Gulf War: ಲೆಬನಾನ್ ಮೇಲೆ ಇಸ್ರೇಲ್ ಭೀಕರ ರಾಸಾಯನಿಕ ಬೆಂಕಿಯ ಮಳೆ, 400 ಸಾವು
ವೈಟ್ ಫಾಸ್ಫರಸ್ ಅತ್ಯಂತ ಅಪಾಯಕಾರಿ ರಾಸಾಯನಿಕ ಪದಾರ್ಥ. ಮೇಣದಂತೆ ಕಾಣುವ ಈ ವಸ್ತು ಗಾಳಿಯ ಸಂಪರ್ಕಕ್ಕೆ ಬಂದ ತಕ್ಷಣ ಆಮ್ಲಜನಕದೊಂದಿಗೆ ಬೆರೆತು ಉರಿಯಲು ಪ್ರಾರಂಭಿಸುತ್ತದೆ. ಉರಿಯುವಾಗ ಸುಮಾರು 815 ಡಿಗ್ರಿ ಸೆಲ್ಸಿಯಸ್ ಶಾಖವನ್ನು ಹೊರಹಾಕುತ್ತದೆ. ಚರ್ಮದ ಮೇಲೆ ಬಿದ್ದಾಗ ಮಾಂಸವನ್ನು ಸೀಳಿ ನೇರವಾಗಿ ಮೂಳೆಯವರೆಗೂ ಸುಡುತ್ತದೆ.
ವೈಟ್ ಫಾಸ್ಪರಸ್ ದಾಳಿ -
ಬೈರೂತ್, ಮಾರ್ಚ್ 10 : ದಕ್ಷಿಣ ಲೆಬನಾನ್ನ ಯೋಹ್ಮೋರ್ ಗ್ರಾಮವನ್ನು ಇಸ್ರೇಲ್ನ ಭೀಕರ ರಾಸಾಯನಿಕ ದಾಳಿ ಸ್ಮಶಾನವಾಗಿ ಪರಿವರ್ತಿಸಿದೆ. ಇಸ್ರೇಲ್ ಸೇನೆಯು ಹಿಜ್ಬುಲ್ಲಾ ನೆಲೆಗಳನ್ನು ಗುರಿಯಾಗಿಸಿಕೊಂಡು ನಡೆಸಿದ ದಾಳಿಯಲ್ಲಿ ಬೆಂಕಿಯ ಉಂಡೆಗಳನ್ನೇ ಸುರಿಸಿದ್ದು, ಅಂತರಾಷ್ಟ್ರೀಯ ಮಟ್ಟದಲ್ಲಿ ನಿಷೇಧಿತ ‘ವೈಟ್ ಫಾಸ್ಫರಸ್’ (White Phosphorus) ಬಳಸಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಈ ದಾಳಿಗೆ ಕೇವಲ ಒಂದು ವಾರದಲ್ಲಿ ಸುಮಾರು 400 ಮಂದಿ ಬಲಿಯಾಗಿದ್ದಾರೆ.
ಮಾನವ ಹಕ್ಕುಗಳ ಸಂಘಟನೆ ‘ಹ್ಯೂಮನ್ ರೈಟ್ಸ್ ವಾಚ್’ (HRW) ಬಿಡುಗಡೆ ಮಾಡಿದ ಇತ್ತೀಚಿನ ವರದಿ ಮತ್ತು ಜಿಯೋಲೋಕೇಟೆಡ್ ಚಿತ್ರಗಳು ಈ ಮಾರಕ ಅಸ್ತ್ರದ ಬಳಕೆಯನ್ನು ದೃಢಪಡಿಸಿದ್ದು, ಇಡೀ ವಿಶ್ವವನ್ನೇ ಬೆಚ್ಚಿಬೀಳಿಸಿದೆ.
ಏನಿದು ವೈಟ್ ಫಾಸ್ಪರಸ್?
ವೈಟ್ ಫಾಸ್ಫರಸ್ ಕೇವಲ ಸ್ಫೋಟಕವಲ್ಲ, ಅದೊಂದು ಅತ್ಯಂತ ಅಪಾಯಕಾರಿ ರಾಸಾಯನಿಕ ಪದಾರ್ಥ. ಮೇಣದಂತೆ ಕಾಣುವ ಈ ವಸ್ತು ಗಾಳಿಯ ಸಂಪರ್ಕಕ್ಕೆ ಬಂದ ತಕ್ಷಣ ಆಮ್ಲಜನಕದೊಂದಿಗೆ ಬೆರೆತು ಸ್ವಯಂಚಾಲಿತವಾಗಿ ಉರಿಯಲು ಪ್ರಾರಂಭಿಸುತ್ತದೆ. ಇದರ ತೀವ್ರತೆ ಎಷ್ಟಿರುತ್ತದೆ ಎಂದರೆ, ಇದು ಉರಿಯುವಾಗ ಸುಮಾರು 815 ಡಿಗ್ರಿ ಸೆಲ್ಸಿಯಸ್ ಶಾಖವನ್ನು ಹೊರಹಾಕುತ್ತದೆ. ಸಾಮಾನ್ಯ ಮಾನವ ದೇಹ 50-60 ಡಿಗ್ರಿ ಶಾಖವನ್ನೇ ತಡೆಯಲಾರದು, ಅಂತಹದರಲ್ಲಿ ಈ ತಾಪಮಾನವು ಜೀವಂತ ದಹನಕ್ಕೆ ಸಮಾನ.
