Rahul Gandhi: "ನಿಮ್ಮ ಕಳ್ಳಾಟ ಜನರಿಗೆ ಈಗ ತಿಳಿದಿದೆ"; ವೋಟ್‌ ಚೋರಿ ಕುರಿತು ವಿಡಿಯೋ ಹಂಚಿಕೊಂಡ ರಾಹುಲ್‌ ಗಾಂಧಿ

ನವದೆಹಲಿ: ಕಾಂಗೆಸ್‌ ನಾಯಕ ರಾಹುಲ್‌ ಗಾಂಧಿ (Rahul Gandhi) ಶನಿವಾರ ಚುನಾವಣಾ ಆಯೋಗದ ವಿರುದ್ಧ ಮತ್ತೆ ವಾಗ್ದಾಳಿ ನಡೆಸಿದ್ದಾರೆ. ವೋಟ್‌ ಚೋರಿ (Voti Chori) ಆರೋಪವನ್ನು ಮತ್ತೆ ಮಾಡಿದ ರಾಹುಲ್‌, ಹೊಸ ವಿಡಿಯೋ ಒಂದನ್ನು ಹರಿ ಬಿಟ್ಟಿದ್ದಾರೆ. ಬಾಲಿವುಡ್ ಸಿನಿಮಾಗಳನ್ನು ಉಲ್ಲೇಖಿಸಿದ ಕಾಂಗ್ರೆಸ್, ಶನಿವಾರ "ಮತಗಳ್ಳತನ" ಆರೋಪದ ವಿರುದ್ಧ "ಲಾಪಾತಾ ವೋಟ್" ಎಂಬ ಹೊಸ ವಿಡಿಯೋವನ್ನು ಬಿಡುಗಡೆ ಮಾಡುವ ಮೂಲಕ ಚುನಾವಣಾ ಆಯೋಗದ ವಿರುದ್ಧದ ತನ್ನ ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸಿದೆ. ರಾಹುಲ್ ಗಾಂಧಿ, "'ಚೋರಿ ಚೋರಿ, ಚುಪ್ಕೆ ಚುಪ್ಕೆ' ಇನ್ನು ಮುಂದೆ ನಡೆಯಲ್ಲ. ಜನ ಈಗ ಎಚ್ಚೆತ್ತುಕೊಂಡಿದ್ದಾರೆ" ಎಂಬ ಶೀರ್ಷಿಕೆಯಡಿಯಲ್ಲಿ ವಿಡಿಯೋ ಹರಿಬಿಟ್ಟಿದ್ದಾರೆ.

ಕಳ್ಳತನದ ದೂರು ದಾಖಲಿಸಲು ಮಧ್ಯವಯಸ್ಕ ವ್ಯಕ್ತಿಯೊಬ್ಬ ಪೊಲೀಸ್ ಠಾಣೆಗೆ ಪ್ರವೇಶಿಸುವುದನ್ನು ವೀಡಿಯೊ ತೋರಿಸುತ್ತದೆ. ಏನು ಕದ್ದಿದೆ ಎಂದು ಅಧಿಕಾರಿ ಕೇಳಿದಾಗ, ಆ ವ್ಯಕ್ತಿ ಒಂದು ಕ್ಷಣ ನಿಂತು, "ನನ್ನ ಮತ" ಎಂದು ಹೇಳುತ್ತಾನೆ. ಆಶ್ಚರ್ಯಚಕಿತನಾದ ಪೊಲೀಸ್, "ಯಾರಾದರೂ ಮತವನ್ನು ಹೇಗೆ ಕದಿಯಬಹುದು?" ಎಂದು ಕೇಳುತ್ತಾನೆ. ಇದಕ್ಕೆ ಆ ವ್ಯಕ್ತಿ, "ನಕಲಿ ಮತಗಳ ಮೂಲಕ ಲಕ್ಷಾಂತರ ಮತಗಳನ್ನು ಕದಿಯಲಾಗುತ್ತಿದೆ" ಎಂದು ಉತ್ತರಿಸುತ್ತಾನೆ. "ಯಾರ ಮತವನ್ನು ಕದಿಯುವುದು ಅವರ ಹಕ್ಕನ್ನು ಕದಿಯುವುದಕ್ಕೆ ಸಮಾನ" ಎಂಬ ಬಲವಾದ ಸಂದೇಶದೊಂದಿಗೆ ದೃಶ್ಯವು ಪರದೆಯ ಮೇಲೆ ಕೊನೆಗೊಳ್ಳುತ್ತದೆ.

