Dhaka-Delhi Reset: ಭಾರತಕ್ಕೆ ಭೇಟಿ ನೀಡಿದ ಬಾಂಗ್ಲಾದೇಶ ವಿದೇಶಾಂಗ ಸಚಿವ; ಎರಡು ದೇಶಗಳ ಸಂಬಂಧ ಮತ್ತೆ ವೃದ್ಧಿಸುತ್ತ?

ದೆಹಲಿ, ಏ. 7: ಬಾಂಗ್ಲಾದೇಶದ (Bangladesh) ವಿದೇಶಾಂಗ ಸಚಿವ ಡಾ. ಖಲೀಲೂರ್ ರೆಹಮಾನ್ (Foreign Minister Dr Khalilur Rahman) ಏಪ್ರಿಲ್ 7 ರಿಂದ 9ರವರೆಗೆ ಭಾರತ ಪ್ರವಾಸ ಕೈಗೊಂಡಿದ್ದಾರೆ. ಬಾಂಗ್ಲಾದೇಶದಲ್ಲಿ ತಾರಿಖ್ ರೆಹಮಾನ್ ನೇತೃತ್ವದಲ್ಲಿ ನೂತನ ಸರ್ಕಾರ ಅಧಿಕಾರಕ್ಕೆ ಬಂದ ನಂತರ ನಡೆಯುತ್ತಿರುವ ಮೊದಲ ಉನ್ನತ ಮಟ್ಟದ ರಾಜತಾಂತ್ರಿಕ ಭೇಟಿ ಇದಾಗಿದ್ದು, ದಕ್ಷಿಣ ಏಷ್ಯಾದ ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.

ಮೂರು ದಿನಗಳ ಈ ಭೇಟಿಯ ಅವಧಿಯಲ್ಲಿ ಬಾಂಗ್ಲಾದೇಶವು ಹಲವು ದಶಕಗಳ ಹಳೆಯದಾದ ಮತ್ತು ಸೂಕ್ಷ್ಮವಾದ ವಿಷಯಗಳನ್ನು ಚರ್ಚೆಯ ಮುಂಚೂಣಿಗೆ ತರುವ ಸಾಧ್ಯತೆಯಿದೆ.

ಭಾರತಕ್ಕೆ ಭೇಟಿ ನೀಡಿದ ಬಾಂಗ್ಲಾ ಸಚಿವ:

ನದಿ ನೀರು ಹಂಚಿಕೆ: ತೀಸ್ತಾ ಸೇರಿದಂತೆ ಗಡಿಯಾಚೆಗಿನ ನದಿಗಳ ನೀರು ಹಂಚಿಕೆಯ ಬಗ್ಗೆ ನ್ಯಾಯಯುತ ಒಪ್ಪಂದಕ್ಕೆ ಢಾಕಾ ಒತ್ತು ನೀಡಲಿದೆ.

ಗಡಿ ಸಾವುಗಳ ನಿಯಂತ್ರಣ: ಭಾರತ-ಬಾಂಗ್ಲಾ ಗಡಿಯಲ್ಲಿ ನಡೆಯುವ ನಾಗರಿಕರ ಸಾವುಗಳ ಬಗ್ಗೆ ಕಳವಳ ವ್ಯಕ್ತಪಡಿಸಲಿರುವ ಸಚಿವರು, ಮಾನವೀಯ ಗಡಿ ನಿರ್ವಹಣೆಗೆ ಆಗ್ರಹಿಸಲಿದ್ದಾರೆ.

ಇಂಧನ ಮತ್ತು ವೀಸಾ ಸೇವೆ: ವಿದ್ಯುತ್ ರಫ್ತು ಮತ್ತು ಇಂಧನ ಮೂಲ ಸೌಕರ್ಯಗಳಲ್ಲಿ ಭಾರತದ ಬೆಂಬಲವನ್ನು ಬಾಂಗ್ಲಾ ನಿರೀಕ್ಷಿಸುತ್ತಿದೆ. ಜತೆಗೆ ಸ್ಥಗಿತಗೊಂಡಿರುವ ವೀಸಾ ಸೇವೆಗಳನ್ನು ಪುನರಾರಂಭಿಸಿ ವಿದ್ಯಾರ್ಥಿಗಳು ಮತ್ತು ರೋಗಿಗಳಿಗೆ ಅನುಕೂಲ ಮಾಡಿಕೊಡುವಂತೆ ಕೋರಲಿದೆ.

