Shah Rukh Khan: ಭಾರತೀಯ ಚಿತ್ರರಂಗದಲ್ಲೇ ಹೊಸ ದಾಖಲೆ ಬರೆದ ಶಾರುಖ್ ‘ಕಿಂಗ್’! ವಿತರಣಾ ಹಕ್ಕು ಕೋಟಿ ಕೋಟಿ ಡೀಲ್

ಭಾರತೀಯ ಚಿತ್ರರಂಗದಲ್ಲಿ ದಕ್ಷಿಣ ಭಾರತದ ಬಿಗ್ ಬಜೆಟ್ ಸಿನಿಮಾಗಳು ಪ್ಯಾನ್ ಇಂಡಿಯಾ (Pan India) ಮಟ್ಟದಲ್ಲಿ ದೊಡ್ಡ ಯಶಸ್ಸು ಕಾಣುತ್ತಿದ್ದರೂ, ವಿದೇಶಿ ಮಾರುಕಟ್ಟೆಯಲ್ಲಿ ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಅವರ ಪ್ರಭಾವ ಮಾತ್ರ ಮುಂದುವರಿದಿದೆ. ಇದಕ್ಕೆ ಸಾಕ್ಷಿ ಎಂಬಂತೆ ಶಾರುಖ್ ಖಾನ್ ಅಭಿನಯದ ಮುಂಬರುವ ‘ಕಿಂಗ್’(King Movie) ಸಿನಿಮಾ ವಿದೇಶಿ ವಿತರಣಾ ಹಕ್ಕುಗಳ ಮೂಲಕ ಹೊಸ ದಾಖಲೆ ನಿರ್ಮಿಸಿದೆ ಎಂಬ ವರದಿಗಳು ಕೇಳಿಬರುತ್ತಿವೆ.

ವರದಿಗಳ ಪ್ರಕಾರ, ‘ಕಿಂಗ್’ ಸಿನಿಮಾದ ವಿದೇಶಿ ಚಿತ್ರಮಂದಿರ ವಿತರಣಾ ಹಕ್ಕುಗಳನ್ನು ಬರೋಬ್ಬರಿ ₹175 ಕೋಟಿ ನೀಡಿ ಫಾರ್ಸ್ ಫಿಲ್ಮ್ಸ್ (Phars Films) ಸಂಸ್ಥೆ ಪಡೆದುಕೊಂಡಿದೆ. ಈ ಮೂಲಕ ಭಾರತೀಯ ಸಿನಿಮಾಗಳ ವಿದೇಶಿ ವಿತರಣಾ ಹಕ್ಕುಗಳ ಮಾರಾಟದಲ್ಲಿ ಹೊಸ ದಾಖಲೆ ನಿರ್ಮಾಣವಾಗುವ ಸಾಧ್ಯತೆಯಿದೆ.

ಇದನ್ನೂ ಓದಿ: Bigg Boss Kannada 13: ಈ ವಾರ ಇವರಿಗೆ ಕಿಚ್ಚನ ಚಪ್ಪಾಳೆ ಆದ್ರೆ, ಈ ಸೀಸನ್‌ ವಿನ್ನರ್‌ ಯಾರು? ವೀಕ್ಷಕರು ಹೇಳೋದೇನು?

₹175 ಕೋಟಿಗೆ ‘ಕಿಂಗ್’ ವಿದೇಶಿ ವಿತರಣಾ ಹಕ್ಕು ಮಾರಾಟ!

ಪಿಂಕ್‌ವಿಲ್ಲಾ ವರದಿಯ ಪ್ರಕಾರ, ಫಾರ್ಸ್ ಫಿಲ್ಮ್ಸ್ ಸಂಸ್ಥೆ ‘ಕಿಂಗ್’ ಸಿನಿಮಾದ ವಿದೇಶಿ ವಿತರಣಾ ಹಕ್ಕುಗಳನ್ನು ₹175 ಕೋಟಿ ಕನಿಷ್ಠ ಗ್ಯಾರಂಟಿ (Minimum Guarantee) ಮೊತ್ತಕ್ಕೆ ಖರೀದಿಸಿದೆ.

