ಆರ್​ಸಿಬಿ ಖರೀದಿಗೆ ಅಂತಿಮ ಸುತ್ತಿನಲ್ಲಿ 2 ಕಂಪನಿಗಳ ನಡುವೆ ಪೈಪೋಟಿ!

ಬೆಂಗಳೂರು, ಮಾ.18: ಹಾಲಿ ಐಪಿಎಲ್​ ಚಾಂಪಿಯನ್​ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು(Royal Challengers Bengaluru) ತಂಡದ ಖರೀದಿಯ ಅಂತಿಮ ಹಂತದ ರೇಸ್​ನಲ್ಲಿ(RCB On Sale) 2 ಕಂಪನಿಗಳು ಮಾತ್ರ ಉಳಿದುಕೊಂಡಿವೆ. ಈ ಮುನ್ನ ಒಟ್ಟು 7 ಕಂಪನಿಗಳು ಆರ್​ಸಿಬಿ ಫ್ರಾಂಚೈಸಿ ಖರೀದಿಗೆ ಆಸಕ್ತಿ ತೋರಿಸಿದ್ದವು. ಆದರೆ ಈಗ ಅದರಲ್ಲಿ 5 ಕಂಪನಿಗಳು ಹಿಂದೆ ಸರಿದಿವೆ. ಈಗಾಗಲೇ ಆರ್​ಸಿಬಿ ತಂಡಕ್ಕೆ ಬಿಡ್​ ಸಲ್ಲಿಸುವ ಅಂತಿಮ ಗಡುವು ಕೂಡ ಮುಕ್ತಾಯಗೊಂಡಿದೆ ಎನ್ನಲಾಗಿದೆ.

ವರದಿಗಳ ಪ್ರಕಾರ, ಸ್ವೀಡನ್​ನ ಖಾಸಗಿ ಷೇರು ಸಂಸ್ಥೆ "ಇಕ್ಯೂಟಿ' ಆರ್​ಸಿಬಿ ತಂಡದ ಖರೀದಿ ರೇಸ್​ನಲ್ಲಿ ಸದ್ಯ ಮುಂಚೂಣಿಯಲ್ಲಿದೆ. ಇಕ್ಯೂಟಿ 2ರಿಂದ 2.1 ಶತಕೋಟಿ ಡಾಲರ್​ (ಸುಮಾರು 18,463ರಿಂದ 19,386 ಕೋಟಿ ರೂ.) ಬಿಡ್​ ಸಲ್ಲಿಸಿದೆ ಎನ್ನಲಾಗಿದೆ. ಇನ್ನು ಮಣಿಪಾಲ್​ ಹಾಸ್ಪಿಟಲ್ಸ್​ನ ಡಾ. ರಂಜನ್​ ಪೈ ಅವರು ಅಮೆರಿಕದ ಖಾಸಗಿ ಷೇರು ಸಂಸ್ಥೆ ಕೆಕೆಆರ್​ ಮತ್ತು ಸಿಂಗಾಪುರದ ಪ್ರಮುಖ ಹೂಡಿಕೆ ಸಂಸ್ಥೆ ಟೆಮಾಸೆಕ್​ ಜತೆಗೂಡಿ ಆರ್​ಸಿಬಿ ಖರೀದಿ ರೇಸ್​ನಲ್ಲಿ ಉಳಿದಿದ್ದಾರೆ.

ಯುನೈಟೆಡ್​ ಮ್ಯಾಂಚೆಸ್ಟರ್​ ಮಾಲೀಕ ಅವ್ರಾಮ್​ ಗ್ಲೇಜರ್​ ಅವರ ಲ್ಯಾನ್ಸರ್​ ಕ್ಯಾಪಿಟಲ್​ ಕಂಪನಿ ಈ ಮುನ್ನ ಗರಿಷ್ಠ 1.8 ಶತಕೋಟಿ ಡಾಲರ್​ (16,616 ಕೋಟಿ ರೂ.) ಬಿಡ್​ ಸಲ್ಲಿಸಿತ್ತು. ಆದರೆ ಅಂತಿಮ ಸುತ್ತಿನಲ್ಲಿ ಖರೀದಿ ರೇಸ್​ನಿಂದ ಹಿಂದೆ ಸರಿದಿದೆ ಎನ್ನಲಾಗಿದೆ.

ಆರ್‌ಸಿಬಿ ಅಭಿಮಾನಿಗಳಿಗೆ ಕೊನೆಗೂ ಸಿಕ್ತು ಗುಡ್‌ನ್ಯೂಸ್‌; ಚಿನ್ನಸ್ವಾಮಿಯಲ್ಲಿ ಐಪಿಎಲ್​ ಪಂದ್ಯಕ್ಕೆ ಗ್ರೀನ್ ಸಿಗ್ನಲ್

ಆರ್‌ಸಿಬಿ ಖರೀದಿಗೆ ಮೊದಲು ಬಿಡ್‌ ಸಲ್ಲಿಸಿದ್ದು ಸೀರಮ್​ ಇನ್​ಸ್ಟಿಟ್ಯೂಟ್​ ಒಡೆಯ ಅದರ್​ ಪೂನಾವಾಲಾ. ಆದರೆ ಅವರು ಹಿಂದೆ ಸರಿದಿದ್ದಾರೆ. ಟೈಮ್ಸ್​ ಗ್ರೂಪ್​ ಕೂಡ ಅಂತಿಮ ಹಂತದ ರೇಸ್​ನಿಂದ ಹಿಂದೆ ಸರದಿದ್ದಾರೆ.

ಮುಂದಿನ ಬಾರಿ ಹೊಸ ಮಾಲಿಕತ್ವ

ಆರ್‌ಸಿಬಿ ಮಾರ್ಚ್​ 31ರೊಳಗೆ ಮಾರಾಟ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲಿದರೂ ತಂಡ ಹೊಸ ಮಾಲೀಕರ ಕೈಗೆ ಸೇರಲು ಅಕ್ಟೋಬರ್​ವರೆಗೆ ಕಾಯಬೇಕಾಗಬಹುದು ಎನ್ನಲಾಗಿದೆ. ಹೌದು ಯಾವುದೇ ಐಪಿಎಲ್​ ತಂಡದ ಮಾರಾಟ ಪ್ರಕ್ರಿಯೆಯನ್ನು ಬಿಸಿಸಿಐ ಒಪ್ಪಿಗೆ ಇಲ್ಲದೆ ಅಂತಿಮಗೊಳಿಸುವಂತಿಲ್ಲ.ಇದು ಬಿಸಿಸಿಐ ನಿಯಮಾವಳಿ ಆಗಿದೆ. ಹೀಗಾಗಿ ಮುಂದಿನ ವರ್ಷದ 20ನೇ ಆವೃತ್ತಿಯಲ್ಲಿ ಹೊಸ ಮಾಲಿಕತ್ವದಡಿ ಆರ್‌ಸಿಬಿ ಆಡಲಿದೆ. ಈ ಬಾರಿ ಡಿಯಾಜಿಯೋ ಒಡೆತನದಲ್ಲೇ ತಂಡ ಮುಂದುವರಿಯಲಿದೆ.

19ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯು ಮಾರ್ಚ್ 28ರಿಂದ ಆರಂಭವಾಗಲಿದ್ದು, ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಸನ್‌ರೈಸರ್ಸ್ ಹೈದರಾಬಾದ್ ತಂಡಗಳು ಮುಖಾಮುಖಿಯಾಗಲಿವೆ.