Dr N Someshwara Column: ಎಕ್ಸ್-ಕಿರಣಗಳು: ಛೇದಿಸದೆ ದೇಹದೊಳಗೆ ನೋಡುವ ಅದ್ಭುತ !

ಹಿಂದಿರುಗಿ ನೋಡಿದಾಗ

1895ರ ನವೆಂಬರ್ 8. ಜರ್ಮನಿಯ ವುರ್ಜ್‌ಬರ್ಗ್ ವಿಶ್ವವಿದ್ಯಾಲಯದ ಪ್ರಯೋಗಶಾಲೆ ಯೊಂದರಲ್ಲಿ ಭೌತವಿಜ್ಞಾನಿಯೊಬ್ಬನು ವಿದ್ಯುತ್ ಮತ್ತು ನಿರ್ವಾತನಳಿಕೆಗಳಿಗೆ ಸಂಬಂಧಿಸಿದ ಪ್ರಯೋಗವನ್ನು ನಡೆಸುತ್ತಿದ್ದ. ಹೊರಗೆ ಕತ್ತಲಾಗಿತ್ತು. ಪ್ರಯೋಗಶಾಲೆಯೊಳಗೂ ಬೆಳಕನ್ನು ಕಡಿಮೆ ಮಾಡಲಾಗಿತ್ತು. ಮೇಜಿನ ಮೇಲಿದ್ದ ಗಾಜಿನ ನಳಿಕೆ ಯೊಂದಕ್ಕೆ ವಿದ್ಯುತ್ ಸಂಪರ್ಕವನ್ನು ನೀಡಲಾಗಿತ್ತು. ಬೆಳಕು ಹೊರಗೆ ಬರದಂತೆ ಆ ನಳಿಕೆಯನ್ನು ದಪ್ಪವಾದ ಕಪ್ಪು ರಟ್ಟಿನಿಂದ ಮುಚ್ಚಲಾಗಿತ್ತು. ಆದರೂ ಸ್ವಲ್ಪ ದೂರದಲ್ಲಿದ್ದ ವಿಶೇಷ ರಾಸಾಯನಿಕ ಪದಾರ್ಥವನ್ನು ಲೇಪಿಸಿದ್ದ ಪರದೆಯು ಮಸುಕಾಗಿ ಹೊಳೆಯುತ್ತಿರುವುದನ್ನು ವಿಜ್ಞಾನಿ ಗಮನಿಸಿದ! ಇದು ಹೇಗೆ ಸಾಧ್ಯ? ನಳಿಕೆಯಿಂದ ಹೊರಬರುವ ಸಾಮಾನ್ಯ ಬೆಳಕನ್ನು ಕಪ್ಪು ರಟ್ಟು ತಡೆಯಬೇಕಾಗಿತ್ತು. ಹಾಗಿದ್ದರೆ ಪರದೆಯು ಹೊಳೆಯುತ್ತಿರುವುದೇಕೆ? ಆ ವಿಜ್ಞಾನಿಯ ಹೆಸರು ವಿಲ್ಹೆಲ್ಮ್ ಕಾನ್ರಾಡ್ ರಾಂಟ್ಜೆನ್ ( Wilhelm Conrad R5ntgen, 1845- 1923). ಆತನಿಗೆ ಅಂದು ತಿಳಿದಿರಲಿಲ್ಲ. ‌

ತಾನು ಗಮನಿಸಿದ ಈ ವಿಚಿತ್ರವಾದ ಬೆಳಕು ವೈದ್ಯವಿಜ್ಞಾನದ ಇತಿಹಾಸವನ್ನೇ ಬದಲಿಸಲಿದೆ ಎಂಬ ಸಂಗತಿ! ಇದುವರೆಗೆ ತಿಳಿದಿರದ ಕಿರಣಗಳು!: ಆ ಕಾಲದಲ್ಲಿ ವಿಜ್ಞಾನಿಗಳು ನಿರ್ವಾತಕ್ಕೆ ಸಮೀಪವಾದ ಸ್ಥಿತಿಯಲ್ಲಿದ್ದ ಗಾಜಿನ ನಳಿಕೆಗಳ ಮೂಲಕ ವಿದ್ಯುತ್ ಪ್ರವಹಿಸಿದಾಗ ಉಂಟಾಗುವ ವಿದ್ಯಮಾನ ಗಳನ್ನು ಅಧ್ಯಯನ ಮಾಡುತ್ತಿದ್ದರು.

ಇಂತಹ ನಳಿಕೆಗಳಲ್ಲಿ ಕ್ಯಾಥೋಡ್ ಕಿರಣಗಳು (Cathode Rays) ಎಂಬ ವಿದ್ಯಮಾನವನ್ನು ಗಮನಿಸ ಲಾಗಿತ್ತು. ಇಂದು ಇವುಗಳಿಗೆ ಎಲೆಕ್ಟ್ರಾನ್‌ಗಳ ಚಲನೆಯೊಂದಿಗೆ ಸಂಬಂಧವಿದೆ ಎನ್ನುವುದು ನಮಗೆ ತಿಳಿದಿದೆ. ರಾಂಟ್ಜೆನ್ ಇದೇ ವಿಷಯಕ್ಕೆ ಸಂಬಂಧಿಸಿದ ಪ್ರಯೋಗಗಳನ್ನು ನಡೆಸುತ್ತಿದ್ದ.

ನಳಿಕೆಯಿಂದ ಹೊರ ಹೊಮ್ಮುತ್ತಿದ್ದ ಯಾವುದೋ ಕಿರಣಗಳು ಕಪ್ಪು ರಟ್ಟನ್ನು ದಾಟಿ, ಬೇರಿಯಂ ಪ್ಲಾಟಿನೋಸಯನೈಡ್ ಎಂಬ ರಾಸಾಯನಿಕ ಪದಾರ್ಥವನ್ನು ಲೇಪಿಸಿದ್ದ ಪರದೆಯ ಮೇಲೆ ಬೀಳುತ್ತಿದ್ದವು. ಇದರಿಂದ ಪರದೆ ಹೊಳೆಯುತ್ತಿತ್ತು. ಈ ಕಿರಣಗಳು ಸಾಮಾನ್ಯ ಬೆಳಕಿನಂತಿರಲಿಲ್ಲ. ರಾಂಟ್ಜೆನ್ ಅವುಗಳ ಗುಣಗಳನ್ನು ಪರೀಕ್ಷಿಸಲಾರಂಭಿಸಿದ.

