Shehbaz Sharif: ಬೀಜಿಂಗ್‌ನಲ್ಲಿ ಶೆಹಬಾಜ್ ಶರೀಫ್‌ಗೆ ಮತ್ತೆ ಮುಜುಗರ: ಇಯರ್‌ಫೋನ್ ಧರಿಸಲು ಪರದಾಡಿದ ಪಾಕ್ ಪ್ರಧಾನಿ

ಬೀಜಿಂಗ್: ಪಾಕಿಸ್ತಾನದ (Pakistan) ಪ್ರಧಾನಮಂತ್ರಿ ಶೆಹಬಾಜ್ ಶರೀಫ್‌ಗೆ (Shehbaz Sharif) ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಮತ್ತೊಮ್ಮೆ ಮುಜುಗರ ಎದುರಾಗಿದೆ. ಚೀನಾದಲ್ಲಿ (China) ಆಗಸ್ಟ್ 31ರಿಂದ ಸೆಪ್ಟೆಂಬರ್ 1ರವರೆಗೆ ನಡೆದ ಶಾಂಘೈ ಸಹಕಾರ ಸಂಸ್ಥೆಯ(Shanghai Cooperation Organisation) ಶೃಂಗಸಭೆಯ ಸಂದರ್ಭದಲ್ಲಿ, ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ (Vladimir Putin) ಜತೆಗಿನ ಚರ್ಚೆಯ ವೇಳೆ ಶರೀಫ್ ಇಯರ್‌ಫೋನ್ ಬಳಸಲು ತಡವರಿಸಿದ್ದು ವಿಡಿಯೊದಲ್ಲಿ ಸೆರೆಯಾಗಿದ್ದು, ವೈರಲ್ ಆಗಿದೆ.

ಪುಟಿನ್ ಇಯರ್‌ಫೋನ್ ಹೇಗೆ ಧರಿಸಬೇಕೆಂದು ತೋರಿಸುತ್ತಿದ್ದರೂ, ಶರೀಫ್‌ಗೆ ಅದು ಕಷ್ಟವಾಯಿತು. ವೈರಲ್ ವಿಡಿಯೊದಲ್ಲಿ ಶರೀಫ್‌ ಅವರ ಇಯರ್‌ಫೋನ್ ಕಿವಿಯಿಂದ ಕೆಳಗೆ ಜಾರುತ್ತಿರುವುದು ಕಂಡುಬಂದಿದ್ದು, ಪುಟಿನ್ ಇದನ್ನು ನೋಡಿ ನಗುತ್ತಿರುವ ದೃಶ್ಯವೂ ದಾಖಲಾಗಿದೆ.

ಈ ಘಟನೆ ಶರೀಫ್‌ಗೆ ಇದೇ ಮೊದಲ ಮುಜುಗರವಲ್ಲ. 2022ರ ಉಜ್ಬೇಕಿಸ್ತಾನ್‌ನ SCO ಶೃಂಗಸಭೆಯಲ್ಲಿ ಸಹ ಅವರು ಇಯರ್‌ಫೋನ್ ಅಳವಡಿಸಲು ಪರದಾಡಿ ಚರ್ಚೆಗೆ ಗುರಿಯಾಗಿದ್ದರು. ಆಗಲೂ ಪುಟಿನ್ ಜತೆಗಿನ ಚರ್ಚೆಯ ವೇಳೆ ಇಯರ್‌ಫೋನ್ ಕೆಳಗೆ ಬೀಳುತ್ತಿದ್ದರಿಂದ ಆತನ ಸಿಬ್ಬಂದಿ ಸಹಾಯಕ್ಕೆ ಬಂದಿದ್ದರು. ಈ ವಿಡಿಯೊ ವೈರಲ್ ಆಗಿ, ವಿದೇಶಿ ವಿಮರ್ಶಕರು ಮತ್ತು ಪಾಕಿಸ್ತಾನದ ಪ್ರತಿಪಕ್ಷಗಳಿಂದ ಟೀಕೆಗೆ ಒಳಗಾಗಿತ್ತು. "22 ಕೋಟಿ ಜನಸಂಖ್ಯೆಯ ದೇಶದ ಪ್ರಧಾನಿಯಾಗಿರುವುದು ಆಶ್ಚರ್ಯ" ಎಂದು ಹಾಸ್ಯಗಾರ ಜಿಮ್ಮಿ ಫಾಲನ್ ಲೇವಡಿ ಮಾಡಿದ್ದರು.

ಈ ಸುದ್ದಿಯನ್ನು ಓದಿ: Crime News: ಬೇರೊಬ್ಬನ ಜತೆ ನಿಶ್ಚಿತಾರ್ಥ ಮಾಡಿಕೊಂಡಳೆಂದು ಪ್ರಿಯತಮೆ ಮೇಲೆ ಗುಂಡು ಹಾರಿಸಿದ ಪ್ರೇಮಿ

ಈ ಬಾರಿಯ ಶೃಂಗಸಭೆಯಲ್ಲಿ ಶರೀಫ್‌ ಅವರ ಭಾಗವಹಿಕೆಯು ಮತ್ತೆ ಮೀಮ್‌ಗಳಿಗೆ ವಿಷಯವಾಯಿತು. ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಪುಟಿನ್ ಜತೆಗೆ ನಡೆದುಕೊಂಡು ಹೋಗುವಾಗ ಶರೀಫ್ ಒಂಟಿಯಾಗಿ ಕಾಯುತ್ತಿರುವ ವಿಡಿಯೊ ವೈರಲ್ ಆಗಿ, ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಅವರನ್ನು ಕಡೆಗಣಿಸಲಾಗಿದೆ ಎಂದು ಚರ್ಚೆಯಾಯಿತು. ಇದೇ ವೇಳೆ ಪಹಲ್ಗಾಮ್ ಭಯೋತ್ಪಾದಕ ದಾಳಿಯನ್ನು SCO ಖಂಡಿಸಿದ್ದು, ಮೋದಿ ಉಪಸ್ಥಿತಿಯಲ್ಲಿ ಶರೀಫ್‌ಗೆ ಮುಜುಗರದ ಕ್ಷಣವಾಯಿತು.

ಪುಟಿನ್ ಜತೆಗಿನ ಭೇಟಿಯಲ್ಲಿ ಶರೀಫ್, ಇಸ್ಲಾಮಾಬಾದ್‌ನಿಂದ ಮಾಸ್ಕೋಗೆ "ಪೂರಕ ಮತ್ತು ಪರಿಪೂರಕ" ಸಂಬಂಧಗಳ ಬಗ್ಗೆ ಪ್ರಸ್ತಾಪಿಸಿದರು. ರಷ್ಯಾದ "ಸಮತೋಲನ ಕಾರ್ಯ"ವನ್ನು ಶ್ಲಾಘಿಸಿದ ಅವರು, ಭಾರತ-ರಷ್ಯಾ ಸಂಬಂಧವನ್ನು ಗೌರವಿಸುವುದಾಗಿ ತಿಳಿಸಿದರು. "ನಾವು ಭಾರತ-ರಷ್ಯಾ ಸಂಬಂಧವನ್ನು ಒಪ್ಪಿಕೊಳ್ಳುತ್ತೇವೆ, ಆದರೆ ಬಲಿಷ್ಠ ಸಂಬಂಧವನ್ನು ಕಟ್ಟಲು ಬಯಸುತ್ತೇವೆ" ಎಂದು ಶರೀಫ್ ಪುಟಿನ್‌ಗೆ ತಿಳಿಸಿದರು.