ODI World Cup 2027: 44 ಪಂದ್ಯಗಳಿಗೆ ದಕ್ಷಿಣ ಆಫ್ರಿಕಾ ಆತಿಥ್ಯ, ನಮೀಬಿಯಾ-ಜಿಂಬಾಬ್ವೆಗೆ 10!

ನವದೆಹಲಿ: ಬರೋಬ್ಬರಿ 24 ವರ್ಷಗಳ ನಂತರ ದಕ್ಷಿಣ ಆಫ್ರಿಕಾದಲ್ಲಿ(South Africa) ಏಕದಿನ ವಿಶ್ವಕಪ್ (ODI World Cup 2027) ನಡೆಯಲಿದೆ. 2027ರಲ್ಲಿ ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಮತ್ತು ನಮೀಬಿಯಾಗಳ ಜಂಟಿ ಆತಿಥ್ಯದಲ್ಲಿ ಈ ಟೂರ್ನಿ ನಡೆಯಲಿದೆ. ಕ್ರಿಕೆಟ್ ದಕ್ಷಿಣ ಆಫ್ರಿಕಾ ಈ ಮಹತ್ವದ ಟೂರ್ನಿಗೆ ಸಿದ್ಧತೆಯನ್ನು ಆರಂಭಿಸಿದೆ. 50 ಓವರ್‌ಗಳ ಟೂರ್ನಿಯ ಯೋಜನೆಯನ್ನು ಕ್ರಿಕೆಟ್‌ ದಕ್ಷಿಣ ಆಫ್ರಿಕಾ (Cricket South Africa) ಬಿಡುಗಡೆ ಮಾಡಿದೆ. ಟೂರ್ನಿಯನ್ನು ಯಶಸ್ವಿಗೊಳಿಸಲು ಸ್ಥಳೀಯ ಸಂಘಟನಾ ಸಮಿತಿ ಮಂಡಳಿಯನ್ನು ರಚಿಸಲಾಗಿದೆ. ಇದರ ಅಧ್ಯಕ್ಷರು ದಕ್ಷಿಣ ಆಫ್ರಿಕಾದ ಮಾಜಿ ಸಚಿವ ಟ್ರೆವರ್ ಮ್ಯಾನುಯೆಲ್ ಆಗಿದ್ದಾರೆ.

2027ರ ಐಸಿಸಿ ಏಕದಿನ ವಿಶ್ವಕಪ್‌ ಟೂರ್ನಿಯಲ್ಲಿ 14 ತಂಡಗಳ ನಡುವೆ ಒಟ್ಟು 54 ಪಂದ್ಯಗಳು ನಡೆಯಲಿವೆ. ಇವುಗಳಲ್ಲಿ 44 ಪಂದ್ಯಗಳು ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿವೆ. ಈ ಪಂದ್ಯಗಳು 8 ವಿಭಿನ್ನ ಮೈದಾನಗಳಲ್ಲಿ ನಡೆಯಲಿವೆ. ಪಂದ್ಯಗಳು ನಡೆಯುವ ದಕ್ಷಿಣ ಆಫ್ರಿಕಾದ ನಗರಗಳಲ್ಲಿ ಜೋಹಾನ್ಸ್‌ಬರ್ಗ್, ಪ್ರಿಟೋರಿಯಾ, ಕೇಪ್ ಟೌನ್, ಡರ್ಬನ್, ಗ್ಕೆಬೆರ್ಹಾ, ಬ್ಲೂಮ್‌ಫಾಂಟೈನ್, ಪೂರ್ವ ಲಂಡನ್ ಮತ್ತು ಪಾರ್ಲ್ ಸೇರಿವೆ. 10 ಪಂದ್ಯಗಳು ಜಿಂಬಾಬ್ವೆ ಮತ್ತು ನಮೀಬಿಯಾದಲ್ಲಿ ನಡೆಯಲಿವೆ. ದಕ್ಷಿಣ ಆಫ್ರಿಕಾದಲ್ಲಿ 2003ರಲ್ಲಿ ಕೊನೆಯ ಬಾರಿ ವಿಶ್ವಕಪ್ ಟೂರ್ನಿ ನಡೆದಿತ್ತು.

