ಒಂದು ಮನೆಯಲ್ಲಿ ಎಷ್ಟು ಎಲ್‌ಪಿಜಿ ಸಿಲಿಂಡರ್‌ ಇಡಬಹುದು? ಪ್ರತಿಯೊಬ್ಬರು ತಿಳಿದುಕೊಳ್ಳೇಬೇಕಾದ ಮಾಹಿತಿ ಇಲ್ಲಿದೆ

ನವದೆಹಲಿ, ಮಾ. 11: ದೇಶದ ಹಲವು ನಗರಗಳಲ್ಲಿ ಎಲ್‍ಪಿಜಿ ಸಿಲಿಂಡರ್‌ಗಳ (LPG cylinders) ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗುತ್ತಿದೆ. ಬೇಡಿಕೆ ಹೆಚ್ಚುತ್ತಿರುವುದರ ಜತೆಗೆ ವಿತರಣೆಯಲ್ಲಿ ತಾತ್ಕಾಲಿಕ ಅಡಚಣೆ ಎದುರಾಗುತ್ತಿದೆ. ಇದೇ ವೇಳೆ ದೇಶಾದ್ಯಂತ ಗೃಹ ಬಳಕೆ ಹಾಗೂ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯಲ್ಲೂ (Price Hike) ಹೆಚ್ಚಳವಾಗಿದೆ. ವಿತರಣೆ ವಿಳಂಬ ಮತ್ತು ಪೂರೈಕೆ ಕೊರತೆ ಬಗ್ಗೆ ವರದಿಗಳು ಬರುತ್ತಿರುವ ಹಿನ್ನೆಲೆಯಲ್ಲಿ, ಸಂಗ್ರಹಿಸಿ ಇಡುವುದನ್ನು ತಡೆಯಲು ಮತ್ತು ಸಮಾನವಾಗಿ ವಿತರಣೆ ನಡೆಯಲು ಸರ್ಕಾರವು ಅತ್ಯಾವಶ್ಯಕ ವಸ್ತುಗಳ ಕಾಯ್ದೆ ಅಡಿಯಲ್ಲಿ ಮೇಲ್ವಿಚಾರಣೆಯನ್ನು ಕಠಿಣಗೊಳಿಸಿದೆ.

ಇದರೊಂದಿಗೆ ಗ್ರಾಹಕರಲ್ಲಿ ಒಂದು ಪ್ರಮುಖ ಪ್ರಶ್ನೆಯೂ ಉದ್ಭವಿಸಿದೆ: ಒಂದು ಕುಟುಂಬವು ಕಾನೂನುಬದ್ಧವಾಗಿ ಒಂದು ವರ್ಷದಲ್ಲಿ ಎಷ್ಟು ಎಲ್‌ಪಿಜಿ ಸಿಲಿಂಡರ್‌ ಹೊಂದಬಹುದು ಅಥವಾ ಬುಕ್ ಮಾಡಬಹುದು? ನಿಮ್ಮ ಸಂದೇಹಗಳಿಗೆ ಇಲ್ಲಿದೆ ಉತ್ತರ.

ಎಲ್‌ಪಿಜಿ ಸಿಲಿಂಡರ್‌ ಕೊರತೆ; ಹರ್ದೀಪ್ ಪುರಿ, ಎಸ್ ಜೈಶಂಕರ್ ಜೊತೆ ಮಹತ್ವದ ಸಭೆ ನಡೆಸಿದ ಮೋದಿ

ಗೃಹ ಬಳಕೆದಾರರಿಗೆ ಎಲ್‌ಪಿಜಿ ಸಿಲಿಂಡರ್ ಮಿತಿ

ಪ್ರಸ್ತುತ ವ್ಯವಸ್ಥೆಯಡಿ ದೇಶೀಯ ಎಲ್‌ಪಿಜಿ ಬಳಕೆದಾರರು ಒಂದು ಹಣಕಾಸು ವರ್ಷದಲ್ಲಿ 14.2 ಕೆಜಿಯ 12 ಸಬ್ಸಿಡಿ ಸಿಲಿಂಡರ್‌ಗಳನ್ನು ಪಡೆಯಲು ಅರ್ಹರಾಗಿರುತ್ತಾರೆ. ಈ ಸಿಲಿಂಡರ್‌ಗಳನ್ನು ಸರ್ಕಾರಿ ಯೋಜನೆಗಳ ಅಡಿಯಲ್ಲಿ ಸಬ್ಸಿಡಿ ದರದಲ್ಲಿ ಸರಬರಾಜು ಮಾಡಲಾಗುತ್ತದೆ. ಸಣ್ಣ ಗಾತ್ರದ ಸಿಲಿಂಡರ್ ಬಳಸುವ ಮನೆಗಳು, ಹಣಕಾಸು ವರ್ಷದ ಅವಧಿಯಲ್ಲಿ 5 ಕೆಜಿ ಗಾತ್ರದ 34 ಸಿಲಿಂಡರ್‌ಗಳನ್ನು ಸಬ್ಸಿಡಿ ದರದಲ್ಲಿ ಪಡೆಯಬಹುದು.

