ಏಷ್ಯನ್ ಪ್ಯಾರಾ ಗೇಮ್ಸ್; ವಿಶ್ವ ದಾಖಲೆಯೊಂದಿಗೆ 2ನೇ ಚಿನ್ನ ಗೆದ್ದ ಮೋನಾ ಅಗರ್ವಾಲ್
Asian Para Games Live: ಸದ್ಯ ಭಾರತವು ಒಟ್ಟು 103 ಪದಕಗಳನ್ನು (27 ಚಿನ್ನ, 33 ಬೆಳ್ಳಿ ಮತ್ತು 43 ಕಂಚು) ಪಡೆದುಕೊಂಡು ಪದಕ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿತ್ತು. 354 ಪದಕಗಳೊಂದಿಗೆ ಚೀನಾ ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿತ್ತು. 2023ರ ಹ್ಯಾಂಗ್‌ಝೌ ಏಷ್ಯನ್ ಪ್ಯಾರಾ ಕ್ರೀಡಾಕೂಟದಲ್ಲಿ ಭಾರತವು ದಾಖಲೆಯ 111 ಪದಕಗಳನ್ನು ಗೆದ್ದುಕೊಂಡಿತು.
Mona Agarwal -
ನಗೋಯಾ, ಅ.23: ಶುಕ್ರವಾರ ನಡೆದ ಮಹಿಳೆಯರ 50 ಮೀಟರ್ ರೈಫಲ್ 3 ಪೊಸಿಷನ್ಸ್ SH1 ಫೈನಲ್‌ನಲ್ಲಿ, ಭಾರತದ ಮೋನಾ ಅಗರ್ವಾಲ್ ವಿಶ್ವ ದಾಖಲೆಯನ್ನು ಮುರಿಯುವ ಮೂಲಕ ಈ ಕ್ರೀಡಾಕೂಟದಲ್ಲಿ ತಮ್ಮ ಎರಡನೇ ಚಿನ್ನದ ಪದಕವನ್ನು ಗೆದ್ದುಕೊಂಡರು. ಐಚಿ-ನಗೋಯಾ 2026 ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ತಮ್ಮ ಅದ್ಭುತ ಪ್ರದರ್ಶನವನ್ನು ಮುಂದುವರಿಸಿದ ಈ ಭಾರತೀಯ ಪ್ಯಾರಾ ಶೂಟರ್, 357.5 ಅಂಕಗಳೊಂದಿಗೆ ಹೊಸ ವಿಶ್ವ ದಾಖಲೆ ಹಾಗೂ ಏಷ್ಯನ್ ಪ್ಯಾರಾ ಗೇಮ್ಸ್ ದಾಖಲೆಯನ್ನು ಸ್ಥಾಪಿಸಿದರು.
ಸ್ಪರ್ಧೆಯ ಆರಂಭದ ದಿನದಂದೇ ಮಹಿಳೆಯರ 10 ಮೀಟರ್ ಏರ್ ರೈಫಲ್ ಸ್ಟ್ಯಾಂಡಿಂಗ್ SH1 ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದಿದ್ದ ಮೋನಾ, ಇದೀಗ ಮತ್ತೊಂದು ಜಯವನ್ನು ಸಾಧಿಸಿದ್ದಾರೆ.
50 ಮೀಟರ್ ರೈಫಲ್ 3 ಪೊಸಿಷನ್ಸ್ SH1 ಫೈನಲ್‌ನಲ್ಲಿ ಮೋನಾ ಅತ್ಯಂತ ಸಂಯಮದಿಂದ ಪ್ರದರ್ಶನ ನೀಡಿ, 357.5 ಅಂಕಗಳೊಂದಿಗೆ ವಿಶ್ವ ದಾಖಲೆ ನಿರ್ಮಿಸಿ ಚಿನ್ನದ ಪದಕವನ್ನು ಗೆದ್ದುಕೊಂಡರು. ಚೀನಾದ ಸುಯಿಪಿಂಗ್ ಝಾಂಗ್ ಅವರು ಭಾರತೀಯ ಸ್ಪರ್ಧಿಗಿಂತ 3.8 ಅಂಕಗಳ ಅಂತರದಲ್ಲಿ ಎರಡನೇ ಸ್ಥಾನ ಪಡೆದು ಬೆಳ್ಳಿ ಪದಕವನ್ನು ತಮ್ಮದಾಗಿಸಿಕೊಂಡರು.
