂಗ್ಲೆಂಡ್ ಪರ ಪ್ರಥಮ ಇನಿಂಗ್ಸ್‌ನಲ್ಲಿ 5 ವಿಕೆಟ್‌ಗಳನ್ನು ಕಬಳಿಸಿದ್ದರು. ಅವರು ೀ ಸರಣಿಯಲ್ಲಿ 16 ವಿಕೆಟ್‌ಗಳೊಂದಿಗೆ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಆಗಿದ್ದಾರೆ. ಆದಾಗ್ಯೂ, ಅವರು ಮ್ಯಾಂಚೆಸ್ಟರ್ ಟೆಸ್ಟ್‌ನ ದ್ವಿತೀಯ ಇನಿಂಗ್ಸ್‌ನಲ್ಲಿ ಬೌಲ್‌ ಮಾಡಲಿಲ್ಲ. ಪಂದ್ಯದ ಮೂರನೇ ದಿನದಂದು ಅವರ ಕಾಲಿನಲ್ಲಿ ಸಮಸ್ಯೆ ಇತ್ತು. ಇದರಿಂದಾಗಿ, ಅವರು ಗಾಯಗೊಂಡು ನಿವೃತ್ತರಾದರು. ನಾಲ್ಕನೇ ದಿನ, ಅವರು ಬ್ಯಾಟಿಂಗ್ ನಡೆಸಿದರು ಹಾಗೂ ಶತಕ ಗಳಿಸಿದರು, ಆದರೆ ಬೌಲ್ ಮಾಡಲಿಲ್ಲ.‌