ಪಾಕಿಸ್ತಾನದಲ್ಲಿ ಲಷ್ಕರ್ ಕಮಾಂಡರ್ ಇಮ್ರಾನ್ ಹತ್ಯೆ? ಹಾಡಹಗಲೇ ಗುಂಡಿಕ್ಕಿ ಕೊಂದ ಅಪರಿಚಿತ ವ್ಯಕ್ತಿ: ವಿಡಿಯೊ ವೈರಲ್

ಇಸ್ಲಾಮಾಬಾದ್, ಅ.14: ಪಾಕಿಸ್ತಾನದ (Pakistan) ಪಂಜಾಬ್ ಪ್ರಾಂತ್ಯದಲ್ಲಿ ಹಾಡಹಗಲೇ ವ್ಯಕ್ತಿಯೊಬ್ಬನನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ ಎಂದು ಹೇಳಲಾದ ವೈರಲ್ ವಿಡಿಯೊವೊಂದು ಸಾಮಾಜಿಕ ಮಾಧ್ಯಮಗಳಲ್ಲಿ ಊಹಾಪೋಹಗಳಿಗೆ ಕಾರಣವಾಗಿದೆ. ಮೃತಪಟ್ಟವರನ್ನು ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಜೊತೆ ಸಂಪರ್ಕ ಹೊಂದಿರುವ ಲಷ್ಕರ್-ಎ-ತೈಬಾದ ಉನ್ನತ ಕಮಾಂಡರ್ ಇಮ್ರಾನ್ ಎಂದು ಹೇಳಲಾಗಿದೆ. ಆದರೆ, ಮೃತನ ಗುರುತು, ಗುಂಡಿನ ದಾಳಿ ನಡೆದ ಸ್ಥಳ ಮತ್ತು ಘಟನೆಯ ಬಗ್ಗೆ ಇನ್ನೂ ಯಾವುದೇ ಸ್ಪಷ್ಟ ಮಾಹಿತಿ ತಿಳಿದುಬಂದಿಲ್ಲ (crime news).

ಈ ವಿಡಿಯೊದಲ್ಲಿ ಅಕ್ಟೋಬರ್ 13, 2026 ರಂದು ಬೆಳಿಗ್ಗೆ 11:54 ಎಂದು ಸಮಯ ತೋರಿಸಲಾಗಿದೆ. ವಿಡಿಯೊದಲ್ಲಿ, ಬೈಕ್ ಸವಾರನೊಬ್ಬ ಸಂಕೀರ್ಣದ ಗೇಟ್‌ನಿಂದ ಹೊರಬರುತ್ತಿರುವುದನ್ನು ನೋಡಬಹುದು. ಈ ವೇಳೆ ಬಿಳಿ ಬಟ್ಟೆ ಧರಿಸಿದ ವ್ಯಕ್ತಿಯೊಬ್ಬರು ಅವನ ಬಳಿಗೆ ಬಂದು ಗುಂಡು ಹಾರಿಸಿದ್ದಾರೆ. ಬೈಕ್ ಸವಾರನು ತನ್ನ ವಾಹನವನ್ನು ತಿರುಗಿಸಿ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದಾಗ, ನಿಯಂತ್ರಣ ತಪ್ಪಿ ನೆಲಕ್ಕೆ ಬಿದ್ದಿದ್ದಾನೆ.

ಈ ವೇಳೆ ಆಕ್ರಮಣಕಾರನು ಗುಂಡು ಹಾರಿಸುತ್ತಲೇ ಇದ್ದನು. ನಂತರ ದಾಳಿಕೋರನು ಒಂದು ಬ್ಯಾಗ್‌ನಿಂದ ಮತ್ತೊಂದು ಪಿಸ್ತೂಲನ್ನು ತೆಗೆದುಕೊಂಡು ಆ ವ್ಯಕ್ತಿಯ ಮೇಲೆ ಹಲವಾರು ಸುತ್ತು ಗುಂಡು ಹಾರಿಸಿದ್ದಾನೆ. ನಂತರ ಸಂಭ್ರಮಾಚರಣೆಯ ಸೂಚಕವಾಗಿ ಕಾಣುವ ಹಾಗೆ ತನ್ನ ಕೈಗಳನ್ನು ಮೇಲಕ್ಕೆತ್ತಿದ್ದಾನೆ. ನಂತರ ಬಂದೂಕುಧಾರಿ ಸ್ಥಳದಿಂದ ಓಡಿಹೋಗಿದ್ದಾನೆ.

