ಅಮೆರಿಕದ ದಾಳಿಗೆ ಅರ್ಧಕ್ಕೆ ಕುಸಿದ ಇರಾನ್‌ನ ಐತಿಹಾಸಿಕ ಬಿ1 ಸೇತುವೆ; ಇಲ್ಲಿದೆ ವಿಡಿಯೊ

ಟೆಹರಾನ್, ಏ.3: ಮಧ್ಯಪ್ರಾಚ್ಯದಲ್ಲಿಯೇ ಅತಿ ಎತ್ತರದ ಇರಾನ್‌ನ ಐತಿಹಾಸಿಕ ಬಿ1 ಸೇತುವೆ, ಅಮೆರಿಕ-ಇಸ್ರೇಲಿ ಜಂಟಿ ದಾಳಿಯಿಂದ ಇಬ್ಭಾಗವಾಗಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಇರಾನ್ ಮೇಲೆ ಬಾಂಬ್ ದಾಳಿ ಮಾಡುವುದಾಗಿ ಎಚ್ಚರಿಕೆ ನೀಡಿದ ನಂತರ ಈ ದಾಳಿ ನಡೆದಿದೆ. ಕರಾಜ್‌ನಲ್ಲಿರುವ ಬಿ 1 ಸೇತುವೆಯನ್ನು ಶತ್ರು ರಾಷ್ಟ್ರ ಗುರಿಯಾಗಿಸಿಕೊಂಡಿತು (United States airstrike) ಎಂದು ಇರಾನ್ ಮಾಧ್ಯಮ ತಿಳಿಸಿದೆ. ದಾಳಿಯಲ್ಲಿ ಇಬ್ಬರು ನಾಗರಿಕರು ಮೃತಪಟ್ಟಿದ್ದಾರೆ.

ಈ ದಾಳಿಯಿಂದ ಅನೇಕರಿಗೆ ಗಾಯಗಳಾಗಿದ್ದು, ಸುತ್ತಮುತ್ತಲಿನ ಪ್ರದೇಶಗಳಿಗೆ ಹಾನಿಯಾಗಿದೆ ಎಂದು ಇರಾನಿನ ಸುದ್ದಿ ಸಂಸ್ಥೆ ಫಾರ್ಸ್ ವರದಿ ಮಾಡಿದೆ. ಇನ್ನೂ ನಿರ್ಮಾಣ ಹಂತದಲ್ಲಿದ್ದ ಸೇತುವೆಯು ಇರಾನ್‌ನ ರಾಜಧಾನಿ ಟೆಹರಾನ್‌ನಿಂದ ಪಶ್ಚಿಮ ನಗರವಾದ ಕರಾಜ್‌ಗೆ ಸಂಪರ್ಕ ಕಲ್ಪಿಸಬೇಕಿತ್ತು.

1,050 ಮೀಟರ್ ಉದ್ದದ 136 ಮೀಟರ್ ಎತ್ತರದ ಕಂಬದೊಂದಿಗೆ, ಡಾಲರ್ 400 ಮಿಲಿಯನ್ ಯೋಜನೆಯನ್ನು ಪ್ರಾದೇಶಿಕ ವ್ಯಾಪಾರವನ್ನು ಹೆಚ್ಚಿಸಲು ಮತ್ತು ಟೆಹರಾನ್ ಅನ್ನು ಉತ್ತರ ಪ್ರದೇಶಗಳೊಂದಿಗೆ ಸಂಪರ್ಕಿಸಲು ವಿನ್ಯಾಸಗೊಳಿಸಲಾಗಿದೆ. ಕರಾಜ್‌ನ ಅಜಿಮಿಯೆಹ್ ಪ್ರದೇಶದ ಸುತ್ತಲೂ ದಾಳಿಗಳು ಕೇಂದ್ರೀಕೃತವಾಗಿವೆ ಎಂದು ಫಾರ್ಸ್ ವರದಿ ಮಾಡಿದೆ.

ಇಲ್ಲಿದೆ ವಿಡಿಯೊ:

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಟ್ರೂತ್ ಸಾಮಾಜಿಕ ಮಾಧ್ಯಮದಲ್ಲಿ ಸ್ಫೋಟದ ವಿಡಿಯೊವನ್ನು ಹಂಚಿಕೊಂಡರು. ಇರಾನ್‌ನ ಅತಿದೊಡ್ಡ ಸೇತುವೆ ಉರುಳಲಿದೆ, ಮತ್ತೆ ಎಂದಿಗೂ ಬಳಸಲಾಗುವುದಿಲ್ಲ ಎಂದು ಎಚ್ಚರಿಸಿದರು. ಟೆಹರಾನ್ ತುಂಬಾ ತಡವಾಗುವ ಮೊದಲು ಒಪ್ಪಂದ ಮಾಡಿಕೊಳ್ಳಬೇಕು. ಇನ್ನೂ ಉತ್ತಮ ದೇಶವಾಗಲು ಏನೂ ಉಳಿದಿಲ್ಲ ಎಂದು ಹೇಳಿದರು.

