Vishweshwar Bhat Column: ರೋಜರ್ ಅಂದರೇನು?

ಸಂಪಾದಕೀಯ ಸದ್ಯಶೋಧನೆ

ರೇಡಿಯೋ ಸಂವಹನದಲ್ಲಿ, ವಿಶೇಷವಾಗಿ ವಿಮಾನದ ಪೈಲೆಟ್‌ಗಳು ಮತ್ತು ಏರ್ ಟ್ರಾಫಿಕ್ ಕಂಟ್ರೋಲ್ (ಎಟಿಸಿ) ನಡುವೆ ಮಾತನಾಡುವಾಗ ‘ರೋಜರ್’ (Roger) ಎಂಬ ಪದವನ್ನು ನೀವು ಪದೇ ಪದೆ ಕೇಳಿರುತ್ತೀರಿ. ಹಾಗಾದರೆ, ಈ ‘ರೋಜರ್’ ಪದದ ಅರ್ಥವೇನು? ಇದರ ಇತಿಹಾಸವೇನು? ಇದನ್ನು ವಿಮಾನಯಾನ ಕ್ಷೇತ್ರದಲ್ಲಿ ಯಾಕೆ ಬಳಸುತ್ತಾರೆ? ಸರಳವಾಗಿ ಹೇಳುವುದಾದರೆ, ರೇಡಿಯೋ ಸಂವಹನದಲ್ಲಿ ‘ರೋಜರ್’ ಎಂದರೆ ‘ನಿಮ್ಮ ಸಂದೇಶ ನನಗೆ ತಲುಪಿದೆ ಮತ್ತು ಅದನ್ನು ನಾನು ಅರ್ಥಮಾಡಿಕೊಂಡಿದ್ದೇನೆ’ (Received and Understood) ಎಂದರ್ಥ.

ಯಾರಾದರೂ ನಿಮಗೆ ಒಂದು ಮಾಹಿತಿಯನ್ನು ನೀಡಿದಾಗ, ‘ಹೌದು, ನೀವು ಹೇಳಿದ್ದು ನನಗೆ ಕೇಳಿಸಿತು ಮತ್ತು ಅರ್ಥವಾಯಿತು’ ಎಂದು ಉದ್ದವಾಗಿ ಹೇಳುವ ಬದಲಾಗಿ ಕೇವಲ ‘ರೋಜರ್’ ಎಂದು ಹೇಳಲಾಗುತ್ತದೆ. ಇದು ಸಂವಹನ ವನ್ನು ಅತ್ಯಂತ ವೇಗವಾಗಿ ಮತ್ತು ಸ್ಪಷ್ಟವಾಗಿ ಮುಗಿಸಲು ಸಹಾಯ ಮಾಡುತ್ತದೆ. ಈ ಪದದ ಬಳಕೆ ಇಂದಿನದಲ್ಲ, ಇದರ ಇತಿಹಾಸವು ವಿಮಾನ ಗಳು ಆವಿಷ್ಕಾರವಾದ ಆರಂಭಿಕ ದಿನಗಳಿಗೆ ಮತ್ತು ಎರಡನೇ ಜಾಗತಿಕ ಯುದ್ಧದ ಕಾಲಕ್ಕೆ ಹೋಗುತ್ತದೆ. ವಿಮಾನಗಳಲ್ಲಿ ರೇಡಿಯೋ ವ್ಯವಸ್ಥೆ ಬರುವ ಮುನ್ನ, ಜನರು ‘ಮೋರ್ಸ್ ಕೋಡ್’ ಮೂಲಕ ಸಂದೇಶ ಕಳುಹಿಸುತ್ತಿದ್ದರು. ಟೆಲಿಗ್ರಾಫ್‌ʼನಲ್ಲಿ ಒಂದು ಸಂದೇಶ ಯಶಸ್ವಿಯಾಗಿ ತಲುಪಿದೆ ಎಂದು ತಿಳಿಸಲು ಇಂಗ್ಲಿಷ್‌ನ ‘R’ ಅಕ್ಷರವನ್ನು ಬಳಸಲಾಗುತ್ತಿತ್ತು.

