ಭಾರತದ ಜನಗಣತಿ 2027 ಸುರಕ್ಷತಾ ಮಾರ್ಗದರ್ಶಿ: ವಂಚನೆ ತಪ್ಪಿಸಲು ಈ ಟಿಪ್ಸ್ ಫಾಲೋ ಮಾಡಿ
2026ರ ಜನಗಣತಿ ಹಿನ್ನೆಲೆಯಲ್ಲಿ ವಂಚಕರು ನಕಲಿ ಕರೆಗಳು, SMS ಹಾಗೂ ಮನೆ ಭೇಟಿ ಮೂಲಕ ಸಾರ್ವಜನಿಕರ ಬ್ಯಾಂಕ್ ಮತ್ತು ವೈಯಕ್ತಿಕ ಮಾಹಿತಿಯನ್ನು ಕದಿಯಲು ಪ್ರಯತ್ನಿಸುತ್ತಿದ್ದಾರೆ. ಅಧಿಕೃತ ಗಣತಿದಾರರು OTP, ಪಾಸ್ವರ್ಡ್, ಬ್ಯಾಂಕ್ ವಿವರಗಳು ಅಥವಾ ಹಣವನ್ನು ಕೇಳುವುದಿಲ್ಲ. ಅಪರಿಚಿತ ಲಿಂಕ್ಗಳು ಮತ್ತು ಆ್ಯಪ್ಗಳಿಂದ ದೂರವಿರ. ಯಾವುದೇ ಸಂಶಯಾಸ್ಪದ ಚಟುವಟಿಕೆ ಕಂಡುಬಂದರೆ ತಕ್ಷಣ ಅಧಿಕಾರಿಗಳಿಗೆ ತಿಳಿಸಿ.
ಸಾಂದರ್ಭಿಕ ಚಿತ್ರ -
ಬೆಂಗಳೂರು, ಏ. 17: 2026-27ರ ಭಾರತದ ಜನಗಣತಿಗೆ (India Census 2027) ನಡೆಯುತ್ತಿರುವ ಬೆನ್ನಲ್ಲೇ ಸಾರ್ವಜನಿಕರ ಸುರಕ್ಷತೆ ಬಗ್ಗೆಯೂ ಪ್ರಶ್ನೆಗಳು ಏಳತೊಡಗಿವೆ. ಸಾರ್ವಜನಿಕರ ವೈಯಕ್ತಿಕ ಮತ್ತು ಹಣಕಾಸಿನ ಮಾಹಿತಿಯನ್ನು ಕದಿಯಲು ವಂಚಕರು ʼಜನಗಣತಿʼ ಹೆಸರನ್ನು ಬಳಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಎಚ್ಚರಿಕೆಯಿಂದ ಇರುವುದು ಅತಿ ಅಗತ್ಯ. ಜನಗಣತಿ ಕಾರ್ಯಕರ್ತರಂತೆ ನಟಿಸಿ ಮನೆಗೆ ಬರುವ ಅಥವಾ ನಕಲಿ ಸಂದೇಶಗಳ ಮೂಲಕ ವಂಚಿಸುವ ಸಾಧ್ಯತೆಗಳ ಬಗ್ಗೆ ತಜ್ಞರು ಎಚ್ಚರಿಸಿದ್ದಾರೆ.
ನಿಜವಾದ ಜನಗಣತಿ ಅಧಿಕಾರಿಗಳು ಈ ಕೆಳಗಿನವುಗಳನ್ನು ಕೇಳುವುದಿಲ್ಲ:
ಬ್ಯಾಂಕ್ ವಿವರಗಳು: ಪೂರ್ಣ ಖಾತೆ ಸಂಖ್ಯೆಗಳು, ಕ್ರೆಡಿಟ್ ಅಥವಾ ಡೆಬಿಟ್ ಕಾರ್ಡ್ (credit or debit card) ಮಾಹಿತಿ, UPI ಪಿನ್ ಅಥವಾ OTP ಗಳನ್ನು ಕೇಳುವುದಿಲ್ಲ. ಇಂತಹ ಬೇಡಿಕೆ ಇಟ್ಟರೆ ಅದನ್ನು ನಂಬಬೇಡಿ.
ಆಧಾರ್ ಮತ್ತು ಪ್ಯಾನ್ ಪ್ರತಿಗಳು: ಜನಗಣತಿ ಪ್ರಕ್ರಿಯೆಯಲ್ಲಿ ನಿಮ್ಮ ಗುರುತಿನ ಚೀಟಿಗಳ ಫೋಟೊ ಕಾಪಿ ಅಥವಾ ಜೆರಾಕ್ಸ್ ಪ್ರತಿಗಳನ್ನು ಸಂಗ್ರಹಿಸುವುದಿಲ್ಲ.
ಹಣ ಅಥವಾ ದೇಣಿಗೆ: ಜನಗಣತಿಯಲ್ಲಿ ಹೆಸರು ನೋಂದಾಯಿಸಲು ಅಥವಾ ಪರಿಶೀಲಿಸಲು ಯಾವುದೇ ಶುಲ್ಕವಿರುವುದಿಲ್ಲ.