ಇದನ್ನೂ ಓದಿ: Dr N Someshwar Column: ಮೆದುಳಿನ ಗಡ್ಡೆಯು ತೋರಿಸಿದ ದೇವರು!

ಮರ, ಕಾಗದ ಮತ್ತು ಕೆಲವು ಲೋಹಗಳಂತಹ ವಸ್ತುಗಳನ್ನು ಅವುಗಳ ಮಾರ್ಗದಲ್ಲಿ ಇರಿಸಿದ. ಕೆಲವು ವಸ್ತುಗಳನ್ನು ಕಿರಣಗಳು ಸುಲಭವಾಗಿ ದಾಟುತ್ತಿದ್ದವು. ಇನ್ನು ಕೆಲವು ವಸ್ತುಗಳು ಅವುಗಳನ್ನು ಹೆಚ್ಚು ತಡೆಯುತ್ತಿದ್ದವು. ಈ ಕಿರಣಗಳು ಕಣ್ಣಿಗೆ ಕಾಣುತ್ತಿರಲಿಲ್ಲ. ಆದರೆ ಅವುಗಳ ಪರಿಣಾಮವನ್ನು ವಿಶೇಷ ಪರದೆಗಳು ಮತ್ತು ಛಾಯಾಚಿತ್ರ ಫಲಕಗಳ ಮೇಲೆ ದಾಖಲಿಸಲು ಸಾಧ್ಯವಾಗುತ್ತಿತ್ತು.

ರಾಂಟ್ಜೆನ್‌ಗೆ ಇವುಗಳ ನಿಜವಾದ ಸ್ವರೂಪ ತಿಳಿದಿರಲಿಲ್ಲ. ಗಣಿತದಲ್ಲಿ ತಿಳಿಯದ ಸಂಖ್ಯೆಗೆ ‘ಎಕ್ಸ್’ ಎಂಬ ಚಿಹ್ನೆಯನ್ನು ಬಳಸುವಂತೆ, ತಿಳಿಯದ ಈ ಕಿರಣಗಳನ್ನು ಆತ ಎಕ್ಸ್-ಕಿರಣಗಳು ( X-rays ) ಎಂದು ಕರೆದ. ಈ ಹೆಸರು ಮುಂದಿನ ಕಾಲದಲ್ಲಿ ವೈದ್ಯವಿಜ್ಞಾನದ ಅತ್ಯಂತ ಪರಿಚಿತವಾದ ಪದಗಳಲ್ಲಿ ಒಂದಾಯಿತು.

ಅನ್ನಾ ಬರ್ತಾಳ ಕೈ ತೋರಿಸಿದ ಅದ್ಭುತ: ರಾಂಟ್ಜೆನ್ ತನ್ನ ಸಂಶೋಧನೆಯನ್ನು ಮುಂದು ವರಿಸಿದಂತೆ ಈ ಕಿರಣ ಗಳು ಮಾನವನ ದೇಹದ ಕೆಲವು ಭಾಗಗಳನ್ನು ದಾಟಿ ಹೋಗಬಲ್ಲವು ಎಂಬುದು ಅವನಿಗೆ ತಿಳಿಯಿತು. ಚರ್ಮ ಮತ್ತು ಮೃದು ಅಂಗಾಂಶಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ದಾಟುವ ಈ ಕಿರಣಗಳನ್ನು ಮೂಳೆಗಳು ಹೆಚ್ಚು ತಡೆಯುತ್ತಿದ್ದವು. ಹಾಗಾದರೆ ದೇಹವನ್ನು ಕತ್ತರಿಸದೆಯೇ ಮೂಳೆಗಳ ಚಿತ್ರವನ್ನು ಪಡೆಯಲು ಸಾಧ್ಯವಿರಬಹುದೇ? ಈ ವಿಚಾರವನ್ನು ಪರಿಶೀಲಿಸಲು ಆತ ತನ್ನ ಪತ್ನಿ ಅನ್ನಾ ಬರ್ತಾಳ ನೆರವನ್ನು ಪಡೆದ.

1895ರ ಡಿಸೆಂಬರ್ 22ರಂದು ಅನ್ನಾ ಬರ್ತಾಳ ಎಡಗೈಯನ್ನು ಛಾಯಾಚಿತ್ರ ಫಲಕದ ಮೇಲೆ ಇರಿಸಿ, ಎಕ್ಸ್-ಕಿರಣಗಳ ನೆರವಿನಿಂದ ಅದರ ಚಿತ್ರವನ್ನು ದಾಖಲಿಸಿದ. ಚಿತ್ರವನ್ನು ಸಂಸ್ಕರಿಸಿದಾಗ ಅಚ್ಚರಿಯ ದೃಶ್ಯ ಕಾಣಿಸಿಕೊಂಡಿತು. ಕೈಯ ಮೂಳೆಗಳ ರಚನೆ ಸ್ಪಷ್ಟವಾಗಿ ಕಾಣಿಸುತ್ತಿತ್ತು. ಬೆರಳುಗಳ ಮೂಳೆಗಳು, ಅವುಗಳ ಕೀಲುಗಳು ಮತ್ತು ಕೈಯಲ್ಲಿದ್ದ ಉಂಗುರವೂ ಚಿತ್ರದಲ್ಲಿ ಕಾಣಿಸುತ್ತಿದ್ದವು. ಆದರೆ ಚರ್ಮ ಮತ್ತು ಇತರ ಮೃದು ಅಂಗಾಂಶಗಳು ಮೂಳೆಗಳಷ್ಟು ಸ್ಪಷ್ಟವಾಗಿ ಕಾಣಿಸುತ್ತಿರಲಿಲ್ಲ.‌ ಮಾನವ ದೇಹದ ಒಳಗಿನ ರಚನೆಯನ್ನು ಶಸ್ತ್ರ ಚಿಕಿತ್ಸೆಯಿಲ್ಲದೆ ನೋಡಲು ಸಾಧ್ಯವಾಗಿತ್ತು!

