Pralhad Joshi Column: ಜಿಎಎಸ್‌ʼಟಿ ಮನ್ವಂತರ: ಉಳಿತಾಯ ಮತ್ತು ಸಮೃದ್ಧಿಯ ಅವಕಾಶ

ಕ್ರಾಂತಿ ಪರ್ವ

ಪ್ರಲ್ಹಾದ್‌ ಜೋಶಿ

ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರಕಾರವು ಆಡಳಿತಕ್ಕೆ ಬಂದ ದಿನದಿಂದಲೂ ಜನರ ಕಲ್ಯಾಣ ಕ್ಕಾಗಿ ‘ಸುಲಭ ಜೀವನ-ಸುಖೀ ಜೀವನ’ ಧ್ಯೇಯಕ್ಕೆ ಬದ್ಧವಾದ ಕಾರ್ಯಯೋಜನೆ ಗಳೊಂದಿಗೆ ಹೆಜ್ಜೆ ಹಾಕುತ್ತಿದೆ. ‘ಆಯುಷ್ಮಾನ್ ಭಾರತ್’ ಯೋಜನೆ ಮೂಲಕ ಬಡವರಿಗೆ ಉಚಿತ ಆರೋಗ್ಯ ಸೇವೆ, ‘ಪ್ರಧಾನಮಂತ್ರಿ ಆವಾಸ್’ ಯೋಜನೆ ಮೂಲಕ ಕೋಟ್ಯಂತರ ಬಡ ಕುಟುಂಬಗಳಿಗೆ ಮನೆ ಮತ್ತು ಇದೀಗ ‘ NEXT GEN GST’ ಮೂಲಕ ಆರ್ಥಿಕ ಸಮಾನತೆ ಕಲ್ಪಿಸಿದ ಜನಪರ ಸರಕಾರವಾಗಿದೆ.

ಭಾರತದ ಅರ್ಥವ್ಯವಸ್ಥೆಗೆ ಸುಭದ್ರ ಬುನಾದಿ ಹಾಕಿಕೊಟ್ಟ ಜಿಎಸ್‌ಟಿ ಇದೀಗ ಒಂಬತ್ತನೇ ಹಣಕಾಸು ವರ್ಷವನ್ನು ಪ್ರವೇಶಿಸಿದೆ. ಭಾರತವು ವಿಶ್ವದ 3ನೇ ಬಲಿಷ್ಠ ಆರ್ಥಿಕತೆಯ ಹೊಸ್ತಿಲಲ್ಲಿರುವಾಗ ‘ಸರ್ವೇ ಜನಾಃ ಸುಖಿನೋ ಭವಂತು, ಸರ್ವೇ ಸಂತು ನಿರಾಮಯಾಃ’ ಎನ್ನುವುದಕ್ಕೆ ಅನ್ವರ್ಥಕವಾಗಿ ಹೊಸ ಸ್ವರೂಪ ಪಡೆದುಕೊಂಡಿದೆ.

ನಾಡಹಬ್ಬ ‘ನವರಾತ್ರಿ’ಗೆ ನರೇಂದ್ರ ಮೋದಿಯವರು ‘ಜನೋಪಯೋಗಿ ಜಿಎಸ್‌ಟಿ-2’ ಅನ್ನು ಉಡುಗೊರೆ ರೂಪದಲ್ಲಿ ನೀಡಿದ್ದಾರೆ. ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರಕಾರವು ಆಡಳಿತಕ್ಕೆ ಬಂದ ದಿನದಿಂದಲೂ ಜನರ ಕಲ್ಯಾಣಕ್ಕಾಗಿ ‘ಸುಲಭ ಜೀವನ- ಸುಖೀ ಜೀವನ’ ಧ್ಯೇಯಕ್ಕೆ ಬದ್ಧ ವಾದ ಕಾರ್ಯಯೋಜನೆಗಳೊಂದಿಗೆ ಹೆಜ್ಜೆ ಹಾಕುತ್ತಿದೆ.

‘ಆಯುಷ್ಮಾನ್ ಭಾರತ್’ ಯೋಜನೆ ಮೂಲಕ ಬಡವರಿಗೆ ಉಚಿತ ಆರೋಗ್ಯ ಸೇವೆ, ‘ಜಲ್ ಜೀವನ್ ಮಿಷನ್’ ಮೂಲಕ ಪ್ರತಿ ಮನೆಗೂ ಶುದ್ಧ ಕುಡಿಯುವ ನೀರು, ‘ಪ್ರಧಾನಮಂತ್ರಿ ಆವಾಸ್’ ಯೋಜನೆ ಮೂಲಕ ಕೋಟ್ಯಂತರ ಬಡ ಕುಟುಂಬಗಳಿಗೆ ಮನೆ ಮತ್ತು ಇದೀಗ ’ NEXT GEN GST’ ಮೂಲಕ ಆರ್ಥಿಕ ಸಮಾನತೆ ಕಲ್ಪಿಸಿದ ಜನಪರ ಸರಕಾರವಾಗಿದೆ.

