ಅಮೆರಿಕ ಮೇಲಿನ 9/11 ಭಯೋತ್ಪಾಕ ದಾಳಿಗೆ ಇಂದು 25 ವರ್ಷ; ಇಡೀ ವಿಶ್ವದ ಚಿತ್ರಣವನ್ನೇ ಬದಲಿಸಿತ್ತು ಆ ಒಂದು ಘಟನೆ

ವಾಷಿಂಗ್ಟನ್ ಡಿಸಿ, ಸೆಪ್ಟೆಂಬರ್ 11: ಅಮೆರಿಕದ ಇತಿಹಾಸವನ್ನೇ ಬದಲಿಸಿದ 9/11 ಭಯೋತ್ಪಾದಕ ದಾಳಿ (9/11 Terrorist Attacks)ಗೆ ಶುಕ್ರವಾರ 25 ವರ್ಷ ತುಂಬಿದೆ. 2001ರ ಸೆಪ್ಟೆಂಬರ್ 11ರಂದು ಅಲ್‌ಖೈದಾ (Al-Qaeda) ಸಂಘಟನೆಗೆ ಸೇರಿದ 19 ಮಂದಿ ಉಗ್ರರು (Terrorists) ನಾಲ್ಕು ಪ್ರಯಾಣಿಕ ವಿಮಾನಗಳನ್ನು ಅಪಹರಿಸಿ ಅಮೆರಿಕದ ಪ್ರಮುಖ ಕಟ್ಟಡಗಳನ್ನು ಗುರಿಯಾಗಿಸಿಕೊಂಡಿದ್ದರು.

ಯಾವ ಕಟ್ಟಡಗಳನ್ನು ಗುರಿಯಾಗಿಸಲಾಗಿತ್ತು?

ಅಪಹರಣಕ್ಕೊಳಗಾದ ನಾಲ್ಕು ವಿಮಾನಗಳಲ್ಲಿ ಎರಡು ನ್ಯೂಯಾರ್ಕ್‌ನ ವರ್ಲ್ಡ್ ಟ್ರೇಡ್ ಸೆಂಟರ್‌ನ ಅವಳಿ ಗೋಪುರಗಳಿಗೆ ಡಿಕ್ಕಿ ಹೊಡೆದವು. ಮೊದಲ ವಿಮಾನ ಡಿಕ್ಕಿ ಹೊಡೆದ 17 ನಿಮಿಷಗಳ ಬಳಿಕ ಎರಡನೇ ವಿಮಾನ ದಕ್ಷಿಣ ಗೋಪುರಕ್ಕೆ ಅಪ್ಪಳಿಸಿತು. ಭಾರೀ ಬೆಂಕಿ ಮತ್ತು ಹೊಗೆಯಿಂದ ಆವರಿಸಲ್ಪಟ್ಟ ಎರಡೂ 110 ಅಂತಸ್ತಿನ ಗೋಪುರಗಳು ಎರಡು ಗಂಟೆಗಳೊಳಗೆ ಕುಸಿದುಬಿದ್ದವು.

ಮೂರನೇ ವಿಮಾನ ವಾಷಿಂಗ್ಟನ್ ಡಿಸಿಯ ಹೊರವಲಯದಲ್ಲಿರುವ ಅಮೆರಿಕದ ರಕ್ಷಣಾ ಇಲಾಖೆಯ ಪ್ರಧಾನ ಕಚೇರಿ ಪೆಂಟಗನ್‌ಗೆ ಡಿಕ್ಕಿ ಹೊಡೆದು ಕಟ್ಟಡದ ಒಂದು ಭಾಗವನ್ನು ಧ್ವಂಸಗೊಳಿಸಿತು.

ನಾಲ್ಕನೇ ವಿಮಾನ ಪ್ರಯಾಣಿಕರು ಅಪಹರಣಕಾರರ ವಿರುದ್ಧ ಹೋರಾಟ ನಡೆಸಿದ ಬಳಿಕ ಪೆನ್ಸಿಲ್ವೇನಿಯಾದ ಹೊಲವೊಂದರಲ್ಲಿ ಪತನಗೊಂಡಿತು. ಈ ವಿಮಾನವನ್ನು ವಾಷಿಂಗ್ಟನ್‌ನ ಕ್ಯಾಪಿಟಲ್ ಕಟ್ಟಡದ ಮೇಲೆ ಅಪ್ಪಳಿಸುವ ಉದ್ದೇಶ ಹೊಂದಲಾಗಿತ್ತು ಎಂದು ನಂಬಲಾಗಿದೆ.

