ಮೊಬೈಲ್‌ ಡೇಟಾ ಬಳಸದವರಿಗೆ ಸಿಹಿಸುದ್ದಿ: ಕರೆ, ಸಂದೇಶ ಮಾತ್ರದ ರೀಚಾರ್ಜ್‌ ಯೋಜನೆಗಳು ಹೆಚ್ಚಳ

ನವದೆಹಲಿ: ಮೊಬೈಲ್‌ (Mobile) ಡೇಟಾ ಬಳಕೆ ಮಾಡದ ಅಥವಾ ಕಡಿಮೆ ಪ್ರಮಾಣದಲ್ಲಿ ಬಳಸುವ ಗ್ರಾಹಕರಿಗೆ ಅನುಕೂಲವಾಗುವಂತೆ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (TRAI)ವು ಹೊಸ ನಿಯಮಗಳನ್ನು ಜಾರಿಗೆ ತರಲು ಮುಂದಾಗಿದೆ. ಇದರ ಅನ್ವಯ ಪ್ರಮುಖ ದೂರಸಂಪರ್ಕ ಸಂಸ್ಥೆಗಳು (Telecom Companies) ಡೇಟಾ ಇಲ್ಲದ ಕರೆ ಮತ್ತು ಸಂದೇಶ ಆಧಾರಿತ ರೀಚಾರ್ಜ್‌ ಯೋಜನೆಗಳನ್ನು ಹೆಚ್ಚಿನ ಸಂಖ್ಯೆಯಲ್ಲಿ ನೀಡಬೇಕಾಗುತ್ತದೆ.

ಹೊಸ ನಿಯಮಗಳ ಪ್ರಕಾರ, 30 ದಿನಗಳು ಅಥವಾ ಅದಕ್ಕಿಂತ ಕಡಿಮೆ ಅವಧಿಯ ಡೇಟಾ ಒಳಗೊಂಡಿರುವ ಯೋಜನೆಗಳ ಜೊತೆಗೆ, ಅದೇ ಅವಧಿಗೆ ಅನ್ವಯಿಸುವ ಡೇಟಾ ರಹಿತ ಕರೆ ಮತ್ತು ಸಂದೇಶ ಯೋಜನೆಯನ್ನೂ ಗ್ರಾಹಕರಿಗೆ ಒದಗಿಸಬೇಕು. ಇದರಿಂದ ಡೇಟಾ ಬಳಸದವರು ಅಗತ್ಯವಿಲ್ಲದ ಡೇಟಾಗೆ ಹಣ ಪಾವತಿಸುವುದನ್ನು ತಪ್ಪಿಸಬಹುದು.

ದರದಲ್ಲೂ ಕಡಿತದ ನಿರೀಕ್ಷೆ

ಕರೆ ಮತ್ತು ಸಂದೇಶ ಮಾತ್ರ ಒಳಗೊಂಡಿರುವ ಯೋಜನೆಗಳಿಗೆ ಸೂಕ್ತ ದರ ಕಡಿತ ನೀಡಬೇಕು ಎಂದು ಪ್ರಾಧಿಕಾರ ಸೂಚಿಸಿದೆ. ಆದರೆ ಎಷ್ಟು ಪ್ರಮಾಣದಲ್ಲಿ ದರ ಕಡಿತ ಮಾಡಬೇಕು ಎಂಬುದನ್ನು ನಿರ್ದಿಷ್ಟವಾಗಿ ತಿಳಿಸಿಲ್ಲ. ಹೀಗಾಗಿ ಗ್ರಾಹಕರಿಗೆ ಸಿಗುವ ಉಳಿತಾಯವು ಆಯಾ ದೂರಸಂಪರ್ಕ ಸಂಸ್ಥೆಗಳು ನಿಗದಿಪಡಿಸುವ ದರವನ್ನು ಅವಲಂಬಿಸಿರುತ್ತದೆ.

