ಶೌಚಾಲಯ ಬಳಸುವುದಾಗಿ ಹೇಳಿ ಮಹಿಳೆಯ ಮನೆಗೆ ನುಗ್ಗಿ ಗುಪ್ತಾಂಗ ಪ್ರದರ್ಶಿಸಿದ ಡೆಲಿವರಿ ಬಾಯ್; ಬೆಂಗಳೂರಿನಲ್ಲೊಬ್ಬ ವಿಕೃತ ಕಾಮಿ

ಬೆಂಗಳೂರು, ಜು.12: ಮಹಿಳೆಯೊಬ್ಬರು ತಮ್ಮ ಮನೆಗೆ ಡೆಲಿವರಿ ಬಾಯ್ (Delivery boy) ಒಬ್ಬ ನುಗ್ಗಿ ಆಕೆಯ ಮುಂದೆ ಅಸಭ್ಯವಾಗಿ ವರ್ತಿಸಿದ್ದಾನೆ ಎಂದು ಮಹಿಳೆಯೊಬ್ಬರು ಆರೋಪಿಸಿದ್ದಾರೆ. ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ (Bengaluru) ಈ ಘಟನೆ ನಡೆದಿದೆ. ತಮಗಾದ ಕಹಿ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ (social media post) ಅವರು, ಡೆಲಿವರಿ ಬಾಯ್ ಪಾರ್ಸೆಲ್ ನೀಡಲು ತಮ್ಮ ಮನೆಗೆ ಬಂದಿದ್ದಾಗ ಶೌಚಾಲಯ ಬಳಸಲು ಅನುಮತಿ ಕೇಳಿದ್ದಾಗಿ ತಿಳಿಸಿದ್ದಾರೆ. ಮಹಿಳೆ ಅದಕ್ಕೆ ನಿರಾಕರಿಸಿದಾಗ, ಆತ ಬಲವಂತವಾಗಿ ಮನೆಗೆ ನುಗ್ಗಿದ್ದಾನೆ ಎಂದು ಆರೋಪಿಸಿದ್ದಾರೆ.

“ನಾನು ನಯವಾಗಿ ಹಲವು ಬಾರಿ ನಿರಾಕರಿಸಿದೆ. ನನ್ನ ಫ್ಲಾಟ್ ಒಳಗೆ ಅಪರಿಚಿತರನ್ನು ಬಿಡುವುದಿಲ್ಲ ಎಂದು ಸ್ಪಷ್ಟವಾಗಿ ಹೇಳಿದೆ. ತುರ್ತು ಪರಿಸ್ಥಿತಿ ಇದ್ದುದರಿಂದ ಪಕ್ಕದ ಮನೆಯ ಪುರುಷ ನೆರೆಹೊರೆಯವರ ಸಹಾಯವನ್ನು ಕೇಳುವಂತೆ ಕೂಡ ನಾನು ಸಲಹೆ ನೀಡಿದ್ದೆ. ಆದರೂ, ನಾನು ಪದೇ ಪದೇ ನಿರಾಕರಿಸಿದರೂ, ಅವರು ತಮ್ಮ ಚಪ್ಪಲಿಗಳನ್ನು ಹೊರಗೆ ಬಿಟ್ಟು ನನ್ನ ಅನುಮತಿಯಿಲ್ಲದೆ ಬಲವಂತವಾಗಿ ನನ್ನ ಮನೆಯೊಳಗೆ ಪ್ರವೇಶಿಸಿದರು” ಎಂದು ಅವರು ತಮ್ಮ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.

ವೈರಲ್‌ ವಿಡಿಯೊ ಇಲ್ಲಿದೆ:

