Most Polluted Countries: ಈ ದೇಶವೇ ಜಗತ್ತಿನ ಮೊದಲನೇ ಅತೀ ಮಾಲಿನ್ಯಯುಕ್ತ ದೇಶ! ಭಾರತ ಎಷ್ಟನೇ ಸ್ಥಾನದಲ್ಲಿದೆ ಗೊತ್ತಾ?

ಇಸ್ಲಾಮಾಬಾದ್: ಸ್ವಿಟ್ಜರ್ಲೆಂಡ್‌ನ ಐಕ್ಯೂಏರ್ (IQAir) ಬಿಡುಗಡೆ ಮಾಡಿದ ಜಾಗತಿಕ ವಾಯು ಗುಣಮಟ್ಟ ವರದಿ ಪ್ರಕಾರ, ಪಾಕಿಸ್ತಾನ ವಿಶ್ವದ ಅತ್ಯಂತ ಮಾಲಿನ್ಯಯುಕ್ತ ದೇಶವಾಗಿ (Most Polluted Country) ಮೊದಲ ಸ್ಥಾನಕ್ಕೇರಿದೆ. ಕಳೆದ ವರ್ಷದಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ (WHO) ನಿಗದಿಪಡಿಸಿದ ಸುರಕ್ಷಿತ ಮಟ್ಟಕ್ಕಿಂತ ಪಾಕಿಸ್ತಾನದಲ್ಲಿ (Pakistan) ‘PM2.5’ ಪ್ರಮಾಣವು ಸುಮಾರು ಐದು ಪಟ್ಟು ಹೆಚ್ಚಾಗಿದೆ ಎಂದು ವರದಿ ಹೇಳಿದೆ.

ಪಟ್ಟಿಯಲ್ಲಿ ಬಾಂಗ್ಲಾದೇಶ ದ್ವಿತೀಯ ಹಾಗೂ ತಜಿಕಿಸ್ತಾನ ತೃತೀಯ ಸ್ಥಾನದಲ್ಲಿದ್ದು, ಭಾರತ ಆರನೇ ಸ್ಥಾನದಲ್ಲಿದೆ. ಚೀನಾ 20ನೇ ಸ್ಥಾನದಲ್ಲಿದ್ದರೆ, ಯುನೈಟೆಡ್ ಕಿಂಗ್ಡಮ್ 110ನೇ ಮತ್ತು ಯುನೈಟೆಡ್ ಸ್ಟೇಟ್ಸ್ 120ನೇ ಸ್ಥಾನಗಳನ್ನು ಪಡೆದಿವೆ. ಈ ಅಂಕಿಅಂಶಗಳು ಜಾಗತಿಕ ಮಟ್ಟದಲ್ಲಿ ವಾಯು ಮಾಲಿನ್ಯ ಸಮಸ್ಯೆ ಇನ್ನೂ ಗಂಭೀರವಾಗಿರುವುದನ್ನು ತೋರಿಸುತ್ತವೆ.

143 ದೇಶಗಳ 9,446 ನಗರಗಳಲ್ಲಿನ 40 ಸಾವಿರಕ್ಕೂ ಹೆಚ್ಚು ವಾಯು ಗುಣಮಟ್ಟ ಮೇಲ್ವಿಚಾರಣಾ ಕೇಂದ್ರಗಳಿಂದ ಸಂಗ್ರಹಿಸಿದ ಮಾಹಿತಿಯನ್ನು ಆಧರಿಸಿ ವರದಿ ಸಿದ್ಧಪಡಿಸಲಾಗಿದೆ. ಜಾಗತಿಕ ಮಟ್ಟದಲ್ಲಿ ಸರ್ಕಾರಿ ಸಂಸ್ಥೆಗಳು, ವಿಶ್ವವಿದ್ಯಾಲಯಗಳು, ಎನ್‌ಜಿಒಗಳು ಹಾಗೂ ವಿಜ್ಞಾನಿಗಳ ಸಹಕಾರದಿಂದ ಈ ಅಧ್ಯಯನ ನಡೆದಿದೆ. ವಿಶ್ವ ಆರೋಗ್ಯ ಸಂಸ್ಥೆ ನಿಗದಿಪಡಿಸಿದ ‘PM2.5’ ಮಾನದಂಡವನ್ನು ಕೇವಲ 13 ದೇಶಗಳು ಮಾತ್ರ ಪೂರೈಸಿರುವುದು ಆತಂಕಕಾರಿ ಸಂಗತಿ. 143ರಲ್ಲಿ 130 ದೇಶಗಳು ಈ ಸುರಕ್ಷಿತ ಮಟ್ಟ ತಲುಪಲು ವಿಫಲವಾಗಿವೆ. 2025ರಲ್ಲಿ ಕೇವಲ 14% ನಗರಗಳು ಮಾತ್ರ WHO ಮಾನದಂಡವನ್ನು ಪೂರೈಸಿದ್ದು, ಇದು ಹಿಂದಿನ ವರ್ಷಕ್ಕಿಂತ ಕಡಿಮೆ ಪ್ರಮಾಣವಾಗಿದೆ.

