ಆರಂಭದಲ್ಲಿ ಒಬ್ಬ ಹುಡುಗಿ ಹಿಂದೆ ಸರಿದಳು, ನಂತರ ಆಗಿದ್ದು ದುರಂತ; ಗಾಜಿಯಾಬಾದ್ ಸಹೋದರಿಯರ ಆತ್ಮಹತ್ಯೆಯ ಪ್ರತ್ಯಕ್ಷದರ್ಶಿ ಹೇಳಿದ್ದೇನು?

ಲಖನೌ, ಫೆ. 4: ಉತ್ತರ ಪ್ರದೇಶದ ಗಾಜಿಯಾಬಾದ್‌ನಲ್ಲಿ ಮೂವರು ಸಹೋದರಿಯರು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ದೇಶವನ್ನೇ ಬೆಚ್ಚಿಬೀಳಿಸಿದೆ (Ghaziabad Tragedy). ರಾತ್ರಿ 2 ಗಂಟೆ ಸುಮಾರಿಗೆ ಒಬ್ಬೊಬ್ಬರಾಗಿ ಕಟ್ಟಡದಿಂದ ಹಾರಿದಾಗ ದೊಡ್ಡ ಶಬ್ಧ ಕೇಳಿದೆ. ಈ ಭಯಾನಕ ಘಟನೆಯನ್ನು ಪ್ರತ್ಯಕ್ಷದರ್ಶಿಗಳು ವಿವರಿಸಿದ್ದಾರೆ. ಮೂವರು ಸಹೋದರಿಯರ ಅಂತಿಮ ಕ್ಷಣಗಳನ್ನು ಕಣ್ಣಾರೆ ಕಂಡ ಅಕ್ಕ-ಪಕ್ಕದ ನಿವಾಸಿಗಳು ಭಯಾನಕ ಘಟನೆಯ ಬಗ್ಗೆ ಮಾತನಾಡಿದ್ದಾರೆ. ಆರಂಭದಲ್ಲಿ ಆ ದೃಶ್ಯವನ್ನು ದಂಪತಿ ಮತ್ತು ಅವರ ಮಗು ಆತ್ಮಹತ್ಯೆಗೆ ಯತ್ನಿಸುತ್ತಿದೆ ಎಂದು ತಪ್ಪಾಗಿ ಭಾವಿಸಿದ್ದಾರೆ.

ಈ ಘಟನೆ ಬೆಳಗಿನ ಜಾವ 2 ಗಂಟೆ ಸುಮಾರಿಗೆ ನಡೆದಿದ್ದು, ಮೂವರು ಬಾಲಕಿಯರು ತಮ್ಮ ಅಪಾರ್ಟ್‌ಮೆಂಟ್ ಕಟ್ಟಡದ ಬಾಲ್ಕನಿ ಬಳಿ ಹತ್ತಿ ಒಬ್ಬೊಬ್ಬರಾಗಿ ಕೆಳಕ್ಕೆ ಹಾರಿ ಮೃತಪಟ್ಟಿದ್ದಾರೆ. ಈ ಘಟನೆ ಅಪಾರ್ಟ್‌ಮೆಂಟ್‌ನಲ್ಲಿ ಭಯ ಮತ್ತು ಆಘಾತ ಉಂಟು ಮಾಡಿದೆ. ದುರಂತದ ಮುಂಚಿನ ಕ್ಷಣಗಳನ್ನು ನೆನಪಿಸಿಕೊಳ್ಳುತ್ತ, ಫ್ಲಾಟ್‌ನಲ್ಲಿ ದೀಪಗಳು ಉರಿಯುತ್ತಿತ್ತು ಮತ್ತು ಬಾಲ್ಕನಿಯಲ್ಲಿ ಅಸಾಮಾನ್ಯ ಚಲನೆಯನ್ನು ಗಮನಿಸಿದ್ದಾಗಿ ನೆರೆಹೊರೆಯವರು ಹೇಳಿದರು.

ಅಳುವ ಇಮೋಜಿಯೊಂದಿಗೆ ಡೆತ್‌ ನೋಟ್‌ ಬರೆದಿದ್ದ ಆತ್ಮಹತ್ಯೆ ಮಾಡಿಕೊಂಡ ತ್ರಿವಳಿ ಸೋದರಿಯರು

ʼʼಜಿಗಿಯಲು ಪ್ರಯತ್ನಿಸುತ್ತಿದ್ದವರನ್ನು ನೋಡಿದೆ. ಆರಂಭದಲ್ಲಿ ಅವರನ್ನು ದಂಪತಿ ಎಂದು ಭಾವಿಸಿದೆ. ಯಾರೋ ಅವರನ್ನು ತಮ್ಮ ಕಡೆಗೆ ಎಳೆದುಕೊಂಡು ಉಳಿಸಲು ಪ್ರಯತ್ನಿಸುತ್ತಿರುವುದು ಕಂಡುಬಂದಿತ್ತುʼʼ ಎಂದು ವ್ಯಕ್ತಿಯೊಬ್ಬರು ಹೇಳಿದರು. ʼʼಮೂವರು ಮಕ್ಕಳಿದ್ದರು. ಆದರೆ ನಾನು ಅವರಲ್ಲಿ ಇಬ್ಬರನ್ನು ಮಾತ್ರ ನೋಡಿದೆʼʼ ಎಂದು ವಿವರಿಸಿದರು. ಹುಡುಗಿಯರಲ್ಲಿ ಒಬ್ಬಾಕೆ ಸ್ವಲ್ಪ ಹಿಂದೆ ಸರಿದಂತೆ ಕಂಡುಬಂತು ಎಂದು ಅವರು ನೆನಪಿಸಿಕೊಂಡರು.

