Viral News: ಹಸುವಿನ ಕೆಚ್ಚಲಿನಿಂದ ಮಗುವಿಗೆ ಹಾಲು ಕುಡಿಸಿದ ವ್ಯಕ್ತಿ; ನೆಟ್ಟಿಗರಿಂದ ಕ್ಲಾಸ್‌, ವಿಡಿಯೋ ನೋಡಿ

ನವದೆಹಲಿ: ವ್ಯಕ್ತಿಯೊಬ್ಬ ತನ್ನ ಮಗುವಿಗೆ ಹಸುವಿನ ಕೆಚ್ಚಲಿನಿಂದ ನೇರವಾಗಿ ಹಸಿ ಹಾಲು ಕುಡಿಯಲು ಬಿಡುತ್ತಿರುವ ವಿಡಿಯೊ ವೈರಲ್ (Viral Video) ಆಗಿದ್ದು, ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಟೀಕೆಗೆ ಕಾರಣವಾಗಿದೆ. ಅನೇಕ ಜನರು ಇದನ್ನು ಅಸುರಕ್ಷಿತ ಮತ್ತು ಬೇಜವಾಬ್ದಾರಿಯುತ ಪಾಲನೆ ಎಂದು ಕರೆಯುತ್ತಿದ್ದಾರೆ. ಇದು ಮಗುವಿಗೆ ಒಳ್ಳೆಯದೇ? ದಯವಿಟ್ಟು ಉತ್ತರಿಸಿ ಎಂಬ ಶೀರ್ಷಿಕೆಯೊಂದಿಗೆ ಎಕ್ಸ್‌ನಲ್ಲಿ ವಿಡಿಯೊ ಹಂಚಿಕೊಳ್ಳಲಾಗಿದೆ.

ವೈರಲ್ ಆಗಿರುವ ವಿಡಿಯೊದಲ್ಲಿ ಹಸುವಿನಿಂದ ನೇರವಾಗಿ ಮಗುವಿಗೆ ಹಸಿ, ಪಾಶ್ಚರೀಕರಿಸದ ಹಾಲನ್ನು ನೀಡುತ್ತಿರುವುದನ್ನು ವಿಡಿಯೊದಲ್ಲಿ ಕಾಣಬಹುದು. ವಿಡಿಯೊದಲ್ಲಿ, ಮಗು ಹಸುವಿನ ಕೆಚ್ಚಲಿನಿಂದ ಹಾಲು ಕುಡಿಯುತ್ತಿರುವುದನ್ನು ಕಾಣಬಹುದು. ಮಗುವಿಗೆ ಹಸುವಿನಿಂದ ನೇರವಾಗಿ ಹಾಲು ಕುಡಿಸುತ್ತಾ ಆ ವ್ಯಕ್ತಿ ನೋಡುತ್ತಾ ನಗುತ್ತಿರುವುದನ್ನು ವಿಡಿಯೊದಲ್ಲಿ ನೋಡಬಹುದು. ಈ ದೃಶ್ಯವು ತ್ವರಿತವಾಗಿ 9 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಗಳಿಸಿತು. ಕಾಮೆಂಟ್ ವಿಭಾಗದಲ್ಲಿ ನೆಟ್ಟಿಗರು ತೀವ್ರ ಆಘಾತ ಮತ್ತು ಕಳವಳವನ್ನುಂಟು ಮಾಡಿದೆ.

ವಿಡಿಯೊ ಇಲ್ಲಿದೆ:

ಬಳಕೆದಾರರೊಬ್ಬರು, ಇದು ಒಳ್ಳೆಯದಲ್ಲ. ಹಸಿ ಹಾಲಿನಲ್ಲಿ ಮಕ್ಕಳಿಗೆ ತುಂಬಾ ಅಪಾಯಕಾರಿ ಬ್ಯಾಕ್ಟೀರಿಯಾಗಳು ಇರುತ್ತವೆ. ಈ ಬ್ಯಾಕ್ಟೀರಿಯಾಗಳನ್ನು ಪಾಶ್ಚರೀಕರಣ ಅಥವಾ ಹಾಲನ್ನು ಬೇಯಿಸುವ ಮೂಲಕ ತೆಗೆದುಹಾಕಲಾಗುತ್ತದೆ. ಇನ್ನೊಬ್ಬ ವ್ಯಕ್ತಿ, ಮಗು ಅನೇಕ ರೋಗಕಾರಕಗಳಿಗೆ ಒಡ್ಡಿಕೊಳ್ಳುವ ಸಾಧ್ಯತೆ ಇದೆ ಎಂದು ಹೇಳಿದರು.