ಇದನ್ನೂ ಓದಿ: Pralhad Joshi: ಜನರಿಗೆ ಕೈಗೆಟುಕುವ ಬೆಲೆಯಲ್ಲಿ ʼಈರುಳ್ಳಿʼ ಲಭ್ಯವಾಗುವಂತೆ ಕ್ರಮ ಕೈಗೊಳ್ಳಿ: ಅಧಿಕಾರಿಗಳಿಗೆ ಜೋಶಿ ಸೂಚನೆ

ಎನ್‌ಡಿಎ ಸರಕಾರವು ಮೂರನೇ ಅವಧಿಯ ಆಡಳಿತದಲ್ಲೂ ಜನಸಾಮಾನ್ಯರ ಜೀವನಮಟ್ಟ ಸುಲಭಗೊಳಿಸುವ ಮಹತ್ವದ ನಿರ್ಣಯಗಳನ್ನು ಕೈಗೊಂಡಿದೆ. ಜನಹಿತದ ‘ NEXT GEN GST ’ಯೇ ಇದಕ್ಕೆ ಸಾಕ್ಷಿ. ಭವಿಷ್ಯದ ಪೀಳಿಗೆಗೆ ( Next Gen) ವರದಾನ ಎನ್ನುವಂತೆ ಸರಳ-ಸುಲಭ ‘ಜಿಎಸ್‌ಟಿ-2’ ತೆರಿಗೆ ವ್ಯವಸ್ಥೆಯನ್ನು ಸಾಕಾರಗೊಳಿಸಲು ಶ್ರೀಕಾರ ಹಾಡಿದೆ.

ದಿನಬಳಕೆಯ ಶೇ.99ರಷ್ಟು ವಸ್ತುಗಳನ್ನು ಶೂನ್ಯ ಮತ್ತು ಶೇ.5ರ ತೆರಿಗೆ ದರ ವ್ಯಾಪ್ತಿಗೆ ತರಲಾಗಿದೆ. ಜೀವನ ಭದ್ರತೆಯ ವಿಮೆ ಸೇರಿದಂತೆ ದಿನೋಪಯೋಗಿ ಶಾಂಪೂ, ಸಾಬೂನು, ವಾಷಿಂಗ್ ಪೌಡರ್ ಹೀಗೆ ಸಾಕಷ್ಟು ವಸ್ತುಗಳು ಶೂನ್ಯ ಮತ್ತು ಅತ್ಯಂತ ಅಗ್ಗದ ಶೇ.5ರ ಕರವ್ಯಾಪ್ತಿಗೆ ಒಳಪಟ್ಟಿವೆ. ಈ ಮೂಲಕ ಸಮಸ್ತ ನಾಗರಿಕರಿಗೂ ಉಳಿತಾಯ-ಆದಾಯ ಹಾಗೂ ಖರೀದಿಯನ್ನು ಸುಗಮಗೊಳಿಸಿ ಜೀವನ ಮಟ್ಟವನ್ನು ಉತ್ತಮಗೊಳಿಸುವಲ್ಲಿ ಮುಂದಡಿ ಇಟ್ಟಿದೆ ಮೋದಿ ಸರಕಾರ.

‘ಒಂದು ರಾಷ್ಟ್ರ, ಒಂದು ತೆರಿಗೆ’ ಪರಿಕಲ್ಪನೆಯಲ್ಲಿ 2017ರ ಜುಲೈ 1ರಿಂದ ಜಾರಿಗೊಂಡ ಜಿಎಸ್‌ಟಿ ದೇಶದಲ್ಲಿ ಹೊಸ ಇತಿಹಾಸವನ್ನೇ ಸೃಷ್ಟಿಸಿತ್ತು. ಆರ್ಥಿಕ ತಳಮಟ್ಟದಲ್ಲಿದ್ದ, ದುರ್ಬಲ ಐದು ( Fragile Five) ರಾಷ್ಟ್ರಗಳಲ್ಲಿ ಒಂದು ಎಂದು ಕರೆಯಲ್ಪಡುತ್ತಿದ್ದ ಭಾರತಕ್ಕೆ ಸಕಾಲಿಕ ವಾಗಿ ಅರ್ಥ ಚೈತನ್ಯ ತುಂಬಿ ಜಗತ್ತಿನ 4ನೇ ಅತಿದೊಡ್ಡ ಆರ್ಥಿಕ ಶಕ್ತಿಯಾಗಿ ನಿರೂಪಿಸುವಲ್ಲಿ ತನ್ನದೇ ಆದ ಕೊಡುಗೆಯನ್ನು ಜಿಎಸ್‌ಟಿ ನೀಡಿತ್ತು. ಇದೀಗ ಮತ್ತೊಂದು ಹಂತದ ಮೇಲ್ಪಂಕ್ತಿಗೇರುವ ಗುರಿ ಯೊಂದಿಗೆ ’ NEXT GEN GST’ ರೂಪಾಂತರವು ಆರ್ಥಿಕ ಅಲೆಯನ್ನು ಎಬ್ಬಿಸಲಿದೆ.

