ಭಾರತದಲ್ಲಿ ಅದ್ಭುತ ಪ್ರದರ್ಶನಕ್ಕೆ ಧೋನಿ ನೀಡಿದ ಸಲಹೆ ರಿವೀಲ್‌ ಮಾಡಿದ ಶಾಯ್ ಹೋಪ್

ಚಂಡೀಗಢ, ಅ.4: ಭಾರತದ ವಿರುದ್ಧದ ಏಕದಿನ ಸರಣಿಯಲ್ಲಿ ಅತ್ಯುತ್ತಮ ಫಾರ್ಮ್ ಕಂಡುಕೊಳ್ಳಲು ಎಂ.ಎಸ್. ಧೋನಿ ಅವರೊಂದಿಗಿನ ಸರಳ ಸಂಭಾಷಣೆ ತಮಗೆ ಹೇಗೆ ನೆರವಾಯಿತು ಎಂಬುದನ್ನು ವೆಸ್ಟ್ ಇಂಡೀಸ್ ನಾಯಕ ಶಾಯ್ ಹೋಪ್ ಬಹಿರಂಗಪಡಿಸಿದ್ದಾರೆ. 48.2 ಓವರ್‌ಗಳಲ್ಲಿ 352 ರನ್‌ಗಳ ಗುರಿಯನ್ನು ಬೆನ್ನಟ್ಟುವ ಮೂಲಕ ಏಕದಿನ ಕ್ರಿಕೆಟ್‌ನಲ್ಲಿ ತಮ್ಮ ಅತ್ಯಂತ ಯಶಸ್ವಿ ರನ್-ಚೇಸ್ ಸಾಧಿಸಿದ ವೆಸ್ಟ್ ಇಂಡೀಸ್ ತಂಡದ ಗೆಲುವಿನಲ್ಲಿ ಹೋಪ್ ಪ್ರಮುಖ ಪಾತ್ರ ವಹಿಸಿದರು.

ಹೋಪ್ 143 ಎಸೆತಗಳಲ್ಲಿ ಅಜೇಯ 162 ರನ್ ಗಳಿಸಿ ತಂಡದ ಗೆಲುವನ್ನು ಖಚಿತಪಡಿಸಿದರು. ಗುವಾಹಟಿಯಲ್ಲಿ ಉತ್ತಮ ಆಟವಾಡಿದ್ದ ವಿಂಡೀಸ್ ನಾಯಕನಿಗೆ, ಈ ಸರಣಿಯಲ್ಲಿ ಇದು ಎರಡನೇ ಶತಕವಾಗಿತ್ತು. ಹೋಪ್ ಈ ಸರಣಿಯಲ್ಲಿ ಆಡಿದ ಮೂರು ಪಂದ್ಯಗಳಲ್ಲಿ 139ರ ಸರಾಸರಿ ಮತ್ತು 112.09ರ ಸ್ಟ್ರೈಕ್-ರೇಟ್‌ನೊಂದಿಗೆ ಒಟ್ಟು 278 ರನ್ ಗಳಿಸಿ ಅಭಿಯಾನವನ್ನು ಮುಕ್ತಾಯಗೊಳಿಸಿದರು.

ಈ ಇನ್ನಿಂಗ್ಸ್‌ನೊಂದಿಗೆ, ಅವರು ಭಾರತದಲ್ಲಿ 84ರ ಸರಾಸರಿಯಲ್ಲಿ ಒಟ್ಟು 1019 ರನ್‌ಗಳನ್ನು (ಐದು ಶತಕಗಳು ಮತ್ತು ಮೂರು ಅರ್ಧಶತಕಗಳೊಂದಿಗೆ) ಗಳಿಸಿದಂತಾಗಿದೆ. ಪಂದ್ಯದ ನಂತರದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದ ಹೋಪ್, ಸಮಯವು ಯಾವಾಗಲೂ ಬ್ಯಾಟರ್‌ನ ಪರವಾಗಿರುತ್ತದೆ ಎಂದು ಧೋನಿ ತಮಗೆ ಹೇಳಿದ್ದಾಗಿ ತಿಳಿಸಿದರು. ಅಲ್ಲದೆ, ಪ್ರಕ್ರಿಯೆಯ ಮೇಲೆ ನಂಬಿಕೆ ಇಟ್ಟುಕೊಂಡು, ಆಟವನ್ನು ಸಾಧ್ಯವಾದಷ್ಟು ಸಣ್ಣ ಹಂತಗಳಾಗಿ ವಿಭಜಿಸಿ ಆಡುವಂತೆ ಧೋನಿ ಸಲಹೆ ನೀಡಿದ್ದರು ಎಂದರು.

