ಆರಂಭವಾದ ಮೊದಲ ವಾರದಲ್ಲೇ ಜಿಯೋಹಾಟ್ಸ್ಟಾರ್ನಲ್ಲಿ ನಂ.1 ಪಟ್ಟಕ್ಕೇರಿದ 'ಬಿಗ್ ಬಾಸ್ ಕನ್ನಡ 13' : ಒಟಿಟಿಯಲ್ಲೂ ʻಕಿಚ್ಚʼ ಸುದೀಪ್ ಗತ್ತು!
Bigg Boss Kannada 13: ಬಿಗ್ ಬಾಸ್ ಮೊದಲ ವಾರದಲ್ಲೇ ಜಿಯೋಹಾಟ್ಸ್ಟಾರ್ನ ಕನ್ನಡ ವಿಭಾಗದಲ್ಲಿ ಅಗ್ರಸ್ಥಾನ ಪಡೆದು ಭರ್ಜರಿ ಡಿಜಿಟಲ್ ಕ್ರಾಂತಿ ಸೃಷ್ಟಿಸಿದೆ. ಕಿಚ್ಚ ಸುದೀಪ್ ಸಾರಥ್ಯದ ಎಂಡೆಮೋಲ್ ಶೈನ್ ಇಂಡಿಯಾ ನಿರ್ಮಾಣದ ಈ ರಿಯಾಲಿಟಿ ಶೋ, ದಕ್ಷಿಣ ಭಾರತದ ನಾಲ್ಕು ಭಾಷೆಗಳ ಪೈಪೋಟಿಯ ನಡುವೆಯೂ ಕನ್ನಡಿಗರನ್ನು ಮೋಡಿ ಮಾಡಿ ದಾಖಲೆಯ ವೀಕ್ಷಣೆ ಗಳಿಸಿದೆ.
-
ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಸಾರಥ್ಯದ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್ ಬಾಸ್ ಕನ್ನಡ 13’ ಪ್ರಸಾರವಾದ ಮೊದಲ ವಾರದಲ್ಲೇ ಡಿಜಿಟಲ್ ಜಗತ್ತಿನಲ್ಲಿ ಹೊಸ ದಾಖಲೆ ಬರೆದಿದೆ. ಎಂಡೆಮೋಲ್ ಶೈನ್ ಇಂಡಿಯಾ (Endemol Shine India) ನಿರ್ಮಾಣದ ಈ ಶೋ, ಖ್ಯಾತ ಒಟಿಟಿ ವೇದಿಕೆ 'JioHotstar'ನ ಕನ್ನಡ ವಿಭಾಗದಲ್ಲಿ ಅಧಿಕೃತವಾಗಿ ನಂ.1 ಸ್ಥಾನಕ್ಕೇರುವ ಮೂಲಕ ಕನ್ನಡ ಮನರಂಜನಾ ಕ್ಷೇತ್ರದಲ್ಲಿ ತನ್ನ ಪ್ರಾಬಲ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
ಟೆಲಿವಿಷನ್ ಪರದೆಯ ಜೊತೆಗೆ ಡಿಜಿಟಲ್ ಪ್ಲಾಟ್ಫಾರ್ಮ್ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಶೋ ಬಗ್ಗೆ ನಿರಂತರ ಚರ್ಚೆಗಳು ನಡೆಯುತ್ತಿದ್ದು, ಪ್ರೇಕ್ಷಕರಿಂದ ಸಿಕ್ಕಿರುವ ಅಪಾರ ಪ್ರತಿಕ್ರಿಯೆಗೆ ಈ ಇತ್ತೀಚಿನ ರ್ಯಾಂಕಿಂಗ್ ಸಾಕ್ಷಿಯಾಗಿದೆ. ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಜಿಯೋಹಾಟ್ಸ್ಟಾರ್ನಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿರುವುದು ಕರ್ನಾಟಕದ ಮೂಲೆಮೂಲೆಯ ಪ್ರೇಕ್ಷಕರೊಂದಿಗೆ ಕಾರ್ಯಕ್ರಮ ಹೊಂದಿರುವ ಬಾಂಧವ್ಯವನ್ನು ತೋರಿಸಿದೆ.
ಜಾಗತಿಕ ಗುಣಮಟ್ಟದ ಕಂಟೆಂಟ್ ನೀಡುವುದರಲ್ಲಿ ಮುಂಚೂಣಿಯಲ್ಲಿರುವ ಬನಿಜಯ್ ಏಷ್ಯಾ (Banijay Asia) ಸಂಸ್ಥೆಯ ಭಾಗವಾದ ಎಂಡೆಮೋಲ್ ಶೈನ್ ಇಂಡಿಯಾ, ಭಾರತೀಯ ಪ್ರಾದೇಶಿಕ ಮಾರುಕಟ್ಟೆಗೆ ತಕ್ಕಂತೆ ಶೋ ರೂಪಿಸಿ ಯಶಸ್ಸು ಕಾಣುವಲ್ಲಿ ತನ್ನ ಹೆಗ್ಗಳಿಕೆಯನ್ನು ಮತ್ತಷ್ಟು ಹೆಚ್ಚಿಸಿಕೊಂಡಿದೆ.
ವಿಶೇಷವೆಂದರೆ, ಈ ಬಾರಿ ದಕ್ಷಿಣ ಭಾರತದಾದ್ಯಂತ ಆರಂಭವಾಗಿರುವ ‘ಬಿಗ್ ಬಾಸ್ ಸೌತ್ ಕಾರ್ನಿವಲ್’ ಅಡಿಯಲ್ಲಿ ನಾಲ್ಕು ಭಾಷೆಗಳ ಬಿಗ್ ಬಾಸ್ ಶೋಗಳು ಒಂದೇ ದಿನ ಅದ್ಧೂರಿಯಾಗಿ ಚಾಲನೆ ಪಡೆದುಕೊಂಡಿವೆ. ಆಯಾ ಭಾಷೆಗಳ ಸೂಪರ್ಸ್ಟಾರ್ ನಿರೂಪಕರಾದ ಮೋಹನ್ಲಾಲ್ (ಮಲಯಾಳಂ), ಅಕ್ಕಿನೇನಿ ನಾಗಾರ್ಜುನ (ತೆಲುಗು), ಕಿಚ್ಚ ಸುದೀಪ್ (ಕನ್ನಡ) ಹಾಗೂ ವಿಜಯ್ ಸೇತುಪತಿ (ತಮಿಳು) ಒಂದೇ ವೇದಿಕೆಯ ರೂಪದಲ್ಲಿ ಒಟ್ಟಿಗೆ ಕಾಣಿಸಿಕೊಂಡು ಪರಸ್ಪರ ಶುಭ ಹಾರೈಸಿದ್ದು ಪ್ರೇಕ್ಷಕರಲ್ಲಿ ಅಪಾರ ಕುತೂಹಲ ಮೂಡಿಸಿತ್ತು.
ಈ ಪ್ಯಾನ್-ಇಂಡಿಯಾ ಸಂಭ್ರಮದ ನಡುವೆ ‘ಬಿಗ್ ಬಾಸ್ ಕನ್ನಡ’ ಒಟಿಟಿಯಲ್ಲೂ ನಂ.1 ಪಟ್ಟ ಅಲಂಕರಿಸಿ ಕನ್ನಡಿಗರ ನೆಚ್ಚಿನ ರಿಯಾಲಿಟಿ ಶೋ ಎಂಬುದನ್ನು ನಿರೂಪಿಸಿದೆ.