ಯುದ್ಧ ವಲಯದಿಂದ ಸುರಕ್ಷಿತವಾಗಿ ಹೊರಬಂದ 'ಜಗ್ ಲಾಡ್ಕಿ' ಹಡಗು: ಹೊರ್ಮುಜ್‌ನಲ್ಲಿ ಭಾರತಕ್ಕೆ ರಾಜತಾಂತ್ರಿಕ ಗೆಲುವು

ನವದೆಹಲಿ: ಪಶ್ಚಿಮ ಏಷ್ಯಾ (West Asia)ದಲ್ಲಿ ಯುದ್ಧ ಭೀಕರವಾಗಿರುವ ಬೆನ್ನಲ್ಲೇ, ಯುಎಇ (UAE)ಯ ಫುಜೈರಾ (Fujairah) ಬಂದರಿನ ಮೇಲೆ ದಾಳಿ ನಡೆದ ಮರುದಿನವೇ ಭಾರತ (India)ದ ಕಚ್ಚಾ ತೈಲ ಹೊತ್ತ 'ಜಗ್ ಲಾಡ್ಕಿ' (Jag Laadki) ನೌಕೆಯು ಭಾನುವಾರ ಸುರಕ್ಷಿತವಾಗಿ ಸಂಚಾರ ಆರಂಭಿಸಿದೆ. ಸುಮಾರು 80,800 ಟನ್ ಮುರ್ಬನ್ ಕಚ್ಚಾ ತೈಲ (Murban crude oil)ವನ್ನು ಹೊಂದಿರುವ ಈ ಹಡಗು ಭಾರತದತ್ತ ಪ್ರಯಾಣ ಬೆಳೆಸಿದೆ ಎಂದು ಸರ್ಕಾರಿ ಅಧಿಕಾರಿಗಳು ಖಚಿತಪಡಿಸಿದ್ದಾರೆ.

ಏನಿದು ಘಟನೆ?

ಮಾರ್ಚ್ 14, 2026 ರಂದು ಫುಜೈರಾ ತೈಲ ಟರ್ಮಿನಲ್ ಮೇಲೆ ದಾಳಿ ನಡೆದಾಗ ಜಗ್ ಲಾಡ್ಕಿ ಹಡಗು ಅಲ್ಲಿ ತೈಲವನ್ನು ತುಂಬಿಸಿಕೊಳ್ಳುತ್ತಿತ್ತು. ದಾಳಿಯ ನಂತರ ಬಂದರಿನ ಕಾರ್ಯಾಚರಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿತ್ತು. ಆದರೂ, ಭಾರತ ಮತ್ತು ಇರಾನ್ ನಡುವಿನ ಉನ್ನತ ಮಟ್ಟದ ಮಾತುಕತೆಯ ಫಲವಾಗಿ, ಭಾನುವಾರ ಬೆಳಿಗ್ಗೆ 10:30ಕ್ಕೆ (IST) ಈ ಹಡಗು ಅಪಾಯಕಾರಿ ವಲಯದಿಂದ ಹೊರಬರಲು ಯಶಸ್ವಿಯಾಗಿದೆ. ಯುದ್ಧ ಆರಂಭವಾದ ನಂತರ ಹಾನಿಗೊಳಗಾಗದೆ ಸುರಕ್ಷಿತವಾಗಿ ಹೊರಬಂದ ನಾಲ್ಕನೇ ಭಾರತೀಯ ನೌಕೆ ಇದಾಗಿದೆ.

