ಮನುತತ್ವವಾದಿಗಳು ಗೋಡ್ಸೆ ಮೂಲಕ ಗಾಂಧೀಜಿಯನ್ನು ಹತ್ಯೆ ಮಾಡಿಸಿದರು: ಮಂಗಳೂರು ವಿಜಯ್

​ತುಮಕೂರು: ಗಾಂಧೀಜಿಯವರ ತತ್ವಗಳನ್ನು ಒಪ್ಪದ ಮನುವಾದಿಗಳು ಗೋಡ್ಸೆಯ ಮೂಲಕ ಗಾಂಧಿಯನ್ನು ಹತ್ಯೆ ಮಾಡಿಸಿದರು ಎಂದು ಗಾಂಧಿ ವಿಚಾರ ಪರಿಚಾರಕ ಮಂಗಳೂರಿನ ವಿಜಯ್ ತಿಳಿಸಿದ್ದಾರೆ.

ನಗರದ ರವೀಂದ್ರ ಕಲಾ ನಿಕೇತನದ ಹೆಚ್.ಎಂ. ಗಂಗಾಧರಯ್ಯ ಅವರ ಆರ್ಟ್ ಗ್ಯಾಲರಿಯಲ್ಲಿ, ಬೆಂಗಳೂರಿನ ಕರ್ನಾಟಕ ಗಾಂಧಿ ಸ್ಮಾರಕ ನಿಧಿ ಹಾಗೂ ಬಾಪೂಜಿ ವಿದ್ಯಾಸಂಸ್ಥೆಯ ಸಹಯೋಗ ದಲ್ಲಿ ಆಯೋಜಿಸಲಾಗಿದ್ದ 'ತಿಂಗಳ ತಿಳಿವು-4' ಕಾರ್ಯಕ್ರಮದಲ್ಲಿ ಡಿ.ಎಸ್. ನಾಗಭೂಷಣ್ ಅವರ 'ಗಾಂಧಿ ಕಥನ: ಓದು-ಚರ್ಚೆ-ಸಂವಾದ' ಕುರಿತು ಮಾತನಾಡಿದರು.

​ಕಾರ್ಯಕ್ರಮದ ಮುಖ್ಯಾಂಶಗಳು:

​ಗಾಂಧೀಜಿಯವರ ರಾಮರಾಜ್ಯ: ಯಾವ ಧರ್ಮವೂ ಮತ್ತೊಂದು ಧರ್ಮ ಶ್ರೇಷ್ಠ ಎಂದು ಹೇಳಿಲ್ಲ. ಗಾಂಧೀಜಿಯವರ ರಾಮ ಮತ್ತು ರಾಮರಾಜ್ಯ ಬೇರೆಯೇ ಆಗಿತ್ತು. ಅದನ್ನು ಒಪ್ಪದವರೇ ಗಾಂಧಿಯನ್ನು ಹತ್ಯೆ ಮಾಡಿದರು ಎಂದು ವಿಜಯ್ ಹೇಳಿದರು.

ಇದನ್ನೂ ಓದಿ: Tumkur News: ತೋಟದಲ್ಲಿ ಅಕ್ರಮವಾಗಿ ಗಾಂಜಾ ಬೆಳೆದು ಸಿಕ್ಕಿಬಿದ್ದ ಪೊಲೀಸ್ ಸಿಬ್ಬಂದಿಯ ಪುತ್ರ!