ಮೂಳೆಗಳನ್ನು ಕರಗಿಸುವ ಶಕ್ತಿ: ಇದು ಚರ್ಮದ ಮೇಲೆ ಬಿದ್ದಾಗ ಮಾಂಸವನ್ನು ಸೀಳಿ ನೇರವಾಗಿ ಮೂಳೆಯವರೆಗೂ ಸುಡುತ್ತದೆ. ಇದರ ಗಾಯಗಳು ಎಂದಿಗೂ ವಾಸಿಯಾಗುವುದಿಲ್ಲ.
Iran israel War: ಯುದ್ಧ ಇನ್ನಷ್ಟು ವಿಸ್ತರಣೆ, ಕ್ಷಿಪಣಿ ದಾಳಿಯಲ್ಲಿ ಇನ್ನೊಬ್ಬ ಭಾರತೀಯ ಬಲಿ
ಶ್ವಾಸಕೋಶಕ್ಕೆ ಮಾರಕ: ಇದರಿಂದ ಹೊರಬರುವ ಹೊಗೆಯು ಶ್ವಾಸಕೋಶವನ್ನು ಸಂಪೂರ್ಣವಾಗಿ ಹಾನಿಗೊಳಿಸುತ್ತದೆ, ವ್ಯಕ್ತಿಯು ಉಸಿರುಗಟ್ಟಿ ತೀವ್ರವಾಗಿ ತಡಕಾಡಿ ಸಾವನ್ನಪ್ಪುತ್ತಾನೆ.
ಸುಡುತ್ತಿರುವ ಕಟ್ಟಡಗಳು, ಜನರ ಚೀರಾಟ
HRW ಸಂಶೋಧಕ ರಾಮ್ಜಿ ಕೈಸ್ ಪ್ರಕಾರ, ಇಸ್ರೇಲ್ ಸೇನೆಯು ದಕ್ಷಿಣ ಲೆಬನಾನ್ನ ಜನವಸತಿ ಪ್ರದೇಶಗಳಲ್ಲಿ ಫಾಸ್ಫರಸ್ ಫಿರಂಗಿ ದಾಳಿ ನಡೆಸಿದೆ. ಇಸ್ರೇಲ್ ಈ ಅಸ್ತ್ರವನ್ನು ಹೊಗೆಯ ಪರದೆಯಂತೆ (Smoke Screen) ಶತ್ರುಗಳ ಕಣ್ಣು ತಪ್ಪಿಸಲು ಬಳಸುತ್ತಿದ್ದೇನೆ ಎಂದು ವಾದಿಸುತ್ತಿದ್ದರೂ, ಜನವಸತಿ ಪ್ರದೇಶಗಳಲ್ಲಿ ಇದರ ಬಳಕೆ ಅಂತರಾಷ್ಟ್ರೀಯ ಕಾನೂನಿನ ಪ್ರಕಾರ ‘ಯುದ್ಧಾಪರಾಧ’ ಎಂದು ಪರಿಗಣಿಸಲಾಗುತ್ತದೆ.
ಲೆಬನಾನ್ ಆರೋಗ್ಯ ಸಚಿವಾಲಯದ ವರದಿಯಂತೆ, 2026ರ ಮಾರ್ಚ್ 2 ರಿಂದ ಮಾರ್ಚ್ 8 ರ ನಡುವೆ ನಡೆದ ದಾಳಿಗಳಲ್ಲಿ ಸಂಭವಿಸಿದ ಹಾನಿ ಹೀಗಿದೆ:
ಒಟ್ಟು ಸಾವು: 400 (ಇದರಲ್ಲಿ 83 ಮಕ್ಕಳು ಮತ್ತು 42 ಮಹಿಳೆಯರು ಸೇರಿದ್ದಾರೆ). ಗಾಯಗೊಂಡವರು: 1130ಕ್ಕೂ ಹೆಚ್ಚು ಮಂದಿ. ಗುರಿಪಡಿಸಿದ ಪ್ರದೇಶಗಳು: ದಕ್ಷಿಣ ಲೆಬನಾನ್, ಬೆಕಾ ಕಣಿವೆ ಮತ್ತು ಬೈರೂತ್ನ ವಸತಿ ಸಮುಚ್ಚಯಗಳು.
ಆರೋಗ್ಯ ಸಚಿವ ರಾಕನ್ ನಾಸ್ರೆದ್ದೀನ್ ಅವರು ಇದೊಂದು “ಘೋರ ಮಾನವೀಯ ದುರಂತ” ಎಂದು ಬಣ್ಣಿಸಿದ್ದಾರೆ. ಈ ರಾಸಾಯನಿಕದಿಂದ ಬದುಕುಳಿದವರೂ ಸಹ ಭವಿಷ್ಯದಲ್ಲಿ ಅಂಗಾಂಗ ವೈಫಲ್ಯ ಮತ್ತು ಆಳವಾದ ಸೋಂಕಿನಂತಹ ಮಾರಣಾಂತಿಕ ಕಾಯಿಲೆಗಳಿಗೆ ತುತ್ತಾಗುವ ಭೀತಿಯಲ್ಲಿದ್ದಾರೆ.