ಭಾರತಕ್ಕೆ ಸಿಕ್ಕ ಇರಾನ್ ಭರವಸೆ:

ಅಮೆರಿಕ ಮತ್ತು ಇಸ್ರೇಲ್ ಹಡಗುಗಳಿಗೆ ಹೋರ್ಮುಜ್ ಜಲಸಂಧಿಯನ್ನು ಇರಾನ್ ಸಂಪೂರ್ಣವಾಗಿ ಬಂದ್ ಮಾಡಿದ್ದರೂ, ಭಾರತದ ಹಡಗುಗಳಿಗೆ 'ಸುರಕ್ಷಿತ ಸಂಚಾರ' (Safe Passage) ನೀಡುವುದಾಗಿ ಇರಾನ್ ವಿದೇಶಾಂಗ ಸಚಿವ ಸೈಯದ್ ಅಬ್ಬಾಸ್ ಅರಾಗ್ಚಿ ಭರವಸೆ ನೀಡಿದ್ದಾರೆ. ಈ ಭರವಸೆಯ ಬೆನ್ನಲ್ಲೇ ಶನಿವಾರವಷ್ಟೇ ಎಲ್‌ಪಿಜಿ ಹೊತ್ತಿದ್ದ 'ಶಿವಾಲಿಕ್' ಮತ್ತು 'ನಂದಾದೇವಿ' ಹಡಗುಗಳು ಜಲಸಂಧಿಯನ್ನು ದಾಟಿದ್ದವು. ಇವು ಮುಂದಿನ ವಾರದ ಆರಂಭದಲ್ಲಿ ಗುಜರಾತಿನ ಮುದ್ರಾ ಮತ್ತು ಕಾಂಡ್ಲಾ ಬಂದರುಗಳನ್ನು ತಲುಪುವ ನಿರೀಕ್ಷೆಯಿದೆ.

ಹಳೆಯ ವಸ್ತುಗಳಿಂದ ಯುದ್ಧ ವಿಮಾನ ತಯಾರಿಸಿದ ಸರ್ಕಾರಿ ಶಾಲಾ ಮಕ್ಕಳು: ಕ್ರಿಯಾತ್ಮಕತೆಗೆ ನೆಟ್ಟಿಗರು ಫಿದಾ!

ಸದ್ಯದ ಸವಾಲುಗಳು:

ಇರಾನ್ ತನ್ನ ನೆರೆಯ ಗಲ್ಫ್ ರಾಷ್ಟ್ರಗಳ ಬಂದರುಗಳ ಮೇಲೆ ದಾಳಿ ತೀವ್ರಗೊಳಿಸಿದ್ದು, ಅಲ್ಲಿರುವ ಭಾರತೀಯರು ತಕ್ಷಣ ಹೊರಬರಲು ಸೂಚಿಸಿದೆ. ಪ್ರಸ್ತುತ ಪರ್ಷಿಯನ್ ಕೊಲ್ಲಿಯಲ್ಲಿ ಭಾರತದ ಧ್ವಜವಿರುವ ಇನ್ನೂ 22 ವ್ಯಾಪಾರಿ ಹಡಗುಗಳು ಸುರಕ್ಷಿತ ಸಂಚಾರಕ್ಕಾಗಿ ಕಾಯುತ್ತಿವೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಚೀನಾ, ಜಪಾನ್ ಮತ್ತು ಯುಕೆ ಸೇರಿದಂತೆ ಇತರ ರಾಷ್ಟ್ರಗಳು ತಮ್ಮ ಯುದ್ಧನೌಕೆಗಳನ್ನು ಕಳುಹಿಸಿ ಈ ಮಾರ್ಗವನ್ನು ಮುಕ್ತವಾಗಿಡಲು ಸಹಕರಿಸಬೇಕು ಎಂದು ಕರೆ ನೀಡಿದ್ದಾರೆ. ಈ ಉದ್ವಿಗ್ನತೆಯ ನಡುವೆಯೂ ಭಾರತವು ತನ್ನ ರಾಜತಾಂತ್ರಿಕ ಚತುರತೆಯಿಂದ ಇಂಧನ ಪೂರೈಕೆಯನ್ನು ಸುಗಮಗೊಳಿಸುತ್ತಿರುವುದು ಆಶಾದಾಯಕ ಬೆಳವಣಿಗೆಯಾಗಿದೆ.