’NEXT GEN GST’ ಸುಧಾರಣೆಯು ತೆರಿಗೆ ದರದ ಬದಲಾವಣೆ ಮಾತ್ರವಲ್ಲ; ಇದು ಪ್ರತಿಯೊಬ್ಬರ ಜೀವನಮಟ್ಟವನ್ನು ಸುಧಾರಿಸುವ, ಉಳಿತಾಯವನ್ನು ವೃದ್ಧಿಸುವ, ಆರ್ಥಿಕತೆಯನ್ನು ಬಲಪಡಿ ಸುವ ಒಂದು ಸಮಗ್ರನೋಟ. ಬಡವರು, ಯುವಕರು, ರೈತರು, ಮಹಿಳೆಯರು ಮತ್ತು ಮಧ್ಯಮ ವರ್ಗ ಹೀಗೆ ಎಲ್ಲರಿಗೂ ಲಾಭ ತೋರುವ ‘ಸರ್ವ ಸಮಾನತೆ’ಯ ಆರ್ಥವಿನ್ಯಾಸದ ಪ್ರತೀಕವಾಗಿದೆ. ಭಾರತ-ಭಾರತೀಯರೆಲ್ಲರ ಪಾಲಿಗೆ ಒಂದು ರೀತಿ ‘ಅಕ್ಷಯ ಪಾತ್ರೆ’ಯಾಗುವ ಆಶಾಭಾವನೆಯನ್ನು ಹುಟ್ಟು ಹಾಕಿದೆ.

ವಿಕಸಿತ ಭಾರತಕ್ಕೆ ಪ್ರೇರಣೆ: ಕಳೆದೆಂಟು ವರ್ಷಗಳಿಂದ ಸರಕು- ಸೇವಾ ತೆರಿಗೆಯು ಭಾರತದ ನಾಗರಿಕತೆ, ಆರ್ಥಿಕತೆ ಜತೆಗೆ ಔದ್ಯಮಿಕವಾಗಿ ಹೊಸ ಮನ್ವಂತರಕ್ಕೆ ನಾಂದಿ ಹಾಡಿತು. ಭವಿಷ್ಯದಲ್ಲಿ ’ NEXT GEN GST’ ಸಹ ವಿಶೇಷವಾಗಿ ಬಡವರು, ಮಹಿಳೆಯರು, ಯುವಕರು, ಕೃಷಿಕರು ಹಾಗೂ ಸಣ್ಣ ಮತ್ತು ಮಧ್ಯಮ ಉದ್ಯಮಿಗಳಿಗೆ ಉತ್ತೇಜನ ನೀಡಲಿದೆ.

ಭಾರತೀಯ ನಾಗರಿಕರ ಜೀವನ ಮಟ್ಟವನ್ನು ಉನ್ನತೀಕರಿಸುವುದರ ಜತೆಗೆ ಪ್ರತಿ ಉತ್ಪನ್ನಗಳ ಬಳಕೆ, ಉದ್ಯಮಗಳ ಬೆಳವಣಿಗೆಯನ್ನೂ ಉತ್ತೇಜಿಸುತ್ತದೆ. ವ್ಯಾಪಾರ-ವಹಿವಾಟಿನಲ್ಲಿ ಹೂಡಿಕೆಯನ್ನು ಹೆಚ್ಚಿಸುತ್ತದೆ. ಸಕಲ ವಲಯಗಳಲ್ಲೂ ಯುವ ಸಮುದಾಯಕ್ಕೆ ಬೃಹತ್ ಉದ್ಯೋಗಾವಕಾಶವನ್ನು ಇದು ಸೃಷ್ಟಿಸಲಿದೆ. ಈ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಅವರ ಆಶಯದಂತೆ ‘ವಿಕಸಿತ ಭಾರತ’ದ ನಿರ್ಮಾಣಕ್ಕೆ ಪ್ರೇರಣೆಯಾಗಲಿದೆ.

