ಅಮೆರಿಕ ಮತ್ತೆ ನಾಟಕವಾಡಿದ್ರೆ ಹಾರ್ಮೊಜ್‌ ಮುಚ್ಚುತ್ತೇವೆ; ಟ್ರಂಪ್‌ಗೆ ಖಡಕ್‌ ಎಚ್ಚರಿಕೆ ಕೊಟ್ಟ ಇರಾನ್‌

ಟೆಹರಾನ್‌: ಇಸ್ರೇಲ್‌ ಹಾಗೂ ಲೆಬನಾನ್‌ ನಡುವೆ ಏರ್ಪಟ್ಟ ಕದನ ವಿರಾಮದ ಬಳಿಕ ಇರಾನ್‌ ಹಾರ್ಮೊಜ್‌ ಜಲಸಂಧಿಯನ್ನು ತೆರೆಯುವುದಾಗಿ ಘೋಷಣೆ (Iran America Ceasefire) ಮಾಡಿತ್ತು. ಆದರೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ (Donald Trump) ತಮ್ಮ ಮೊಂಡುತನವನ್ನು ಮುಂದುವರಿಸಿ, ಅಮೆರಿಕದ ನೌಕಾ ಪಡೆ ಹಾರ್ಮೊಜ್‌ ಸುತ್ತಲೂ ಕಾವಲು ಇರುತ್ತವೆ ಎಂದು ಹೇಳಿಕೆ ನೀಡಿದ್ದರು. ಈ ಹೇಳಿಕೆಗೆ ಇದೀಗ ಇರಾನ್‌ ತಿರುಗೇಟು ನೀಡಿದೆ. ಅಮೆರಿಕ ತನ್ನ ನೌಕಾ ದಿಗ್ಬಂಧನವನ್ನು ಮುಂದುವರಿಸಿದರೆ ಟೆಹರಾನ್‌ ಹಾರ್ಮೊಜ್‌ ಜಲಸಂಧಿಯನ್ನು ಮುಚ್ಚಲಿದೆ ಎಂಬ ಎಚ್ಚರಿಕೆಯನ್ನು ನೀಡಿದೆ.

ಈ ಕುರಿತು ಎಕ್ಸ್‌ನಲ್ಲಿ ಟ್ವೀಟ್‌ ಮಾಡಿದ ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಘರ್ ಗಾಲಿಬಾಫ್ ಹಾರ್ಮೊಜ್‌ ಜಲಸಂಧಿಯ ಮೂಲಕ ಹಾದುಹೋಗುವಿಕೆಯನ್ನು ನಿಗದಿತ ಮಾರ್ಗದ ಆಧಾರದ ಮೇಲೆ ಮತ್ತು ಇರಾನಿನ ಅನುಮತಿಯೊಂದಿಗೆ ನಡೆಸಲಾಗುವುದು ಎಂದು ಪ್ರತಿಪಾದಿಸಿದ್ದಾರೆ. ಕದನ ವಿರಾಮದ ಉಳಿದ ಅವಧಿಗೆ ಹಾರ್ಮೊಜ್‌ ಎಲ್ಲಾ ವಾಣಿಜ್ಯ ಹಡಗುಗಳಿಗೆ ಸಂಪೂರ್ಣವಾಗಿ ಮುಕ್ತವಾಗಿದೆ ಎಂದು ಇರಾನ್ ಘೋಷಿಸಿದ ಕೆಲವೇ ಗಂಟೆಗಳ ನಂತರ ಇದು ಬಂದಿದೆ. "ಲೆಬನಾನ್‌ನಲ್ಲಿ ಕದನ ವಿರಾಮಕ್ಕೆ ಅನುಗುಣವಾಗಿ, ಇರಾನ್‌ನ ಇಸ್ಲಾಮಿಕ್ ಪ್ರತಿನಿಧಿಯ ಬಂದರುಗಳು ಮತ್ತು ಕಡಲ ಸಂಸ್ಥೆ ಈಗಾಗಲೇ ಘೋಷಿಸಿದಂತೆ ಸಂಘಟಿತ ಮಾರ್ಗದಲ್ಲಿ, ಹಾರ್ಮೊಜ್‌ ಜಲಸಂಧಿಯ ಮೂಲಕ ಎಲ್ಲಾ ವಾಣಿಜ್ಯ ಹಡಗುಗಳ ಮಾರ್ಗವನ್ನು ಕದನ ವಿರಾಮದ ಉಳಿದ ಅವಧಿಗೆ ಸಂಪೂರ್ಣವಾಗಿ ಮುಕ್ತವೆಂದು ಘೋಷಿಸಲಾಗಿದೆ" ಎಂದು ಇರಾನ್‌ನ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ನಿನ್ನೆಯಷ್ಟೇ ತಿಳಿಸಿದ್ದರು.

