Vastu Tips: ವಾಸ್ತು ಪ್ರಕಾರ ಈ ಗಿಡಗಳನ್ನು ಗಿಫ್ಟ್ ಮಾಡಬೇಡಿ! ಅದೃಷ್ಟಕ್ಕಿಂತ ದುಷ್ಪರಿಣಾಮವೇ ಹೆಚ್ಚು?

ಬೆಂಗಳೂರು: ಇತ್ತೀಚಿನ ವರ್ಷಗಳಲ್ಲಿ ಗಿಡಗಳನ್ನು ಉಡುಗೊರೆಯಾಗಿ ನೀಡುವ ಗ್ರೀನ್ ಗಿಫ್ಟಿಂಗ್ (Green Gifting) ಟ್ರೆಂಡ್ ಸಾಕಷ್ಟು ಜನಪ್ರಿಯವಾಗಿದೆ. ಹುಟ್ಟುಹಬ್ಬ, ಗೃಹಪ್ರವೇಶ, ವಿವಾಹ ವಾರ್ಷಿಕೋತ್ಸವ ಅಥವಾ ವಿಶೇಷ ಸಮಾರಂಭಗಳಲ್ಲಿ ಪರಿಸರ ಸ್ನೇಹಿ ಉಡುಗೊರೆಯಾಗಿ ಗಿಡಗಳನ್ನು ನೀಡುವುದು ಉತ್ತಮ ಅಭ್ಯಾಸವೆಂದು ಪರಿಗಣಿಸಲಾಗುತ್ತದೆ. ಆದರೆ ವಾಸ್ತು ಶಾಸ್ತ್ರದ(Vastu Shastra) ನಂಬಿಕೆಗಳ ಪ್ರಕಾರ, ಎಲ್ಲ ಗಿಡಗಳೂ ಉಡುಗೊರೆಗೆ ಸೂಕ್ತವಲ್ಲ. ಕೆಲವು ಗಿಡಗಳು ನಕಾರಾತ್ಮಕ ಶಕ್ತಿ, ಆರ್ಥಿಕ ಅಡಚಣೆ ಅಥವಾ ಸಂಬಂಧಗಳಲ್ಲಿ ಭಿನ್ನಾಭಿಪ್ರಾಯಗಳನ್ನು ಉಂಟುಮಾಡುವ ಸಂಕೇತವೆಂದು ನಂಬಲಾಗುತ್ತದೆ. ಆದ್ದರಿಂದ ಇಂತಹ ಗಿಡಗಳನ್ನು ಉಡುಗೊರೆಯಾಗಿ ನೀಡುವುದು ಅಥವಾ ಸ್ವೀಕರಿಸುವುದನ್ನು ತಪ್ಪಿಸುವುದು ಉತ್ತಮ ಎಂದು ವಾಸ್ತು ತಜ್ಞರು ಸಲಹೆ ನೀಡುತ್ತಾರೆ.

ಹಾಗಾದ್ರೆ ಬನ್ನಿ ವಾಸ್ತು ಶಾಸ್ತ್ರದ ಸಲಹೆಯಂತೆ (Vastu Tips) ಯಾವ ಗಿಡಗಳನ್ನು ಉಡುಗೊರೆಯಾಗಿ ನೀಡಬಾರದು ಎಂಬುದನ್ನು ತಿಳಿದುಕೊಳ್ಳೋಣ..

1. ಕ್ಯಾಕ್ಟಸ್ ಮತ್ತು ಇತರ ಮುಳ್ಳಿನ ಗಿಡಗಳು

ಅಲಂಕಾರಿಕ ಉದ್ದೇಶಕ್ಕಾಗಿ ಕ್ಯಾಕ್ಟಸ್ ಮತ್ತು ವಿವಿಧ ರೀತಿಯ ಮುಳ್ಳಿನ ಗಿಡಗಳನ್ನು ಮನೆ ಹಾಗೂ ಕಚೇರಿಗಳಲ್ಲಿ ಇಡುವುದು ಸಾಮಾನ್ಯವಾಗಿದೆ. ಆದರೆ ವಾಸ್ತು ಪ್ರಕಾರ, ಮುಳ್ಳುಗಳು ಒತ್ತಡ, ಸಂಘರ್ಷ ಮತ್ತು ನಕಾರಾತ್ಮಕ ಶಕ್ತಿಯ ಪ್ರತೀಕವಾಗಿವೆ. ಇಂತಹ ಗಿಡಗಳನ್ನು ಉಡುಗೊರೆಯಾಗಿ ನೀಡಿದರೆ ಸಂಬಂಧಗಳಲ್ಲಿ ಅಸಮಾಧಾನ, ವಾದ-ವಿವಾದ ಮತ್ತು ಮಾನಸಿಕ ಅಶಾಂತಿ ಹೆಚ್ಚಾಗಬಹುದು ಎಂಬ ನಂಬಿಕೆ ಇದೆ.

