ಐಪಿಎಲ್‌ ಇತಿಹಾಸದಲ್ಲೇ ಅತ್ಯಂತ ದುರಾದೃಷ್ಟಕರ ರೀತಿಯಲ್ಲಿ ಔಟ್‌ ಆದ ಸಾಯಿ ಸದರ್ಶನ್‌; ವಿಡಿಯೊ ವೈರಲ್‌

ಧರ್ಮಶಾಲಾ, ಮೇ 27: ಮಂಗಳವಾರ ಧರ್ಮಶಾಲಾದ HPCA ಕ್ರೀಡಾಂಗಣದಲ್ಲಿ ನಡೆದ ಇಂಡಿಯನ್ ಪ್ರೀಮಿಯರ್ ಲೀಗ್ 2026ರ ಋತುವಿನ ಕ್ವಾಲಿಫೈಯರ್ 1(IPL 2026 Qualifier 1) ರಲ್ಲಿ ಗುಜರಾತ್ ಟೈಟಾನ್ಸ್ ತಂಡವು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಹೀನಾಯ ಸೋಲು ಕಂಡಿತು. ಪಂದ್ಯದಲ್ಲಿ ಸಾಯಿ ಸುದರ್ಶನ್‌(Sai Sudharsan) ಐಪಿಎಲ್ ಇತಿಹಾಸದಲ್ಲಿ ಕಂಡ ಅತ್ಯಂತ ವಿಚಿತ್ರವಾದ ಔಟ್‌ಗೆ ವಿಕೆಟ್‌ ಕಳೆದುಕೊಂಡರು.

ಇನ್ನಿಂಗ್ಸ್‌ನ ಮೂರನೇ ಓವರ್‌ನಲ್ಲಿ ಆರ್‌ಸಿಬಿ ಸೀಮರ್ ಜಾಕೋಬ್ ಡಫಿಯನ್ನು ಎದುರಿಸುವಾಗ ಸುದರ್ಶನ್‌ ಅವರ ವಿಕೆಟ್ ಪತನವಾಯಿತು. ಆಫ್ ಸೈಡ್ ಕಡೆಗೆ ಲೆಂಗ್ತ್ ಎಸೆತವನ್ನು ಕಟ್ ಮಾಡಲು ಪ್ರಯತ್ನಿಸಿದಾಗ, ಚೆಂಡಿನ ಸಂಪರ್ಕಕ್ಕೆ ಬಂದ ನಂತರ ಸುದರ್ಶನ್‌ ತಕ್ಷಣ ರನ್ ಗಳಿಸಲು ಮುಂದಾದರು. ಆದಾಗ್ಯೂ, ಹೊಡೆತದ ಆವೇಗವು ಬ್ಯಾಟ್ ಅವರ ಕೈಯಿಂದ ಜಾರಿತು. ಸುದರ್ಶನ್ ನಾನ್-ಸ್ಟ್ರೈಕರ್‌ನ ತುದಿಯತ್ತ ವೇಗವಾಗಿ ಓಡುತ್ತಿದ್ದಂತೆ, ಬ್ಯಾಟ್ ಹಿಂದಕ್ಕೆ ಹಾರಿ ಸ್ಟಂಪ್‌ಗಳಿಗೆ ಅಪ್ಪಳಿಸಿತು. ತರುವಾಯ ಬ್ಯಾಟ್ಸ್‌ಮನ್‌ಗೆ ವಿಲಕ್ಷಣ ರೀತಿಯಲ್ಲಿ ಹಿಟ್ ವಿಕೆಟ್ ಎಂದು ತೀರ್ಪು ನೀಡಲಾಯಿತು. ಹಿಟ್‌ವಿಕೆಟ್‌ ಆದ ಹಲವು ನಿದರ್ಶನಗಳು ಕಣ್ಣ ಮುಂದಿದ್ದರೂ ಈ ರೀತಿ ಬ್ಯಾಟ್‌ ಕೈ ಜಾರಿ ವಿಕೆಟ್‌ ಕಳೆದುಕೊಂಡ ಮೊದಲ ನಿದರ್ಶನ ಇದಾಗಿದೆ.

IPL 2026: 600 ರನ್‌ ಪೂರ್ಣಗೊಳಿಸಿ ವಿಶೇಷ ದಾಖಲೆ ಬರೆದ ವಿರಾಟ್‌ ಕೊಹ್ಲಿ!

ಪಂದ್ಯದ ಮೊದಲ ಇನ್ನಿಂಗ್ಸ್‌ನಲ್ಲಿ ರಜತ್ ಪಾಟಿದಾರ್ ಅಜೇಯ 93 ರನ್‌ ಬಾರಿಸಿ ಆರ್‌ಸಿಬಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಪಾಟಿದಾರ್ 17 ಎಸೆತಗಳಲ್ಲಿ 20 ರನ್ ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದಾಗ ರಬಾಡ ಅವರು ಸುಲಭವಾದ ಕ್ಯಾಚ್‌ ಕೈಬಿಟ್ಟದ್ದು ಗುಜರಾತ್‌ ತಂಡಕ್ಕೆ ಭಾರೀ ಹಿನ್ನಡೆ ಉಂಟು ಮಾಡಿತು.

ಗುಜರಾತ್ ತಂಡಕ್ಕೆ ತನ್ನ ತವರು ಅಹಮದಾಬಾದಿನಲ್ಲಿ ನಡೆಯಲಿರುವ ಫೈನಲ್‌ನಲ್ಲಿ ಆಡಲು ಇನ್ನೂ ಒಂದು ಅವಕಾಶ ಬಾಕಿ ಇದೆ. ಇದೇ 29ರಂದು ಮುಲ್ಲನಪುರದಲ್ಲಿ ನಡೆಯುವ ಎರಡನೇ ಕ್ವಾಲಿಫಯರ್‌ನಲ್ಲಿ ಆಡಲಿರುವ ತಂಡವು ಗೆದ್ದರೆ ಫೈನಲ್ ಪ್ರವೇಶಿಸಬಹುದು.

ಆರ್‌ಸಿಬಿಯು 20 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 254 ರನ್‌ಗಳ ಬೃಹತ್ ಗುರಿಯನ್ನು ಗುಜರಾತ್ ಟೈಟನ್ಸ್‌ಗೆ ಒಡ್ಡಿತು. ಟೈಟನ್ಸ್‌ಗೆ 19.3 ಓವರ್‌ಗಳಲ್ಲಿ 162 ರನ್ ಗಳಿಸಲಷ್ಟೇ ಸಾಧ್ಯವಾಯಿತು.