ಇದಕ್ಕೆ ಪ್ರತಿಕ್ರಿಯಿಸಿದ ಟ್ರಂಪ್, ಇರಾನ್ ಜೊತೆಗಿನ ತಮ್ಮ ವಹಿವಾಟು ಪೂರ್ಣಗೊಳ್ಳುವವರೆಗೆ ಜಲಸಂಧಿಯ ನೌಕಾ ದಿಗ್ಬಂಧನವು ಹಾಗೆಯೇ ಇರುತ್ತದೆ ಎಂದು ಸ್ಪಷ್ಟಪಡಿಸಿದ್ದರು. ಆದಾಗ್ಯೂ, ವಿವಾದಾತ್ಮಕ ಅಂಶಗಳನ್ನು ಈಗಾಗಲೇ ಮಾತುಕತೆ ನಡೆಸಿರುವುದರಿಂದ ಈ ಪ್ರಕ್ರಿಯೆಯನ್ನು ಬಹಳ ಬೇಗನೆ ಮುಕ್ತಾಯಗೊಳಿಸಲಾಗುವುದು ತಿಳಿಸಿದ್ದರು.

ಇರಾನ್‌ಗೆ ಶಸ್ತ್ರಾಸ್ತ್ರ ಒದಗಿಸಿದರೆ ಹುಷಾರ್! ಚೀನಾಗೆ ಖಡಕ್‌ ವಾರ್ನಿಂಗ್ ಕೊಟ್ಟ ಟ್ರಂಪ್

ಹಾರ್ಮುಜ್ ಜಲಸಂಧಿಯು ವಿಶ್ವದ ತೈಲ ಪೂರೈಕೆಯ ಐದನೇ ಒಂದು ಭಾಗದಷ್ಟು ತೈಲವನ್ನು ಸಾಗಿಸುವ ಪ್ರಮುಖ ಸ್ಥಳವಾಗಿದೆ. ಇರಾನ್ ಯುದ್ಧದ ಮಧ್ಯೆ ಸುಮಾರು ಎರಡು ತಿಂಗಳ ಕಾಲ ಇದನ್ನು ಮುಚ್ಚಲಾಗಿರುವುದರಿಂದ ಅನೇಕ ದೇಶಗಳಲ್ಲಿ ಕಚ್ಚಾ ತೈಲ ಬೆಲೆಗಳು ಮತ್ತು ಪೂರೈಕೆಯ ಮೇಲೆ ಪರಿಣಾಮ ಬೀರಿತು. ಈಗ ಇರಾನ್ ಜಲಸಂಧಿಯನ್ನು ಸಂಪೂರ್ಣವಾಗಿ ಮತ್ತೆ ತೆರೆದಿರುವುದರಿಂದ, ವಾಣಿಜ್ಯ ಹಡಗುಗಳು ಕಾರ್ಯಾಚರಣೆ ಪ್ರಾರಂಭವಾಗಬಹುದು ಎಂಬ ನಿರೀಕ್ಷೆ ಇದೆ.