Yeh Rishta Kya Kehlata Hai actress: ಮುರಿದುಬಿತ್ತು ಖ್ಯಾತ ಕಿರುತೆರೆ ನಟಿಯ ನಿಶ್ಚಿತಾರ್ಥ!

‘ಇಂಗ್ಲಿಷ್ ವಿಂಗ್ಲಿಷ್’ ಸಿನಿಮಾದಲ್ಲಿ ಶ್ರೀದೇವಿ ಅವರ ಮಗಳ ಪಾತ್ರದಲ್ಲಿ ನಟಿಸಿದ್ದ ನವಿಕಾ ಕೊಟಿಯಾ (Navika Kotia), ಉದ್ಯಮಿ ಮಝೆನ್ ಮೋದಿ ಅವರೊಂದಿಗಿನ ನಿಶ್ಚಿತಾರ್ಥವನ್ನು ಮುರಿದುಕೊಂಡಿದ್ದಾರೆ. ‘ಯೇ ರಿಶ್ತಾ ಕ್ಯಾ ಕೆಹ್ಲಾತಾ ಹೈ’ (Yeh Rishta Kya Kehlata Hai Serial) ಧಾರಾವಾಹಿಯ ಮೂಲಕವೂ ನವಿಕಾ ಜನಪ್ರಿಯರಾಗಿದ್ದಾರೆ.

ನವಿಕಾ ಮತ್ತು ಪುಣೆಯ ಉದ್ಯಮಿ ಮಝೆನ್ ಮೋದಿ ಅವರು 2026ರ ಜನವರಿಯಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಮುಂದಿನ ವರ್ಷ ಮದುವೆಯಾಗಲು ಯೋಜಿಸಿದ್ದರು. ಆದರೆ, ಇಬ್ಬರ ನಡುವೆ ಹೊಂದಾಣಿಕೆಯ ಸಮಸ್ಯೆಗಳು ಎದುರಾದ ಕಾರಣ, ಜುಲೈ ತಿಂಗಳ ಆರಂಭದಲ್ಲಿ ಪರಸ್ಪರ ಒಪ್ಪಿಗೆಯಿಂದ ದೂರವಾಗಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.

‘ಟೈಮ್ಸ್ ಆಫ್ ಇಂಡಿಯಾ’ ವರದಿಯ ಪ್ರಕಾರ, ಇದು ಎರಡೂ ಕುಟುಂಬಗಳ ಒಪ್ಪಿಗೆಯಿಂದ ನಡೆದ ಮದುವೆಯ ಮಾತುಕತೆಯಾಗಿತ್ತು. ಜನವರಿಯಲ್ಲಿ ಗೋಲ್ ಧನಾ ಸಮಾರಂಭವನ್ನೂ ನಡೆಸಲಾಗಿತ್ತು. ಆದರೆ, ದಿನ ಕಳೆದಂತೆ ಇಬ್ಬರ ಆಲೋಚನೆಗಳು ಮತ್ತು ಸ್ವಭಾವದಲ್ಲಿ ವ್ಯತ್ಯಾಸವಿರುವುದು ತಿಳಿದುಬಂದಿದೆ. ಹೀಗಾಗಿ, ಯಾವುದೇ ಮನಸ್ತಾಪವಿಲ್ಲದೆ ನಿಶ್ಚಿತಾರ್ಥವನ್ನು ಮುರಿದುಕೊಳ್ಳಲು ನಿರ್ಧರಿಸಿದ್ದಾರೆ ಎಂದು ಮೂಲವೊಂದು ತಿಳಿಸಿದೆ.

ಇದನ್ನೂ ಓದಿ: Bigg Boss Kannada 13: ಶೆಟ್ಟಿ ಡಾನ್ ಕಲ್ಯಾಣವಂತೆ! ವರನ್ಯಾರು ಗೊತ್ತೇನು?

ಇಬ್ಬರೂ ತಮ್ಮ ಜೀವನದಲ್ಲಿ ಮುಂದೆ ಸಾಗಿದ್ದು, ಈ ವಿಚಾರದಲ್ಲಿ ಯಾವುದೇ ನಕಾರಾತ್ಮಕತೆ ಇಲ್ಲ ಎಂದು ವರದಿಯಾಗಿದೆ. ನವಿಕಾ ತಮ್ಮ ಸಾಮಾಜಿಕ ಜಾಲತಾಣದಿಂದ ನಿಶ್ಚಿತಾರ್ಥದ ಫೋಟೋಗಳನ್ನೂ ತೆಗೆದುಹಾಕಿದ್ದಾರೆ.