‘R’ ಎಂದರೆ ‘Received’ (ಸ್ವೀಕರಿಸಲಾಗಿದೆ) ಎಂದರ್ಥ. ಅದಾದ ನಂತರ, ವಿಮಾನಗಳಲ್ಲಿ ಮತ್ತು ಸೇನೆಯಲ್ಲಿ ಧ್ವನಿಯ ಮೂಲಕ ಮಾತನಾಡುವ ರೇಡಿಯೋ ತಂತ್ರಜ್ಞಾನ ಬಂದಿತು. ಆದರೆ ಆರಂಭಿಕ ದಿನಗಳಲ್ಲಿ ರೇಡಿಯೋ ಸಿಗ್ನಲ್‌ಗಳು ತುಂಬಾ ದುರ್ಬಲವಾಗಿದ್ದವು ಮತ್ತು ಭಾರಿ ಕರ್ಕಶ ಶಬ್ದ ಬರುತ್ತಿತ್ತು.

ಇದನ್ನೂ ಓದಿ: Vishweshwar Bhat Column: ಗಡಿಗಳು: ಪ್ರಕೃತಿಯ ಸೃಷ್ಟಿಯಲ್ಲ, ಮನುಷ್ಯನ ಸ್ವಾರ್ಥದ ರೇಖೆಗಳು

ಕೇವಲ ‘R’ ಎಂದು ಹೇಳಿದರೆ ಎದುರಿಗಿದ್ದವರಿಗೆ ಸರಿಯಾಗಿ ಕೇಳಿಸುತ್ತಿರಲಿಲ್ಲ. ಆದ್ದರಿಂದ, ಪ್ರತಿ ಯೊಂದು ಅಕ್ಷರಕ್ಕೂ ಒಂದು ನಿರ್ದಿಷ್ಟ ಹೆಸರನ್ನು ನೀಡುವ ‘ಫೋನೆಟಿಕ್ ಆಲ್ಫಾಬೆಟ್’ ವ್ಯವಸ್ಥೆಯನ್ನು ತರಲಾಯಿತು. ಆ ಕಾಲದಲ್ಲಿ (ವಿಶೇಷವಾಗಿ 1930‌ ಮತ್ತು 1940ರ ದಶಕದಲ್ಲಿ), ‘R’ ಅಕ್ಷರಕ್ಕೆ ‘Roger’ (ರೋಜರ್) ಎಂಬ ಹೆಸರನ್ನು ನಿಗದಿಪಡಿಸಲಾಗಿತ್ತು. (ಉದಾಹರಣೆಗೆ: Aಗೆ ಆಪಲ್, Bಗೆ ಬಾಯ್ ಅನ್ನುವಂತೆ, ‘R’ಗೆ ರೋಜರ್). ‌

ಹೀಗಾಗಿ, ‘ನಿಮ್ಮ ಸಂದೇಶ ತಲುಪಿದೆ’ (Received) ಎಂದು ಹೇಳಲು ‘R’ ಬದಲಾಗಿ ‘Roger’ ಎಂದು ಜೋರಾಗಿ ಹೇಳಲು ಪ್ರಾರಂಭಿಸಿದರು. ಇದು ಎರಡನೇ ಮಹಾಯುದ್ಧದ ಸಮಯದಲ್ಲಿ ಅಮೆರಿಕ ಮತ್ತು ಬ್ರಿಟನ್ ಸೇನೆಗಳಲ್ಲಿ ಅತ್ಯಂತ ಜನಪ್ರಿಯವಾಯಿತು. ಹಾಗಾದರೆ, ‘ರೋಜರ್’ ಎಂದರೆ ‘ಹೌದು’ (Yes) ಎಂದರ್ಥವೇ? ಇದು ಬಹಳಷ್ಟು ಜನರು ಮಾಡಿಕೊಳ್ಳುವ ಸಾಮಾನ್ಯ ತಪ್ಪು ತಿಳಿವಳಿಕೆ.