2. ಬೋನ್ಸಾಯ್ ಗಿಡಗಳು

ಬೋನ್ಸಾಯ್ ಗಿಡಗಳು ತಮ್ಮ ವಿಶಿಷ್ಟ ಸೌಂದರ್ಯ ಮತ್ತು ಆಕರ್ಷಕ ವಿನ್ಯಾಸದಿಂದ ಜನರನ್ನು ಸೆಳೆಯುತ್ತವೆ. ಆದರೆ ಇವುಗಳನ್ನು ಸಹಜ ಬೆಳವಣಿಗೆಯನ್ನು ನಿಯಂತ್ರಿಸಿ ಚಿಕ್ಕದಾಗಿ ಬೆಳೆಸಲಾಗುತ್ತದೆ. ವಾಸ್ತು ನಂಬಿಕೆಯ ಪ್ರಕಾರ, ಬೋನ್ಸಾಯ್ ಗಿಡಗಳು ಬೆಳವಣಿಗೆಯ ಕುಂಠಿತತೆಯ ಸಂಕೇತವಾಗಿದ್ದು, ಇವುಗಳನ್ನು ಉಡುಗೊರೆಯಾಗಿ ನೀಡುವುದರಿಂದ ವೃತ್ತಿ, ವ್ಯಾಪಾರ ಅಥವಾ ಆರ್ಥಿಕ ಪ್ರಗತಿಗೆ ಅಡ್ಡಿಯಾಗಬಹುದು ಎಂದು ಹೇಳಲಾಗುತ್ತದೆ.

Vastu Tips: ಮಲಗುವ ಕೋಣೆಯಲ್ಲಿ ಡ್ರೆಸ್ಸಿಂಗ್ ಟೇಬಲ್ ಎಲ್ಲಿರಬೇಕು? ದಾಂಪತ್ಯ ಸುಖಕ್ಕೆ ವಾಸ್ತು ಹೇಳುವ ನಿಯಮ ಇದು!

3. ಮೆಹಂದಿ (ಮದರಂಗಿ) ಗಿಡ

ಮೆಹಂದಿ ಎಲೆಗಳು ಮದುವೆ ಹಾಗೂ ಶುಭ ಸಮಾರಂಭಗಳಲ್ಲಿ ಮಹತ್ವ ಪಡೆದಿದ್ದರೂ, ಅದರ ಗಿಡವನ್ನು ಗಿಫ್ಟ್ ಮಾಡುವುದನ್ನು ವಾಸ್ತು ಒಪ್ಪುವುದಿಲ್ಲ. ಕೆಲವು ಆಧ್ಯಾತ್ಮಿಕ ನಂಬಿಕೆಗಳ ಪ್ರಕಾರ, ಈ ಗಿಡವು ನಕಾರಾತ್ಮಕ ಶಕ್ತಿಗಳನ್ನು ಹೆಚ್ಚು ಆಕರ್ಷಿಸುತ್ತದೆ ಎಂದು ಹೇಳಲಾಗುತ್ತದೆ. ಹೀಗಾಗಿ ಇದನ್ನು ಉಡುಗೊರೆಯಾಗಿ ನೀಡುವುದು ಅಥವಾ ಮನೆಯ ಪ್ರಮುಖ ಭಾಗದಲ್ಲಿ ನೆಡುವುದು ಕುಟುಂಬದ ಶಾಂತಿ ಮತ್ತು ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರಬಹುದು ಎಂಬ ನಂಬಿಕೆ ಇದೆ.

4. ಹತ್ತಿ ಹರಡುವ ಅಥವಾ ಒಣಗುವ ಗಿಡಗಳು

ವಾಸ್ತು ಪ್ರಕಾರ, ನಿರಂತರವಾಗಿ ಒಣಗುವ, ಹಳದಿಯಾಗುವ ಅಥವಾ ಅತಿಯಾಗಿ ಹತ್ತಿ ಹರಡುವ ಗಿಡಗಳನ್ನು ಉಡುಗೊರೆಯಾಗಿ ನೀಡುವುದು ಅಶುಭ ಎಂದು ಪರಿಗಣಿಸಲಾಗುತ್ತದೆ. ಇವು ಜೀವನದಲ್ಲಿ ಅಡೆತಡೆ, ನಿರುತ್ಸಾಹ ಮತ್ತು ನಕಾರಾತ್ಮಕತೆಯನ್ನು ಪ್ರತಿನಿಧಿಸುತ್ತವೆ ಎಂದು ನಂಬಲಾಗುತ್ತದೆ.

ಯಾವ ಗಿಡಗಳನ್ನು ಉಡುಗೊರೆಯಾಗಿ ನೀಡಬಹುದು?

ವಾಸ್ತು ನಂಬಿಕೆಗಳ ಪ್ರಕಾರ ತುಳಸಿ, ಮನಿ ಪ್ಲಾಂಟ್, ಬಿದಿರು (Lucky Bamboo), ಜೇಡ್ ಪ್ಲಾಂಟ್ ಮತ್ತು ಶಾಂತಿ ಲಿಲಿ (Peace Lily) ಗಿಡಗಳನ್ನು ಉಡುಗೊರೆಯಾಗಿ ನೀಡುವುದು ಶುಭಕರವೆಂದು ಪರಿಗಣಿಸಲಾಗುತ್ತದೆ. ಇವು ಮನೆಗೆ ಧನಾತ್ಮಕ ಶಕ್ತಿ, ಸಮೃದ್ಧಿ ಮತ್ತು ಶಾಂತಿಯನ್ನು ತರುತ್ತವೆ ಎಂಬ ನಂಬಿಕೆ ಇದೆ.