ದೇಶದ ತೆರಿಗೆ ವ್ಯವಸ್ಥೆಯಲ್ಲಿ ‘ಏಕೀಕರಣ’ದ ಹೊಸ ಅಧ್ಯಾಯ ಬರೆದ ಜಿಎಸ್‌ಟಿಯು ಆಮೂಲಾಗ್ರ ಬದಲಾವಣೆ ತಂದು ಬಲಿಷ್ಠ ಆರ್ಥಿಕತೆಗೆ ನಾಂದಿ ಹಾಡಿತು. ಯುದ್ಧದ ಬಿಕ್ಕಟ್ಟಿನ ಸನ್ನಿವೇಶದಲ್ಲಿ ವಿಶ್ವವೇ ಆರ್ಥಿಕ ಸಂದಿಗ್ಧತೆಗೆ ಸಿಲುಕಿ ನಲುಗುತ್ತಿದ್ದರೆ, ನಮ್ಮ ದೇಶವು ಜಗತ್ತಿನ ಅರ್ಥಪಟದಲ್ಲಿ 4ನೇ ಸ್ಥಾನದಲ್ಲಿ ಪ್ರಜ್ವಲಿಸುತ್ತಿದೆ. ಪ್ರಸ್ತುತ ಜಿಡಿಪಿ ಸಹ ಶೇ.7.8ಕ್ಕೆ ವೃದ್ಧಿಸಿದೆ. ಹೀಗೆ ಆರ್ಥಿಕತೆಯ ಅಮೃತ ಗಳಿಗೆಯಲ್ಲಿ ಸಾಗಿರುವ ಭಾರತವು ಇದೀಗ ’ NEXT GEN GST’ ಎಂಬ ಮಗದೊಂದು ಕಲ್ಪವೃಕ್ಷ ವನ್ನು ನೆಟ್ಟಿದೆ.

ಭಾರತವನ್ನು ನಂ.1 ಆಗಿಸುವ ಮುನ್ನುಡಿಯಾಗಿ ಪ್ರಧಾನಿ ನರೇಂದ್ರ ಮೋದಿ ಅವರು ದ್ವಿಸ್ತರದ ಜಿಎಸ್‌ಟಿ-2 ಅನ್ನು ಪರಿಚಯಿಸಿದ್ದಾರೆ. ಪ್ರಸ್ತುತ ಶೇ.5, ಶೇ.12, ಶೇ.18 ಮತ್ತು ಶೇ.28ರ ಚತುಸ್ತರ ದಲ್ಲಿದ್ದ ಜಿಎಸ್‌ಟಿಯನ್ನು, ‘ಶೇ.5’ ಮತ್ತು ‘ಶೇ.18’ರ ದ್ವಿಸ್ತರಕ್ಕಿಳಿಸಿ ಜನೋಪಯೋಗಿಯಾಗುವ ತ್ತ ಅದನ್ನು ಕೊಂಡೊಯ್ಯುವಲ್ಲಿ ಮಹತ್ತರ ಹೆಜ್ಜೆಯಿರಿಸಿದ್ದಾರೆ.

ಹೀಗಾಗಿ ಭವಿಷ್ಯದಲ್ಲಿನ್ನು ’ NEXT GEN GST’ ಸರಕಾರ ಮತ್ತು ಜನಸಾಮಾನ್ಯರಿಗೆ ‘ಆದಾಯ-ಉಳಿತಾಯ’ದ ಹೊಸ ಸರಕಾಗಲಿದೆ ಎಂಬುದು ಸಂಶಯಾತೀತ. ಜಿಎಸ್‌ಟಿಯು ಅನುಷ್ಠಾನಕ್ಕೆ ಬಂದಾಗಿನಿಂದ ಆದಾಯ ಕ್ರೋಡೀಕರಣ ಮತ್ತು ಮೂಲ ತೆರಿಗೆ ವಿಸ್ತರಣೆಯಲ್ಲಿ ಪ್ರಬಲ ಬೆಳವಣಿಗೆ ಯನ್ನು ತೋರುತ್ತಲೇ ಬಂದಿದೆ. ವ್ಯಾಟ್, ವಾಣಿಜ್ಯ ತೆರಿಗೆ, ಸೇವಾ ತೆರಿಗೆ, ಮಾರಾಟ ತೆರಿಗೆ ಹೀಗೆ ನಾನಾ ವಿಧದಲ್ಲಿ ಜನಸಾಮಾನ್ಯರ ಮೇಲೆ ಬೀಳುತ್ತಿದ್ದ ಕರಭಾರವನ್ನು ಇದು ಇಳಿಸಿತ್ತು.

