191 ವಿದ್ಯಾರ್ಥಿಗಳಿರುವ ಸರ್ಕಾರಿ ಶಾಲೆಯ ಕಂಬ ಕುಸಿತ: ಚಾವಣಿ ಬೀಳದಂತೆ ಬೆಂಚ್, ಮೇಜುಗಳನ್ನು ಆಧಾರವಾಗಿಟ್ಟ ಸಿಬ್ಬಂದಿ!

ಪಟ್ನಾ, ಅ. 4: ಸರ್ಕಾರಿ ಶಾಲೆಯೊಂದರ (Government school) ಕಂಬ ಕುಸಿದು ಬಿದ್ದಿದ್ದು, ಅದರ ಜಾಗದಲ್ಲಿ ಬೆಂಚ್‌ಗಳು ಮತ್ತು ಡೆಸ್ಕ್‌ಗಳನ್ನು ಪೇರಿಸಿಟ್ಟು ಚಾವಣಿಗೆ ಆಧಾರ ನೀಡಲಾಗಿದೆ. ಬಿಹಾರದ ದರ್ಭಂಗಾ ಜಿಲ್ಲೆಯ ಅಲಿನಗರ ಬ್ಲಾಕ್‌ನಲ್ಲಿರುವ ಕೀರತ್‌ಪುರ ಪ್ರಾಥಮಿಕ ಶಾಲೆಯಲ್ಲಿ ಈ ರೀತಿಯ ದುಸ್ಥಿತಿ ಕಂಡು ಬಂದಿದೆ. ಇದರಿಂದ ಶಾಲೆಯಲ್ಲಿರುವ 191 ಮಕ್ಕಳ ಸುರಕ್ಷತೆ ಬಗ್ಗೆ ಆತಂಕ ಮೂಡಿದೆ.

ಒಂದರಿಂದ ಐದನೇ ತರಗತಿಗಳನ್ನು ಹೊಂದಿರುವ ಸರ್ಕಾರಿ ಪ್ರಾಥಮಿಕ ಶಾಲೆಯಲ್ಲಿ ಕೇವಲ ಎರಡು ಕೊಠಡಿಗಳಿವೆ. ಒಂದು ಕೋಣೆಯಲ್ಲಿ ಪ್ರಸ್ತುತ ಕಚೇರಿ ಪೀಠೋಪಕರಣಗಳಿದ್ದು, ನಿಯಮಿತ ತರಗತಿಗಳು ನಡೆಸಲು ಸ್ಥಳಾವಕಾಶವಿಲ್ಲ. ಕಟ್ಟಡವು ಕಳಪೆ ಸ್ಥಿತಿಯಲ್ಲಿರುವುದರಿಂದ, ಈಗ ಪಾಠಗಳನ್ನು ಬಯಲು ಪ್ರದೇಶಗಳಲ್ಲಿ ಮತ್ತು ಆವರಣದಲ್ಲಿ ಅಡುಗೆಮನೆಯ ಶೆಡ್‌ನಲ್ಲಿ ನಡೆಸಲಾಗುತ್ತಿದೆ.

ಎರಡು ಕೋಣೆಗಳ ಈ ಕಟ್ಟಡವನ್ನು 1983ರಲ್ಲಿ ಕೇಂದ್ರ ಸರ್ಕಾರದ 'ಆಪರೇಷನ್ ಬ್ಲ್ಯಾಕ್‌ ಬೋರ್ಡ್' ಯೋಜನೆಯಡಿ ನಿರ್ಮಿಸಲಾಯಿತು. ನಾಲ್ಕು ದಶಕಗಳಿಗೂ ಹೆಚ್ಚು ಸಮಯದಿಂದ ಮಳೆಗಾಲದಲ್ಲಿ ಅದರ ಚಾವಣಿ ಸೋರುತ್ತಿದೆ. ಕಟ್ಟಡ ಶಿಥಿಲಾವಸ್ಥೆಯಲ್ಲಿದ್ದು, ಪ್ಲಾಸ್ಟರ್ ಉದುರಿಹೋಗಿದೆ. ಮೂರ್ನಾಲ್ಕು ತಿಂಗಳ ಹಿಂದೆ ಒಂದು ಕಂಬ ಕುಸಿದ ನಂತರ ಪರಿಸ್ಥಿತಿ ತುಂಬಾ ಹದಗೆಟ್ಟಿತು. ಶಾಲಾ ಅಧಿಕಾರಿಗಳ ಪ್ರಕಾರ, ಕಂಬದ ಬದಲು, ಚಾವಣಿಗೆ ಆಧಾರವಾಗಿ ಬೆಂಚು, ಮೇಜುಮತ್ತು ಇಟ್ಟಿಗೆಗಳನ್ನು ಇರಿಸಲಾಗಿದೆ.