Women ODI World Cup 2025: ಮಹಿಳಾ ಏಕದಿನ ವಿಶ್ವಕಪ್‌ ಟೂರ್ನಿಗೆ ಭಾರತ ವನಿತೆಯರ ತಂಡ ಪ್ರಕಟ!

ಎರಡು ದಶಕಗಳ ನಂತರ ವಿಶ್ವಕಪ್ ಆಫ್ರಿಕಾಕ್ಕೆ ಮರಳುತ್ತಿದೆ ಎಂದು ಕ್ರಿಕೆಟ್ ದಕ್ಷಿಣ ಆಫ್ರಿಕಾ ಅಧ್ಯಕ್ಷ ರಿಹಾನ್ ರಿಚರ್ಡ್ಸ್ ಹೇಳಿದ್ದಾರೆ. ಇದು ಬಹಳ ವಿಶೇಷವಾದ ವಿಷಯ. "24 ವರ್ಷಗಳ ನಂತರ, ಐಸಿಸಿ ಕ್ರಿಕೆಟ್ ವಿಶ್ವಕಪ್ ಆಫ್ರಿಕನ್ ನೆಲದಲ್ಲಿ ನಡೆಯುತ್ತಿದೆ. 2027ರ ವಿಶ್ವಕಪ್ ಒಂದು ಉತ್ತಮ ಅವಕಾಶ. ಇದರ ಮೂಲಕ ನಾವು ಹೊಸ ಅಭಿಮಾನಿಗಳನ್ನು ಸಂಪರ್ಕಿಸಬಹುದು ಮತ್ತು ಹಳೆಯ ಅಭಿಮಾನಿಗಳಿಗೆ ಡಿಜಿಟಲ್ ಮೂಲಕ ಉತ್ತಮ ಅನುಭವವನ್ನು ನೀಡಬಹುದು. ನಾವು ಆಫ್ರಿಕಾ ಮತ್ತು ಜಗತ್ತನ್ನು ಒಟ್ಟಿಗೆ ತರಬಹುದು," ಎಂದು ಅವರು ಹೇಳಿದ್ದಾರೆ.

ಕಳೆದ ಎರಡು ಏಕದಿನ ವಿಶ್ವಕಪ್‌ ಟೂರ್ನಿಗಳಲ್ಲಿ ತಲಾ 10 ತಂಡಗಳು ಭಾಗವಹಿಸಿದ್ದವು. 2027ರಲ್ಲಿ,14 ತಂಡಗಳ ನಡುವೆ ಪ್ರಶಸ್ತಿಗಾಗಿ ಕಾದಾಟ ನಡೆಯಲಿದೆ. ತಲಾ 7 ತಂಡಗಳನ್ನು ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಪ್ರತಿ ಗುಂಪಿನ ಅಗ್ರ-3 ತಂಡಗಳು ಸೂಪರ್ ಸಿಕ್ಸ್‌ಗೆ ಪ್ರವೇಶ ಪಡೆಯುತ್ತವೆ. ಇದರ ನಂತರ ಸೆಮಿಫೈನಲ್ಸ್‌ ಮತ್ತು ಫೈನಲ್‌ ಇರುತ್ತವೆ. ಸೂಪರ್ ಸಿಕ್ಸ್ ಸಮಯದಲ್ಲಿ ಒಂದು ತಂಡ ಇತರ ಗುಂಪಿನ ತಂಡಗಳ ವಿರುದ್ಧ ಮಾತ್ರ ಆಡುತ್ತದೆ. 1999 ಮತ್ತು 2003 ರ ವಿಶ್ವಕಪ್‌ ಟೂರ್ನಿಗಳಲ್ಲಿ ಈ ಸ್ವರೂಪದಲ್ಲಿ ಪಂದ್ಯಗಳನ್ನು ಆಡಿಸಲಾಗಿತ್ತು.