ಸಾಮಾನ್ಯವಾಗಿ, ಗ್ರಾಹಕರು ಸಬ್ಸಿಡಿ ಕೋಟಾದ ಅಡಿಯಲ್ಲಿ ತಿಂಗಳಿಗೆ ಒಂದು ಸಿಲಿಂಡರ್ ಮಾತ್ರ ಬುಕ್ ಮಾಡಬಹುದು. ಆದರೆ, ಗೃಹ ಬಳಕೆದಾರರು ಸಬ್ಸಿಡಿ ಕೋಟಾದ ಹೊರತಾಗಿಯೂ ಮಾರುಕಟ್ಟೆ ದರದಲ್ಲಿ ಹೆಚ್ಚುವರಿ ಸಿಲಿಂಡರ್‌ ಬುಕ್ ಮಾಡಬಹುದು.

ಅಂದಹಾಗೆ, ಸಬ್ಸಿಡಿ ದರದಲ್ಲಿ 12 ಸಿಲಿಂಡರ್‌ಗಳು ಲಭ್ಯವಿದ್ದರೂ, ಭಾರತದಲ್ಲಿ ಗೃಹ ಬಳಕೆದಾರರು ಸಾಮಾನ್ಯವಾಗಿ ಒಂದು ಹಣಕಾಸು ವರ್ಷದಲ್ಲಿ ಒಟ್ಟು 14.2 ಕೆಜಿ ಗಾತ್ರದ 15 ಎಲ್‌ಪಿಜಿ ಸಿಲಿಂಡರ್‌ಗಳವರೆಗೆ ಬುಕ್ ಮಾಡಬಹುದು. ಇದರರ್ಥ ವಾರ್ಷಿಕ ಸಬ್ಸಿಡಿ ಕೋಟಾ ಮುಗಿದ ನಂತರ ಮೂರು ಹೆಚ್ಚುವರಿ ಸಿಲಿಂಡರ್‌ಗಳನ್ನು ಸಬ್ಸಿಡಿ ರಹಿತ ವಾಣಿಜ್ಯ ದರಗಳಲ್ಲಿ ಖರೀದಿಸಬಹುದು.

ಇದಲ್ಲದೆ, ಕೃತಕ ಅಭಾವ, ಸಂಗ್ರಹಿಸಿ ಇಡುವುದು ಮತ್ತು ಬ್ಲ್ಯಾಕ್‌ ಮಾರುಕಟ್ಟೆಯನ್ನು ತಡೆಯಲು ತೈಲ ಮಾರುಕಟ್ಟೆ ಕಂಪನಿಗಳು ಎರಡು ಬುಕ್ಕಿಂಗ್‌ಗಳ ನಡುವಿನಲ್ಲಿ 25 ದಿನಗಳ ಅಂತರವನ್ನು ಕಡ್ಡಾಯಗೊಳಿಸಿವೆ. ಪ್ರಾಯೋಗಿಕವಾಗಿ ವಿಶೇಷ ಸಂದರ್ಭಗಳನ್ನು ಹೊರತುಪಡಿಸಿ, ತಿಂಗಳಿಗೆ ಸುಮಾರು ಎರಡು ಸಿಲಿಂಡರ್‌ಗಳಷ್ಟೇ ಬುಕ್ ಮಾಡಬಹುದಾಗಿದೆ.

ಪ್ರಸ್ತುತ, ಒಂದು ಮನೆಯಲ್ಲಿ ಸಾಮಾನ್ಯವಾಗಿ ಒಂದು ವರ್ಷದಲ್ಲಿ 15 ಎಲ್‌ಪಿಜಿ ಸಿಲಿಂಡರ್‌ಗಳನ್ನು ಬುಕ್ ಮಾಡಬಹುದು. ಕೇವಲ 12 ಮಾತ್ರ ಸಬ್ಸಿಡಿ ದರದಲ್ಲಿ ಲಭ್ಯವಿದೆ. ವ್ಯವಸ್ಥೆಯ ದುರುಪಯೋಗ ಮಾಡಿಕೊಳ್ಳದಿರಲು ಬುಕಿಂಗ್‌ಗಳು 25 ದಿನಗಳ ಅಂತರ ನಿಯಮವನ್ನು ಅನುಸರಿಸಬೇಕು.

ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳದ ಹಿನ್ನೆಲೆ ಎಲ್‌ಪಿಜಿ ಕೊರತೆ; ಕೇಂದ್ರದ ವಿರುದ್ಧ ಡಿ.ಕೆ. ಶಿವಕುಮಾರ್ ವಾಗ್ದಾಳಿ

ಮನೆಯಲ್ಲಿ ಎಷ್ಟು LPG ಸಿಲಿಂಡರ್‌ ಸಂಗ್ರಹಿಸಬಹುದು?

ತೈಲ ಮಾರುಕಟ್ಟೆ ಕಂಪನಿಗಳು ಅನುಸರಿಸುವ ಸುರಕ್ಷತೆ ಮತ್ತು ಪೆಟ್ರೋಲಿಯಂ ನಿಯಮಗಳ ಅಡಿಯಲ್ಲಿ, ಗೃಹ ಬಳಕೆದಾರರು ಸಾಮಾನ್ಯವಾಗಿ ಒಂದು ಸಮಯದಲ್ಲಿ ಮನೆಯಲ್ಲಿ ಗರಿಷ್ಠ ಎರಡು ಎಲ್‌ಪಿಜಿ ಸಿಲಿಂಡರ್‌ಗಳನ್ನು ಮಾತ್ರ ಇಟ್ಟುಕೊಳ್ಳಲು ಅನುಮತಿ ಇದೆ.

• ಒಂದು ಸಿಲಿಂಡರ್ ಬಳಸಬಹುದು.
• ಒಂದು ಬಿಡಿ ಸಿಲಿಂಡರ್ ಬ್ಯಾಕಪ್ ಆಗಿ ಇಡಬಹುದು.

ಎಲ್‌ಪಿಜಿ ಅನ್ನು ಅತ್ಯಂತ ಸುಲಭವಾಗಿ ಹೊತ್ತಿ ಉರಿಯುವ ಇಂಧನವಾಗಿ ವರ್ಗೀಕರಿಸಿರುವುದರಿಂದ, ಹೆಚ್ಚಿನ ಪ್ರಮಾಣದಲ್ಲಿ ಸಿಲಿಂಡರ್‌ಗಳನ್ನು ಸಂಗ್ರಹಿಸಲು Gas Cylinders Rules, 2016 ಅಡಿಯಲ್ಲಿ ಭದ್ರತಾ ಅನುಮತಿಗಳು ಅಗತ್ಯ. ಅನೇಕ ಸಿಲಿಂಡರ್‌ಗಳನ್ನು ಸಂಗ್ರಹಿಸುವುದು ಅಪಘಾತಗಳ ಅಪಾಯವನ್ನು ಹೆಚ್ಚಿಸುತ್ತದೆ ಎಂಬ ಕಾರಣದಿಂದ ಈ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಲಾಗುತ್ತದೆ. ಆದರೆ ವಾಣಿಜ್ಯ ಬಳಕೆಗೆ ಗರಿಷ್ಠ 100 ಕೆಜಿ ಎಲ್‌ಪಿಜಿ ಸಂಗ್ರಹಿಸಲು ಅನುಮತಿ ಇದೆ.

ಇರಾನ್ ಸಂಘರ್ಷದ ಕಾರಣದಿಂದಾಗಿ ಜಾಗತಿಕ ಇಂಧನ ಮಾರುಕಟ್ಟೆಗಳು ಅಸ್ತವ್ಯಸ್ತಗೊಂಡಿರುವುದರಿಂದ, ಎಲ್‌ಪಿಜಿ ಉತ್ಪಾದನೆ, ದಾಸ್ತಾನು ಮಟ್ಟಗಳು ಮತ್ತು ವಿತರಣೆಯ ಮೇಲ್ವಿಚಾರಣೆಯನ್ನು ಬಲಪಡಿಸಲು ಕೇಂದ್ರ ಸರ್ಕಾರವು ಅಗತ್ಯ ಸರಕುಗಳ ಕಾಯ್ದೆಯನ್ನು ಜಾರಿಗೆ ತಂದಿದೆ.