9/11 ದಾಳಿಯಲ್ಲಿ ಎಷ್ಟು ಮಂದಿ ಮೃತಪಟ್ಟರು?

ಅಪಹರಣಕಾರರನ್ನು ಹೊರತುಪಡಿಸಿ ಒಟ್ಟು 2,977 ಮಂದಿ ಪ್ರಾಣ ಕಳೆದುಕೊಂಡರು.

• ನಾಲ್ಕು ವಿಮಾನಗಳಲ್ಲಿದ್ದ 246 ಪ್ರಯಾಣಿಕರು ಮತ್ತು ಸಿಬ್ಬಂದಿ
• ವರ್ಲ್ಡ್ ಟ್ರೇಡ್ ಸೆಂಟರ್‌ನಲ್ಲಿ 2,606 ಮಂದಿ
• ಪೆಂಟಗನ್‌ನಲ್ಲಿ 125 ಮಂದಿ

ಮೃತರಲ್ಲಿ 77 ದೇಶಗಳ ನಾಗರಿಕರು ಇದ್ದರು. ನ್ಯೂಯಾರ್ಕ್‌ನಲ್ಲಿ 441 ತುರ್ತು ಸೇವಾ ಸಿಬ್ಬಂದಿಯೂ ಮೃತಪಟ್ಟರು. ದಾಳಿಯ ಬಳಿಕ ಕಟ್ಟಡಗಳ ಅವಶೇಷಗಳಿಂದ ಹರಡಿದ ವಿಷಕಾರಿ ಧೂಳು ಮತ್ತು ಹೊಗೆಯಿಂದಾಗಿ ಸಾವಿರಾರು ಮಂದಿ ಆರೋಗ್ಯ ಸಮಸ್ಯೆಗಳಿಗೆ ಒಳಗಾದರು.

9/11 ದಾಳಿಕೋರರು ಯಾರು?

ಅಫ್ಘಾನಿಸ್ತಾನದಿಂದ ಕಾರ್ಯಾಚರಿಸುತ್ತಿದ್ದ ಇಸ್ಲಾಮಿಸ್ಟ್ ಉಗ್ರ ಸಂಘಟನೆ ಅಲ್‌ಖೈದಾ, ಒಸಾಮಾ ಬಿನ್ ಲಾಡೆನ್ ನೇತೃತ್ವದಲ್ಲಿ ದಾಳಿಯ ಸಂಚು ರೂಪಿಸಿತ್ತು. ಖಾಲಿದ್ ಶೇಖ್ ಮೊಹಮ್ಮದ್ ಈ ಸಂಚಿನ ಪ್ರಮುಖ ರೂಪಶಿಲ್ಪಿ ಎಂದು ಆರೋಪಿಸಲಾಗಿದೆ.

19 ಮಂದಿ ಅಪಹರಣಕಾರರಲ್ಲಿ 15 ಮಂದಿ ಸೌದಿ ಅರೇಬಿಯಾದವರು, ಇಬ್ಬರು ಯುಎಇಯವರು, ಒಬ್ಬ ಈಜಿಪ್ಟ್‌ನವರು ಮತ್ತು ಒಬ್ಬ ಲೆಬನಾನ್‌ನವರಾಗಿದ್ದರು.

7 ವರ್ಷಗಳ ಬಳಿಕ ಭಾರತಕ್ಕೆ ಚೀನಾ ಅಧ್ಯಕ್ಷ ಭೇಟಿ; ಮೋದಿ-ಕ್ಸಿ ದ್ವಿಪಕ್ಷೀಯ ಸಭೆ

9/11 ಬಳಿಕ ಅಮೆರಿಕದ ಪ್ರತಿಕ್ರಿಯೆ

ದಾಳಿಯ ಒಂದು ತಿಂಗಳೊಳಗೆ ಅಮೆರಿಕ ಅಧ್ಯಕ್ಷ ಜಾರ್ಜ್ ಡಬ್ಲ್ಯು. ಬುಷ್ ನೇತೃತ್ವದಲ್ಲಿ ಅಂತಾರಾಷ್ಟ್ರೀಯ ಬೆಂಬಲದೊಂದಿಗೆ ಅಫ್ಘಾನಿಸ್ತಾನದ ಮೇಲೆ ದಾಳಿ ಆರಂಭಿಸಲಾಯಿತು. ಅಲ್‌ಖೈದಾವನ್ನು ನಾಶಪಡಿಸುವುದು ಮತ್ತು ಒಸಾಮಾ ಬಿನ್ ಲಾಡೆನ್‌ನನ್ನು ಪತ್ತೆಹಚ್ಚುವುದು ಇದರ ಪ್ರಮುಖ ಉದ್ದೇಶವಾಗಿತ್ತು.