ಅಂತೆಯೇ ಈಗ ಮಗದೊಮ್ಮೆ ಜನಸಾಮಾನ್ಯರ ಮೇಲಿನ ತೆರಿಗೆ ಹೊರೆಯನ್ನು ಗರಿಷ್ಠ ಪ್ರಮಾಣ ದಲ್ಲಿ ಇಳಿಸುವ ದಿಸೆಯಲ್ಲಿ ಹೊಸ ಸ್ವರೂಪವನ್ನು ಇದು ಪಡೆದುಕೊಂಡಿದೆ.

ಶೇ.99ಕ್ಕೂ ಅಧಿಕ ವಸ್ತುಗಳ ಬೆಲೆಭಾರ ಇಳಿಕೆ: ದ್ವಿಸ್ತರದ ಜಿಎಸ್‌ಟಿ ಜಾರಿಯಿಂದ ಪ್ರತಿ ಉತ್ಪನ್ನ ಗಳ ಬೆಲೆಯೂ ಇಳಿಕೆಯಾಗಲಿದೆ. ಪರಿಷ್ಕೃತ ಜಿಎಸ್‌ಟಿಯಲ್ಲಿ ಶೇ.12ರ ಸ್ತರದಲ್ಲಿದ್ದ ಶೇ.99ರಷ್ಟು ವಸ್ತುಗಳು ಶೇ.5ರ ವ್ಯಾಪ್ತಿಗೆ ಮತ್ತು ಶೇ.28ರ ಸ್ತರದಲ್ಲಿದ್ದ ಶೇ.90ರಷ್ಟು ಉತ್ಪನ್ನಗಳು ಶೇ.18ರ ವ್ಯಾಪ್ತಿ ಗೆ ಬರುವುದರಿಂದ ಶೇ.99ರಷ್ಟು ದಿನಬಳಕೆ, ಅಗತ್ಯ ವಸ್ತುಗಳು ಶೇ.5ರ ಅಥವಾ ಶೂನ್ಯ ಸ್ತರದೊಳಗೆ ಬರಲಿವೆ. ಇದರಿಂದ ಜನಸಾಮಾನ್ಯರಿಗೆ ಉಳಿತಾಯ ಮತ್ತು ಉತ್ಪನ್ನ-ಉದ್ಯಮ, ವಹಿವಾಟು ಹೆಚ್ಚಾಗುವ ಎಲ್ಲ ಸಾಧ್ಯತೆ ಇದೀಗ ಸೃಷ್ಟಿ ಆಗಿದೆ.

ಶೂನ್ಯ ತೆರಿಗೆ ದರದಲ್ಲಿ ಆರೋಗ್ಯ-ಆಹಾರೋತ್ಪನ್ನ ವಲಯ: ಹೊಸ ಜಿಎಸ್‌ಟಿ-2 ಜನ ಸಾಮಾನ್ಯರ ಜೀವನದ ಮೇಲೆ ಸಕಾರಾತ್ಮಕವಾಗಿ ನೇರ ಪರಿಣಾಮ ಬೀರುತ್ತದೆ. ಹಾಲು, ಹಣ್ಣು, ತರಕಾರಿ, ಬ್ರೆಡ್, ಗೋಧಿ ಹಿಟ್ಟು, ಖಾದ್ಯ ತೈಲ, ಸಕ್ಕರೆ, ತಿಂಡಿ-ತಿನಿಸುಗಳು ಅನೇಕಾನೇಕ ಆಹಾರ ಪದಾರ್ಥ-ಆಹಾರ ಧಾನ್ಯಗಳೆಲ್ಲ ಶೂನ್ಯ ತೆರಿಗೆ ದರಕ್ಕೆ ಒಳಪಡಲಿವೆ. 33 ಜೀವರಕ್ಷಕ ಔಷಧಗಳಿಗೂ ಶೂನ್ಯ ತೆರಿಗೆ ಅನ್ವಯವಾಗಲಿದೆ. ಹೀಗೆ ಆರೋಗ್ಯ-ಆಹಾರೋತ್ಪನ್ನಗಳ ಬೆಲೆ ಅಗ್ಗವಾಗಿ ಪ್ರತಿ ಕುಟುಂಬಗಳ ಮಾಸಿಕ ವೆಚ್ಚದಲ್ಲಿ ಕನಿಷ್ಠ ನಾಲ್ಕು ಪ್ರತಿಶತದಷ್ಟು ಉಳಿತಾಯವಾಗಲಿದೆ. ಇದು ಕಡುಬಡವರ ಏಳಿಗೆಗೆ ಹೊಸ ಸ್ಪರ್ಶ ನೀಡುವತ್ತ ಪ್ರಧಾನಿ ನರೇಂದ್ರ ಮೋದಿ ಅವರು ಇರಿಸಿರುವ ಐತಿಹಾಸಿಕ ಹೆಜ್ಜೆಯಾಗಿದೆ.