ಒಂದು ನಿಮಿಷದ ವಿಡಿಯೋಗೆ ಲಾಪಾತಾ ವೋಟ್ ಎಂದು ಹೆಸರಿಸಲಾಗಿದ್ದು, 'ಲೇಡೀಸ್' ಅನ್ನು ತೆಗೆದು ಹಾಕಲಾಗಿದೆ. ಇದು ಕಿರಣ್ ರಾವ್ ನಿರ್ದೇಶನದ 'ಲಾಪತಾ ಲೇಡಿಸ್‌ ಎಂಬುದನ್ನು ಲಾಪತಾ ವೋಟ್‌ ಎಂದು ಮಾಡಲಾಗಿದೆ. ರಾಹುಲ್ ಗಾಂಧಿಯವರು ಆ ಒಂದು ನಿಮಿಷದ ವಿಡಿಯೋವನ್ನು ಹಂಚಿಕೊಂಡಿದ್ದು, "ಆಪ್ಕೆ ವೋಟ್ ಕಿ ಚೋರಿ ಆಪ್ಕೆ ಅಧಿಕಾರ್ ಕಿ ಚೋರಿ, ಆಪ್ಕಿ ಪೆಹಚಾನ್ ಕಿ ಚೋರಿ ಹೈ ಎಂದು ಹೇಳಿದ್ದಾರೆ.

ಈ ಸುದ್ದಿಯನ್ನೂ ಓದಿ: Rahul Gandhi: ಮತಗಳ್ಳತನ ಆರೋಪ; ದಾಖಲೆ ನೀಡುವಂತೆ ರಾಹುಲ್‌ ಗಾಂಧಿಗೆ ಚುನಾವಣಾ ಆಯೋಗ ನೋಟಿಸ್‌

ಈ ಮಧ್ಯೆ ಗುರುವಾರ ಚುನಾವಣಾ ಆಯೋಗವು, 'ವೋಟ್ ಚೋರಿ' ನಂತಹ ಕೊಳಕು ನುಡಿಗಟ್ಟುಗಳನ್ನು ಬಳಸಿಕೊಂಡು ನಕಲಿ ನಿರೂಪಣೆಗಳನ್ನು ಒದಗಿಸುವ ಬದಲು ಕಾಂಗ್ರೆಸ್ ನಾಯಕರು ಪುರಾವೆಗಳನ್ನು ನೀಡಬೇಕು ಎಂದು ಹೇಳಿದೆ. ಯಾವುದೇ ವ್ಯಕ್ತಿ ಯಾವುದೇ ಚುನಾವಣೆಯಲ್ಲಿ ಎರಡು ಬಾರಿ ಮತ ಚಲಾಯಿಸಿರುವ ಬಗ್ಗೆ ಯಾವುದೇ ಪುರಾವೆ ಇದ್ದರೆ, ಅದನ್ನು ಯಾವುದೇ ಪುರಾವೆ ಇಲ್ಲದೆ ಭಾರತದ ಎಲ್ಲಾ ಮತದಾರರನ್ನು 'ಚೋರ್' ಎಂದು ಬಣ್ಣಿಸುವ ಬದಲು ಲಿಖಿತ ಅಫಿಡವಿಟ್‌ನೊಂದಿಗೆ ಚುನಾವಣಾ ಆಯೋಗದೊಂದಿಗೆ ಹಂಚಿಕೊಳ್ಳಬೇಕು" ಎಂದು ಚುನಾವಣಾ ಸಂಸ್ಥೆ ಹೇಳಿಕೆಯಲ್ಲಿ ತಿಳಿಸಿದೆ.