ಇದು ವೈದ್ಯವಿಜ್ಞಾನದ ಇತಿಹಾಸದ ಅತ್ಯಂತ ಪ್ರಸಿದ್ಧ ಚಿತ್ರಗಳಲ್ಲಿ ಒಂದಾಯಿತು. ಆ ಚಿತ್ರವು ವಿಜ್ಞಾನಿಗಳ ಮತ್ತು ಸಾಮಾನ್ಯ ಜನರ ಕಲ್ಪನೆಯನ್ನೇ ಬದಲಿಸಿತು. ಮೊಟ್ಟಮೊದಲ ಬಾರಿಗೆ ಸಾಮಾನ್ಯ ಕಣ್ಣಿಗೆ ಕಾಣದ ದೇಹದ ಒಳಗಿನ ಮೂಳೆಗಳನ್ನು, ದೇಹವನ್ನು ತೆರೆಯದೆಯೇ, ಛಾಯಾ ಚಿತ್ರದ ರೂಪದಲ್ಲಿ ನೋಡಲು ಸಾಧ್ಯವಾಗಿತ್ತು.

ಒಂದು ಸಣ್ಣ ಲೇಖನ ತಂದ ದೊಡ್ಡ ಕ್ರಾಂತಿ: 1895ರ ಡಿಸೆಂಬರ್ 28ರಂದು ರಾಂಟ್ಜೆನ್ ತನ್ನ ಸಂಶೋಧನೆಯ ವಿವರಗಳನ್ನು ಹೊಸ ವಿಧದ ಕಿರಣಗಳ ಕುರಿತು (On a New Kind of Rays) ಎಂಬ ಶೀರ್ಷಿಕೆಯಲ್ಲಿ ಪ್ರಕಟಿಸಲು ಸಲ್ಲಿಸಿದ. ಅದು ಬಹಳ ದೊಡ್ಡ ಗ್ರಂಥವಾಗಿರಲಿಲ್ಲ. ಆದರೆ ಅದರಲ್ಲಿದ್ದ ಆವಿಷ್ಕಾರವು ಅಸಾಧಾರಣವಾಗಿತ್ತು. 1896ರ ಆರಂಭದಲ್ಲಿ ಎಕ್ಸ್ -ಕಿರಣಗಳ ಸುದ್ದಿ ಯುರೋಪ್ ಮತ್ತು ಅಮೆರಿಕದ ವೈಜ್ಞಾನಿಕ ವಲಯಗಳಿಗೆ ಹರಡಿತು.

ವಿಜ್ಞಾನಿಗಳು ಈ ಹೊಸ ಕಿರಣಗಳ ಗುಣಗಳನ್ನು ಪರೀಕ್ಷಿಸಲಾರಂಭಿಸಿದರು. ವೈದ್ಯರು ಅವು ಗಳನ್ನು ರೋಗನಿರ್ಣಯಕ್ಕೆ ಬಳಸುವ ಸಾಧ್ಯತೆಗಳನ್ನು ಪರಿಶೀಲಿಸಿದರು. ಕೆಲವೇ ತಿಂಗಳುಗಳಲ್ಲಿ ಮೂಳೆ ಮುರಿತಗಳು ಮತ್ತು ದೇಹದೊಳಗಿನ ಅನ್ಯವಸ್ತುಗಳನ್ನು ಗುರುತಿಸಲು ಎಕ್ಸ್-ಕಿರಣಗಳನ್ನು ಬಳಸುವ ಪ್ರಯತ್ನಗಳು ಆರಂಭವಾದವು. ‌

ಒಬ್ಬ ವ್ಯಕ್ತಿಯ ಕೈಯ ಮೂಳೆ ಮುರಿದಿದೆ ಎಂದು ಭಾವಿಸೋಣ. ಹಿಂದೆ ಶಸ್ತ್ರಚಿಕಿತ್ಸಕನು ಆತನ ಕೈಯನ್ನು ಮುಟ್ಟಿ ಪರೀಕ್ಷಿಸಿ, ನೋವು, ಊತ ಮತ್ತು ಕೈಯ ಆಕಾರದಲ್ಲಿ ಕಂಡುಬರುವ ಬದಲಾವಣೆಗಳ ಆಧಾರದ ಮೇಲೆ ಮೂಳೆಮುರಿತದ ಸ್ವರೂಪವನ್ನು ಅಂದಾಜಿಸ ಬೇಕಾಗಿತ್ತು. ಆದರೆ ಎಕ್ಸ್-ಕಿರಣಗಳ ನೆರವಿನಿಂದ ಮೂಳೆಯ ನಿಜವಾದ ಸ್ಥಿತಿಯನ್ನು ಚಿತ್ರದಲ್ಲಿ ನೋಡಲು ಸಾಧ್ಯವಾಯಿತು. ‌

ಮೂಳೆ ಎಲ್ಲಿ ಮುರಿದಿದೆ? ಅದರ ಎರಡು ಭಾಗಗಳು ಎಷ್ಟು ದೂರ ಸರಿದಿವೆ? ಮುರಿತವು ಯಾವ ದಿಕ್ಕಿನಲ್ಲಿದೆ? ಕೀಲುಗಳಿಗೂ ಹಾನಿಯಾಗಿದೆಯೇ? ಇಂತಹ ಅನೇಕ ಪ್ರಶ್ನೆಗಳಿಗೆ ಹೆಚ್ಚು ವಿಶ್ವಾಸಾರ್ಹವಾದ ಉತ್ತರ ದೊರೆಯಲಾರಂಭಿಸಿತು. ಇದೇ ರೀತಿ ಗುಂಡೇಟಿನಿಂದ ಗಾಯ ಗೊಂಡ ವ್ಯಕ್ತಿಯ ದೇಹದೊಳಗೆ ಗುಂಡು ಎಲ್ಲಿ ಸಿಲುಕಿದೆ ಎಂಬುದನ್ನು ಗುರುತಿಸಲು ಸಾಧ್ಯವಾಯಿತು. ಹಿಂದೆ ಗಾಯದೊಳಗೆ ಹುಡುಕಬೇಕಾಗುತ್ತಿದ್ದ ಅನ್ಯವಸ್ತುಗಳನ್ನು ಈಗ ಚಿತ್ರಗಳ ಮೂಲಕ ಗುರುತಿಸಲು ಅವಕಾಶ ದೊರೆಯಿತು.