ಕೆಲವರು ಇದನ್ನು ಮಕ್ಕಳ ಮೇಲಿನ ದೌರ್ಜನ್ಯ ಎಂದು ಹೇಳಿದ್ದಾರೆ. ತಂದೆ ತನ್ನ ಮಗುವಿನ ಜೀವವನ್ನು ಪಣಕ್ಕಿಟ್ಟಿದ್ದಾರೆ ಎಂದು ಆರೋಪಿಸಿದರು. ಅನೇಕ ಜನರು ಆ ವ್ಯಕ್ತಿಯ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು. ಅವರು ಮಗುವಿನ ಆರೋಗ್ಯವನ್ನು ಅಪಾಯಕ್ಕೆ ಸಿಲುಕಿಸುತ್ತಿದ್ದಾರೆ ಎಂದು ಹೇಳಿದರು.

ಕೇರಳದ ಹೆಪಟಾಲಜಿಸ್ಟ್ ಡಾ. ಸಿರಿಯಾಕ್ ಅಬ್ಬಿ ಫಿಲಿಪ್ಸ್ ಎಂಬುವವರು, ಎಕ್ಸ್‌ನಲ್ಲಿ ವಿಡಿಯೊವನ್ನು ಮರುಪೋಸ್ಟ್ ಮಾಡಿ ಹಸಿ ಹಾಲು ಎಷ್ಟು ಅಪಾಯಕಾರಿ ಎಂದು ವಿವರಿಸಿದರು. ವಿಶೇಷವಾಗಿ ಶಿಶುಗಳಿಗೆ ಹಸಿ ಹಾಲು ಅಪಾಯಕಾರಿ. ಹಸಿ ಹಾಲು ಇ. ಕೋಲಿ ಬ್ಯಾಕ್ಟೀರಿಯಾದಿಂದ ಕಲುಷಿತಗೊಂಡರೆ, ಮಗು ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಎದುರಿಸಬಹುದು ಎಂದು ಅವರು ಎಚ್ಚರಿಸಿದರು.

ಡಾ. ಫಿಲಿಪ್ಸ್ ಪ್ರಕಾರ, ಮಗುವಿಗೆ ಮೊದಲು ತೀವ್ರವಾದ ಹೊಟ್ಟೆ ನೋವು ಮತ್ತು ರಕ್ತಸಿಕ್ತ ಅತಿಸಾರ ಉಂಟಾಗಬಹುದು. ನಂತರ, ಬ್ಯಾಕ್ಟೀರಿಯಾವು ಹಾನಿಕಾರಕ ವಿಷವನ್ನು ಬಿಡುಗಡೆ ಮಾಡಬಹುದು. ಅದು ಕೆಂಪು ರಕ್ತಕಣಗಳನ್ನು ಹಾನಿಗೊಳಿಸುತ್ತದೆ, ಪ್ಲೇಟ್‌ಲೆಟ್ ಸಂಖ್ಯೆಯನ್ನು ಕಡಿಮೆ ಮಾಡುತ್ತದೆ ಮತ್ತು ಮೂತ್ರಪಿಂಡ ವೈಫಲ್ಯಕ್ಕೆ ಕಾರಣವಾಗಬಹುದು. ಹಸಿ ಹಾಲು ಸೇವಿಸುವ ಪ್ರವೃತ್ತಿಯನ್ನು ಅವರು ತೀವ್ರವಾಗಿ ಟೀಕಿಸಿದ್ದಾರೆ.

ಈ ಸುದ್ದಿಯನ್ನೂ ಓದಿ: Viral Video: ಇಸ್ಕಾನ್‌ನೊಳಗೆ ಚಿಕನ್‌ ತಿಂದ ಕಿಡಿಗೇಡಿ- ಭಕ್ತರ ರಿವೇಂಜ್‌ ಹೇಗಿತ್ತು ಗೊತ್ತಾ? ವಿಡಿಯೊ ಫುಲ್‌ ವೈರಲ್‌

ಈ ವಿಡಿಯೊ, ವಿಶೇಷವಾಗಿ ಮಕ್ಕಳ ವಿಚಾರದಲ್ಲಿ ನೈಸರ್ಗಿಕ ಪಾಲನೆ, ವೈದ್ಯಕೀಯ ಸಲಹೆ ಮತ್ತು ಆಹಾರ ಸುರಕ್ಷತೆಯ ಮಹತ್ವದ ಬಗ್ಗೆ ವ್ಯಾಪಕ ಚರ್ಚೆಯನ್ನು ಹುಟ್ಟುಹಾಕಿದೆ.