MONA AGARWAL AT ASIAN PARA GAMES 2026 🥇 Women’s 10m Air Rifle Standing SH1 - Games Record! 💥 🥇 Women’s 50m Rifle 3 Positions SH1 - World Record 🔥 TWO GOLD MEDALS & TWO RECORD-BREAKING PERFORMANCES BY MONA! WHAT A CHAMPION SHOOTER!!!! 🇮🇳🥹 https://t.co/0l0YbVMKpW
— The Khel India (@TheKhelIndia) October 23, 2026
ಭಾರತದ ಮತ್ತೊಬ್ಬ ಫೈನಲಿಸ್ಟ್ ಅವನಿ ಲೇಖರಾ, ಪದಕ ಗೆಲ್ಲುವ ಅವಕಾಶವನ್ನು ಕೂದಲೆಳೆ ಅಂತರದಲ್ಲಿ ಕಳೆದುಕೊಂಡು ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಡಬೇಕಾಯಿತು. 'ಪ್ರೋನ್' (ಮಲಗಿದ) ಭಂಗಿಯ ಸುತ್ತಿನ ನಂತರ ಅವನಿ ಮುಂಚೂಣಿಯ ಸ್ಪರ್ಧಿಗಳಲ್ಲೊಬ್ಬರಾಗಿದ್ದರು, ಆದರೆ 'ಸ್ಟ್ಯಾಂಡಿಂಗ್' (ನಿಂತ) ಭಂಗಿಯ ಸುತ್ತಿನಲ್ಲಿ ಹಿನ್ನಡೆ ಅನುಭವಿಸಿದರು. ಅಂತಿಮ ಫಲಿತಾಂಶವನ್ನು ನಿರ್ಧರಿಸುವಲ್ಲಿ ಇದೇ ನಿರ್ಣಾಯಕವಾಯಿತು.
ಸ್ಕ್ವಾಷ್‌ ಜಗತ್ತನ್ನೇ ಬೆರಗುಗೊಳಿಸಿದ ಭಾರತ ಯುವ ತಾರೆ ಅನಾಹತ್‌ ಸಿಂಗ್‌
ಸ್ಪರ್ಧೆಯ ಮೊದಲ ದಿನದಂದು, ಮಹಿಳೆಯರ 10 ಮೀಟರ್ ಏರ್ ರೈಫಲ್ ಸ್ಟ್ಯಾಂಡಿಂಗ್ SH1 ವಿಭಾಗದಲ್ಲಿ ಮೋನಾ ಮತ್ತು ಅವನಿ ಒಟ್ಟಾಗಿ ಭಾರತಕ್ಕೆ ಮೊದಲ ಮತ್ತು ಎರಡನೇ ಸ್ಥಾನಗಳನ್ನು ತಂದುಕೊಟ್ಟಿದ್ದರು. ಏಳನೇ ಸರಣಿಯ ನಂತರ 250 ಅಂಕಗಳನ್ನು ಗಳಿಸಿದ ಮೋನಾ ಚಿನ್ನದ ಪದಕವನ್ನು ಗೆದ್ದುಕೊಂಡರು. ಈ ಸಾಧನೆಯೊಂದಿಗೆ ಅವರು ಏಷ್ಯನ್ ಪ್ಯಾರಾ ಗೇಮ್ಸ್ ದಾಖಲೆಯನ್ನು ನಿರ್ಮಿಸಿದ್ದು, 2023ರ ಹ್ಯಾಂಗ್‌ಝೌ ಆವೃತ್ತಿಯಲ್ಲಿ ಅವನಿ ಸ್ಥಾಪಿಸಿದ್ದ 249.6 ಅಂಕಗಳ ಹಿಂದಿನ ದಾಖಲೆಯನ್ನು ಹಿಂದಿಕ್ಕಿದರು.
ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ತಮ್ಮ ಹಿಂದಿನ ಅತ್ಯುತ್ತಮ ಸಾಧನೆಯನ್ನು ಮೀರಿಸುವತ್ತ ಭಾರತವು ಪ್ರಯತ್ನಗಳನ್ನು ಮುಂದುವರಿಸಿರುವ ನಡುವೆಯೇ, ಮೋನಾ ಎರಡನೇ ಚಿನ್ನದ ಪದಕವನ್ನು ಗೆದ್ದುಕೊಂಡರು. ಈ ಸುದ್ದಿಯನ್ನು ಪ್ರಕಟಿಸುವ ಹೊತ್ತಿಗೆ, ಭಾರತವು ಒಟ್ಟು 103 ಪದಕಗಳನ್ನು (27 ಚಿನ್ನ, 33 ಬೆಳ್ಳಿ ಮತ್ತು 43 ಕಂಚು) ಪಡೆದುಕೊಂಡು ಪದಕ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿತ್ತು. 354 ಪದಕಗಳೊಂದಿಗೆ ಚೀನಾ ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿತ್ತು. 2023ರ ಹ್ಯಾಂಗ್‌ಝೌ ಏಷ್ಯನ್ ಪ್ಯಾರಾ ಕ್ರೀಡಾಕೂಟದಲ್ಲಿ ಭಾರತವು ದಾಖಲೆಯ 111 ಪದಕಗಳನ್ನು ಗೆದ್ದುಕೊಂಡಿತು.