‘ನಮ್ಮ ಶಾಲೆ’ ಡಿಜಿಟಲ್ ವೇದಿಕೆಗೆ ಧ್ರುವ್ ಜತ್ತಿ ಚಾಲನೆ

ಕಟ್ಟಡದ ಸ್ಥಿತಿಯ ಬಗ್ಗೆ ಶಿಕ್ಷಣ ಇಲಾಖೆ ಮತ್ತು ಇತರ ಅಧಿಕಾರಿಗಳಿಗೆ ಹಲವು ಬಾರಿ ತಿಳಿಸಲಾಗಿದೆ ಎಂದು ಸಹಾಯಕ ಶಿಕ್ಷಕ ಪವನ್ ಕುಮಾರ್ ಚೌಧರಿ ಹೇಳಿದ್ದಾರೆ. ತಕ್ಷಣ ಕ್ರಮ ಕೈಗೊಳ್ಳುವಂತೆ ಕೋರಿ ಗ್ರಾಮಸ್ಥರು ಪ್ರತಿಭಟನೆಗಳನ್ನು ಸಹ ನಡೆಸಿದ್ದಾರೆ. ಮಕ್ಕಳ ಸುರಕ್ಷತೆಯ ಬಗ್ಗೆ ಪದೇ ಪದೆ ಪ್ರಸ್ತಾವಿಸಲಾಗಿದೆ ಎಂದು ಗ್ರಾಮಸ್ಥ ಪರ್ಜಿತ್ ಯಾದವ್ ತಿಳಿಸಿದ್ದಾರೆ. ಶೀಘ್ರದಲ್ಲೇ ಹೊಸ ಕಟ್ಟಡ ನಿರ್ಮಿಸದಿದ್ದರೆ, ಆಂದೋಲನವನ್ನು ಪ್ರಾರಂಭಿಸುವುದಾಗಿ ಎಚ್ಚರಿಸಿದ್ದಾರೆ.

ಶಾಲೆಯು ಬ್ಲಾಕ್‌ನಿಂದ ಜಿಲ್ಲಾ ಮಟ್ಟದ ಅಧಿಕಾರಿಗಳಿಗೆ ಸುಮಾರು ಐದರಿಂದ ಆರು ಬಾರಿ ಮಾಹಿತಿ ನೀಡಿದೆ. ಲಿಖಿತ ಸಂವಹನಗಳನ್ನು ಸಹ ಕಳುಹಿಸಲಾಗಿದೆ. ಆವರಣವನ್ನು ಪರಿಶೀಲಿಸಿರುವ ಅಧಿಕಾರಿಗಳು, ಇಲ್ಲಿಯವರೆಗೆ ಯಾವುದೇ ಶಾಶ್ವತ ದುರಸ್ತಿ ಅಥವಾ ಬದಲಿ ಕಟ್ಟಡವನ್ನು ಒದಗಿಸಿಲ್ಲ ಎಂದು ಮುಖ್ಯೋಪಾಧ್ಯಾಯ ರಾಜೇಂದ್ರ ಕುಮಾರ್ ಹೇಳಿದ್ದಾರೆ.

ಹಳೆಯ ಕಟ್ಟಡವನ್ನು ಅಸುರಕ್ಷಿತವೆಂದು ಘೋಷಿಸಲಾಗಿದ್ದು, ಅಲ್ಲಿ ಯಾವುದೇ ಬೋಧನಾ ಚಟುವಟಿಕೆಗಳನ್ನು ನಡೆಸಲಾಗುತ್ತಿಲ್ಲ. ಹೊಸ ಕಟ್ಟಡ ನಿರ್ಮಾಣಕ್ಕೆ ಈಗಾಗಲೇ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ದರ್ಭಂಗಾ ಜಿಲ್ಲಾ ಶಿಕ್ಷಣ ಅಧಿಕಾರಿ ವಿದ್ಯಾನಂದ್ ಠಾಕೂರ್ ವಿವರಿಸಿದ್ದಾರೆ.

ಪ್ರಸ್ತುತ ಇರುವ ಎರಡು ಕೋಣೆಗಳ ಕಟ್ಟಡವನ್ನು 1983ರಲ್ಲಿ ಆಪರೇಷನ್ ಬ್ಲ್ಯಾಕ್‌ ಬೋರ್ಡ್ ಅಡಿಯಲ್ಲಿ ಈ ಗ್ರಾಮದಲ್ಲಿ ಮೊದಲ ಪ್ರಾಥಮಿಕ ಶಾಲೆಯಾಗಿ ನಿರ್ಮಿಸಲಾಯಿತು. ಇದೀಗ, ಶಾಲಾ ಆವರಣದಲ್ಲಿರುವ ಅಡುಗೆಮನೆಯ ಶೆಡ್‌ನಲ್ಲಿ ಬೋಧನೆಯನ್ನು ನಡೆಸಲಾಗುತ್ತಿದೆ ಎಂದು ಠಾಕೂರ್ ಮಾಹಿತಿ ನೀಡಿದ್ದಾರೆ.