BWF World Championships: ಕ್ವಾರ್ಟರ್ಫೈನಲ್ನಲ್ಲಿ ಸೋಲು ಅನುಭವಿಸಿದ ಸಾತ್ವಿಕ್-ಚಿರಾಗ್ ಜೋಡಿ!
ಬಿಡಬ್ಲ್ಯುಎಫ್ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್ನ ಕ್ವಾರ್ಟರ್ ಫೈನಲ್ನಲ್ಲಿ ಸಾತ್ವಿಕ್ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಜೋಡಿ ಚೀನಾದ ಲಿಯಾಂಗ್ ವೀ ಕೆಂಗ್ ಮತ್ತು ವಾಂಗ್ ಚಾಂಗ್ ವಿರುದ್ಧ 18-21, 9-21 ಅಂತರದಲ್ಲಿ ಸೋಲು ಅನುಭವಿಸಿತು. ಆ ಮೂಲಕ ಟೂರ್ನಿಯಲ್ಲಿ ತನ್ನ ಅಭಿಯಾನವನ್ನು ಮುಗಿಸಿತು.
ಸಾತ್ವಿಕ್ಸಾಯಿರಾಜ್-ಚಿರಾಗ್ ಶೆಟ್ಟಿ ಜೋಡಿಗೆ ನಿರಾಶೆ. -
ನವದೆಹಲಿ: ಬಿಡಬ್ಲ್ಯುಎಫ್ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್ನಲ್ಲಿ ( BWF World Championships 2026) ಭಾರತದ ಸ್ಟಾರ್ ಪುರುಷರ ಡಬಲ್ಸ್ ಜೋಡಿ ಸಾತ್ವಿಕ್ಸಾಯಿರಾಜ್ ರಾಂಕಿರೆಡ್ಡಿ (Satwiksairaj Rankireddy) ಮತ್ತು ಚಿರಾಗ್ ಶೆಟ್ಟಿ (Chirag Shetty) ಅವರ ಹೋರಾಟ ನಿರಾಶಾದಾಯಕವಾಗಿ ಅಂತ್ಯಗೊಂಡಿದೆ. ಸತತ ಮೂರನೇ ಪದಕ ಗೆಲ್ಲುವ ಕನಸಿನೊಂದಿಗೆ ಕಣಕ್ಕಿಳಿದಿದ್ದ ಭಾರತೀಯ ಜೋಡಿ ಕ್ವಾರ್ಟರ್ಫೈನಲ್ನಲ್ಲಿ ಸೋಲು ಅನುಭವಿಸಿದೆ. ವಿಶ್ವದ 3ನೇ ಶ್ರೇಯಾಂಕದ ಚೀನಾದ ಜೋಡಿಯಾದ ಲಿಯಾಂಗ್ ವೀ ಕೆಂಗ್ ಮತ್ತು ವಾಂಗ್ ಚಾಂಗ್, ಕೇವಲ 36 ನಿಮಿಷಗಳಲ್ಲಿ ನೇರ ಗೇಮ್ಗಳಲ್ಲಿ ಸಾತ್ವಿಕ್–ಚಿರಾಗ್ ಜೋಡಿಯನ್ನು ಮಣಿಸಿ ಟೂರ್ನಿಯಿಂದ ಹೊರಹಾಕಿದರು.
ಪಂದ್ಯದ ಆರಂಭದಲ್ಲೇ ಸಾತ್ವಿಕ್ ಮತ್ತು ಚಿರಾಗ್ ಆಕ್ರಮಣಕಾರಿ ಆಟಕ್ಕೆ ಮುಂದಾದರು. ಮೊದಲ ಗೇಮ್ನಲ್ಲಿ ಎರಡೂ ಜೋಡಿಗಳ ನಡುವೆ ಪ್ರತಿಯೊಂದು ಪಾಯಿಂಟ್ಗಾಗಿ ತೀವ್ರ ಪೈಪೋಟಿ ಕಂಡುಬಂತು. ಭಾರತೀಯ ಜೋಡಿ ನೆಟ್ ಬಳಿ ಅತ್ಯುತ್ತಮ ನಿಯಂತ್ರಣ ಪ್ರದರ್ಶಿಸಿ, ಹಾಫ್ಟೈಮ್ ಬ್ರೇಕ್ ವೇಳೆಗೆ 11-10ರ ಅಲ್ಪ ಮುನ್ನಡೆ ಸಾಧಿಸಿತ್ತು. ಬ್ರೇಕ್ ಬಳಿಕವೂ ಸಾತ್ವಿಕ್–ಚಿರಾಗ್ ತಮ್ಮ ನಿಖರವಾದ ಆಂಗಲ್ ರಿಟರ್ನ್ಗಳ ಮೂಲಕ ಪ್ರಾಬಲ್ಯ ಮುಂದುವರಿಸಿ 16-14ರ ಮುನ್ನಡೆ ಪಡೆದುಕೊಂಡಿದ್ದರು.
ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ಷಿಪ್: 15 ವರ್ಷಗಳ ನಂತರ ಭಾರತಕ್ಕೆ ಪದಕ ಖಚಿತಪಡಿಸಿದ ಟ್ರಿಸಾ–ಗಾಯತ್ರಿ ಜೋಡಿ
ಆದರೆ ಇದಾದ ಬಳಿಕ ಪಂದ್ಯದ ಚಿತ್ರಣವೇ ಬದಲಾಯಿತು. ಭಾರತೀಯ ಜೋಡಿ ಮಾಡಿದ ತಪ್ಪುಗಳ ಲಾಭ ಪಡೆದ ಚೀನಾದ ಆಟಗಾರರು ಭರ್ಜರಿ ಕಮ್ಬ್ಯಾಕ್ ಮಾಡಿ ಸ್ಕೋರ್ ಅನ್ನು 18-18ರಿಂದ ಸಮಬಲಗೊಳಿಸಿದರು. ಬಳಿಕ ಚಿರಾಗ್ ನೆಟ್ನಲ್ಲಿ ಮಾಡಿದ ತಪ್ಪು ಹಾಗೂ ಸಾತ್ವಿಕ್ ಹೊಡೆದ ಶಾಟ್ ಹೊರಗೆ ಹೋದ ಪರಿಣಾಮ ಚೀನಾದ ಜೋಡಿ ಸತತ ಅಂಕಗಳನ್ನು ಕಲೆಹಾಕಿತು. ಒತ್ತಡವನ್ನು ಹೆಚ್ಚಿಸಿದ ಚೀನಾದ ಜೋಡಿ ಮೊದಲ ಗೇಮ್ನ್ನು 21-18ರಿಂದ ಗೆದ್ದುಕೊಂಡಿತು.
ಮೊದಲ ಗೇಮ್ ಗೆದ್ದ ಬಳಿಕ ಚೀನಾದ ಆಟಗಾರರ ಆತ್ಮವಿಶ್ವಾಸ ಮತ್ತಷ್ಟು ಹೆಚ್ಚಾಯಿತು. ಎರಡನೇ ಗೇಮ್ನಲ್ಲೂ ಅವರು ಸಾತ್ವಿಕ್–ಚಿರಾಗ್ಗೆ ಚೇತರಿಸಿಕೊಳ್ಳಲು ಯಾವುದೇ ಅವಕಾಶ ನೀಡಲಿಲ್ಲ. ಆರಂಭದಿಂದಲೇ ವೇಗದ ರ್ಯಾಲಿಗಳಲ್ಲಿ ಪ್ರಾಬಲ್ಯ ಸಾಧಿಸಿದ ಚೀನಾದ ಜೋಡಿ, ಬ್ರೇಕ್ ವೇಳೆಗೆ 11-5ರ ಭರ್ಜರಿ ಮುನ್ನಡೆ ಪಡೆದುಕೊಂಡಿತು. ಮತ್ತೊಂದೆಡೆ, ಚಿರಾಗ್ ಸರ್ವಿಸ್ನಲ್ಲಿ ತಪ್ಪುಗಳನ್ನು ಮಾಡಿದರು. ಇಡೀ ಭಾರತೀಯ ಜೋಡಿ ತಮ್ಮ ಲಯವನ್ನು ಮರಳಿ ಪಡೆಯಲು ಪರದಾಡುತ್ತಿರುವುದು ಕಂಡುಬಂತು.
World Championships: 16ನೇ ಸುತ್ತಿನಲ್ಲಿ ಸೋತು, ಟೂರ್ನಿಯಿಂದ ಹೊರಬಿದ್ದ ಕನ್ನಡಿಗ ಆಯುಷ್ ಶೆಟ್ಟಿ!
ಎರಡನೇ ಗೇಮ್ನ ಉತ್ತರಾರ್ಧದಲ್ಲಿ ಚೀನಾದ ಆಟಗಾರರು ಕೋರ್ಟ್ನ ಪ್ರತಿಯೊಂದು ಮೂಲೆಯಲ್ಲೂ ಅದ್ಭುತ ಶಾಟ್ಗಳನ್ನು ಬಾರಿಸಿ, ಭಾರತೀಯ ಜೋಡಿಯ ರಕ್ಷಣಾತ್ಮಕ ಆಟವನ್ನು ಸಂಪೂರ್ಣವಾಗಿ ಛಿದ್ರಗೊಳಿಸಿದರು. 17-9ರ ಭರ್ಜರಿ ಮುನ್ನಡೆ ಸಾಧಿಸಿದ್ದ ಚೀನಾದ ಜೋಡಿ ಸುಲಭವಾಗಿ 9 ಮ್ಯಾಚ್ ಪಾಯಿಂಟ್ಗಳನ್ನು ಗಳಿಸಿತು. ಮೊದಲ ಅವಕಾಶವನ್ನೇ ಸದುಪಯೋಗಪಡಿಸಿಕೊಂಡ ಅವರು ಎರಡನೇ ಗೇಮ್ನ್ನು 21-9ರಿಂದ ಗೆದ್ದು ಪಂದ್ಯವನ್ನು ತಮ್ಮದಾಗಿಸಿಕೊಂಡರು. ಈ ಸೋಲಿನೊಂದಿಗೆ ಸಾತ್ವಿಕ್ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಅವರ ಮೂರನೇ ವಿಶ್ವ ಚಾಂಪಿಯನ್ಶಿಪ್ ಪದಕ ಗೆಲ್ಲುವ ಕನಸು ಭಗ್ನವಾಯಿತು.