ಭಾರತ-ಪಾಕಿಸ್ತಾನ ಗಡಿಯಲ್ಲಿ ಎಕೆ-47 ರೈಫಲ್‌ಗಳು, ಪಿಸ್ತೂಲ್‌ಗಳು, ಮದ್ದುಗುಂಡುಗಳು ಪತ್ತೆ

ಪಠಾಣ್‌ಕೋಟ್, ಜ.18: ಕೇಂದ್ರ ಗುಪ್ತಚರ ಸಂಸ್ಥೆಗಳ (intelligence agencies) ಸಮನ್ವಯದೊಂದಿಗೆ, ಭಾರತ-ಪಾಕಿಸ್ತಾನ ಗಡಿಯ (India–Pakistan border) ಸಮೀಪವಿರುವ ನರೋತ್ ಜೈಮಲ್ ಸಿಂಗ್ ಗಡಿ ಪ್ರದೇಶದಿಂದ ದೊಡ್ಡ ಪ್ರಮಾಣದ ಶಸ್ತ್ರಾಸ್ತ್ರ ಮತ್ತು ಮದ್ದುಗುಂಡುಗಳನ್ನು ಪಂಜಾಬ್‌ನ ಪಠಾಣ್‌ಕೋಟ್ (Punjab's Pathankot) ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ರಾಜ್ಯದಲ್ಲಿ ಶಾಂತಿ ಕದಡಲು ಪಾಕಿಸ್ತಾನದಿಂದ ಈ ಅಕ್ರಮ ಶಸ್ತ್ರಾಸ್ತ್ರಗಳನ್ನು ರವಾನೆ ಮಾಡಲಾಗಿದೆ ಎಂದು ಹೇಳಲಾಗಿದೆ. ವಶಪಡಿಸಿಕೊಂಡ ವಸ್ತುಗಳಲ್ಲಿ 3 ಎಕೆ -47 ರೈಫಲ್‌ಗಳು, 5 ಮ್ಯಾಗಜೀನ್‌ಗಳು ( ಬುಲೆಟ್ಸ್ ಇಡುವ ಡಬ್ಬಿ/ಕಂಟೈನರ್), 2 ಪಿಸ್ತೂಲ್‌ಗಳು (ಟರ್ಕಿಶ್ ಮತ್ತು ಚೈನೀಸ್ ನಿರ್ಮಿತ) ಮತ್ತು 98 ಲೈವ್ ಕಾರ್ಟ್ರಿಡ್ಜ್‌ಗಳು ಸೇರಿವೆ.

ಹಳೆಯ ಚಾಳಿ ಬಿಡದ ಪಾಪಿ ಪಾಕ್; ಮತ್ತೆ ಭಾರತದೊಳಗೆ ಡ್ರೋನ್‌ಗಳ ಹಾರಾಟ

ಪಾಕಿಸ್ತಾನದಿಂದ ಕಾರ್ಯನಿರ್ವಹಿಸುತ್ತಿರುವ ಕ್ರಿಮಿನಲ್‌ನಿಂದ ಭಯೋತ್ಪಾದಕನಾಗಿ ಬದಲಾದ ರಿಂಡಾ ಈ ಶಸ್ತ್ರಾಸ್ತ್ರಗಳನ್ನು ಕಳುಹಿಸಿದ್ದಾನೆ ಎಂದು ಗುಪ್ತಚರ ಮಾಹಿತಿಗಳು ಸೂಚಿಸಿವೆ ಎಂದು ಗಡಿ ವಲಯದ ಡಿಐಜಿ ಸಂದೀಪ್ ಗೋಯಲ್ ಹೇಳಿದ್ದಾರೆ. ಆತ ಪಾಕಿಸ್ತಾನದ ಗುಪ್ತಚರ ಸಂಸ್ಥೆಯಾದ ಇಂಟರ್ ಸರ್ವಿಸ್ ಇಂಟೆಲಿಜೆನ್ಸ್ (ಐಎಸ್ಐ) ನ ಸಂಪೂರ್ಣ ಬೆಂಬಲದೊಂದಿಗೆ ಕೆಲಸ ಮಾಡುತ್ತಿರುವುದಾಗಿ ಹೇಳಲಾಗಿದೆ.

ಪ್ರಕರಣದ ತನಿಖೆ ನಡೆಸಿದ ಪೊಲೀಸರು, ಘಟನೆಯಲ್ಲಿ ಭಾಗಿಯಾದವರನ್ನು ಬಂಧಿಸಲು ಹಲವು ಸ್ಥಳಗಳಲ್ಲಿ ಶೋಧ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದ್ದಾರೆ. ಈ ಜಾಲಗಳನ್ನು ಭೇದಿಸಲು ಮತ್ತು ಮುಂದೆ ಯಾವುದೇ ಬೆದರಿಕೆಗಳನ್ನು ತಡೆಗಟ್ಟಲು ಪೊಲೀಸರು ಮತ್ತು ಭದ್ರತಾ ಸಂಸ್ಥೆಗಳು ನಿಕಟವಾಗಿ ಕಾರ್ಯನಿರ್ವಹಿಸುತ್ತಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪಾಕಿಸ್ತಾನ ಮತ್ತೆ ಡ್ರೋನ್‌ಗಳನ್ನು ಕಳುಹಿಸುತ್ತಿರುವುದು ಏಕೆ?