ಇದು ಶಸ್ತ್ರಚಿಕಿತ್ಸೆಯ ಯೋಜನೆ ಮತ್ತು ರೋಗ ನಿರ್ಣಯಕ್ಕೆ ಅತ್ಯಂತ ಮಹತ್ವದ ನೆರವನ್ನು ನೀಡಿತು. ಎಕ್ಸ್-ಕಿರಣಗಳು ದೇಹದೊಳಗಿನ ಅಂಗಗಳನ್ನು ಹೇಗೆ ತೋರಿಸುತ್ತವೆ? ಎಕ್ಸ್-ಕಿರಣಗಳು ಹೇಗೆ ಕೆಲಸ ಮಾಡುತ್ತವೆ ಎಂಬುದನ್ನು ಸರಳವಾಗಿ ಅರ್ಥಮಾಡಿ ಕೊಳ್ಳೋಣ. ನಾವು ನೋಡುತ್ತಿರುವ ಸಾಮಾನ್ಯ ಬೆಳಕು ಮತ್ತು ಎಕ್ಸ್-ಕಿರಣಗಳು ಎರಡೂ ವಿದ್ಯುತ್ಕಾಂತೀಯ ತರಂಗಗಳಾಗಿವೆ. ಆದರೆ ಎಕ್ಸ್-ಕಿರಣಗಳು ಸಾಮಾನ್ಯ ಬೆಳಕಿಗಿಂತ ಹೆಚ್ಚು ಶಕ್ತಿಯನ್ನು ಹೊಂದಿವೆ. ಅವು ನಮ್ಮ ಕಣ್ಣಿಗೆ ಕಾಣುವುದಿಲ್ಲ. ಆದರೆ ದೇಹದ ಕೆಲವು ಭಾಗಗಳನ್ನು ದಾಟಿ ಹೋಗಬಲ್ಲವು. ‌

ಒಬ್ಬ ವ್ಯಕ್ತಿಯ ಕೈಗೆ ಎಕ್ಸ್-ಕಿರಣಗಳನ್ನು ಹಾಯಿಸಿದಾಗ ಕೆಲವು ಕಿರಣಗಳು ಚರ್ಮ, ಸ್ನಾಯುಗಳು ಮತ್ತು ಇತರ ಮೃದು ಅಂಗಾಂಶಗಳನ್ನು ದಾಟುತ್ತವೆ. ಮೂಳೆಗಳಲ್ಲಿ ಕ್ಯಾಲ್ಸಿಯಂ ಸೇರಿ ದಂತೆ ಕಿರಣಗಳನ್ನು ಹೆಚ್ಚು ತಡೆಯುವ ಅಂಶಗಳಿರುವುದ ರಿಂದ, ಅವುಗಳ ಮೂಲಕ ಹಾದುಹೋಗುವ ಕಿರಣಗಳ ಪ್ರಮಾಣ ಕಡಿಮೆಯಾಗುತ್ತದೆ. ದೇಹದ ವಿವಿಧ ಭಾಗ ಗಳನ್ನು ದಾಟಿ ಬಂದ ಕಿರಣ ಗಳನ್ನು ಚಿತ್ರಗ್ರಾಹಕವು ದಾಖಲಿಸುತ್ತದೆ. ಇದರಿಂದ ದೇಹದ ಒಳಗಿನ ರಚನೆಯ ಚಿತ್ರವನ್ನು ಪಡೆಯಲು ಸಾಧ್ಯವಾಗುತ್ತದೆ. ಇಂದಿನ ಸಾಮಾನ್ಯ ಎಕ್ಸ್-ರೇ ಚಿತ್ರಗಳಲ್ಲಿ ಮೂಳೆಗಳು ಸಾಮಾನ್ಯ ವಾಗಿ ಬಿಳಿ ಅಥವಾ ತಿಳಿಯಾದ ಬಣ್ಣದಲ್ಲಿ ಕಾಣಿಸುತ್ತವೆ. ‌

ಗಾಳಿಯಿಂದ ತುಂಬಿರುವ ಶ್ವಾಸಕೋಶದ ಭಾಗಗಳು ಕಪ್ಪಾಗಿ ಕಾಣಿಸುತ್ತವೆ. ಆದರೆ ಎಲ್ಲಾ ಅಂಗಗಳೂ ಎಕ್ಸ್-ರೇ ಚಿತ್ರದಲ್ಲಿ ಒಂದೇ ಮಟ್ಟದ ಸ್ಪಷ್ಟತೆಯಿಂದ ಕಾಣಿಸುವುದಿಲ್ಲ. ಮೃದು ಅಂಗಾಂಶಗಳ ನಡುವಿನ ಕೆಲವು ವ್ಯತ್ಯಾಸಗಳನ್ನು ಸಾಮಾನ್ಯ ಎಕ್ಸ್-ರೇಯಲ್ಲಿ ಗುರುತಿಸುವುದು ಕಷ್ಟವಾಗ ಬಹುದು. ಅಂತಹ ಸಂದರ್ಭಗಳಲ್ಲಿ ಅಲ್ಟ್ರಾಸೌಂಡ್, ಸಿಟಿ ಸ್ಕ್ಯಾನ್ ಅಥವಾ ಎಂಆರ್‌ಐನಂತಹ ಇತರ ಪರೀಕ್ಷೆಗಳ ಅಗತ್ಯ ಬರಬಹುದು. ಹೀಗಾಗಿ ಎಕ್ಸ್-ರೇ ಅತ್ಯಂತ ಮಹತ್ವದ ಸಾಧನವಾದರೂ ಪ್ರತಿಯೊಂದು ಕಾಯಿಲೆಯನ್ನು ಗುರುತಿಸುವ ಸಾರ್ವತ್ರಿಕ ಪರೀಕ್ಷೆಯಲ್ಲ.

ಎದೆಯೊಳಗಿನ ಕಾಯಿಲೆಗಳನ್ನೂ ಗುರುತಿಸುವ ಅವಕಾಶ: ಎಕ್ಸ್-ಕಿರಣಗಳ ನೆರವಿನಿಂದ ಮೂಳೆಗಳನ್ನು ಮಾತ್ರ ವಲ್ಲದೆ ಎದೆಯೊಳಗಿನ ಕೆಲವು ಅಂಗಗಳ ಸ್ಥಿತಿಯನ್ನೂ ಪರಿಶೀಲಿಸಲು ಸಾಧ್ಯವಾಯಿತು. ಇದು ಶ್ವಾಸಕೋಶಗಳ ಕಾಯಿಲೆಗಳ ರೋಗನಿರ್ಣಯದಲ್ಲಿ ಮಹತ್ವದ ಬದಲಾವಣೆಯನ್ನು ತಂದಿತು. ಉದಾಹರಣೆಗೆ, ನ್ಯುಮೋನಿಯಾ ಕಾಯಿಲೆಯಲ್ಲಿ ಶ್ವಾಸಕೋಶದ ಕೆಲವು ಭಾಗಗಳಲ್ಲಿ ಉರಿಯೂತ ದಿಂದಾಗಿ ದ್ರವ ಮತ್ತು ಜೀವಕೋಶಗಳ ಸಂಗ್ರಹವಾಗಬಹುದು. ಇಂತಹ ಬದಲಾವಣೆಗಳು ಎದೆಯ ಎಕ್ಸ್-ರೇ ಚಿತ್ರದಲ್ಲಿ ಕೆಲವು ಸಂದರ್ಭಗಳಲ್ಲಿ ಕಾಣಿಸಿ ಕೊಳ್ಳುತ್ತವೆ.