"ಇರಾನ್‌ ಮೇಲೆ ದಾಳಿ ಮಾಡಿದ್ದು ನಾನಲ್ಲ"; ಯುದ್ಧ ಆರಂಭಕ್ಕೆ ರಕ್ಷಣಾ ಮುಖ್ಯಸ್ಥನ್ನೇ ಹೊಣೆ ಮಾಡಿದ ಟ್ರಂಪ್‌

ಭಾರತದ ಉತ್ತರ ಪ್ರದೇಶದಲ್ಲಿರುವ ಲೋನಿ ನಗರವು ವಿಶ್ವದ ಅತ್ಯಂತ ಮಾಲಿನ್ಯಯುಕ್ತ ನಗರವಾಗಿ ಗುರುತಿಸಲಾಗಿದೆ. ಗಾಜಿಯಾಬಾದ್ ಸಮೀಪದಲ್ಲಿರುವ ಈ ನಗರವು ಮಾಲಿನ್ಯದ ಗಂಭೀರತೆಯನ್ನು ಪ್ರತಿಬಿಂಬಿಸುತ್ತದೆ. ವಿಶ್ವದ ಟಾಪ್ 25 ಮಾಲಿನ್ಯಯುಕ್ತ ನಗರಗಳ ಪಟ್ಟಿಯಲ್ಲಿ ಭಾರತ, ಪಾಕಿಸ್ತಾನ ಮತ್ತು ಚೀನಾದ ನಗರಗಳೇ ಹೆಚ್ಚಿನ ಸಂಖ್ಯೆಯಲ್ಲಿ ಕಾಣಿಸಿಕೊಂಡಿವೆ.

2024ರಲ್ಲಿ ಅತ್ಯಂತ ಮಾಲಿನ್ಯಯುಕ್ತ ದೇಶವಾಗಿದ್ದ ಚಾಡ್ 2025ರಲ್ಲಿ ನಾಲ್ಕನೇ ಸ್ಥಾನಕ್ಕೆ ಇಳಿದಿದೆ. ಆದರೆ ಇದಕ್ಕೆ ದತ್ತಾಂಶದ ವ್ಯತ್ಯಾಸವೂ ಕಾರಣವಾಗಿರಬಹುದು ಎಂದು ತಜ್ಞರು ತಿಳಿಸಿದ್ದಾರೆ. ಅಮೆರಿಕವು ಬಜೆಟ್ ಸಮಸ್ಯೆಯಿಂದ ತನ್ನ ರಾಯಭಾರ ಕಚೇರಿಗಳಿಂದ ಸಂಗ್ರಹಿಸುತ್ತಿದ್ದ ವಾಯು ಗುಣಮಟ್ಟದ ದತ್ತಾಂಶವನ್ನು ಸ್ಥಗಿತಗೊಳಿಸಿದ್ದು, ಇದರಿಂದ ಜಾಗತಿಕ ಮಾಹಿತಿಯಲ್ಲಿ ಕೊರತೆ ಉಂಟಾಗಿದೆ. ಇದರ ಪರಿಣಾಮವಾಗಿ ಬುರುಂಡಿ, ತುರ್ಕ್‌ಮೆನಿಸ್ತಾನ್ ಮತ್ತು ಟೋಗೊ ದೇಶಗಳನ್ನು ವರದಿಯಲ್ಲಿ ಸೇರಿಸಲಾಗಿಲ್ಲ. ಕೆನಡಾದಲ್ಲಿ ಸಂಭವಿಸಿದ ಕಾಡ್ಗಿಚ್ಚುಗಳ ಪರಿಣಾಮವಾಗಿ ಅಮೆರಿಕ ಮತ್ತು ಯುರೋಪ್ ಪ್ರದೇಶಗಳಲ್ಲಿ ‘PM2.5’ ಪ್ರಮಾಣ ಹೆಚ್ಚಾಗಿದೆ. ಆದಾಗ್ಯೂ, ಆಸ್ಟ್ರೇಲಿಯಾ, ಐಸ್‌ಲೆಂಡ್‌, ಎಸ್ಟೋನಿಯಾ ಮತ್ತು ಪನಾಮಾ ದೇಶಗಳು WHO ಮಾನದಂಡವನ್ನು ಪೂರೈಸುವಲ್ಲಿ ಯಶಸ್ವಿಯಾಗಿವೆ.

ಇನ್ನೊಂದೆಡೆ, ಲಾವೋಸ್, ಕಾಂಬೋಡಿಯಾ ಮತ್ತು ಇಂಡೋನೇಷ್ಯಾ ದೇಶಗಳಲ್ಲಿ ಮಾಲಿನ್ಯ ಪ್ರಮಾಣದಲ್ಲಿ ಇಳಿಕೆ ಕಂಡುಬಂದಿದೆ. ಮಂಗೋಲಿಯಾದಲ್ಲಿ ‘PM2.5’ ಸಾಂದ್ರತೆ ಶೇಕಡಾ 31ರಷ್ಟು ಕುಸಿದು 17.8 ಮೈಕ್ರೋಗ್ರಾಂ ಮಟ್ಟಕ್ಕೆ ಇಳಿದಿದೆ. ಒಟ್ಟಾರೆ, ಜಾಗತಿಕ ಮಟ್ಟದಲ್ಲಿ ವಾಯು ಮಾಲಿನ್ಯ ನಿಯಂತ್ರಣ ಇನ್ನೂ ದೊಡ್ಡ ಸವಾಲಾಗಿದ್ದು, ಹೆಚ್ಚಿನ ರಾಷ್ಟ್ರಗಳು ಸುರಕ್ಷಿತ ಮಟ್ಟ ತಲುಪಲು ಇನ್ನಷ್ಟು ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ ಎಂದು ವರದಿ ಸ್ಪಷ್ಟಪಡಿಸಿದೆ.