ಇರಾಕ್‌ನಲ್ಲಿ ಇರಾನ್‌ನ ಶಹೀದ್ ಡ್ರೋನ್ ಹಿಂಬಾಲಿಸಿದ ಅಮೆರಿಕದ ಎಫ್ -15 ಜೆಟ್ ವಿಡಿಯೊ ವೈರಲ್

ಟೆಹರಾನ್‌ನಲ್ಲಿರುವ ವೈದ್ಯಕೀಯ ಸೌಲಭ್ಯದ ಮೇಲೆ ದಾಳಿ ನಡೆದಿದೆ ಎಂದು ಇರಾನ್ ಅಧಿಕಾರಿಗಳು ಹೇಳಿದ್ದಾರೆ. ಶತಮಾನದಷ್ಟು ಹಳೆಯದಾದ ಸಂಶೋಧನಾ ಕೇಂದ್ರವಾದ ಪಾಶ್ಚರ್ ಇನ್‌ಸ್ಟಿಟ್ಯೂಟ್ ಆಫ್ ಇರಾನ್ ಎಂದು ಗುರುತಿಸಲಾದ ಕಟ್ಟಡಕ್ಕೆ ಹಾನಿಯಾಗಿರುವ ಚಿತ್ರಗಳನ್ನು ಆರೋಗ್ಯ ಸಚಿವಾಲಯ ಬಿಡುಗಡೆ ಮಾಡಿದೆ.

ಇದಕ್ಕೂ ಮುನ್ನ ಮಾತನಾಡಿದ ಟ್ರಂಪ್, ಇರಾನ್ ವಿರುದ್ಧ ಅಮೆರಿಕ-ಇಸ್ರೇಲಿ ಗೆಲುವು ಸಾಧಿಸಿರುವುದಾಗಿ ಹೇಳಿದರು. ಅಮೆರಿಕದ ಮಿಲಿಟರಿಯು ಟೆಹರಾನ್‌ನ ಮಿಲಿಟರಿ ಪರಾಕ್ರಮವನ್ನು ನಾಶಪಡಿಸಿದೆ ಎಂದು ತಿಳಿಸಿದರು.

ಶ್ವೇತಭವನದಿಂದ ಸುಮಾರು 19 ನಿಮಿಷಗಳ ಭಾಷಣ ಮಾಡಿದ ಟ್ರಂಪ್, ಮುಂದಿನ ಎರಡ್ಮೂರು ವಾರಗಳಲ್ಲಿ ಅಮೆರಿಕವು ಇರಾನ್ ಮೇಲೆ ಅತ್ಯಂತ ಕಠಿಣ ದಾಳಿ ನಡೆಸಲಿದೆ ಎಂದು ಘೋಷಿಸಿದರು. ಇರಾನ್ ಒಪ್ಪಂದ ಮಾಡಿಕೊಳ್ಳದಿದ್ದರೆ ಅದರ ಎಲ್ಲಾ ವಿದ್ಯುತ್ ಉತ್ಪಾದನಾ ಸ್ಥಾವರಗಳನ್ನು ನಾಶಮಾಡುವುದಾಗಿ ಮತ್ತು ಅದರ ತೈಲ ತಾಣಗಳನ್ನು ಗುರಿಯಾಗಿಸುವುದಾಗಿ ಬೆದರಿಕೆ ಹಾಕಿದರು. ನಾವು ಅವರನ್ನು ಮತ್ತೆ ಶಿಲಾಯುಗಕ್ಕೆ ಕರೆದೊಯ್ಯಲಿದ್ದೇವೆ ಎಂದು ಅವರು ಎಚ್ಚರಿಸಿದರು.

ಅಮೆರಿಕ-ಇಸ್ರೇಲ್-ಇರಾನ್ ಯುದ್ಧವು ಎರಡನೇ ತಿಂಗಳನ್ನು ಪ್ರವೇಶಿಸಿದೆ. ಈ ಪ್ರದೇಶದಲ್ಲಿ ಮಿಲಿಟರಿ ಕಾರ್ಯಾಚರಣೆಗಳು ಪೂರ್ಣ ವೇಗದಲ್ಲಿ ಮುಂದುವರೆದಿವೆ.