ಪಾಸ್ವರ್ಡ್ಗಳು: ಯಾವುದೇ ಪಾಸ್ವರ್ಡ್ ಅಥವಾ OTPಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬೇಡಿ.
ಮನೆಯೊಳಗೆ ಪ್ರವೇಶ: ಜನಗಣತಿ ಕಾರ್ಯಕರ್ತರು ನಿಮ್ಮ ಮನೆಯೊಳಗೆ ಪ್ರವೇಶಿಸಲು ಪಟ್ಟು ಹಿಡಿಯುವುದಿಲ್ಲ.
ಆ್ಯಪ್ಗಳ ಡೌನ್ಲೋಡ್: ಯಾವುದೇ ಲಿಂಕ್ ಕ್ಲಿಕ್ ಮಾಡಲು ಅಥವಾ ಅಪರಿಚಿತ ಆ್ಯಪ್ಗಳನ್ನು ಇನ್ಸ್ಟಾಲ್ ಮಾಡಲು ಅವರು ಕೇಳುವುದಿಲ್ಲ.
ಹಿಂದಿಗೆ ಗ್ರೇಡ್ ಬೇಡ, ಅಂಕ ಕೊಡಿ: ರಾಜ್ಯ ಸರ್ಕಾರಕ್ಕೆ ಹೈಕೋರ್ಟ್ ನಿರ್ದೇಶನ
ವಂಚಕರು ಕಾರ್ಯನಿರ್ವಹಿಸುವ ರೀತಿ:
ನಕಲಿ ಮನೆ ಭೇಟಿ: ಸರ್ಕಾರಿ ಅಧಿಕಾರಿಗಳಂತೆ ನಟಿಸಿ ದಾಖಲೆಗಳನ್ನು ಅಥವಾ ಪರಿಶೀಲನಾ ಶುಲ್ಕ ಕೇಳಬಹುದು.
ಫಿಶಿಂಗ್ ವೆಬ್ಸೈಟ್: ಅಧಿಕೃತ ವೆಬ್ಸೈಟ್ನಂತೆ ಕಾಣುವ ನಕಲಿ ಡೊಮೇನ್ಗಳ ಮೂಲಕ ಮಾಹಿತಿ ಕದಿಯಬಹುದು.
SMS ಮತ್ತು ಕರೆಗಳು: ಅಧಿಕೃತವಾಗಿ ನೀವು ವಿನಂತಿಸದ ಹೊರತು ಯಾವುದೇ ಭದ್ರತಾ ಕೋಡ್ ಅಥವಾ ಲಾಗಿನ್ ವಿವರಗಳನ್ನು ಕೇಳುವ ಸಂದೇಶಗಳು ಬರುವುದಿಲ್ಲ.
ಸ್ವಯಂ-ಗಣತಿ (Self-Enumeration) ಪ್ರಕ್ರಿಯೆ:
ಮೊದಲ ಬಾರಿಗೆ ಸಾರ್ವಜನಿಕರಿಗೆ ಆನ್ಲೈನ್ ಮೂಲಕ ವಿವರಗಳನ್ನು ತುಂಬಲು ಅವಕಾಶ ನೀಡಲಾಗಿದೆ.
ಸಾರ್ವಜನಿಕರು se.census.gov.in ಪೋರ್ಟಲ್ಗೆ ಭೇಟಿ ನೀಡಿ ತಮ್ಮ ಮೊಬೈಲ್ ಸಂಖ್ಯೆ ಬಳಸಿ ಲಾಗಿನ್ ಆಗಬಹುದು. ಮಾಹಿತಿ ಸಲ್ಲಿಕೆಯಾದ ನಂತರ ಯುನಿಕ್ ಸೆಲ್ಫ್-ಎನ್ಯೂಮರೇಶನ್ ಐಡಿ (SE ID) ಜನರೇಟ್ ಆಗುತ್ತದೆ. ಈ ಐಡಿಯನ್ನು ನಂತರ ಮನೆಗೆ ಭೇಟಿ ನೀಡುವ ಗಣತಿದಾರರಿಗೆ ತೋರಿಸಿ ಧೃಡೀಕರಿಸಬಹುದು.
ಜನಗಣತಿಯ ಮೊದಲ ಹಂತವಾದ 'ಮನೆ ಪಟ್ಟಿ ಮತ್ತು ವಸತಿ ಗಣತಿ' (HLO) ಪ್ರಕ್ರಿಯೆಯು 2026ರ ಏಪ್ರಿಲ್ 1ರಿಂದ ಸೆಪ್ಟೆಂಬರ್ 30ರವರೆಗೆ ನಡೆಯಲಿದೆ. ಈ ಬಗ್ಗೆ ನಿಮ್ಮ ಕುಟುಂಬದ ಸದಸ್ಯರಿಗೆ, ವಿಶೇಷವಾಗಿ ಹಿರಿಯರಿಗೆ ಅರಿವು ಮೂಡಿಸಿ. ಯಾವುದೇ ಸಂಶಯಾಸ್ಪದ ಕರೆ ಅಥವಾ ಸಂದೇಶ ಬಂದಲ್ಲಿ ತಕ್ಷಣ ಸ್ಥಳೀಯ ಅಧಿಕಾರಿಗಳಿಗೆ ವರದಿ ಮಾಡಿ.