ಕ್ಷಯರೋಗದಿಂದ ಉಂಟಾಗುವ ಕೆಲವು ಬದಲಾವಣೆಗಳು, ಶ್ವಾಸಕೋಶದ ಸುತ್ತ ದ್ರವ ಸಂಗ್ರಹ ವಾಗುವುದು ಮತ್ತು ಇತರ ಅನೇಕ ಸಮಸ್ಯೆಗಳಿಗೂ ಎಕ್ಸ್-ರೇ ಉಪಯುಕ್ತವಾಗಿದೆ. ಹೃದಯದ ಗಾತ್ರದ ಬಗ್ಗೆ ಕೆಲವು ಸುಳಿವುಗಳನ್ನು ಪಡೆಯಬಹುದು. ಆದರೆ ಹೃದಯದ ಪಂಪಿನ ಸಾಮರ್ಥ್ಯ ಅಥವಾ ಕವಾಟಗಳ ಕಾರ್ಯವನ್ನು ಎಕ್ಸ್-ರೇ ಮಾತ್ರದಿಂದ ಸಂಪೂರ್ಣವಾಗಿ ತಿಳಿಯಲು ಸಾಧ್ಯವಿಲ್ಲ.

ಹೀಗಾಗಿ ಎಕ್ಸ್- ರೇ ಚಿತ್ರವು ದೇಹದ ಒಳಗಿನ ರಚನೆಯ ಬಗ್ಗೆ ಮಾಹಿತಿಯನ್ನು ನೀಡುತ್ತದೆ. ಆ ಮಾಹಿತಿಯನ್ನು ರೋಗಿಯ ಲಕ್ಷಣಗಳು, ದೈಹಿಕ ಪರೀಕ್ಷೆ ಮತ್ತು ಇತರ ಪರೀಕ್ಷೆಗಳೊಂದಿಗೆ ಸೇರಿಸಿ ಅರ್ಥಮಾಡಿ ಕೊಳ್ಳ ಬೇಕಾಗುತ್ತದೆ.

ಒಂದು ಆವಿಷ್ಕಾರದ ಜೊತೆಗೆ ಬಂದ ಅನಿರೀಕ್ಷಿತ ಅಪಾಯ: ಎಕ್ಸ್-ಕಿರಣಗಳ ಆವಿಷ್ಕಾರವು ವಿಜ್ಞಾನಿಗಳನ್ನು ಮತ್ತು ವೈದ್ಯರನ್ನು ಅಚ್ಚರಿಗೊಳಿಸಿತು. ಆದರೆ ಇದರ ಬಳಕೆಯ ಆರಂಭಿಕ ವರ್ಷಗಳಲ್ಲಿ ಒಂದು ದೊಡ್ಡ ಅಪಾಯವನ್ನು ಸಮರ್ಪಕವಾಗಿ ಅರ್ಥಮಾಡಿಕೊಂಡಿರಲಿಲ್ಲ. ಅದುವೇ ವಿಕಿರಣದಿಂದ ಉಂಟಾಗಬಹುದಾದ ಹಾನಿ. ಎಕ್ಸ್-ಕಿರಣಗಳು ಅಯನೀಕರಣ ವಿಕಿರಣ ಗಳು (Ionizing Radiation). ಅಂದರೆ ಅವು ಕೆಲವು ಪರಮಾಣುಗಳಿಂದ ಎಲೆಕ್ಟ್ರಾನ್‌ಗಳನ್ನು ಬೇರ್ಪಡಿಸುವಷ್ಟು ಶಕ್ತಿಯನ್ನು ಹೊಂದಿರುತ್ತವೆ. ಇಂತಹ ವಿಕಿರಣವು ಜೀವಕೋಶಗಳಲ್ಲಿರುವ ಅಣುಗಳಿಗೆ ಮತ್ತು ಡಿಎನ್‌ಎಗೆ ಹಾನಿಯನ್ನು ಉಂಟುಮಾಡಬಹುದು. ಅತಿಯಾದ ವಿಕಿರಣಕ್ಕೆ ಒಳಗಾದಾಗ ಚರ್ಮದಲ್ಲಿ ಸುಟ್ಟ ಗಾಯ ಗಳಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.

ದೀರ್ಘ ಕಾಲದ ಅಥವಾ ಹೆಚ್ಚಿನ ವಿಕಿರಣದ ಪರಿಣಾಮವಾಗಿ ಕೆಲವು ವಿಧದ ಕ್ಯಾನ್ಸರ್‌ಗಳ ಅಪಾಯವೂ ಹೆಚ್ಚಾಗಬಹುದು. ಆದರೆ ಎಕ್ಸ್-ಕಿರಣಗಳ ಆವಿಷ್ಕಾರದ ಆರಂಭದಲ್ಲಿ ಈ ಅಪಾಯ ಗಳ ಬಗ್ಗೆ ಸಾಕಷ್ಟು ಅರಿವು ಇರಲಿಲ್ಲ. ಕೆಲವು ಸಂಶೋಧಕರು ತಮ್ಮ ಕೈಗಳನ್ನು ಪದೇಪದೆ ಕಿರಣಗಳಿಗೆ ಒಡ್ಡುತ್ತಿದ್ದರು. ಹೊಸ ಉಪಕರಣಗಳನ್ನು ಪರೀಕ್ಷಿಸಲು ದೀರ್ಘಕಾಲ ವಿಕಿರಣದ ಸಮೀಪದಲ್ಲಿಯೇ ಕೆಲಸ ಮಾಡುತ್ತಿದ್ದರು. ಆರಂಭಿಕ ಎಕ್ಸ್-ರೇ ಉಪಕರಣಗಳು ಚಿತ್ರವನ್ನು ಪಡೆಯಲು ಹೆಚ್ಚಿನ ಸಮಯ ತೆಗೆದುಕೊಳ್ಳುತ್ತಿದ್ದವು. ವಿಕಿರಣದ ಪ್ರಮಾಣವೂ ಇಂದಿನ ಅನೇಕ ಸಾಮಾನ್ಯ ಪರೀಕ್ಷೆಗಳಿಗಿಂತ ಹೆಚ್ಚಾಗಿತ್ತು. ಹೀಗಾಗಿ ಕೆಲವು ಸಂಶೋಧಕರು ಮತ್ತು ತಂತ್ರಜ್ಞರು ಗಂಭೀರವಾದ ಆರೋಗ್ಯ ಸಮಸ್ಯೆಗಳಿಗೆ ಒಳಗಾದರು.