ಆಪರೇಷನ್ ಸಿಂಧೂರ್‌ನಲ್ಲಿ ಹೀನಾಯ ಸೋಲು ಅನುಭವಿಸಿದ ಸುಮಾರು ಎಂಟು ತಿಂಗಳ ನಂತರ, ಪಾಕಿಸ್ತಾನ ಮತ್ತೊಮ್ಮೆ ಡ್ರೋನ್ ಪ್ರಚೋದನೆಗೆ ಮುಂದಾಗಿದೆ. ಜನವರಿ ಆರಂಭದಿಂದಲೂ, ಜಮ್ಮು ಮತ್ತು ಕಾಶ್ಮೀರದ ಹಲವಾರು ಗಡಿ ಪ್ರದೇಶಗಳಲ್ಲಿ ಪಾಕಿಸ್ತಾನಿ ಡ್ರೋನ್‌ಗಳು ಪತ್ತೆಯಾಗಿವೆ. ಈ ಘಟನೆಗಳ ನಂತರ, ಭಾರತವು ಪಾಕಿಸ್ತಾನಕ್ಕೆ ಬಲವಾದ ಸಂದೇಶವನ್ನು ನೀಡಿತು, ಆದರೆ ಡ್ರೋನ್ ಚಟುವಟಿಕೆ ಇನ್ನೂ ನಿಂತಿಲ್ಲ.

ಸೇನೆಯ ಪ್ರಕಾರ, ಪಾಕಿಸ್ತಾನ ಕಳುಹಿಸುತ್ತಿರುವ ಡ್ರೋನ್‌ಗಳು ಆತ್ಮಹತ್ಯಾ ಅಥವಾ ಕಾಮಿಕಾಜ್-ವರ್ಗದವುಗಳಲ್ಲ. ಈ ಡ್ರೋನ್‌ಗಳು ಗಾತ್ರದಲ್ಲಿ ಚಿಕ್ಕದಾಗಿರುತ್ತವೆ ಮತ್ತು ಪ್ರಾಥಮಿಕವಾಗಿ ಕಣ್ಗಾವಲು ಉದ್ದೇಶಗಳಿಗಾಗಿ ಬಳಸಲ್ಪಡುತ್ತವೆ. ಕಾಮಿಕಾಜ್ ಡ್ರೋನ್‌ಗಳು ಗುರಿಯನ್ನು ಹುಡುಕುತ್ತಾ ಸುಳಿದಾಡುವ ಮತ್ತು ನಂತರ ಸ್ಫೋಟದೊಂದಿಗೆ ದಾಳಿ ಮಾಡುವ UAV ಗಳಾಗಿವೆ. ಇತ್ತೀಚಿನ ಘಟನೆಗಳಲ್ಲಿ ಕಂಡುಬರುವ ಡ್ರೋನ್‌ಗಳು ಈ ರೀತಿಯದ್ದಾಗಿರಲಿಲ್ಲ.

ಪಾಕಿಸ್ತಾನ ಆತ್ಮಹತ್ಯಾ ಡ್ರೋನ್‌ಗಳನ್ನಲ್ಲ, ಸಣ್ಣ ಕಣ್ಗಾವಲು ಡ್ರೋನ್‌ಗಳನ್ನು ಕಳುಹಿಸುತ್ತಿದೆ

ಸೇನಾ ದಿನದಂದು ಮಾಧ್ಯಮಗಳೊಂದಿಗೆ ಮಾತನಾಡಿದ ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ, ಇತ್ತೀಚೆಗೆ ಕಂಡುಬಂದ ಡ್ರೋನ್‌ಗಳು ತುಂಬಾ ಚಿಕ್ಕದಾಗಿದ್ದವು ಮತ್ತು ಕಡಿಮೆ ಎತ್ತರದಲ್ಲಿ ಹಾರುತ್ತಿದ್ದವು ಎಂದು ಹೇಳಿದರು. ಡ್ರೋನ್‌ಗಳು ಸಹ ತಮ್ಮ ದೀಪಗಳನ್ನು ಆನ್ ಮಾಡಿದ್ದವು, ಅವು ದೊಡ್ಡ ದಾಳಿಗೆ ಉದ್ದೇಶಿಸಿಲ್ಲ, ಬದಲಾಗಿ ಕಣ್ಗಾವಲುಗಳಾಗಿವೆ ಎಂದು ಹೇಳಿದ್ದರು.

ಜನರಲ್ ದ್ವಿವೇದಿ ಅವರ ಪ್ರಕಾರ, ಭಾರತ ಕಠಿಣ ಕ್ರಮ ಕೈಗೊಳ್ಳುವ ಸಾಧ್ಯತೆಯ ಬಗ್ಗೆ ಪಾಕಿಸ್ತಾನ ಭಯಪಡುತ್ತದೆ. ಆದ್ದರಿಂದ, ಅದು ಭಾರತೀಯ ಭದ್ರತೆಯನ್ನು ಪರೀಕ್ಷಿಸಲು ಡ್ರೋನ್‌ಗಳನ್ನು ಬಳಸುತ್ತದೆ. ಈ ಚಟುವಟಿಕೆಗಳ ಬಗ್ಗೆ ಪಾಕಿಸ್ತಾನಕ್ಕೆ ಎಚ್ಚರಿಕೆ ನೀಡಲಾಗಿದೆ ಮತ್ತು ಯಾವುದೇ ದುಸ್ಸಾಹಸಕ್ಕೆ ಬಲವಾದ ಪ್ರತಿಕ್ರಿಯೆ ನೀಡಲಾಗುವುದು ಎಂದು ಅವರು ಹೇಳಿದರು.