ಶಾಲಾ ಮಕ್ಕಳೊಂದಿಗೆ ರಕ್ಷಾಬಂಧನ ಆಚರಿಸಿದ ಪ್ರಧಾನಿ ಮೋದಿ: ಹೈ-ಫೈವ್, ನಗು, ಸಂಭ್ರಮದ ಕ್ಷಣ ವೈರಲ್‌

ನವದೆಹಲಿ, ಆ. 28: ಪ್ರಧಾನಿ ನರೇಂದ್ರ ಮೋದಿ (PM Modi) ಶುಕ್ರವಾರ ನವದೆಹಲಿಯ 7, ಲೋಕ ಕಲ್ಯಾಣ ಮಾರ್ಗದಲ್ಲಿರುವ ತಮ್ಮ ಅಧಿಕೃತ ನಿವಾಸದಲ್ಲಿ ಶಾಲಾ ಬಾಲಕಿಯರು ಹಾಗೂ ವಿದ್ಯಾರ್ಥಿಗಳೊಂದಿಗೆ ರಕ್ಷಾಬಂಧನ (Raksha Bandhan) ಆಚರಿಸಿದರು. ಈ ಸಂದರ್ಭದ ಹಲವು ಫೋಟೊ ಹಾಗೂ ವಿಡಿಯೊ ತುಣುಕುಗಳನ್ನು ಪ್ರಧಾನಿ ಮೋದಿ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದು, “ಇಂದಿನ ರಕ್ಷಾಬಂಧನ ಸಂಭ್ರಮದಲ್ಲಿ ಹೈ-ಫೈವ್, ನಗು ಮತ್ತು ಇನ್ನಷ್ಟು” ಎಂದು ಶೀರ್ಷಿಕೆ ನೀಡಿದ್ದಾರೆ.

ಆಚರಣೆಯಲ್ಲಿ ಶಾಲಾ ಸಮವಸ್ತ್ರದಲ್ಲಿದ್ದ ವಿದ್ಯಾರ್ಥಿಗಳು ಹಾಗೂ ಎನ್‌ಸಿಸಿ ಕ್ಯಾಡೆಟ್ ಉಡುಪಿನಲ್ಲಿದ್ದ ಕೆಲ ವಿದ್ಯಾರ್ಥಿನಿಯರು ಪ್ರಧಾನಿ ಅವರ ಕೈಗೆ ರಾಖಿ ಕಟ್ಟಿರುವುದು ಕಂಡು ಬಂದಿದೆ. ಪ್ರಧಾನಿ ಮೋದಿ ವಿದ್ಯಾರ್ಥಿಗಳೊಂದಿಗೆ ಆತ್ಮೀಯವಾಗಿ ಕುಳಿತು ಮಾತನಾಡಿ, ಅವರೊಂದಿಗೆ ನಗು-ನಲಿವು ಹಂಚಿಕೊಂಡರು.

ರಕ್ಷಾ ಬಂಧನ ಆಚರಿಸಿದ ಮೋದಿ:

ವಿದ್ಯಾರ್ಥಿಗಳೊಂದಿಗೆ ಹಲವು ಬಾರಿ ಹೈ-ಫೈವ್ ಮಾಡುತ್ತಾ, ಅವರೊಂದಿಗೆ ಮುಕ್ತವಾಗಿ ಸಂವಾದ ನಡೆಸಿದ ಪ್ರಧಾನಿ ಮೋದಿ ಅವರ ಸರಳ ಹಾಗೂ ಅನೌಪಚಾರಿಕ ನಡೆ ಗಮನ ಸೆಳೆಯಿತು. ರಕ್ಷಾಬಂಧನದ ಸಾಂಪ್ರದಾಯಿಕ ಪೂಜಾ ಸಾಮಗ್ರಿಗಳೂ ಕಾರ್ಯಕ್ರಮದಲ್ಲಿ ಕಂಡುಬಂದವು.

ಜೆನ್‌ ಝೀ ಸಂಪರ್ಕಕ್ಕೆ ಹೊಸ ರೀತಿಯ ಪ್ರಯತ್ನವೇ?