ನವೀಕೃತ ಇಂಧನ-ಹಸಿರು ಶಕ್ತಿಗೆ ಉತ್ತೇಜನ: ‘ಜಿಎಸ್‌ಟಿ-2’ ಪರಿಸರ ಸ್ನೇಹಿ ಯೋಜನೆಗಳಿಗೆ ಪೂರಕವಾಗಿದೆ. ವಿದ್ಯುತ್ ಚಾಲಿತ ವಾಹನಗಳನ್ನು ಶೇ.28ರಿಂದ ಶೇ.12ರ ಕರವ್ಯಾಪ್ತಿಗೆ ತಂದಿದ್ದು, ಈವರೆಗೆ ದುಬಾರಿ ದರದಲ್ಲಿದ್ದ ಇವಿಎಂ ಬೈಕ್, ಆಟೋ, ಕಾರುಗಳು, ಅವುಗಳ ಬಿಡಿಭಾಗಗಳ ಮೌಲ್ಯ ಅಗ್ಗವಾಗಲಿದೆ. ಮನೆ ಮನೆಗಳಲ್ಲಿ ಸೌರಶಕ್ತಿಯೂ ಬೆಲೆ ಇಳಿಕೆಯ ಬೆಳಕು ಬೀರಲಿದೆ.

ವಿಶ್ವದ ಅತಿದೊಡ್ಡ ಸೌರಶಕ್ತಿ ಮೇಲ್ಚಾವಣಿ ಯೋಜನೆ ‘ಸೂರ್ಯ ಘರ್’ ಪರಿಕರಗಳು ಸಹ ಶೇ.5ರ ತೆರಿಗೆಗೊಳಪಟ್ಟಿದ್ದು, ಅಗ್ಗದ ಬೆಲೆಯಲ್ಲಿ ಇವು ಪ್ರಖರ ಬೆಳಕು ಚೆಲ್ಲಲಿವೆ. ಭವಿಷ್ಯದಲ್ಲಿ 1 ಕೋಟಿ ಸೌರ ಮೇಲ್ಚಾವಣಿ ಗುರಿ ಮೀರಿಸುವ ಸಾಧನೆಗೆ ಹಾಗೂ 17 ಲಕ್ಷಕ್ಕೂ ಅಧಿಕ ಉದ್ಯೋಗ ಸೃಷ್ಟಿಗೆ ನಾಂದಿಯಾಗಲಿದೆ.

ಹಸಿರು ಹೈಡ್ರೋಜನ್ ಮತ್ತು ನವೀಕರಿಸಬಹುದಾದ ಇಂಧನ ಯೋಜನೆಗಳಿಗೆ ಅತ್ಯುತ್ತಮ ಬೆಂಬಲ ನೀಡುವ ಭಾರತದ ದ್ವಿಸ್ತರದ ಜಿಎಸ್‌ಟಿ ಜಗತ್ತಿನ ಶುದ್ಧ ಇಂಧನ ಬೇಡಿಕೆಗೇ ಸ್ವಚ್ಛಂದದ ಬೆಳಕು ತೋರಲಿದೆ.

ಅನ್ನದಾತರಿಗೂ ಶೂನ್ಯ ತೆರಿಗೆಯ ವರದಾನ: ವಿಶ್ವದ ಅತಿ ದೊಡ್ಡ ಕೃಷಿ ಭೂಮಿ ಮತ್ತು ನೀರಾ ವರಿ ಪ್ರದೇಶ ಹೊಂದಿರುವ ನಮ್ಮೀ ಕೃಷಿ ಪ್ರಧಾನ ದೇಶದಲ್ಲಿ ಜಿಎಸ್‌ಟಿ-೨ ಕೃಷಿ ವಲಯದ ಅಭ್ಯು ದಯ, ಕೃಷಿ ವೈವಿವೀಕರಣದ ನಿಟ್ಟಿನಲ್ಲಿ ಮಹತ್ತರ ಪಾತ್ರ ವಹಿಸಲಿದೆ. ಸೌರ ಪಂಪ್‌ಸೆಟ್‌ ಗಳು, ಸೋಲಾರ್ ವಿದ್ಯುತ್ ಘಟಕದ ಪರಿಕರಗಳು ಶೇ.5ರ ತೆರಿಗೆ ದರಕ್ಕೆ ತಗ್ಗಿ ನೇಗಿಲ ಯೋಗಿಗಳಿಗೆ ವರದಾನವಾಗಲಿವೆ.