ಕ್ಲಾರೆನ್ಸ್ ಡ್ಯಾಲಿ- ಆವಿಷ್ಕಾರದ ಕರಾಳ ಅಧ್ಯಾಯ: ಎಕ್ಸ್-ಕಿರಣಗಳ ಆರಂಭಿಕ ಇತಿಹಾಸದಲ್ಲಿ ಅಮೆರಿಕದ ಕ್ಲಾರೆನ್ಸ್ ಡ್ಯಾಲಿ (Clarence Dally) ಎಂಬ ವ್ಯಕ್ತಿಯ ಕಥೆಯು ಅತ್ಯಂತ ದುಃಖಕರ ವಾಗಿದೆ. ಡ್ಯಾಲಿ ಪ್ರಸಿದ್ಧ ಆವಿಷ್ಕಾರಕ ಥಾಮಸ್ ಎಡಿಸನ್‌ನ ಸಹಾಯಕ ನಾಗಿದ್ದ. ಎಕ್ಸ್-ಕಿರಣಗಳ ನೆರವಿನಿಂದ ದೇಹದ ಒಳಗಿನ ರಚನೆಯನ್ನು ನೇರವಾಗಿ ಗಮನಿಸಲು ಅನುಕೂಲವಾಗುವ ಸಾಧನಗಳನ್ನು ಅಭಿವೃದ್ಧಿಪಡಿಸುವ ಪ್ರಯತ್ನದಲ್ಲಿ ಎಡಿಸನ್‌ನ ಪ್ರಯೋಗಶಾಲೆಯು ತೊಡಗಿತ್ತು. ಈ ಸಂಶೋಧನೆಗಳಲ್ಲಿ ಡ್ಯಾಲಿ ಪದೇಪದೇ ಎಕ್ಸ್-ಕಿರಣಗಳಿಗೆ ಒಳಗಾಗುತ್ತಿದ್ದ. ಕ್ರಮೇಣ ಅವನ ಕೈಗಳಲ್ಲಿ ಚರ್ಮದ ಗಾಯಗಳು ಕಾಣಿಸಿಕೊಳ್ಳಲಾರಂಭಿಸಿದವು. ‌

ಗಾಯಗಳು ಗುಣವಾಗದೆ ಸಮಸ್ಯೆಗಳು ಹೆಚ್ಚಾದವು. ವಿಕಿರಣದಿಂದ ಉಂಟಾಗುವ ಆರೋಗ್ಯ ಹಾನಿಯ ಬಗ್ಗೆ ಅಂದಿನ ತಿಳಿವಳಿಕೆ ಸೀಮಿತವಾಗಿದ್ದುದರಿಂದ ಈ ಅಪಾಯವನ್ನು ಆರಂಭ ದಲ್ಲಿಯೇ ಗುರುತಿಸಲಾಗಲಿಲ್ಲ. ಮುಂದೆ ಡ್ಯಾಲಿಯ ಆರೋಗ್ಯ ತೀವ್ರವಾಗಿ ಹದಗೆಟ್ಟಿತು. 1904ರಲ್ಲಿ ಆತ ಕ್ಯಾನ್ಸರ್‌ನಿಂದ ಮೃತಪಟ್ಟ. ಅವನ ಮರಣವು ಎಕ್ಸ್-ಕಿರಣಗಳ ಇತಿಹಾಸದಲ್ಲಿನ ಅತ್ಯಂತ ದುಃಖಕರವಾದ ಘಟನೆಗಳಲ್ಲಿ ಒಂದಾಯಿತು. ಆದರೆ ಇಂತಹ ಘಟನೆಗಳಿಂದ ವೈದ್ಯಕೀಯ ಲೋಕ ಒಂದು ಮಹತ್ವದ ಪಾಠ ಕಲಿಯಿತು. ಹೊಸ ಆವಿಷ್ಕಾರದೊಂದಿಗೆ ಅದನ್ನು ಬಳಸುವ ರೋಗಿಗಳು, ವೈದ್ಯರು ಮತ್ತು ತಂತ್ರಜ್ಞರ ಸುರಕ್ಷತೆ ಕಾಪಾಡುವ ವಿಧಾನಗಳನ್ನು ರೂಪಿಸುವುದೂ ಅಗತ್ಯ.

ವಿಕಿರಣ ಸುರಕ್ಷತೆ: ಇಂದು ಎಕ್ಸ್-ರೇ ಪರೀಕ್ಷೆಯನ್ನು ನಡೆಸುವಾಗ ವಿಕಿರಣದ ಸುರಕ್ಷತೆಗೆ ವಿಶೇಷ ಮಹತ್ವ ನೀಡಲಾಗುತ್ತದೆ. ವೈದ್ಯರು ರೋಗಿಗೆ ಪರೀಕ್ಷೆಯ ಅಗತ್ಯವಿದೆಯೇ ಎಂದು ನಿರ್ಧರಿಸುತ್ತಾರೆ. ಅಗತ್ಯ ವಿರುವ ಭಾಗದ ಚಿತ್ರಗಳನ್ನು ಪಡೆಯಲು ಸೂಕ್ತವಾದ ಉಪಕರಣ ಮತ್ತು ವಿಧಾನವನ್ನು ಆಯ್ಕೆ ಮಾಡಲಾಗು ತ್ತದೆ. ಸಾಧ್ಯವಾದಷ್ಟು ಕಡಿಮೆ ವಿಕಿರಣ ಬಳಸಿ ರೋಗ ನಿರ್ಣಯಕ್ಕೆ ಸಾಕಾ ಗುವ ಗುಣಮಟ್ಟದ ಚಿತ್ರ ಪಡೆಯು ವುದು ಮುಖ್ಯ. ಈ ತತ್ವವನ್ನು As Low As Rea sonably Achievable (ALARA) ಎಂದು ಕರೆಯುತ್ತಾರೆ.