2011ರಲ್ಲಿ ಪಾಕಿಸ್ತಾನದಲ್ಲಿ ಅಮೆರಿಕದ ಪಡೆಗಳು ಬಿನ್ ಲಾಡೆನ್‌ನನ್ನು ಪತ್ತೆಹಚ್ಚಿ ಹತ್ಯೆಗೈದವು. ಅಮೆರಿಕದ ಪಡೆಗಳು 2022ರಲ್ಲಿ ಅಫ್ಘಾನಿಸ್ತಾನದಿಂದ ಸಂಪೂರ್ಣವಾಗಿ ಹೊರಬಂದವು.

ಖಾಲಿದ್ ಶೇಖ್ ಮೊಹಮ್ಮದ್‌ಗೆ ಏನಾಯಿತು?

2003ರಲ್ಲಿ ಪಾಕಿಸ್ತಾನದಲ್ಲಿ ಬಂಧಿಸಲ್ಪಟ್ಟ ಖಾಲಿದ್ ಶೇಖ್ ಮೊಹಮ್ಮದ್, ಮೂರು ವರ್ಷಗಳ ಕಾಲ ಸಿಐಎಯ ರಹಸ್ಯ ಬಂಧನ ಕೇಂದ್ರಗಳಲ್ಲಿ ಇರಿಸಲ್ಪಟ್ಟಿದ್ದನು. ಬಳಿಕ ಕ್ಯೂಬಾದ ಗ್ವಾಂಟನಾಮೊ ಬೇಗೆ ವರ್ಗಾಯಿಸಲಾಯಿತು. 9/11 ದಾಳಿಯಲ್ಲಿ ಆತನ ಪಾತ್ರಕ್ಕೆ ಸಂಬಂಧಿಸಿದ ವಿಚಾರಣೆ ಹಲವು ವರ್ಷಗಳಿಂದ ಮುಂದುವರಿದಿದ್ದು, ಪ್ರಸ್ತುತ ವಿಚಾರಣೆಯನ್ನು 2028ರ ಜೂನ್‌ನಲ್ಲಿ ನಡೆಸಲು ನಿಗದಿಪಡಿಸಲಾಗಿದೆ.

ದಾಳಿಯ ನಂತರ ಅಮೆರಿಕ ಸೇರಿದಂತೆ ವಿಶ್ವದಾದ್ಯಂತ ವಿಮಾನಯಾನ ಭದ್ರತಾ ನಿಯಮಗಳನ್ನು ಮತ್ತಷ್ಟು ಕಠಿಣಗೊಳಿಸಲಾಯಿತು. ಅಮೆರಿಕದಲ್ಲಿ ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆ ಮತ್ತು ಸಾರಿಗೆ ಭದ್ರತಾ ಆಡಳಿತ (TSA) ಸ್ಥಾಪಿಸಲಾಯಿತು.

ನ್ಯೂಯಾರ್ಕ್‌ನ ‘ಗ್ರೌಂಡ್ ಝೀರೋ’ ಸ್ವಚ್ಛತಾ ಕಾರ್ಯಕ್ಕೆ ಎಂಟು ತಿಂಗಳಿಗೂ ಹೆಚ್ಚು ಸಮಯ ಬೇಕಾಯಿತು. ಇಂದು ಅಲ್ಲಿ 9/11 ಸ್ಮಾರಕ ಮತ್ತು ವಸ್ತುಸಂಗ್ರಹಾಲಯ ನಿರ್ಮಿಸಲಾಗಿದೆ. ಅದೇ ಸ್ಥಳದಲ್ಲಿ ನಿರ್ಮಿಸಲಾದ One World Trade Center 1,776 ಅಡಿ ಎತ್ತರದಲ್ಲಿದ್ದು, ಹೊಸ ನ್ಯೂಯಾರ್ಕ್ ನಗರದ ಪ್ರಮುಖ ಸಂಕೇತವಾಗಿ ನಿಂತಿದೆ. 25 ವರ್ಷಗಳ ಬಳಿಕವೂ 9/11 ದಾಳಿಯ ನೆನಪು, ಅದರ ಮಾನವೀಯ ಬೆಲೆ ಮತ್ತು ಜಾಗತಿಕ ಪರಿಣಾಮಗಳು ವಿಶ್ವದಾದ್ಯಂತ ಸ್ಮರಿಸಲ್ಪಡುತ್ತಿವೆ