ಕೃಷಿ ಮೂಲಸೌಕರ್ಯಗಳ ವೆಚ್ಚ ಕಡಿಮೆಯಾಗಿ ಉತ್ಪನ್ನ ಮತ್ತು ಆದಾಯ ವೃದ್ಧಿಸಲಿದೆ. ಟ್ರ್ಯಾಕ್ಟರ್ ಸೇರಿದಂತೆ ಕೃಷಿ ಯಂತ್ರೋಪಕರಣ, ಗೊಬ್ಬರ, ಬೀಜ ಮತ್ತು ಔಷಧಿಗಳೆಲ್ಲ ಅಗ್ಗವಾಗಿ ರೈತರ ಹೆಗಲ ಮೇಲಿದ್ದ ಬೆಲೆ ಏರಿಕೆ ಭಾರ ಇಳಿಯಲಿದೆ. ಒಟ್ಟಿನಲ್ಲಿ, ಅತ್ಯಂತ ಕಡಿಮೆ ದರದಲ್ಲಿ ಕೃಷಿ ಸಾಮಗ್ರಿಗಳು ಕೈಗೆಟುಕಿ ಅನ್ನದಾತರ ಬಾಳು ಹಸನಾಗುವುದರಲ್ಲಿ ಸಂದೇಹವಿಲ್ಲ.

ಯುವ ಕೈಗಳಿಗೆ ಉದ್ಯೋಗಾವಕಾಶ: ದೇಶದ ಜನಸಂಖ್ಯೆಯಲ್ಲಿ ಶೇ.31ಕ್ಕೂ ಅಧಿಕವಿರುವ ಯುವ ಕೈಗಳಿಗೆ ಉದ್ಯೋಗಭಾಗ್ಯ ಸೃಷ್ಟಿಯಾಗಲಿದೆ. ನವೋದ್ಯಮಗಳು, ಜವಳಿ, ಕೃಷಿ, ಇಲೆಕ್ಟ್ರಾನಿಕ್ಸ್, ಶಿಕ್ಷಣ, ಮೆಡಿಕಲ, ಆಟೋಮೊಬೈಲ್, ಹೀಗೆ‌ ಸರ್ವರಂಗಗಳಲ್ಲೂ ಹೊಸ ಉದ್ಯಮಗಳ ಸ್ಥಾಪನೆ ಹೆಚ್ಚಿ ಅಧಿಕ ಉದ್ಯೋಗಾವಕಾಶಗಳು ತೆರೆದುಕೊಳ್ಳಲಿವೆ. ಸದ್ಯಕ್ಕೆ 65 ಕೋಟಿ ಸನಿಹದಲ್ಲಿರುವ ಉದ್ಯೋಗಿ ಗಳ ಸಂಖ್ಯೆ ಮತ್ತಷ್ಟು ಅಧಿಕಗೊಳ್ಳುತ್ತದೆ. ಎಂಎಸ್‌ಎಂಇಗಳ ಸಂಖ್ಯೆಯೂ ದ್ವಿಗುಣಗೊಳ್ಳಲಿದ್ದು, ಯುವೋದ್ಯಮಿಗಳ ಉದ್ಯಮಾಕಾಂಕ್ಷೆಗೆ ಅದು ಉತ್ತೇಜಕವಾಗಲಿದೆ. ಸ್ಟಾರ್ಟ್-ಅಪ್ ಉದ್ಯಮಗಳಿಗೆ ಹೊಸ ಬಾಗಿಲು ತೆರೆಯುತ್ತಿರುವ ‘ನ್ಯೂ ಇಂಡಿಯಾ’ ಯುವಕರಿಗೆ ಭವಿಷ್ಯದ ಭರವಸೆ ಮೂಡಿಸು ತ್ತಿದೆ.