ವಿಕಿರಣಕ್ಕೆ ಒಳಗಾಗುವ ಅವಧಿ, ಮೂಲದಿಂದ ಇರುವ ದೂರ ಮತ್ತು ಸೂಕ್ತ ರಕ್ಷಣಾ ವ್ಯವಸ್ಥೆಗಳು-ಇವು ಗಳೆಲ್ಲವೂ ವಿಕಿರಣದೊಂದಿಗೆ ಕೆಲಸ ಮಾಡುವ ಸಿಬ್ಬಂದಿಯ ಸುರಕ್ಷತೆಯಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ. ಮಕ್ಕಳಲ್ಲಿ ಮತ್ತು ಗರ್ಭಿಣಿಯರಲ್ಲಿ ಪರೀಕ್ಷೆಯ ಅಗತ್ಯ ಹಾಗೂ ವಿಕಿರಣದ ಪ್ರಮಾಣವನ್ನು ವಿಶೇಷವಾಗಿ ಪರಿಗಣಿಸಲಾಗುತ್ತದೆ. ಆದರೆ ಎಕ್ಸ್-ಕಿರಣಗಳಿಂದ ಹಾನಿಯಾಗಬಹು ದೆಂಬ ಭಯದಿಂದ ಅಗತ್ಯ ವೈದ್ಯಕೀಯ ಪರೀಕ್ಷೆಯನ್ನೇ ನಿರಾಕರಿಸುವುದು ಕೂಡ ಸರಿಯಾದ ಕ್ರಮವಲ್ಲ. ಇಂದಿನ ಅನೇಕ ಸಾಮಾನ್ಯ ಎಕ್ಸ್-ರೇ ಪರೀಕ್ಷೆಗಳಲ್ಲಿ ವಿಕಿರಣದ ಪ್ರಮಾಣ ಕಡಿಮೆ. ಸೂಕ್ತ ವೈದ್ಯಕೀಯ ಕಾರಣಕ್ಕಾಗಿ ನಡೆಸುವ ಪರೀಕ್ಷೆಯಿಂದ ದೊರೆಯುವ ಪ್ರಯೋಜನವು ಸಣ್ಣ ವಿಕಿರಣ ಅಪಾಯಕ್ಕಿಂತ ಹೆಚ್ಚು. ಆದ್ದರಿಂದ ವಿವೇಚನೆ ಅತ್ಯಂತ ಮುಖ್ಯ.

ಎಕ್ಸ್-ರೇಯಿಂದ ಸಿಟಿ ಸ್ಕ್ಯಾನ್‌ವರೆಗೆ: ರಾಂಟ್ಜೆನ್‌ನ ಕಾಲದಲ್ಲಿ ಎಕ್ಸ್-ಕಿರಣಗಳ ನೆರವಿನಿಂದ ಸರಳವಾದ ಚಿತ್ರಗಳನ್ನು ಪಡೆಯಲಾಗುತ್ತಿತ್ತು. ಆದರೆ ಮುಂದಿನ ಶತಮಾನದಲ್ಲಿ ವೈದ್ಯಕೀಯ ತಂತ್ರಜ್ಞಾನ ಅಭಿವೃದ್ಧಿಯಾಯಿತು. ಎಕ್ಸ್-ಕಿರಣಗಳ ನೆರವಿನಿಂದ ದೇಹದ ವಿವಿಧ ಕೋನಗಳಿಂದ ಚಿತ್ರಗಳನ್ನು ಪಡೆದು, ಗಣಕಯಂತ್ರದ ಮೂಲಕ ಅಡ್ಡಛೇದಗಳ ಚಿತ್ರಗಳನ್ನು ರೂಪಿಸುವ ಸಿಟಿ ಸ್ಕ್ಯಾನ್ (Computed Tomography- CT) ವಿಧಾನವು ಬೆಳೆಯಿತು. ಇದರಿಂದ ದೇಹದೊಳಗಿನ ಅಂಗಗಳನ್ನು ಪದರಪದರವಾಗಿ ಅಧ್ಯಯನ ಮಾಡಲು ಅವಕಾಶ ದೊರೆಯಿತು. ಇಂದು ಮೂಳೆ ಮುರಿತಗಳು, ಕೆಲವು ಮೆದುಳಿನ ತುರ್ತು ಸಮಸ್ಯೆಗಳು, ಶ್ವಾಸಕೋಶಗಳ ಕಾಯಿಲೆಗಳು, ದೇಹ ದೊಳಗಿನ ರಕ್ತಸ್ರಾವ ಮತ್ತು ಅನೇಕ ಇತರ ಸಮಸ್ಯೆಗಳನ್ನು ಗುರುತಿಸಲು ಸಿಟಿ ಸ್ಕ್ಯಾನ್ ಉಪಯುಕ್ತ ವಾಗಿದೆ. ಇದೇ ರೀತಿ ಸ್ತನಗಳಲ್ಲಿನ ಕೆಲವು ಬದಲಾವಣೆಗಳನ್ನು ಪರಿಶೀಲಿಸಲು ಮ್ಯಾಮೋಗ್ರಫಿ, ರಕ್ತನಾಳಗಳ ಚಿತ್ರಗಳನ್ನು ಪಡೆಯಲು ವಿಶೇಷವಾದ ಎಕ್ಸ್-ರೇ ವಿಧಾನಗಳು ಮತ್ತು ಶಸ್ತ್ರಚಿಕಿತ್ಸೆಯ ಸಂದರ್ಭದಲ್ಲಿ ಉಪಕರಣಗಳ ಸ್ಥಾನವನ್ನು ತಿಳಿದುಕೊಳ್ಳಲು ನಿರಂತರ ಚಿತ್ರಣ ನೀಡುವ ವಿಧಾನಗಳು ಅಭಿವೃದ್ಧಿಯಾಗಿವೆ. ಆದರೆ ಪ್ರತಿಯೊಂದು ಒಳಚಿತ್ರಣ ವಿಧಾನವೂ ಎಕ್ಸ್- ಕಿರಣಗಳನ್ನು ಬಳಸುವುದಿಲ್ಲ. ಉದಾಹರಣೆಗೆ, ಎಂಆರ್'ಐ ಬಲವಾದ ಕಾಂತೀಯ ಕ್ಷೇತ್ರ ಮತ್ತು ರೇಡಿಯೊ ತರಂಗಗಳನ್ನು ಬಳಸುತ್ತದೆ. ಅಲ್ಟ್ರಾಸೌಂಡ್ ಶಬ್ದತರಂಗಗಳನ್ನು ಬಳಸುತ್ತದೆ.