ಬಂಗಾಳದ ಗದ್ದುಗೆ ಯಾರಿಗೆ? ಪಶ್ಚಿಮ ಬಂಗಾಳ ಚುನಾವಣಾ ಪೂರ್ವ ಸಮೀಕ್ಷೆ ಹೇಳಿದ್ದೇನು?

ಶೇಖ್ ಹಸೀನಾ ಹಸ್ತಾಂತರ: ರಾಜಕೀಯವಾಗಿ ಅತ್ಯಂತ ಸೂಕ್ಷ್ಮವಾದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರ ಹಸ್ತಾಂತರದ ಕುರಿತು ಹೊಸ ಸರ್ಕಾರವು ಭಾರತದ ಸಹಕಾರವನ್ನು ಅಧಿಕೃತವಾಗಿ ಕೋರುವ ಸಾಧ್ಯತೆಯಿದೆ.

ಭಾರತದ 'ರಿಸೆಟ್' ತಂತ್ರ

ಭಾರತದ ಪಾಲಿಗೆ ಈ ಭೇಟಿಯು ಬಾಂಗ್ಲಾದೇಶದ ಹೊಸ ನಾಯಕತ್ವದೊಂದಿಗೆ ವಿಶ್ವಾಸ ವೃದ್ಧಿಸುವ ಮತ್ತು ಸಂಬಂಧಗಳನ್ನು 'ರಿಸೆಟ್' ಮಾಡುವ ಸಂದರ್ಭ ಎಂದೇ ವಿಶ್ಲೇಷಿಸಲಾಗುತ್ತಿದೆ. ನವದೆಹಲಿಯು ತನ್ನ ಕಾರ್ಯತಂತ್ರ ಮತ್ತು ಭದ್ರತಾ ಹಿತಾಸಕ್ತಿಗಳನ್ನು ಗಮನದಲ್ಲಿಟ್ಟುಕೊಂಡು, ರಚನಾತ್ಮಕ ಪಾಲುದಾರಿಕೆಗೆ ಬದ್ಧತೆಯನ್ನು ಪುನರುಚ್ಚರಿಸಲಿದೆ. ಗಡಿಯಾಚೆಗಿನ ಭಯೋತ್ಪಾದನೆ ತಡೆ ಮತ್ತು ಪ್ರಾದೇಶಿಕ ಸ್ಥಿರತೆಯ ವಿಷಯದಲ್ಲಿ ಕಟ್ಟುನಿಟ್ಟಿನ ಸಹಕಾರವನ್ನು ಭಾರತ ನಿರೀಕ್ಷಿಸುತ್ತಿದೆ.

ಮುಂದಿನ ಹಾದಿ

ಈ ಭೇಟಿಯು ಕೇವಲ ಔಪಚಾರಿಕ ಚರ್ಚೆಯಾಗದೆ, ಉಭಯ ದೇಶಗಳ ನಡುವಿನ ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು ಸಮಾನ ಹಿತಾಸಕ್ತಿಯ ವಿಷಯಗಳ ಮೇಲೆ ಗಮನ ಹರಿಸುವ ವೇದಿಕೆಯಾಗಲಿದೆ ಎಂದು ರಾಜತಾಂತ್ರಿಕ ಮೂಲಗಳು ತಿಳಿಸಿವೆ. ದಶಕಗಳ ಕಾಲದ ಸ್ನೇಹವನ್ನು ಹೊಸ ರಾಜಕೀಯ ಪರಿಸ್ಥಿತಿಯಲ್ಲಿ ಹೇಗೆ ಮುನ್ನಡೆಸಲಾಗುತ್ತದೆ ಎಂಬುದು ಈ ಮೂರು ದಿನಗಳ ಮಾತುಕತೆಯ ಫಲಿತಾಂಶದ ಮೇಲೆ ಅವಲಂಬಿತವಾಗಿದೆ.