‘ಟೆಲ್ಲಿಚಕ್ಕರ್’ ವರದಿಯ ಪ್ರಕಾರ, ಹೊಂದಾಣಿಕೆ, ಜೀವನದ ಆದ್ಯತೆಗಳು ಮತ್ತು ಭವಿಷ್ಯದ ನಿರೀಕ್ಷೆಗಳಲ್ಲಿನ ವ್ಯತ್ಯಾಸಗಳಿಂದಾಗಿ ಆರು ತಿಂಗಳ ಹಿಂದೆಯೇ ನಿಶ್ಚಿತಾರ್ಥ ಮುರಿದುಬಿದ್ದಿತ್ತು ಎನ್ನಲಾಗಿದೆ. ಇಬ್ಬರೂ ಪರಸ್ಪರ ಗೌರವದಿಂದ ದೂರವಾಗಿದ್ದೇವೆ ಎಂದು ಮಝೆನ್ ತಿಳಿಸಿದ್ದಾರೆ.

ನವಿಕಾ ಮತ್ತು ಮಝೆನ್ ಅವರನ್ನು ಸಾಮಾನ್ಯ ಸ್ನೇಹಿತರೊಬ್ಬರು ಪರಿಚಯಿಸಿದ್ದರು. ಸುಮಾರು ಒಂದು ವರ್ಷದಿಂದ ಪರಿಚಯವಿದ್ದ ಇವರ ಮದುವೆಯ ಬಗ್ಗೆ ನಂತರ ಕುಟುಂಬದವರು ಚರ್ಚಿಸಿದ್ದರು.

‘ಎಚ್‌ಟಿ ಸಿಟಿ’ಗೆ ನೀಡಿದ ಸಂದರ್ಶನದಲ್ಲಿ ನವಿಕಾ ತಮ್ಮ ಪರಿಚಯದ ಬಗ್ಗೆ ಮಾತನಾಡಿದ್ದರು. “ನಮ್ಮ ಸ್ನೇಹಿತರ ಮೂಲಕ ಪರಿಚಯವಾಯಿತು. ನಂತರ ನಾನು ಅವರ ಪೋಷಕರನ್ನು ಎರಡು ಬಾರಿ ಭೇಟಿಯಾಗಿದ್ದೆ. ಆ ಬಳಿಕ ಅವರು ನನ್ನ ತಾಯಿಗೆ ಕರೆ ಮಾಡಿ, ಮಝೆನ್‌ಗಾಗಿ ನನ್ನ ಮಗಳನ್ನು ಮದುವೆ ಮಾಡಿಕೊಡುತ್ತೀರಾ ಎಂದು ಕೇಳಿದರು. ಆಗ ನನಗೆ, ‘ಇವರು ಎಲ್ಲಿಂದ ಬಂದರು?’ ಎಂದು ಅನಿಸಿತ್ತು. ಆದರೆ, ನನ್ನ ಮದುವೆಯ ನಿರ್ಧಾರವನ್ನು ನನ್ನ ಪೋಷಕರೇ ತೆಗೆದುಕೊಳ್ಳಬೇಕು ಎಂದು ನಾನು ಯಾವಾಗಲೂ ಬಯಸಿದ್ದೆ. ಹಾಗಾಗಿ ಇದು ನನಗೆ ಸರಿಯಾದ ನಿರ್ಧಾರ ಎನಿಸಿತು. ಅವರನ್ನು ತಿಳಿದುಕೊಳ್ಳಲು ಸ್ವಲ್ಪ ಸಮಯ ತೆಗೆದುಕೊಂಡೆ. ಬಳಿಕ ಒಪ್ಪಿಗೆ ನೀಡಿದೆ. ನವೆಂಬರ್‌ನಲ್ಲಿ ನಮ್ಮ ಸಣ್ಣ ರೋಕಾ ಸಮಾರಂಭವೂ ನಡೆದಿತ್ತು,” ಎಂದು ಹೇಳಿದ್ದರು.