ಶಾಲಾ ವಿದ್ಯಾರ್ಥಿಗಳೊಂದಿಗೆ ಪ್ರಧಾನಿ ಮೋದಿ ಅವರ ಈ ಅನೌಪಚಾರಿಕ ಸಂವಾದವು ಯುವಜನತೆ, ಅದರಲ್ಲೂ ಜೆನ್‌ ಝೀ ಸಮುದಾಯದೊಂದಿಗೆ ಸಂಪರ್ಕ ಸಾಧಿಸುವ ಮತ್ತೊಂದು ಮಾರ್ಗವಾಗಿರಬಹುದು ಎಂಬ ಚರ್ಚೆ ಆರಂಭವಾಗಿದೆ. ಹೈ-ಫೈವ್, ನಗು ಹಾಗೂ ಸಾಮಾಜಿಕ ಜಾಲತಾಣಗಳಿಗೆ ಸೂಕ್ತವಾಗಿರುವ ಆತ್ಮೀಯ ದೃಶ್ಯಗಳ ಮೂಲಕ ರಾಜಕೀಯ ಸಂವಹನವು ಸಾಂಪ್ರದಾಯಿಕ ಸಭೆ-ಸಮಾರಂಭಗಳ ವ್ಯಾಪ್ತಿಯನ್ನು ಮೀರಿ ಹೆಚ್ಚು ಅನೌಪಚಾರಿಕವಾಗುತ್ತಿರುವುದಕ್ಕೆ ಈ ಆಚರಣೆಯೇ ಸಾಕ್ಷಿ.

ಪ್ರಜ್ವಲ್ ವಿದ್ಯಾನಿಕೇತನ್ ಶಾಲೆಯಲ್ಲಿ ರಕ್ಷಾ ಬಂಧನ ಹಬ್ವದ ಸಂಭ್ರಮ

ಪ್ರಧಾನಿ ಮೋದಿ ಅವರ ಪೋಸ್ಟ್‌ನಲ್ಲಿ ಈ ರಕ್ಷಾಬಂಧನ ಕಾರ್ಯಕ್ರಮವನ್ನು ಜೆನ್‌ ಝೀ ಔಟ್‌ರೀಚ್ ಎಂದು ಅಧಿಕೃತವಾಗಿ ಉಲ್ಲೇಖಿಸಲಾಗಿಲ್ಲ. ಶಾಲಾ ವಿದ್ಯಾರ್ಥಿಗಳ ಉಪಸ್ಥಿತಿ ಹಾಗೂ ಕಾರ್ಯಕ್ರಮವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಸ್ತುತಪಡಿಸಿದ ರೀತಿ ಮಾತ್ರ ಯುವಜನತೆಯೊಂದಿಗೆ ಹೆಚ್ಚು ಆತ್ಮೀಯ ಸಂಪರ್ಕ ಬೆಳೆಸುವ ಪ್ರಯತ್ನದಂತೆ ಕಾಣುತ್ತಿದೆ.

ಇದಕ್ಕೂ ಮುನ್ನ ಪ್ರಧಾನಿ ಮೋದಿ ದೇಶದ ಜನತೆಗೆ ರಕ್ಷಾಬಂಧನದ ಶುಭಾಶಯ ಕೋರಿದ್ದರು. ಪ್ರೀತಿ, ವಾತ್ಸಲ್ಯ ಹಾಗೂ ಪರಸ್ಪರ ನಂಬಿಕೆಯ ಬಂಧವನ್ನು ಪ್ರತಿನಿಧಿಸುವ ಈ ಹಬ್ಬವು ಸದಾ ಅಚಲವಾಗಿರಲಿ ಎಂದು ಅವರು ಆಶಿಸಿದ್ದರು.

ಸಹೋದರ-ಸಹೋದರಿಯರ ನಡುವಿನ ಪ್ರೀತಿಯ ಬಂಧವನ್ನು ಆಚರಿಸುವ ರಕ್ಷಾಬಂಧನವನ್ನು ಶ್ರಾವಣ ಮಾಸದ ಹುಣ್ಣಿಮೆಯಂದು ಆಚರಿಸಲಾಗುತ್ತದೆ. ಈ ದಿನ ಸಹೋದರಿಯರು ಸಹೋದರರ ಕೈಗೆ ರಾಖಿ ಕಟ್ಟಿ, ಸಹೋದರರು ಉಡುಗೊರೆ ನೀಡಿ ಅವರ ರಕ್ಷಣೆ ಹಾಗೂ ಬೆಂಬಲದ ಭರವಸೆ ನೀಡುವುದು ಸಂಪ್ರದಾಯ.