ಶೌಚಾಲಯದಿಂದ ಹೊರಬಂದ ನಂತರ, ಡೆಲಿವರಿ ಬಾಯ್ ತನಗೆ ಫೋನ್ ಕರೆ ಮಾಡಿದ್ದಾರೆ ಎಂದು ಮಹಿಳೆ ಆರೋಪಿಸಿದ್ದಾರೆ. “ಅವರು ವಾಶ್‌ರೂಮ್‌ನಿಂದ ಹೊರಬಂದಾಗ ತಮ್ಮ ಖಾಸಗಿ ಅಂಗಗಳನ್ನು ನನ್ನ ಮುಂದೆ ಪ್ರದರ್ಶಿಸಿದರು. ತನ್ನ ಸ್ವಂತ ಮನೆಯಲ್ಲಿ ನಾನು ಆಘಾತಕ್ಕೊಳಗಾಗಿದ್ದೇನೆ, ದೌರ್ಜನ್ಯಕ್ಕೊಳಗಾಗಿದ್ದೇನೆ, ಅವಮಾನಿತಳಾಗಿದ್ದೇನೆ ಮತ್ತು ಸಂಪೂರ್ಣವಾಗಿ ಅಸುರಕ್ಷಿತಳಾಗಿದ್ದೇನೆ ಎಂದು ಭಾವಿಸಿದೆ. ಒಬ್ಬ ಮಹಿಳೆ ಬೇಡ ಎಂದು ಹೇಳಿದರೆ, ಅಲ್ಲಿಗೇ ಮಾತು ಮುಗಿಯಬೇಕು. ಆಕೆಯ ವೈಯಕ್ತಿಕ ಗಡಿಗಳನ್ನು ನಿರ್ಲಕ್ಷಿಸುವ ಅಥವಾ ಆಕೆಯ ಮನೆಯೊಳಗೆ ಬಲವಂತವಾಗಿ ಪ್ರವೇಶಿಸುವ ಹಕ್ಕು ಯಾರಿಗೂ ಇಲ್ಲ” ಎಂದು ಅವರು ಹೇಳಿದರು.

ಡೆಲಿವರಿ ಬಾಯ್ ಆಗಿದ್ದ ಹುಡುಗ ಈಗ ಎಐ ಸ್ಟಾರ್ಟ್‌ ಅಪ್ ಬಾಸ್: ಸುರಾಜ್ ಬಿಸ್ವಾಸ್ ಎಂಬ ಯುವ ಸಾಧಕನ ಯಶೋಗಾಥೆ

ಸುರಕ್ಷತೆಯ ಬಗ್ಗೆ ಭಯಭೀತಳಾಗಿದ್ದೇನೆ ಎಂದು ಆ ಮಹಿಳೆ ತನ್ನ ಪೋಸ್ಟ್‌ನಲ್ಲಿ ಬರೆದಿದ್ದಾರೆ. ನಾನು ತುಂಬಾ ಭಯಭೀತಳಾಗಿದ್ದೆ. “ನನ್ನ ಸುರಕ್ಷತೆಯ ಬಗ್ಗೆ ಆತಂಕಗೊಂಡಿದ್ದರಿಂದ ಮೊಬೈಲ್ ಕ್ಯಾಮರಾವನ್ನು ಆನ್‌ ಮಾಡಿ ಇಟ್ಟಿದ್ದೆ. ಜೊತೆಗೆ, ಏನಾದರೂ ಅನಾಹುತ ಸಂಭವಿಸಿದರೆ ಹೊರಗೆ ಓಡಿ ಸಹಾಯ ಕೇಳಲು ಸಾಧ್ಯವಾಗಲಿ ಎಂಬ ಕಾರಣಕ್ಕೆ ಮನೆಯ ಮುಖ್ಯ ಬಾಗಿಲನ್ನು ತೆರೆದಿಟ್ಟುಕೊಂಡು ಅಲ್ಲಿಯೇ ಬಳಿಯೇ ನಿಂತಿದ್ದೆ. ಪ್ರತಿದಿನ ಮಹಿಳೆಯರ ಮೇಲಿನ ಅತ್ಯಾಚಾರ ಸೇರಿದಂತೆ ವಿವಿಧ ಅಪರಾಧಗಳ ಸುದ್ದಿಗಳನ್ನು ನಾವು ಕೇಳುತ್ತಲೇ ಇದ್ದೇವೆ” ಎಂದು ಅವರು ಹೇಳಿದ್ದಾರೆ.

ಈ ಘಟನೆಯು ತನಗೆ ಆಘಾತ ಮತ್ತು ತನ್ನ ಸ್ವಂತ ಮನೆಯಲ್ಲಿ ಅಸುರಕ್ಷಿತ ಭಾವನೆ ಮೂಡಿಸಿದೆ ಎಂದು ಅವರು ಹೇಳಿದರು. ಬೆಂಗಳೂರು ಪೊಲೀಸರು ಈ ಪೋಸ್ಟ್ ಅನ್ನು ಗಮನಿಸಿದ್ದು, ಆರೋಪಗಳನ್ನು ಪರಿಶೀಲಿಸಲು ಮತ್ತು ಡೆಲಿವರಿ ಬಾಯ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ವಿವರಗಳನ್ನು ಹಂಚಿಕೊಳ್ಳಲು ಮಹಿಳೆಯನ್ನು ಕೇಳಿಕೊಂಡಿದ್ದಾರೆ. ತನಿಖೆ ಮುಂದುವರಿಸುವ ಮೊದಲು ಹೆಚ್ಚಿನ ಮಾಹಿತಿಗಾಗಿ ಕಾಯುತ್ತಿದ್ದೇವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.