ಇನ್ನು, ನಿಶ್ಚಿತಾರ್ಥ ಮುರಿದುಬಿದ್ದಿರುವ ಸುದ್ದಿ ಹೊರಬಂದ ಬೆನ್ನಲ್ಲೇ, ಮಝೆನ್ ಮೋದಿ ಈಗ ನಟಿ ರಿತಿಕಾ ಬದಿಯಾನಿ ಅವರೊಂದಿಗೆ ಸಂಬಂಧದಲ್ಲಿದ್ದಾರೆ ಎಂಬ ವರದಿಗಳು ಕೇಳಿಬಂದಿವೆ. ಅವರ ಸಾಮಾಜಿಕ ಜಾಲತಾಣದ ಅಪ್‌ಡೇಟ್‌ಗಳ ಆಧಾರದ ಮೇಲೆ ಈ ಸುದ್ದಿ ಹರಿದಾಡುತ್ತಿದೆ.

2001ರ ಅಕ್ಟೋಬರ್ 17ರಂದು ಗುಜರಾತ್‌ನ ಪೋರಬಂದರ್‌ನಲ್ಲಿ ಜನಿಸಿದ ರಿತಿಕಾ ಬದಿಯಾನಿ, ‘ಏರ್‌ಲಿಫ್ಟ್’, ‘10 ಕಲ್ಪನಕಲ್’ ಮತ್ತು ‘ಚಮನ್ ಬಹಾರ್’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ.

ಇದನ್ನೂ ಓದಿ: Bigg Boss Kannada 13: ಕುಮಾರಿ ಸ್ನಾನಾನೇ ಮಾಡಲ್ಲ! ಲಕ್ಷ್ಮೀ ಗೌಡ ಶಾಕಿಂಗ್​ ಸ್ಟೇಟ್​ಮೆಂಟ್​

ಇನ್ನು, ನವಿಕಾ ಕೊಟಿಯಾ ಬಾಲನಟಿಯಾಗಿ ತಮ್ಮ ವೃತ್ತಿಜೀವನ ಆರಂಭಿಸಿದ್ದರು. ‘ಕಸಮ್ ಸೇ’, ‘ಬಾ ಬಹೂ ಔರ್ ಬೇಬಿ’ ಮತ್ತು ‘ಬಾಲಿಕಾ ವಧು’ ಸೇರಿದಂತೆ ಹಲವು ಕಿರುತೆರೆ ಧಾರಾವಾಹಿಗಳಲ್ಲಿ ಕಾಣಿಸಿಕೊಂಡಿದ್ದರು. 2012ರಲ್ಲಿ ಬಿಡುಗಡೆಯಾದ ‘ಇಂಗ್ಲಿಷ್ ವಿಂಗ್ಲಿಷ್’ ಸಿನಿಮಾದಲ್ಲಿ ಶ್ರೀದೇವಿ ಅವರ ಮಗಳ ಪಾತ್ರದಲ್ಲಿ ನಟಿಸುವ ಮೂಲಕ ಹೆಚ್ಚಿನ ಜನಪ್ರಿಯತೆ ಗಳಿಸಿದ್ದರು.

ನಂತರ ವಿದ್ಯಾಭ್ಯಾಸದ ಕಡೆ ಗಮನಹರಿಸಲು ಎಂಟು ವರ್ಷಗಳ ಕಾಲ ನಟನೆಯಿಂದ ದೂರ ಉಳಿದಿದ್ದರು. 2022ರಲ್ಲಿ ‘ಯೇ ರಿಶ್ತಾ ಕ್ಯಾ ಕೆಹ್ಲಾತಾ ಹೈ’ ಧಾರಾವಾಹಿಯ ಮೂಲಕ ಮತ್ತೆ ಕಿರುತೆರೆಗೆ ಮರಳಿದರು. ಈ ಧಾರಾವಾಹಿಯಲ್ಲಿ ಮಾಯಾ ಅಲಿಯಾಸ್ ಮೌ ಖೇರಾ ಎಂಬ ವಿಭಿನ್ನ ಛಾಯೆಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.

ಇದಾದ ಬಳಿಕ ‘ಕ್ಯೋಂಕಿ ಸಾಸ್ ಮಾ ಬಹೂ ಬೇಟಿ ಹೋತಿ ಹೈ’ ಧಾರಾವಾಹಿಯಲ್ಲಿ ಮೊದಲ ಬಾರಿಗೆ ನಾಯಕಿಯಾಗಿ ನಟಿಸಿದರು. ಅಲ್ಲದೆ, ಅಮೆಜಾನ್ ಮಿನಿಟಿವಿಯ ‘ಸ್ಕೂಲ್ ಫ್ರೆಂಡ್ಸ್’ ವೆಬ್ ಸರಣಿಯ ಮೂರು ಸೀಸನ್‌ಗಳಲ್ಲಿಯೂ ಅಭಿನಯಿಸಿದ್ದಾರೆ.