Vishweshwar Bhat Column: ಅವರು 50 ವರ್ಷ ಬರೆದರು

ಸಂಪಾದಕರ ಸದ್ಯಶೋಧನೆ

ಜಾಗತಿಕ ಪತ್ರಿಕೋದ್ಯಮದ ಇತಿಹಾಸವನ್ನು ಗಮನಿಸಿದರೆ, ಒಂದೇ ಪತ್ರಿಕೆಯಲ್ಲಿ ಒಂದೇ ವಿಷಯದ ಕುರಿತು ಐದು ದಶಕಗಳಿಗೂ ಹೆಚ್ಚು ಕಾಲ ನಿರಂತರವಾಗಿ ಅಂಕಣ ಬರೆದವರು ತೀರಾ ವಿರಳ. ಅಂಥ ಅಪರೂಪದ, ಬೆರಗುಗೊಳಿಸುವ ಪರಂಪರೆಯನ್ನು ನಿರ್ಮಿಸಿದ ಹಿರಿಯ ಬರಹಗಾರ ರಾಬಿನ್ ಲೇನ್ ಫಾಕ್ಸ್. 1970ರಲ್ಲಿ ಫೈನಾನ್ಷಿಯಲ್ ಟೈಮ್ಸ್ ಪತ್ರಿಕೆಯಲ್ಲಿ ಆರಂಭವಾದ ಅಂಕಣವು ಇಂದಿಗೂ ಜಗತ್ತಿನಾದ್ಯಂತ ಲಕ್ಷಾಂತರ ಓದುಗರ ವಾರಾಂತ್ಯದ ಅತ್ಯಂತ ಪ್ರೀತಿಯ ಬೌದ್ಧಿಕ ಹಾಗೂ ಸೌಂದರ್ಯದ ಸಂಗಾತಿಯಾಗಿದೆ. ‌

ಅಷ್ಟಕ್ಕೂ ಇವರು ಬರೆಯುತ್ತಿರುವ ವಿಷಯ ಗಾರ್ಡನಿಂಗ್ ಕುರಿತು. ಹಣಕಾಸು ಮತ್ತು ಷೇರು ಮಾರುಕಟ್ಟೆಯ ಕಠಿಣ ಅಂಕಿ-ಅಂಶಗಳ ನಡುವೆ ಮಣ್ಣಿನ ಘಮಲು, ಹೂವುಗಳ ನವಿರು ಮತ್ತು ಎಲೆಗಳ ಹಸಿರನ್ನು ಬೆರೆಸಿ ಓದುಗರಿಗೆ ನೆಮ್ಮದಿಯ ತಂಗಾಳಿಯನ್ನು ಉಣಬಡಿಸಿದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಮೂಲತಃ ಇತಿಹಾಸಕಾರರಾದ ರಾಬಿನ್ ಲೇನ್ ಫಾಕ್ಸ್ ಅವರು ಆಕ್ಸ್‌ʼಫರ್ಡ್ ವಿಶ್ವವಿದ್ಯಾಲಯದ ನ್ಯೂ ಕಾಲೇಜಿನಲ್ಲಿ ಪ್ರಾಚೀನ ಗ್ರೀಕ್ ಮತ್ತು ರೋಮನ್ ಇತಿಹಾಸದ ಪ್ರಾಧ್ಯಾಪಕರಾಗಿ ದೀರ್ಘಕಾಲ ಸೇವೆ ಸಲ್ಲಿಸಿದವರು.

ಇದನ್ನೂ ಓದಿ: Vishweshwar Bhat Column: ನ್ಯಾಷನಲ್ ಜಿಯಾಗ್ರಫಿಕ್ ಮುಖಪುಟ

ಅಲೆಕ್ಸಾಂಡರ್ ದಿ ಗ್ರೇಟ್ ಕುರಿತು ಇವರು ರಚಿಸಿದ ಸಂಶೋಧನಾ ಗ್ರಂಥವು ಜಾಗತಿಕ ಮಟ್ಟದಲ್ಲಿ ಕ್ಲಾಸಿಕ್ ಎಂದು ಪರಿಗಣಿತವಾಗಿದೆ. ಹಾಲಿವುಡ್ ನಿರ್ದೇಶಕ ಆಲಿವರ್ ಸ್ಟೋನ್ ‘ಅಲೆಕ್ಸಾಂಡರ್’ ಚಲನಚಿತ್ರ ವನ್ನು ರೂಪಿಸಿದಾಗ, ಲೇನ್ ಫಾಕ್ಸ್ ಅವರೇ ಅದಕ್ಕೆ ಮುಖ್ಯ ಐತಿಹಾಸಿಕ ಸಲಹೆಗಾರ ರಾಗಿದ್ದರು. ವಿಶೇಷವೆಂದರೆ, ಆ ಸಿನಿಮಾದ ಸಲಹೆಗಾಗಿ ಅವರು ಹಣವನ್ನು ಪಡೆಯದೇ, ಕೇವಲ ಕುದುರೆ ಸವಾರಿ ಮಾಡುವ ಅವಕಾಶ ಮತ್ತು ಅಲೆಕ್ಸಾಂಡರ್ ಸೈನ್ಯದ ಮುಂಚೂಣಿ ಅಶ್ವದಳದ ನಾಯಕನಾಗಿ ಪರದೆಯ ಮೇಲೆ ಕಾಣಿಸಿಕೊಳ್ಳುವ ಅಪರೂಪದ ಷರತ್ತನ್ನು ವಿಧಿಸಿದ್ದರು!

