ಜನ್ ಝೀ ಹೋರಾಟ ಆಯ್ತು, ಇದೀಗ ಬೀದಿಗಿಳಿದ ಜನ್ ಆಲ್ಫಾ ಸಮುದಾಯ: ಶಾಸಕರ ವಾಹನ ತಡೆದು, ಕಳಪೆ ರಸ್ತೆ ಬಗ್ಗೆ ಆಕ್ರೋಶ

ಲಖನೌ, ಆ. 20: 2010 ಮತ್ತು 2024ರ ನಡುವೆ ಜನಿಸಿದ ಜೆನ್ ಆಲ್ಫಾ (Gen Alpha) ತಲೆಮಾರಿನ ಮಕ್ಕಳು ಕಳಪೆ ರಸ್ತೆ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಾ ಬೀದಿಗಿಳಿದಿದ್ದಾರೆ. ಉತ್ತರ ಪ್ರದೇಶದ (Uttar Pradesh) ಬಸ್ತಿ ಜಿಲ್ಲೆಯಲ್ಲಿ ರಸ್ತೆಯ ದುಸ್ಥಿತಿಯನ್ನು ಖಂಡಿಸಿದ ಶಾಲಾ ಮಕ್ಕಳ ಗುಂಪೊಂದು ಸ್ಥಳೀಯ ಸಮಾಜವಾದಿ ಪಕ್ಷದ (SP) ಶಾಸಕ ರಾಜೇಂದ್ರ ಚೌಧರಿ ಅವರ ಬೆಂಗಾವಲು ವಾಹನವನ್ನು ತಡೆದು ಆಕ್ರೋಶ ಹೊರಹಾಕಿದ್ದಾರೆ. ರಸ್ತೆ ಮಾರ್ಗದಲ್ಲಿ ನಿರಂತರ ನೀರು ಮತ್ತು ಕೆಸರು ನೀರು ನಿಲ್ಲುವುದರಿಂದ ಪ್ರತಿದಿನ ಶಾಲೆಗೆ ತಲುಪಲು ಮತ್ತು ಮನೆಗೆ ಮರಳಲು ತುಂಬಾ ಕಷ್ಟಪಡುವಂತಾಗಿದೆ ಎಂದು ವಿದ್ಯಾರ್ಥಿಗಳು ದೂರಿದರು. ಬುಧವಾರ (ಆಗಸ್ಟ್‌ 19) ಶಾಲೆಯಿಂದ ವಿದ್ಯಾರ್ಥಿಗಳು ಮನೆಗೆ ಹಿಂತಿರುಗುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ಶಾಸಕರ ಬೆಂಗಾವಲು ಪಡೆ ಆ ಪ್ರದೇಶದ ಮೂಲಕ ಹಾದು ಹೋಗುತ್ತಿತ್ತು. ರಸ್ತೆಯ ದುಸ್ಥಿತಿಯಿಂದ ಬೇಸತ್ತ ವಿದ್ಯಾರ್ಥಿಗಳು ಬೆಂಗಾವಲು ಪಡೆಯನ್ನು ನಿಲ್ಲಿಸಿ, ಸಮಸ್ಯೆ ಏನೆಂದು ನೋಡುವಂತೆ ಶಾಸಕರನ್ನು ಒತ್ತಾಯಿಸಿದರು.

ಚೌಧರಿ ವಾಹನದಿಂದ ಇಳಿದು ಹೊರಬರುತ್ತಿದ್ದಂತೆ, ಮಕ್ಕಳು ಅವರಿಗೆ ನೀರು ತುಂಬಿದ ಮತ್ತು ಕೆಸರಿನಿಂದ ಕೂಡಿದ ರಸ್ತೆಯನ್ನು ತೋರಿಸಿದರು. ಅದನ್ನು ಪ್ರತಿದಿನ ದಾಟಲು ಕಷ್ಟಪಡುತ್ತಿರುವುದಾಗಿ ವಿವರಿಸಿದರು. ಆ ರಸ್ತೆಯಲ್ಲಿ ಹಾದುಹೋಗುವಾಗ ಮಕ್ಕಳು ಆಗಾಗ ಕೆಸರು ನೀರಿನಲ್ಲಿ ಜಾರಿ ಬೀಳುತ್ತಾರೆ. ಇದರಿಂದಾಗಿ ಶಾಲಾ ಸಮವಸ್ತ್ರ ಮತ್ತು ಬೂಟುಗಳು ಕೊಳಕಾಗುತ್ತವೆ ಮತ್ತು ತೊಯ್ದು ಹೋಗುತ್ತವೆ ಎಂದು ಅವರು ಹೇಳಿದರು.