ಈ ಹಿಂದೆ ಶಾರುಖ್ ಖಾನ್ ಅವರ ಸಿನಿಮಾಗಳ ವಿದೇಶಿ ವಿತರಣೆಯನ್ನು ಹೆಚ್ಚಾಗಿ ಯಶ್ ರಾಜ್ ಫಿಲ್ಮ್ಸ್ ಸಂಸ್ಥೆಯೇ ನಿರ್ವಹಿಸುತ್ತಿತ್ತು. 2023ರಲ್ಲಿ ಬಿಡುಗಡೆಯಾದ ‘ಪಠಾಣ್’ ಮತ್ತು ‘ಜವಾನ್’ ಸಿನಿಮಾಗಳ ವಿದೇಶಿ ವಿತರಣೆಯಲ್ಲೂ ಈ ಸಂಸ್ಥೆ ಪ್ರಮುಖ ಪಾತ್ರ ವಹಿಸಿತ್ತು.

ಇದೀಗ ಫಾರ್ಸ್ ಫಿಲ್ಮ್ಸ್ ಸಂಸ್ಥೆ ಈ ಜವಾಬ್ದಾರಿ ಹೊತ್ತುಕೊಂಡಿದೆ. ಈ ಸಂಸ್ಥೆಗೆ ವಿದೇಶಿ ಮಾರುಕಟ್ಟೆಯಲ್ಲಿ ಸಿನಿಮಾಗಳ ವಿತರಣೆ ಮಾಡಿದ ಅನುಭವವಿದೆ. ಯಶ್ ರಾಜ್ ಫಿಲ್ಮ್ಸ್ ಜೊತೆ ಹಲವು ಸಿನಿಮಾಗಳಲ್ಲಿ ಕೆಲಸ ಮಾಡಿರುವುದರ ಜೊತೆಗೆ, ಪ್ರಭಾಸ್ ಅಭಿನಯದ ‘ಸಾಹೋ’ ಸಿನಿಮಾವನ್ನು ಸ್ವತಂತ್ರವಾಗಿ ವಿತರಣೆ ಮಾಡಿತ್ತು.

‘ಕಿಂಗ್’ ಸಿನಿಮಾ ಗಳಿಸಬೇಕಿದೆ ₹350-375 ಕೋಟಿ!

ಸಿನಿಮಾದ ವಿತರಣಾ ಹಕ್ಕುಗಳಿಗೆ ನೀಡುವ ಕನಿಷ್ಠ ಗ್ಯಾರಂಟಿ ಮೊತ್ತವು ಆ ಚಿತ್ರದ ಯಶಸ್ಸಿನ ಮೇಲೆ ವಿತರಕರಿಗೆ ಇರುವ ನಂಬಿಕೆಯನ್ನು ತೋರಿಸುತ್ತದೆ.

ವಿದೇಶಿ ಮಾರುಕಟ್ಟೆಯಲ್ಲಿ ಸಾಮಾನ್ಯವಾಗಿ ವಿತರಕರಿಗೆ ಬಾಕ್ಸ್ ಆಫೀಸ್ ಗಳಿಕೆಯ ಸುಮಾರು ಶೇ.50ರಷ್ಟು ಮಾತ್ರ ಸಿಗುತ್ತದೆ. ಹೀಗಾಗಿ ₹175 ಕೋಟಿ ಹೂಡಿಕೆಯನ್ನು ವಾಪಸ್ ಪಡೆಯಲು ‘ಕಿಂಗ್’ ಸಿನಿಮಾ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಸುಮಾರು ₹350ರಿಂದ ₹375 ಕೋಟಿ ಒಟ್ಟು ಗಳಿಕೆ ಮಾಡಬೇಕಾಗಬಹುದು ಎಂದು ವರದಿ ವಿಶ್ಲೇಷಿಸಿದೆ.

ಶಾರುಖ್ ಖಾನ್ ಅವರ ‘ಪಠಾಣ್’ ಮತ್ತು ‘ಜವಾನ್’ ಸಿನಿಮಾಗಳು ವಿದೇಶಿ ಮಾರುಕಟ್ಟೆಯಲ್ಲಿ ತಲಾ ಸುಮಾರು ₹400 ಕೋಟಿ ಗಳಿಕೆ ಮಾಡಿದ್ದವು. ಹೀಗಾಗಿ ‘ಕಿಂಗ್’ ಸಿನಿಮಾ ಕೂಡ ಇದೇ ಮಟ್ಟದ ಅಥವಾ ಅದಕ್ಕಿಂತ ಹೆಚ್ಚಿನ ಗಳಿಕೆ ಮಾಡಬೇಕಾದ ಒತ್ತಡದಲ್ಲಿದೆ.

