Arun Gawli: 17 ವರ್ಷಗಳ ಸೆರೆವಾಸದ ಬಳಿಕ ಭೂಗತ ದೊರೆ ರಿಲೀಸ್‌; ಯಾರೀತ? ಏನಿವನ ಹಿನ್ನೆಲೆ?

ನಾಗಪುರ: ಮುಂಬೈನ ಶಿವಸೇನಾ (Mumbai Shiv Sena) ಕಾರ್ಪೊರೇಟರ್ ಕಮಲಾಕರ್ ಜಂಸಾಂದೇಕರ್‌ (Kamlakar Jamsandekar) ಅವರ 2007ರ ಕೊಲೆ ಪ್ರಕರಣದಲ್ಲಿ (Murder Case) ಜೀವಾವಧಿ ಶಿಕ್ಷೆಗೊಳಗಾಗಿದ್ದ ಗ್ಯಾಂಗ್‌ಸ್ಟರ್‌ ರಾಜಕಾರಣಿಯಾದ ಅರುಣ್ ಗಾವ್ಲಿ (76) (Arun Gawli) ಬುಧವಾರ ನಾಗಪುರ ಕೇಂದ್ರ ಕಾರಾಗೃಹದಿಂದ ಬಿಡುಗಡೆಯಾಗಿದ್ದಾರೆ. ಸುಪ್ರೀಂ ಕೋರ್ಟ್ ಆಗಸ್ಟ್ 28ರಂದು ಅವರಿಗೆ ಜಾಮೀನು ಮಂಜೂರು ಮಾಡಿದ್ದು, ಎಲ್ಲ ಜೈಲು ಔಪಚಾರಿಕತೆಗಳನ್ನು ಪೂರೈಸಿ ಮಧ್ಯಾಹ್ನ 12:30ಕ್ಕೆ ಬಂಧಮುಕ್ತನಾದನು. ಜೈಲಿನಿಂದ ಹೊರಬಂದ ಗಾವ್ಲಿಯನ್ನು ಕುಟುಂಬ ಸದಸ್ಯರು ಮತ್ತು ಬೆಂಬಲಿಗರು ಸ್ವಾಗತಿಸಿದರು.

ಸುಪ್ರೀಂ ಕೋರ್ಟ್‌ನ ತೀರ್ಪು

ಗಾವ್ಲಿಯ ಜಾಮೀನು ಅರ್ಜಿಯನ್ನು ಪರಿಗಣಿಸಿದ ಸುಪ್ರೀಂ ಕೋರ್ಟ್‌ನ ನ್ಯಾಯಮೂರ್ತಿಗಳಾದ ಎಂ.ಎಂ. ಸುಂದರೇಶ್ ಮತ್ತು ಎನ್. ಕೋಟೀಶ್ವರ್ ಸಿಂಗ್, "ಅರುಣ್ ಗಾವ್ಲಿ 17 ವರ್ಷ ಮತ್ತು 3 ತಿಂಗಳಿಂದ ಜೈಲಿನಲ್ಲಿದ್ದಾರೆ. ಆತನ ವಯಸ್ಸು 76 ಎಂಬುದನ್ನೂ ಗಮನಿಸಿದ್ದೇವೆ. ಆತನ ಮೇಲ್ಮನವಿ ಇನ್ನೂ ಬಾಕಿಯಿದೆ" ಎಂದು ತಿಳಿಸಿದರು. ಜಾಮೀನನ್ನು ಟ್ರಯಲ್ ಕೋರ್ಟ್‌ನ ಷರತ್ತುಗಳಿಗೆ ಒಳಪಡಿಸಲಾಗಿದ್ದು, ಪ್ರಕರಣದ ಅಂತಿಮ ವಿಚಾರಣೆಯನ್ನು ಮುಂದಿನ ಫೆಬ್ರವರಿಗೆ ನಿಗದಿಪಡಿಸಲಾಗಿದೆ.