ಶೇ.48 ಮಹಿಳೆಯರಿಗೆ ದ್ವಿಸ್ತರದ ಜಿಎಸ್‌ಟಿ ಲಾಭ: ಭಾರತದ ಜನಸಂಖ್ಯೆಯಲ್ಲಿ ಶೇ.48ರಷ್ಟಿರುವ ಮಹಿಳೆಯರು ಈ ದ್ವಿಸ್ತರದ ಜಿಎಸ್‌ಟಿ ಲಾಭದಲ್ಲಿ ಪಾಲುದಾರರು ಎನ್ನುವುದೇ ವಿಶೇಷ. ಕುಟುಂಬ ನಿರ್ವಹಣೆ ಮತ್ತು ಆಯ-ವ್ಯಯದಲ್ಲಿ ಮಹತ್ತರ ಪಾತ್ರಧಾರಿಗಳಾದ ಸ್ತ್ರೀಯರಿಗೇ ಇದು ಹೆಚ್ಚು ಕೊಡುಗೆಯನ್ನು ಕಲ್ಪಿಸಿದೆ.

ಅಡುಗೆ ಸಾಮಾನು, ಬಟ್ಟೆ, ದಿನಬಳಕೆ ಅಗತ್ಯ ವಸ್ತುಗಳ ಮೇಲಿನ ಕರಭಾರ ಹಗುರವಾಗಲಿದೆ. ಇನ್ನೊಂದೆಡೆ, ಸ್ವ-ಸಹಾಯ ಸಂಘಗಳ ಮೂಲಕ ಸಣ್ಣ ಉದ್ಯಮ ನಡೆಸುತ್ತಿರುವ ಲಕ್ಷಾಂತರ ಮಹಿಳೆಯರ ಆರ್ಥಿಕ ಸ್ವಾವಲಂಬನೆಗೆ ಇದು ಬಲ ತುಂಬಲಿದೆ. ಭಾರತೀಯ ಉದ್ಯಮಗಳಲ್ಲಿ ಇಂದು ಮಹಿಳೆಯರೂ ದೊಡ್ಡ ಸಂಖ್ಯೆಯಲ್ಲಿ ಜಿಎಸ್‌ಟಿ ವ್ಯಾಪ್ತಿಗೊಳಪಟ್ಟು ಗಣನೀಯ ಪ್ರಮಾ ಣದ ಆದಾಯ ಗಳಿಸುತ್ತಿದ್ದಾರೆ.

ಜವಳಿ, ಆಭರಣ, ಬ್ಯೂಟಿ ಪಾರ್ಲರ್, ಗಾರ್ಮೆಂಟ್ಸ್, ಮೆಡಿಕಲ, ಆಹಾರೋತ್ಪನ್ನ ಹಾಗೂ ಕೃಷಿ ಸಂಬಂಧಿತ ಉದ್ದಿಮೆಗಳಲ್ಲಿ ತಮ್ಮದೇ ಛಾಪು ಮೂಡಿಸುತ್ತಿರುವ ನಾರಿಶಕ್ತಿಗೆ ಜಿಎಸ್‌ಟಿ-2 ಪ್ರೇರಕ ಶಕ್ತಿಯಾಗಿದೆ. ಎಸ್‌ಬಿಐ ವರದಿ ಪ್ರಕಾರ ದೇಶದ ಒಟ್ಟು ತೆರಿಗೆದಾರರಲ್ಲಿ ಶೇ.20ಕ್ಕೂ ಅಧಿಕ ಮಹಿಳಾ ಉದ್ಯಮಿಗಳ ಪಾಲಿದೆ. ಪ್ರಸ್ತುತ ಜಿಎಸ್‌ಟಿ ನೋಂದಣಿಯಲ್ಲಿ ಸ್ತ್ರೀಯರು ತಮ್ಮದೇ ಆದ ಹೆಜ್ಜೆ ಗುರುತು ಮೂಡಿಸಿದ್ದು, ಮಹಿಳಾ ಮಾಲೀಕತ್ವದ ಎಂಎಸ್ ಎಂಇಗಳ ಸಂಖ್ಯೆಯೂ ಹೆಚ್ಚಿದೆ.

ಭವಿಷ್ಯದಲ್ಲಿ ಭಾರತದ ಅರ್ಥ ವ್ಯವಸ್ಥೆಗೆ ಹೊಸ ಭಾಷ್ಯ ಬರೆಯುವ ಈ ಮಹಿಳಾ ಸಮೂಹಕ್ಕೆ ವಿಶಿಷ್ಟ ಕೊಡುಗೆಯಾಗಿದೆ ಈ ದ್ವಿಸ್ತರದ ಜಿಎಸ್‌ಟಿ.

(ಲೇಖಕರು ಸಚಿವರು, ಕೇಂದ್ರ ಆಹಾರ ಮತ್ತು ನಾಗರಿಕ ಸರಬರಾಜು, ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಹಾಗೂ ಗ್ರಾಹಕ ವ್ಯವಹಾರಗಳ ಇಲಾಖೆ)