ತಡೆಯಲು ಯತ್ನ

ʼʼಅವಳು ಒಮ್ಮೆ ಕೆಳಗೆ ಇಳಿದಳು. ನಂತರ ಮತ್ತೆ ಮೇಲೆ ಹತ್ತಿ ಕುಳಿತಳು. ಅದಾದ ನಂತರ, ಒಬ್ಬಳು ಬಂದು ಅವಳನ್ನು ಹಿಂದಿನಿಂದ ಅಪ್ಪಿಕೊಂಡಳುʼʼ ಎಂದು ಅವರು ನೆನಪಿಸಿಕೊಂಡರು. ʼʼಸ್ವಲ್ಪ ಸಮಯದ ನಂತರ, ಇನ್ನೊಬ್ಬ ಹುಡುಗಿ ತನ್ನ ಸೋದರಿಯನ್ನು ಹಿಂದಕ್ಕೆ ಎಳೆಯಲು ಪ್ರಯತ್ನಿಸುತ್ತಿರುವುದು ಕಂಡುಬಂತು. ಮೂರನೆಯವಳು ಅವಳನ್ನು ತನ್ನ ಕಡೆಗೆ ಎಳೆಯಲು ಪ್ರಯತ್ನಿಸಿದಳು. ಆ ಹೊತ್ತಿಗೆ, ಮೂವರೂ ಒಟ್ಟಿಗೆ ಬಿದ್ದರುʼʼ ಎಂದು ತಿಳಿಸಿದರು. ಇದೆಲ್ಲ ಕ್ಷಣಾರ್ಧದಲ್ಲಿ ನಡೆದ ಘಟನೆಯಾಗಿತ್ತು.

9ನೇ ಮಹಡಿಯಿಂದ ಜಿಗಿದು ಮೂವರು ಅಪ್ರಾಪ್ತ ಸಹೋದರಿಯರು ಆತ್ಮಹತ್ಯೆ

ʼʼಬಾಲಕಿಯರು ಬಿದ್ದ ತಕ್ಷಣ, ನೆರೆಹೊರೆಯವರು ಕೆಳಕ್ಕೆ ಧಾವಿಸಿ ತುರ್ತು ಕರೆಗಳನ್ನು ಮಾಡಲು ಪ್ರಾರಂಭಿಸಿದರು. ನಾನು ತುಂಬಾ ವೇಗವಾಗಿ ಓಡಿದೆ. ಮೊದಲು, ಆಂಬ್ಯುಲೆನ್ಸ್‌ಗೆ ಕರೆ ಮಾಡಿದೆ. ನಂತರ ನಾನು ಪೊಲೀಸರಿಗೆ ತಿಳಿಸಿದೆ. ನಂತರ ನಾನು ಕಾವಲುಗಾರರಿಗೆ ಎಲ್ಲರಿಗೂ ಕರೆ ಮಾಡಲು ಹೇಳಿದೆʼʼ ಎಂದು ಅವರು ಹೇಳಿದರು. ʼʼನಿವಾಸಿಗಳು ಸ್ಥಳದಲ್ಲಿ ಜಮಾಯಿಸುವ ಹೊತ್ತಿಗೆ ಸಹೋದರಿಯರು ಮೃತಪಟ್ಟಿದ್ದರು. ಮೂವರು ಮಕ್ಕಳು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆಂದು ಮೊದಲು ತನಗೆ ಅರಿವಾಗಿರಲಿಲ್ಲವಾದ್ದರಿಂದ, ಈ ಘಟನೆಯಿಂದ ನಾನು ನಡುಗಿದೆ ಮತ್ತು ಗೊಂದಲಕ್ಕೊಳಗಾಗಿದ್ದೆʼʼ ಎಂದು ಪ್ರತ್ಯಕ್ಷದರ್ಶಿ ತಿಳಿಸಿದರು.

ತನಿಖೆ ಆರಂಭ

ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು, ಫ್ಲಾಟ್‌ನಿಂದ ವಶಪಡಿಸಿಕೊಂಡ ಮೊಬೈಲ್ ಫೋನ್‌ಗಳನ್ನು ವಿಧಿವಿಜ್ಞಾನ ವಿಶ್ಲೇಷಣೆಗಾಗಿ ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪ್ರಾಥಮಿಕ ತನಿಖೆಯಲ್ಲಿ ಸೂಚಿಸಿರುವಂತೆ ಸಹೋದರಿಯರ ಸಾವು, ಆನ್‌ಲೈನ್ ಟಾಸ್ಕ್ ಆಧಾರಿತ ಆಟಕ್ಕೆ ಸಂಬಂಧಿಸಿವೆಯೇ ಎಂದು ತನಿಖಾಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.