ಇಲ್ಲಿದೆ ವಿಡಿಯೊ:

ಈ ವಿಡಿಯೊವನ್ನು ಹಂಚಿಕೊಂಡ ಹಲವಾರು ಸಾಮಾಜಿಕ ಮಾಧ್ಯಮ ಖಾತೆಗಳು, ಈ ಘಟನೆಯನ್ನು ಲಷ್ಕರ್ ಹಿರಿಯ ಕಾರ್ಯಕರ್ತನ ಗುರಿಯಾಗಿಟ್ಟುಕೊಂಡು ನಡೆಸಲಾದ ಹತ್ಯೆ ಎಂದು ಹೇಳಿವೆ. ಕೆಲವು ಪೋಸ್ಟ್‌ಗಳು, ಮೃತ ವ್ಯಕ್ತಿಯು ಪಾಕಿಸ್ತಾನದ ಇಂಟರ್-ಸರ್ವೀಸಸ್ ಇಂಟೆಲಿಜೆನ್ಸ್ (ಐಎಸ್‌ಐ) ನೊಂದಿಗೆ ಸಂಪರ್ಕ ಹೊಂದಿದ್ದಾನೆ ಎಂದು ಆರೋಪಿಸಿವೆ.

‘ಉಗ್ರವಾದದ ಬೆಂಕಿ ಪಾಕಿಸ್ತಾನವನ್ನೇ ಸುಡುತ್ತಿದೆ’: ವಿಶ್ವಸಂಸ್ಥೆಯಲ್ಲಿ ಪಾಕ್ ವಿರುದ್ಧ ಭಾರತ ವಾಗ್ದಾಳಿ

ಆದರೆ, ಈ ಹೇಳಿಕೆಗಳು ಆಧಾರರಹಿತವಾಗಿವೆ. ಈ ವಿಡಿಯೊದಲ್ಲಿ ಗುಂಡೇಟಿಗೆ ಒಳಗಾದ ವ್ಯಕ್ತಿ ಯಾರು? ಅವನಿಗೆ ಉಗ್ರಗಾಮಿ ಸಂಘಟನೆಯೊಂದಿಗೆ ಸಂಬಂಧವಿದೆಯೇ? ಅವನನ್ನು ಏಕೆ ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ ಎಂಬುದರ ಬಗ್ಗೆ ಇನ್ನೂ ಖಚಿತವಾದ ಮಾಹಿತಿ ಅಥವಾ ಸಾಕ್ಷ್ಯ ಸಿಕ್ಕಿಲ್ಲ. ವಿಡಿಯೊ ನೋಡಿದ ಮಾತ್ರಕ್ಕೆ ಈ ವಿಷಯಗಳನ್ನು ಸತ್ಯವೆಂದು ಹೇಳಲು ಸಾಧ್ಯವಿಲ್ಲ.

ಇಮ್ರಾನ್ ಎಂಬ ಲಷ್ಕರ್‌ನ ಪ್ರಮುಖ ಕಮಾಂಡರ್ ಪಾಕಿಸ್ತಾನದಲ್ಲಿ ಹತ್ಯೆಯಾಗಿದ್ದಾರೆ ಎಂಬ ಸುದ್ದಿಗೆ ಇನ್ನೂ ಯಾವುದೇ ಸ್ಪಷ್ಟೀಕರಣ ಸಿಕ್ಕಿಲ್ಲ. ಪಾಕಿಸ್ತಾನ ಪೊಲೀಸರು ಅಥವಾ ಸೇನೆ ಈ ಹತ್ಯೆಯನ್ನು ದೃಢಪಡಿಸಿಲ್ಲ.