ಇವರ ಇತಿಹಾಸ ಪ್ರಜ್ಞೆ ಮತ್ತು ರೋಮಾಂಚಕ ವ್ಯಕ್ತಿತ್ವವೇ ಇವರ ಗಾರ್ಡನಿಂಗ್ ಬರವಣಿಗೆಗೂ ಅಡಿಪಾಯ. ಸಾಮಾನ್ಯವಾಗಿ ಗಾರ್ಡನಿಂಗ್ ಎಂದರೆ ಕೇವಲ ಸಸಿ ನೆಡುವುದು, ನೀರುಣಿಸುವುದು ಅಥವಾ ಕಳೆ ಕೀಳುವ ತಾಂತ್ರಿಕ ಪ್ರಕ್ರಿಯೆ ಎಂದು ಹಲವರು ಭಾವಿಸುತ್ತಾರೆ. ಆದರೆ ಲೇನ್ ಫಾಕ್ಸ್ ಅವರ ದೃಷ್ಟಿಯಲ್ಲಿ ತೋಟಗಾರಿಕೆ ಎನ್ನುವುದು ಕೇವಲ ಕೃಷಿಯಲ್ಲ. ಅದೊಂದು ಜೀವಂತ ಕಲೆ, ಸಾಹಿತ್ಯ ಮತ್ತು ಕಾಲದೊಂದಿಗಿನ ಆಧ್ಯಾತ್ಮಿಕ ಸಂವಾದ. ಅವರ ಪ್ರತಿಯೊಂದು ಅಂಕಣದಲ್ಲೂ ಸಸ್ಯಶಾ‌ಸ್ತ್ರದ ಜತೆಗೆ ಲ್ಯಾಟಿನ್ ಸಾಹಿತ್ಯ, ಪ್ರಾಚೀನ ಗ್ರೀಸ್‌ನ ಉದ್ಯಾನ ಕಲ್ಪನೆಗಳು, ಯೂರೋಪಿನ ನವೋದಯ ಕಾಲದ ಹೂವಿನ ಮಾರುಕಟ್ಟೆಗಳು ಹಾಗೂ ಅಂದಿನ ರಾಜಮನೆತನಗಳ ತೋಟಗಾರಿಕಾ ಅಭಿರುಚಿಗಳು ಎದ್ದು ಕಾಣುತ್ತವೆ.

ಇತಿಹಾಸದ ಆಳವಾದ ತಿಳಿವಳಿಕೆಯು ಸಸ್ಯಲೋಕದ ಸೂಕ್ಷ್ಮತೆಗಳನ್ನು ವಿವರಿಸಲು ಅವರಿಗೆ ಹೊಸ ಆಯಾಮವನ್ನು ಒದಗಿಸಿದೆ. ಫಾಕ್ಸ್ ಅವರ ಶೈಲಿಯು ಅತ್ಯಂತ ನೇರ, ನಿಷ್ಠುರ ಮತ್ತು ಅಷ್ಟೇ ಆಪ್ತವಾದುದು. ಗಿಡಗಳ ಆಯ್ಕೆ, ಬಣ್ಣಗಳ ಹೊಂದಾಣಿಕೆ ಮತ್ತು ಋತುಮಾನಕ್ಕೆ ತಕ್ಕಂತೆ ಉದ್ಯಾನ ವನ್ನು ಸಜ್ಜುಗೊಳಿಸುವ ವಿಷಯದಲ್ಲಿ ಅವರು ಎಂದಿಗೂ ಮುಲಾಜಿಲ್ಲದೇ ತಮ್ಮ ಖಚಿತ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಾರೆ. ‌