ಈ ಸುದ್ದಿಯನ್ನು ಓದಿ: Viral News: ನಡುರಸ್ತೆಯಲ್ಲಿ ಹೈಡ್ರಾಮಾ! 2 ಗಂಟೆಗಳಿಗೂ ಹೆಚ್ಚು ಕಾಲ ಬೆತ್ತಲೆಯಾಗಿ ಓಡಾಡಿದ ತೃತೀಯ ಲಿಂಗಿ

ಅರುಣ್ ಗಾವ್ಲಿಯ ಹಿನ್ನೆಲೆ

ಮುಂಬೈನ ಬೈಕುಲಾದ ದಾಗ್ಡಿ ಚಾವ್ಲ್‌‌ನ ಗಾವ್ಲಿ, 1980 ಮತ್ತು 1990ರ ದಶಕದಲ್ಲಿ ಭೂಗತ ಲೋಕದಲ್ಲಿ ಹೆಸರುವಾಸಿಯಾಗಿದ್ದರು. "ಡ್ಯಾಡಿ" ಎಂಬ ಅಡ್ಡಹೆಸರಿನಿಂದ ಕರೆಯಲ್ಪಡುತ್ತಿದ್ದ ಆತ, ದರೋಡೆ ಮತ್ತು ಸಂಘಟಿತ ಅಪರಾಧಗಳಲ್ಲಿ ಭಾಗಿಯಾಗಿದ್ದ. ಆದರೂ, ರಾಜಕೀಯಕ್ಕೆ ಧುಮುಕಿದ ಗಾವ್ಲಿ, ಅಖಿಲ ಭಾರತೀಯ ಸೇನಾ ಪಕ್ಷವನ್ನು ಸ್ಥಾಪಿಸಿ, 2004ರಿಂದ 2009ರವರೆಗೆ ಮುಂಬೈನ ಚಿಂಚ್‌ಪೋಕ್ಲಿ ಕ್ಷೇತ್ರದಿಂದ ಶಾಸಕರಾಗಿದ್ದರು.

ಕೊಲೆ ಪ್ರಕರಣ ಮತ್ತು ಶಿಕ್ಷೆ

2006ರಲ್ಲಿ ಕಮಲಾಕರ್ ಜಂಸಾಂದೇಕರ್ ಕೊಲೆ ಪ್ರಕರಣದಲ್ಲಿ ಗಾವ್ಲಿಯನ್ನು ಮಹಾರಾಷ್ಟ್ರ ಸಂಘಟಿತ ಅಪರಾಧ ತಡೆ ಕಾಯ್ದೆ (MCOCA) ಅಡಿಯಲ್ಲಿ ಬಂಧಿಸಲಾಯಿತು. 2012ರ ಆಗಸ್ಟ್‌ನಲ್ಲಿ ಮುಂಬೈ ಸೆಷನ್ಸ್ ಕೋರ್ಟ್ ಅವರಿಗೆ ಜೀವಾವಧಿ ಶಿಕ್ಷೆ ಮತ್ತು 17 ಲಕ್ಷ ರೂ. ದಂಡ ವಿಧಿಸಿತು. 2019ರಲ್ಲಿ ಬಾಂಬೆ ಹೈಕೋರ್ಟ್ ಈ ತೀರ್ಪನ್ನು ಎತ್ತಿಹಿಡಿದಿತ್ತು, ನಂತರ ಗಾವ್ಲಿ ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿದ್ದರು. ಗಾವ್ಲಿಯ ಬಿಡುಗಡೆಯು ಮುಂಬೈನ ಭೂಗತ ಲೋಕ ಮತ್ತು ರಾಜಕೀಯ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ. ಆತನ ಮೇಲಿನ ಆರೋಪಗಳ ಅಂತಿಮ ತೀರ್ಪಿಗಾಗಿ ಎಲ್ಲರ ಗಮನವು ಫೆಬ್ರವರಿಯ ವಿಚಾರಣೆಯ ಮೇಲಿದೆ.