‘ಧುರಂಧರ್ 2’ ಸುಮಾರು ₹460 ಕೋಟಿ ಹಾಗೂ ‘RRR’ ಸುಮಾರು ₹430 ಕೋಟಿ ವಿದೇಶಿ ಗಳಿಕೆ ಮಾಡಿರುವುದಾಗಿ ವರದಿಗಳಲ್ಲಿ ಉಲ್ಲೇಖಿಸಲಾಗಿದೆ. ಈ ಸಿನಿಮಾಗಳ ಮಟ್ಟದ ಗಳಿಕೆ ಮಾಡುವುದು ‘ಕಿಂಗ್’ ಚಿತ್ರದ ವಿದೇಶಿ ಮಾರುಕಟ್ಟೆಯ ಗುರಿಯಾಗಬಹುದು.

ಶಾರುಖ್ ಜೊತೆ ದೊಡ್ಡ ತಾರಾಬಳಗ!

‘ಕಿಂಗ್’ ಸಿನಿಮಾದಲ್ಲಿ ಶಾರುಖ್ ಖಾನ್ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. 2023ರಲ್ಲಿ ಬಿಡುಗಡೆಯಾದ ‘ಪಠಾಣ್’ ಬಳಿಕ ನಿರ್ದೇಶಕ ಸಿದ್ಧಾರ್ಥ್ ಆನಂದ್ ಜೊತೆ ಶಾರುಖ್ ಖಾನ್ ಮಾಡುತ್ತಿರುವ ಎರಡನೇ ಸಿನಿಮಾ ಇದಾಗಿದೆ.

ಈ ಚಿತ್ರದಲ್ಲಿ ಶಾರುಖ್ ಖಾನ್ ಪುತ್ರಿ ಸುಹಾನಾ ಖಾನ್ ಕೂಡ ನಟಿಸುತ್ತಿದ್ದಾರೆ. ಅಲ್ಲದೆ ದೀಪಿಕಾ ಪಡುಕೋಣೆ, ಅಭಿಷೇಕ್ ಬಚ್ಚನ್, ರಾಣಿ ಮುಖರ್ಜಿ, ಜಯದೀಪ್ ಅಹ್ಲಾವತ್, ರಾಘವ್ ಜುಯಲ್ ಮತ್ತು ಸೌರಭ್ ಶುಕ್ಲಾ ಸೇರಿದಂತೆ ಹಲವು ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಇದನ್ನೂ ಓದಿ: Bigg Boss Kannada 13: ಈ ವಾರದ ಕ್ಯಾಪ್ಟನ್‌ ಜಗ್ಗ ಮಮ್ಮಿ!‌ ಉತ್ತಮ ಪ್ರಶಾಂತ್‌, ಕಳಪೆ ಯಾರು?

2023ರಲ್ಲಿ ‘ದಿ ಆರ್ಚೀಸ್’ ಚಿತ್ರದ ಮೂಲಕ ನಟನೆಗೆ ಕಾಲಿಟ್ಟ ಸುಹಾನಾ ಖಾನ್, ಮೊದಲ ಬಾರಿಗೆ ತಮ್ಮ ತಂದೆ ಶಾರುಖ್ ಖಾನ್ ಜೊತೆ ತೆರೆ ಹಂಚಿಕೊಳ್ಳುತ್ತಿರುವುದು ಚಿತ್ರದ ಮತ್ತೊಂದು ವಿಶೇಷ.

ಡಿಸೆಂಬರ್ 24ರಂದು ‘ಕಿಂಗ್’ ಸಿನಿಮಾ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಸಿದ್ಧವಾಗಿದೆ. ₹175 ಕೋಟಿ ವಿದೇಶಿ ವಿತರಣಾ ಒಪ್ಪಂದದ ವರದಿಯ ಬೆನ್ನಲ್ಲೇ, ಶಾರುಖ್ ಖಾನ್ ಮತ್ತೊಮ್ಮೆ ವಿದೇಶಿ ಬಾಕ್ಸ್ ಆಫೀಸ್‌ನಲ್ಲಿ ಯಾವ ರೀತಿಯ ದಾಖಲೆ ಬರೆಯಲಿದ್ದಾರೆ ಎಂಬ ಕುತೂಹಲ ಹೆಚ್ಚಾಗಿದೆ.