ಇರಾನ್‌ ವಿರುದ್ಧದ ಯುದ್ಧ ಮತ್ತೊಂದು ಹಂತಕ್ಕೆ ಕೊಂಡೊಯ್ದ ಅಮೆರಿಕ-ಇಸ್ರೇಲ್‌; ಏರ್‌ಪೋರ್ಟ್‌ ಮೇಲೆ ದಾಳಿ

ಟೆಹರಾನ್‌, ಮಾ. 3: ಫೆಬ್ರವರಿ 28ರಂದು ಇರಾನ್‌ ಮೇಲೆ ದಾಳಿ ನಡೆಸುವ ಮೂಲಕ ಯುದ್ಧ ಆರಂಭಿಸಿದ್ದ ಅಮೆರಿಕ-ಇಸ್ರೇಲ್‌ ಇದೀಗ ಸಮರವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ (US-Israel-Iran War). ಈಗಾಗಲೇ ಇರಾನ್‌ನಲ್ಲಿ 700ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದಾರೆ. ಸತತ 4ನೇ ದಿನವಾದ ಮಾರ್ಚ್‌ 3ರಂದು ಆಕ್ರಮಣ ಮುಂದುವರಿಸಿದ ಅಮೆರಿಕ-ಇಸ್ರೇಲ್‌ ಜಂಟಿ ಪಡೆ ಇರಾನ್‌ನ ವಿಮಾನ ನಿಲ್ದಾಣದ ಮೇಲೆ ದಾಳಿ ನಡೆಸಿದೆ. ಬುಶೆಹರ್ ವಿಮಾನ ನಿಲ್ದಾಣದ (Bushehr Airport) ಮೇಲೆ ನಡೆದ ಈ ದಾಳಿಯಲ್ಲಿ ನಿಲ್ಲಿಸಿದ್ದ ವಿಮಾನ ಧ್ವಂಸಗೊಂಡಿದೆ. ಯಾವುದೇ ಸಾವು-ನೋವಿನ ಬಗ್ಗೆ ವರದಿಯಾಗಿಲ್ಲ.

ಇರಾನ್‌ನ ಸುಪ್ರೀಂ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಹತ್ಯೆಯ ನಂತರ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ಕಮಾಂಡ್ ಕೇಂದ್ರಗಳು, ಮಿಲಿಟರಿ ನೆಲೆಗಳು ಮತ್ತು ನಾಯಕರ ತಾಣಗಳನ್ನು ಗುರಿಯಾಗಿಸಿಕೊಂಡು ಅಮೆರಿಕ-ಇಸ್ರೇಲ್‌ ನಡೆಸುತ್ತಿರುವ ಜಂಟಿ ಕಾರ್ಯಾಚರಣೆಯ ಭಾಗವಾಗಿ ಈ ದಾಳಿ ನಡೆದಿವೆ. ಬುಶೆಹರ್ ವಿಮಾನ ನಿಲ್ದಾಣದ ಮೇಲಿನ ದಾಳಿಯ ಬಗ್ಗೆ ಅಧಿಕೃತ ಪ್ರಕಟಣೆ ಇನ್ನೂ ಬಂದಿಲ್ಲ.

ಹಾನಿಗೀಡಾದ ಬುಶೆಹರ್ ವಿಮಾನ ನಿಲ್ದಾಣ:

ಮೆಹರ್ ನ್ಯೂಸ್ ಏಜೆನ್ಸಿಯ ಪ್ರಕಾರ, ಟೆಹರಾನ್‌ನ ಮೆಹರಾಬಾದ್ ವಿಮಾನ ನಿಲ್ದಾಣವನ್ನು ಗುರಿಯಾಗಿಸಿಕೊಂಡು ದಾಳಿ ನಡೆದಿದೆ. ರನ್‌ವೇಯಂತೆ ಕಾಣುವ ಜಾಗದ ಹಿಂದೆ ಬೂದು ಹೊಗೆಯ ಮೋಡವು ಆಕಾಶಕ್ಕೆ ಏರುತ್ತಿರುವುದನ್ನು ತೋರಿಸುವ ಫೋಟೊ, ವಿಡಿಯೊ ವೈರಲ್‌ ಆಗಿದೆ.

ಹೊರ್ಮುಜ್‌ ಜಲಸಂಧಿ ಸ್ಥಗಿತಗೊಂಡರೂ ಭಾರತಕ್ಕಿಲ್ಲ ಸಮಸ್ಯೆ; 25 ದಿನಕ್ಕಾಗುವಷ್ಟು ಕಚ್ಚಾ ತೈಲ ದಾಸ್ತಾನಿದೆ ಎಂದ ಕೇಂದ್ರ

ಬುಶೆಹರ್ ವಿಮಾನ ನಿಲ್ದಾಣ ಯಾಕೆ ಮುಖ್ಯ?

ಬುಶೆಹರ್ ಪ್ರದೇಶವು ಇರಾನ್‌ನ ಏಕೈಕ ನ್ಯೂಕ್ಲಿಯರ್ ವಿದ್ಯುತ್ ಸ್ಥಾವರವನ್ನು ಹೊಂದಿದೆ. ಇದರ ಸಮೀಪವೇ ವಿಮಾನ ನಿಲ್ದಾಣವಿದೆ. ಈ ವಿದ್ಯುತ್ ಸ್ಥಾವರ ರಷ್ಯಾದ ಸಹಾಯದಿಂದ ನಿರ್ಮಿತವಾಗಿದೆ ಮತ್ತು ರಷ್ಯಾದಿಂದ ಒದಗಿಸಲಾದ ಯುರೇನಿಯಂನಿಂದ ಚಾಲಿತವಾಗಿದೆ. ಇರಾನ್‌ ರಾಜಧಾನಿ ಟೆಹರಾನ್‌ನಿಂದ ಸುಮಾರು 1,000 ಕಿ.ಮೀ. ದೂರದಲ್ಲಿರುವ ದಕ್ಷಿಣ ಗಲ್ಫ್ ಕರಾವಳಿಯಲ್ಲಿರುವ ಬುಶೆಹರ್ ನಗರದ ಈ ಸ್ಥಾವರದಲ್ಲಿ ಹಲವು ರಷ್ಯಾದ ಕಾರ್ಮಿಕರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಖಾಯಂ ಕಾರ್ಮಿಕರು ಮತ್ತು ತಾತ್ಕಾಲಿಕ ನಿಯೋಜನೆಯಲ್ಲಿರುವ ಇತರರು ಸೇರಿದಂತೆ 600 ರಷ್ಯಾದ ಕಾರ್ಮಿಕರಿದ್ದಾರೆ. ಹೀಗಾಗಿ ರಷ್ಯಾ ತನ್ನ ನಾಗರಿಕರ ಸುರಕ್ಷತೆ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ.

ವಿದೇಶ ಸುದ್ದಿ ಓದಲು ಇಲ್ಲಿ ಕ್ಲಿಕ್‌ ಮಾಡಿ.