ಇಂಡಿಯಾ ಮೈತ್ರಿಕೂಟದಲ್ಲಿ ಮತ್ತೆ ಬಿರುಕು; ಮಹತ್ವದ ಸಭೆಗೆ ಆಮ್‌ ಆದ್ಮಿ, ಡಿಎಂಕೆ ನಾಯಕರು ಸೇರಿ ಹಲವರು ಗೈರು

ಪ್ರತಿ ತಿಂಗಳು ಒಂದೇ ದಿನ ನವೀಕರಣ

ಹೊಸ ನಿಯಮಗಳ ಮತ್ತೊಂದು ಪ್ರಮುಖ ಅಂಶವೆಂದರೆ, ಕನಿಷ್ಠ ಒಂದು ಕರೆ ಮತ್ತು ಸಂದೇಶ ಆಧಾರಿತ ಯೋಜನೆಯನ್ನು ಪ್ರತಿ ತಿಂಗಳು ಒಂದೇ ದಿನ ನವೀಕರಿಸಿಕೊಳ್ಳುವ ಅವಕಾಶ ನೀಡಬೇಕು. ನಿಗದಿತ ದಿನಾಂಕವು ಯಾವುದಾದರೂ ತಿಂಗಳಲ್ಲಿ ಇಲ್ಲದಿದ್ದರೆ, ಆ ತಿಂಗಳ ಕೊನೆಯ ದಿನವನ್ನು ನವೀಕರಣ ದಿನವಾಗಿ ಪರಿಗಣಿಸಲಾಗುತ್ತದೆ.

ದೀರ್ಘಾವಧಿಯ ಯೋಜನೆಗೂ ಅವಕಾಶ

ಡೇಟಾ ಬಳಕೆ ಮಾಡದ ಗ್ರಾಹಕರಿಗಾಗಿ ದೀರ್ಘಾವಧಿಗೆ ಬಳಸಬಹುದಾದ ಕನಿಷ್ಠ ಒಂದು ಕರೆ ಮತ್ತು ಸಂದೇಶ ಮಾತ್ರ ಒಳಗೊಂಡಿರುವ ರೀಚಾರ್ಜ್‌ ಯೋಜನೆಯನ್ನೂ ದೂರಸಂಪರ್ಕ ಸಂಸ್ಥೆಗಳು ಒದಗಿಸಬೇಕು. ಇದರಿಂದ ಹಿರಿಯ ನಾಗರಿಕರು ಸೇರಿದಂತೆ ಡೇಟಾ ಅಗತ್ಯವಿಲ್ಲದ ಗ್ರಾಹಕರಿಗೆ ಹೆಚ್ಚು ಅನುಕೂಲವಾಗಬಹುದು.

ಹೊಸ ನಿಯಮಗಳು ಜಾರಿಗೆ ಬಂದ ಬಳಿಕ ದೂರಸಂಪರ್ಕ ಸಂಸ್ಥೆಗಳು ತಮ್ಮ ರೀಚಾರ್ಜ್‌ ಯೋಜನೆಗಳಲ್ಲಿ ಬದಲಾವಣೆ ಮಾಡುವ ಸಾಧ್ಯತೆ ಇದೆ. ಆದರೆ ಎಲ್ಲ ರೀಚಾರ್ಜ್‌ಗಳ ದರವೂ ಸ್ವಯಂಚಾಲಿತವಾಗಿ ಕಡಿಮೆಯಾಗುತ್ತದೆ ಎಂದರ್ಥವಲ್ಲ. ಅಂತಿಮ ದರ ಮತ್ತು ಉಳಿತಾಯವು ಆಯಾ ಸಂಸ್ಥೆಗಳು ಪ್ರಕಟಿಸುವ ಹೊಸ ಯೋಜನೆಗಳ ಮೇಲೆ ಅವಲಂಬಿತವಾಗಿರಲಿದೆ.