‘ರೋಜರ್’ ಎಂದರೆ ‘ಹೌದು’ ಅಥವಾ ‘ನಾನು ಈ ಕೆಲಸವನ್ನು ಮಾಡುತ್ತೇನೆ’ ಎಂದಲ್ಲ. ರೋಜರ್ ಅಂದ್ರೆ ‘ನೀವು ಹೇಳಿದ ಮಾಹಿತಿ ನನಗೆ ಕೇಳಿಸಿತು/ಅರ್ಥವಾಯಿತು’ ಎಂದರ್ಥ. ಹಾಗೆ ಇನ್ನೊಂದು ಪದವಿದೆ. ಅದು ವಿಲ್ಕೊ (Wilco). ಅಂದರೆ ‘ನೀವು ಹೇಳಿದ ಆಜ್ಞೆಯನ್ನು ನಾನು ಪಾಲಿಸುತ್ತೇನೆ.’ ವಿಲ್ಕೊ (Wilco) ಎಂಬುದು ‘Will Comply’ ಎಂಬುದರ ಸಂಕ್ಷಿಪ್ತ ರೂಪ. ಉದಾಹರಣೆಗೆ, ಏರ್ ಟ್ರಾಫಿಕ್ ಕಂಟ್ರೋಲ್‌ನವರು ಪೈಲೆಟ್‌ಗೆ, ‘ನಿಮ್ಮ ವಿಮಾನವನ್ನು 10000 ಅಡಿ ಎತ್ತರಕ್ಕೆ ಕೊಂಡೊ ಯ್ಯಿರಿ’ ಎಂದು ಆದೇಶಿಸಿದರೆ, ಪೈಲೆಟ್ ಕೇವಲ ‘ರೋಜರ್’ ಎನ್ನಬಾರದು.

ಬದಲಿಗೆ ‘ರೋಜರ್, ವಿಲ್ಕೊ’ ಎನ್ನಬೇಕು. ಅಂದರೆ, ಮಾಹಿತಿ ತಲುಪಿತು (Roger), ಮತ್ತು ‘ನಾನು ಆeಯನ್ನು ಪಾಲಿಸುತ್ತೇನೆ (Wilco)’ ಎಂದರ್ಥ. ಇಂದಿನ ದಿನಗಳಲ್ಲಿ ‘ರೋಜರ್’ ಬಳಕೆ ಬದಲಾಗಿ ದೆಯೇ? ಹೌದು, ಕಾಲ ಬದಲಾದಂತೆ ಭಾಷೆ ಮತ್ತು ತಂತ್ರಜ್ಞಾನವೂ ಬದಲಾಗಿದೆ. ಪ್ರಸ್ತುತ ಅಂತಾರಾಷ್ಟ್ರೀಯ ನಾಗರಿಕ ವಿಮಾನಯಾನ ಸಂಸ್ಥೆ (ICAO) ಬಳಸುವ ಆಧುನಿಕ ಫೋನೆಟಿಕ್ ಆಲ್ಫಾಬೆಟ್ ಪ್ರಕಾರ, ‘R’ ಅಕ್ಷರಕ್ಕೆ Romeo (ರೋಮಿಯೋ) ಎಂಬ ಪದವನ್ನು ಬಳಸಲಾಗುತ್ತದೆ.

ಆದರೆ, ದಶಕಗಳಿಂದ ರೂಢಿ ಬಂದುಬಿಟ್ಟಿರುವ ಕಾರಣ ಮತ್ತು ಜಾಗತಿಕವಾಗಿ ಎಲ್ಲರಿಗೂ ಸುಲಭ ವಾಗಿ ಅರ್ಥವಾಗುವ ಕಾರಣ, ಏವಿಯೇಷನ್ ಕ್ಷೇತ್ರದಲ್ಲಿ ಈಗಲೂ ‘Received’ ಎಂಬ ಅರ್ಥ ನೀಡಲು ‘ರೋಜರ್’ ಪದವನ್ನೇ ಮುಂದುವರಿಸಿಕೊಂಡು ಬರಲಾಗಿದೆ.

ವಿಮಾನಯಾನದಲ್ಲಿ ಇಂಥ ನಿಖರವಾದ ಪದಗಳ ಬಳಕೆ ಯಾಕೆ ಮುಖ್ಯ? ವಿಮಾನಗಳು ಸಾವಿರಾರು ಅಡಿ ಎತ್ತರದಲ್ಲಿ ಗಂಟೆಗೆ ನೂರಾರು ಕಿಮೀ ವೇಗದಲ್ಲಿ ಚಲಿಸುತ್ತಿರುತ್ತವೆ. ಅಂಥ ಸಮಯದಲ್ಲಿ ಪೈಲೆಟ್ ಮತ್ತು ನೆಲದ ಮೇಲಿರುವ ಕಂಟ್ರೋಲ್ ರೂಮ್ ನಡುವಿನ ಸಂವಹನದಲ್ಲಿ ಸಣ್ಣ ತಪ್ಪಾದರೂ ದೊಡ್ಡ ಅನಾಹುತ ಸಂಭವಿಸಬಹುದು.