ವಿಶ್ವಕಪ್ ಸಮೀಪಿಸುತ್ತಿರುವಾಗ ಈ ಪ್ರದರ್ಶನದ ಅಗತ್ಯವಿತ್ತು; ಕೆ.ಎಲ್. ರಾಹುಲ್

"ಒಮ್ಮೆ ನಾನು ದಿಗ್ಗಜ ಎಂ.ಎಸ್. ಧೋನಿ ಅವರೊಂದಿಗೆ ಉತ್ತಮ ಸಂಭಾಷಣೆ ನಡೆಸಿದ್ದೆ. ಆಗ ಅವರು ನಾವು ಅಂದುಕೊಳ್ಳುವುದಕ್ಕಿಂತ ಹೆಚ್ಚಿನ ಸಮಯ ಯಾವಾಗಲೂ ನಮ್ಮ ಬಳಿ ಇರುತ್ತದೆ ಎಂದು ಅವರು ನನಗೆ ಹೇಳಿದ್ದರು. ಹಾಗಾಗಿ, ಅಂತಿಮ ಫಲಿತಾಂಶದ ಬಗ್ಗೆಯೇ ಹೆಚ್ಚು ಗಮನಹರಿಸಲು ಪ್ರಯತ್ನಿಸಬೇಡಿ. ಬದಲಿಗೆ ಪ್ರಕ್ರಿಯೆಯತ್ತ ಗಮನಹರಿಸಿ, ಪಂದ್ಯದ ಸನ್ನಿವೇಶವನ್ನು ಸಾಧ್ಯವಾದಷ್ಟು ಸೂಕ್ಷ್ಮವಾಗಿ ವಿಶ್ಲೇಷಿಸಿ ಮತ್ತು ಅಂತಿಮ ಹಂತದಲ್ಲಿ ಬೌಂಡರಿಗಳನ್ನು ಗಳಿಸುವ ಮಾರ್ಗಗಳನ್ನು ಕಂಡುಕೊಳ್ಳಿ" ಎಂದು ಹೋಪ್‌ ಪಂದ್ಯದ ಬಳಿಕ ಹೇಳಿದರು.

ಫೀಲ್ಡಿಂಗ್ ಮಾಡುವಾಗ ಬೆರಳಿಗೆ ಗಾಯವಾದ ಕಾರಣ ಜ್ಯೂವೆಲ್ ಆಂಡ್ರ್ಯೂ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾದ ಹಿನ್ನೆಲೆಯಲ್ಲಿ, ಹೋಪ್ ಅನಿರೀಕ್ಷಿತವಾಗಿ ಆರಂಭಿಕ ಆಟಗಾರನಾಗಿ ಕಣಕ್ಕಿಳಿಯಬೇಕಾಯಿತು. ಈಗಾಗಲೇ ತೇವಾಂಶಭರಿತ ವಾತಾವರಣದಲ್ಲಿ ಪೂರ್ತಿ 50 ಓವರ್‌ಗಳ ಕಾಲ ವಿಕೆಟ್ ಕೀಪಿಂಗ್ ಮಾಡಿದ್ದ ಹೋಪ್ ದಣಿವಿನ ಮಧ್ಯೆಯೂ ಸವಾಲು ಕೈಗೆತ್ತಿಕೊಂಡು ಇದರಲ್ಲಿ ಯಶಸ್ಸು ಕಂಡರು.