​ಮನುಸ್ಮೃತಿ ಮತ್ತು ಗಾಂಧಿ ತತ್ವಗಳು: ಮನುಸ್ಮೃತಿಯಲ್ಲಿರುವ ಸಮಾನತೆ, ಜಾತಿ, ಧರ್ಮ, ಪುರುಷ-ಮಹಿಳಾ ಸಮಾನತೆ ಮತ್ತು ಆರ್ಥಿಕ ಸಮಾನತೆ ಕುರಿತ ಅಂಶಗಳನ್ನು ಗಾಂಧೀಜಿ ವಿರೋಧಿಸಿದ್ದರು. ಮೇಲು-ಕೀಳು, ಜಾತಿ ಅಸಮತೋಲನವನ್ನು ಅವರು ಒಪ್ಪಿರಲಿಲ್ಲ. ಇದನ್ನು ಸಹಿಸದ ಮನು ತತ್ವವಾದಿಗಳು ಗೋಡ್ಸೆ ಮೂಲಕ ಗಾಂಧಿಯನ್ನು ಕೊಂದರು ಎಂದರು.

​ಜಾಗತಿಕ ಮಟ್ಟದಲ್ಲಿ ಗಾಂಧಿ ಪ್ರಭಾವ: ದಕ್ಷಿಣ ಆಫ್ರಿಕಾದ ನೆಲ್ಸನ್ ಮಂಡೇಲಾ ಜೈಲಿನಿಂದ ಬಿಡುಗಡೆಯಾಗಿ ದೇಶದ ಅಧ್ಯಕ್ಷರಾಗಲು ಗಾಂಧಿ ಮಾರ್ಗವೇ ಕಾರಣವಾಗಿತ್ತು. ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಕೂಡ ತಾನು ಗಾಂಧಿಯ ಅನುಯಾಯಿ ಎಂದು ಹೇಳಿಕೊಂಡಿದ್ದಾರೆ ಎಂದು ತಿಳಿಸಿದರು.

​ಪುಸ್ತಕದ ಪರಿಚಯ: ಸಂಪನ್ಮೂಲ ವ್ಯಕ್ತಿಯಾಗಿ ಮಾತನಾಡಿದ ತುಮಕೂರು ವಿಶ್ವವಿದ್ಯಾಲಯದ ಇಂಗ್ಲಿಷ್ ವಿಭಾಗದ ಸಹ ಪ್ರಾಧ್ಯಾಪಕ ಡಾ. ಜ್ಯೋತಿ, ಡಿ.ಎಸ್. ನಾಗಭೂಷಣ್ ಅವರು ತಮ್ಮ ಜೀವಿತಾವಧಿಯಲ್ಲಿ ಗಾಂಧಿಯನ್ನು ಅಧ್ಯಯನ ಮಾಡಿ 'ಗಾಂಧಿ ಕಥನ' ಎಂಬ ಶ್ರೇಷ್ಠ ಕೃತಿಯನ್ನು ಸರಳವಾಗಿ ನೀಡಿದ್ದಾರೆ ಎಂದರು.

ಗಾಂಧೀಜಿಯವರ ಸರಳ ಜೀವನ, ಸತ್ಯಾಗ್ರಹ ಮತ್ತು ಅಹಿಂಸೆಯ ತತ್ವಗಳು ಇಂದಿಗೂ ಪ್ರಸ್ತುತ ಎಂದು ಅಭಿಪ್ರಾಯಪಟ್ಟರು.

​ಸಮಾರಂಭದ ಅಧ್ಯಕ್ಷತೆಯನ್ನು ಬಾಪೂಜಿ ವಿದ್ಯಾಸಂಸ್ಥೆಯ ಕಾರ್ಯದರ್ಶಿ ಎಂ. ಬಸವಯ್ಯ ವಹಿಸಿದ್ದರು. ಕಾರ್ಯಕ್ರಮದಲ್ಲಿ ಜಿ.ವಿ.ಕೆ. ಶಾಸ್ತ್ರಿ ಹಾಗೂ ಪುಟ್ಟಕಾಮಣ್ಣ ಉಪಸ್ಥಿತರಿದ್ದರು. ಉಪನ್ಯಾಸಕರಾದ ಹೆಚ್.ಗೋವಿಂದಯ್ಯ ಕಾರ್ಯಕ್ರಮ ನಿರೂಪಿಸಿದರು.