ಜೆನ್ ಆಲ್ಫಾ ಮಕ್ಕಳ ಪ್ರತಿಭಟನೆ:

ವಿದ್ಯಾರ್ಥಿಗಳ ಮಾತುಗಳನ್ನು ಆಲಿಸಿದ ಶಾಸಕರು, ಸ್ಥಳದಲ್ಲೇ ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಮಾತನಾಡಿದರು. ಸಮಸ್ಯೆಯನ್ನು ಆದಷ್ಟು ಬೇಗ ಪರಿಹರಿಸಲಾಗುವುದು ಎಂದು ವಿದ್ಯಾರ್ಥಿಗಳಿಗೆ ಭರವಸೆ ನೀಡಿದರು. ಭರವಸೆ ದೊರೆತ ನಂತರವೇ ವಿದ್ಯಾರ್ಥಿಗಳು ಅವರ ಬೆಂಗಾವಲು ಪಡೆಯನ್ನು ಮುಂದುವರಿಸಲು ಅವಕಾಶ ನೀಡಿದರು.

ಭ್ರಷ್ಟಾಚಾರದ ವಿರುದ್ಧ ಅಪರೂಪದ ಹೋರಾಟ; ನಾಯಿಯ ಮುಖವಾಡ ಧರಿಸಿ ದೂರು ನೀಡಿದ ವ್ಯಕ್ತಿ

ಈ ರಸ್ತೆಯು ಬಸ್ತಿಯ ಮುಡಾಡಿಹ ಅಲಿಯಾಸ್ ಭೋಪಾಲ್‌ಪುರ ಮತ್ತು ಹನುಮಾನ್‌ಗಂಜ್ ಕಡೆಗೆ ಹೋಗುವ ಸರಯೂ ಕಾಲುವೆ ವಿಭಾಗ-4ರ ಮಾರ್ಗದ ಭಾಗವಾಗಿದೆ. ಈ ರಸ್ತೆಯ ಉದ್ದಕ್ಕೂ ಇಟ್ಟಿಗೆ ಹಾಸಿದ ಮೇಲ್ಮೈಯನ್ನು (ಬ್ರಿಕ್ಸ್ ರಸ್ತೆ) ನಿರ್ಮಿಸಲಾಗಿದೆ. ಆದರೆ ಪ್ರಸ್ತುತ ಮಳೆಗಾಲದ ಹಿನ್ನೆಲೆಯಲ್ಲಿ ಈ ರಸ್ತೆಯು ತೀವ್ರವಾಗಿ ಜಲಾವೃತಗೊಂಡಿದೆ.

ನೀರು ಸಂಗ್ರಹವಾಗುವುದರಿಂದ ಮಾರ್ಗದ ಕೆಲವು ಭಾಗಗಳು ಕೆಸರಿನಿಂದ ಕೂಡಿದ್ದು, ಪಾದಚಾರಿಗಳು, ವಿಶೇಷವಾಗಿ ಶಾಲಾ ಮಕ್ಕಳು ಹಾದುಹೋಗುವುದು ಕಷ್ಟವಾಗಿದೆ. ಮಳೆಗಾಲದಲ್ಲಿ ವಿದ್ಯಾರ್ಥಿಗಳು ಈ ಮಾರ್ಗವನ್ನು ಬಳಸುವಾಗ ಪದೇ ಪದೆ ತೊಂದರೆ ಅನುಭವಿಸುತ್ತಿದ್ದಾರೆ. ಶಾಸಕರ ಬೆಂಗಾವಲು ಪಡೆ ಹಾದು ಹೋಗುತ್ತಿದ್ದಂತೆ, ವಿದ್ಯಾರ್ಥಿಗಳು ಈ ಸಮಸ್ಯೆಯನ್ನು ನೇರವಾಗಿ ಅವರ ಗಮನಕ್ಕೆ ತರಲು ನಿರ್ಧರಿಸಿದರು. ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಮಾತನಾಡಿದ ಶಾಸಕರು, ವಿದ್ಯಾರ್ಥಿಗಳಿಗೆ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದ ನಂತರ, ಚೌಧರಿ ಅವರಿಗೆ ಹೊರಡಲು ಅನುಮತಿ ನೀಡಲಾಯಿತು.