ರಾಂಟ್ಜೆನ್‌ಗೆ ದೊರೆತ ಮೊದಲ ಭೌತವಿಜ್ಞಾನ ನೊಬೆಲ್ ಪ್ರಶಸ್ತಿ: ಎಕ್ಸ್-ಕಿರಣಗಳ ಆವಿಷ್ಕಾರ ವು ವೈದ್ಯ ಕೀಯದ ಜೊತೆಗೆ ಭೌತವಿಜ್ಞಾನದ ಬೆಳವಣಿಗೆಯಲ್ಲಿಯೂ ಮಹತ್ವದ ಸ್ಥಾನವನ್ನು ಪಡೆದಿದೆ. 1901ರಲ್ಲಿ ನೊಬೆಲ್ ಪ್ರಶಸ್ತಿಗಳನ್ನು ಮೊಟ್ಟಮೊದಲ ಬಾರಿಗೆ ನೀಡಲಾಯಿತು. ಆ ವರ್ಷದ ಭೌತವಿಜ್ಞಾನ ವಿಭಾಗದ ನೊಬೆಲ್ ಪ್ರಶಸ್ತಿಯನ್ನು ವಿಲ್ಹೆಲ್ಮ್ ಕಾನ್ರಾಡ್ ರಾಂಟ್ಜೆನ್‌ಗೆ ನೀಡಲಾ ಯಿತು. ಇದು ಅವನ ಆವಿಷ್ಕಾರಕ್ಕೆ ದೊರೆತ ಮಹತ್ವದ ಅಂತಾರಾಷ್ಟ್ರೀಯ ಗೌರವ ವಾಗಿತ್ತು. ಅವನ ಆವಿಷ್ಕಾರ, ವೈದ್ಯರು ಮತ್ತು ವಿಜ್ಞಾನಿಗಳು ಮಾನವ ದೇಹದ ಒಳಗಿನ ರಚನೆ ಯನ್ನು ಅಧ್ಯಯನ ಮಾಡುವ ವಿಧಾನವನ್ನೇ ಬದಲಿಸಿತು.

ಒಂದು ಕಾಲದಲ್ಲಿ ದೇಹದ ಅಂಗಗಳ ರಚನೆಯನ್ನು ನೇರವಾಗಿ ತಿಳಿದುಕೊಳ್ಳಲು ಶಸ್ತ್ರಚಿಕಿತ್ಸೆ ಅಥವಾ ಮೃತದೇಹದ ಅಂಗರಚನಾ ಅಧ್ಯಯನವೇ ಮುಖ್ಯವಾದ ಮಾರ್ಗವಾಗಿತ್ತು. ಆದರೆ ಈಗ ಜೀವಂತ ವ್ಯಕ್ತಿಯ ದೇಹವನ್ನು ತೆರೆಯದೆಯೇ ಒಳಗಿನ ಕೆಲವು ರಚನೆಗಳನ್ನು ನೋಡಲು ಸಾಧ್ಯ ವಾಯಿತು.

ಹೊಸ ತಂತ್ರಜ್ಞಾನ ಕಲಿಸುವ ಪಾಠ: ರಾಂಟ್ಜೆನ್‌ನ ಆವಿಷ್ಕಾರದ ಇತಿಹಾಸ ಗಮನಿಸಿದಾಗ ಎರಡು ಮಹತ್ವದ ಸಂಗತಿಗಳು ಸ್ಪಷ್ಟವಾಗುತ್ತವೆ. ಮೊದಲನೆಯದು, ಮೂಲಭೂತ ವೈಜ್ಞಾನಿಕ ಸಂಶೋಧನೆಯು ಅನಿರೀಕ್ಷಿತವಾಗಿ ವೈದ್ಯಕೀಯಕ್ಕೆ ಅಪಾರವಾದ ಪ್ರಯೋಜನವನ್ನು ನೀಡಬ ಹುದು. ರಾಂಟ್ಜೆನ್ ಹೊಸ ರೀತಿಯ ವೈದ್ಯಕೀಯ ಸಾಧನವನ್ನು ನಿರ್ಮಿಸಬೇಕೆಂಬ ಉದ್ದೇಶದಿಂದ ತನ್ನ ಪ್ರಯೋಗಗಳನ್ನು ಆರಂಭಿಸಿರಲಿಲ್ಲ. ಆತ ಭೌತವಿಜ್ಞಾನದ ಒಂದು ಮೂಲಭೂತ ಪ್ರಶ್ನೆ ಯನ್ನು ಅಧ್ಯಯನ ಮಾಡುತ್ತಿದ್ದ. ಆದರೆ ಅವನ ಪ್ರಯೋಗಗಳಿಂದ ದೊರೆತ ಹೊಸ ತಿಳಿವಳಿಕೆಯು ವೈದ್ಯಕೀಯ ರೋಗನಿರ್ಣಯದ ಸ್ವರೂಪವನ್ನೇ ಬದಲಿಸಿತು.

ಎರಡನೆಯದು, ತಂತ್ರಜ್ಞಾನದ ಪ್ರಯೋಜನವನ್ನು ಕಂಡುಹಿಡಿಯುವುದರ ಜೊತೆಗೆ ಅದರ ಸಂಭವನೀಯ ಅಪಾಯಗಳನ್ನು ಗುರು ತಿಸುವುದೂ ಅಗತ್ಯ. ಆರಂಭಿಕ ಎಕ್ಸ್-ರೇ ಸಂಶೋಧಕರು ಈ ಕಿರಣಗಳ ಅಪಾಯವನ್ನು ಸಂಪೂರ್ಣವಾಗಿ ತಿಳಿದಿರಲಿಲ್ಲ. ನಂತರದ ಅನುಭವಗಳು ಮತ್ತು ಸಂಶೋಧನೆ ಗಳಿಂದ ವಿಕಿರಣ ರಕ್ಷಣೆಯ ವಿಧಾನಗಳು ಬೆಳೆಯತೊಡಗಿದವು. ಇದೇ ತತ್ವವು ಇಂದಿನ ಕೃತಕ ಬುದ್ಧಿಮತ್ತೆ, ವಂಶ ವಾಹಿ ಚಿಕಿತ್ಸೆ, ಹೊಸ ಔಷಧಗಳು ಮತ್ತು ಅತ್ಯಾಧುನಿಕ ವೈದ್ಯಕೀಯ ಉಪಕರಣಗಳಿಗೂ ಅನ್ವಯಿಸುತ್ತದೆ.