ಯಾವುದೇ ಒಂದು ಹೂವಿನ ಬಣ್ಣ ಅವರಿಗೆ ಅತಿಯಾಗಿ ಅನಿಸಿದರೆ ಅಥವಾ ವಿನ್ಯಾಸಕ್ಕೆ ಹೊಂದಿಕೆ ಯಾಗದಿದ್ದರೆ, ಅದನ್ನು ನೇರವಾಗಿ ಟೀಕಿಸಲು ಅವರು ಹಿಂಜರಿಯುವುದಿಲ್ಲ. ಇದೇ ವೇಳೆ, ಮಣ್ಣಿನ ಸತ್ವವನ್ನು ಪರೀಕ್ಷಿಸುವ ವಿಧಾನ, ಅಪರೂಪದ ಸಸ್ಯಗಳನ್ನು ಪೋಷಿಸುವ ಸೂಕ್ಷ್ಮ ತಂತ್ರಗಳು ಮತ್ತು ಗೆಡ್ಡೆಗಳನ್ನು ನೆಲದಲ್ಲಿ ಹೂಳುವ ನಿಖರ ಲೆಕ್ಕಾಚಾರಗಳನ್ನು ಸ್ನೇಹಿತನೊಬ್ಬ ಕುಳಿತು ಪ್ರೀತಿಯಿಂದ ವಿವರಿಸುವಂತೆ ಎಳೆಎಳೆಯಾಗಿ ಬಿಡಿಸಿಡುತ್ತಾರೆ.

ಆಕ್ಸ್ʼಫರ್ಡ್‌ನ ನ್ಯೂ ಕಾಲೇಜಿನ ಐತಿಹಾಸಿಕ ಉದ್ಯಾನವನವನ್ನು ದಶಕಗಳ ಕಾಲ ‘ಗಾರ್ಡನ್ ಮಾಸ್ಟರ್’ ಆಗಿ ನಿರ್ವಹಿಸಿದ ಅಪಾರ ನೈಜ ಅನುಭವ ಅವರ ಬೆನ್ನಿಗಿದೆ. ಪುಸ್ತಕಗಳಲ್ಲಿ ಓದಿ ಬರೆಯುವ ಮೇಜಿನ ಬರಹಗಾರರಲ್ಲ ಅವರು. ಖುದ್ದಾಗಿ ಮಣ್ಣನ್ನು ಮುಟ್ಟಿ, ಸ್ವತಃ ಕೈಯಾರೆ ಕಳೆ ಕಿತ್ತು, ಮಣ್ಣಿನ ಫಲವತ್ತತೆಗಾಗಿ ಗೊಬ್ಬರ ಬೆರೆಸಿ, ಋತುಮಾನಗಳ ಬದಲಾವಣೆಗೆ ಗಿಡಗಳು ತೋರುವ ಪ್ರತಿಕ್ರಿಯೆಯನ್ನು ದಿನನಿತ್ಯ ಕಣ್ಣಾರೆ ಕಂಡವರು. ಈ ನೈಜ ಸ್ಪರ್ಶವೇ ಅವರ ಅಕ್ಷರಗಳಿಗೆ ಅಪ್ರತಿಮ ಜೀವಂತಿಕೆಯನ್ನು ತಂದುಕೊಟ್ಟಿದೆ. ಅವರ ತೋಟದಲ್ಲಿ ಒಂದು ಗುಲಾಬಿ ಅರಳಿದರೂ ಅಥವಾ ವಿಚಿತ್ರ ಶಿಲೀಂಧ್ರ ದಾಳಿಯಿಂದ ಅಪರೂಪದ ಸಸಿಯೊಂದು ಸೊರಗಿದರೂ, ಆ ನೋವು ಮತ್ತು ಸಂಭ್ರಮ ಎರಡೂ ಅವರ ಲೇಖನಗಳಲ್ಲಿ ಓದುಗರ ಎದೆಗಿಳಿಯುವಂತೆ ಧ್ವನಿಸುತ್ತದೆ.

ಇವರ ಗಾರ್ಡನಿಂಗ್ ತತ್ವಗಳಲ್ಲಿ ಮುಖ್ಯವಾದುದು ಸೌಂದರ್ಯಪ್ರಜ್ಞೆ ಮತ್ತು ಬಣ್ಣಗಳ ಸಾಮರಸ್ಯ. ತೋಟವೆಂದರೆ ಬರೀ ಹಸಿರು ರಾಶಿಯಲ್ಲ, ಬದಲಾಗಿ ಅದೊಂದು ವರ್ಣಚಿತ್ರದ ಕ್ಯಾನ್ವಾಸ್ ಎನ್ನುವುದು ಅವರ ನಿಲುವು.