ಮೋದಿ ಟಾಸ್ಕ್ ಎಫೆಕ್ಟ್: ಇನ್‌ಸ್ಟಾಗ್ರಾಂನಲ್ಲಿ ಸಕ್ರಿಯರಾದ 97% ಕೇಂದ್ರ ಸಚಿವರು

ನವದೆಹಲಿ, ಆ.26: ಪ್ರಧಾನಿ ನರೇಂದ್ರ ಮೋದಿ (PM Modi) ಅವರು ಒಂದು ತಿಂಗಳ ಹಿಂದೆ ತಮ್ಮ ಕೇಂದ್ರ ಸಚಿವರಿಗೆ ಮಹತ್ವದ ಸಲಹೆಯೊಂದನ್ನು ನೀಡಿದ್ದರು. ಇನ್‌ಸ್ಟಾಗ್ರಾಂನಲ್ಲಿ ಹೆಚ್ಚು ಸಕ್ರಿಯರಾಗಿ, ಶಾರ್ಟ್ ರೀಲ್ಸ್‌ಗಳನ್ನು ಮಾಡಿ ಯುವಜನರೊಂದಿಗೆ ನೇರವಾಗಿ ಸಂಪರ್ಕ ಸಾಧಿಸುವಂತೆ ಸೂಚಿಸಿದ್ದರು. ಸಾಂಪ್ರದಾಯಿಕ ಹಾಗೂ ಹೆಚ್ಚು ಪಠ್ಯಾಧಾರಿತ ಸಾಮಾಜಿಕ ಜಾಲತಾಣಗಳ ಮಿತಿಯನ್ನು ಮೀರಿ, ಯುವ ಪೀಳಿಗೆಯ ಭಾಷೆಯಲ್ಲಿ ಸಂವಹನ ನಡೆಸಬೇಕು ಎಂಬುದು ಪ್ರಧಾನಿಯ ಉದ್ದೇಶವಾಗಿತ್ತು.

ಜುಲೈ 24ರಂದು ನೀಡಿದ್ದ ಈ ಸಲಹೆಗೆ ಇದೀಗ ಒಂದು ತಿಂಗಳು ಪೂರ್ಣಗೊಂಡಿದ್ದು, ಸಚಿವರು ಅದನ್ನು ಎಷ್ಟರ ಮಟ್ಟಿಗೆ ಪಾಲಿಸಿದ್ದಾರೆ ಎಂಬುದರ ಅಂಕಿ-ಅಂಶಗಳು ಹೊರಬಿದ್ದಿವೆ. ಮೇ 1ರಿಂದ ಆಗಸ್ಟ್ 15ರವರೆಗೆ ಇನ್‌ಸ್ಟಾಗ್ರಾಂ, ಎಕ್ಸ್‌ ಹಾಗೂ ಫೇಸ್‌ಬುಕ್‌ನಲ್ಲಿ ಮೋದಿ ಸರ್ಕಾರದ ಸಾಮಾಜಿಕ ಜಾಲತಾಣಗಳ ಕಾರ್ಯಕ್ಷಮತೆಯನ್ನು ಇತ್ತೀಚೆಗೆ ನಡೆದ ಸಂಪುಟ ಸಭೆಯಲ್ಲಿ ಪರಿಶೀಲಿಸಲಾಗಿದೆ. ಧರ್ಮೇಂದ್ರ ಪ್ರಧಾನ ಅವರ ರಾಜೀನಾಮೆಯ ಬಳಿಕ ಕೇಂದ್ರ ಸಂಪುಟದ ಗಾತ್ರ 30ರಿಂದ 29ಕ್ಕೆ ಇಳಿದಿದೆ.

ಮೋದಿ ಮಾದರಿ: ತಿಂಗಳಲ್ಲಿ 31 ಲಕ್ಷ ಹೊಸ ಫಾಲೋವರ್ಸ್

ಕೇಂದ್ರ ಸಚಿವರಿಗೆ ಸಲಹೆ ನೀಡುವುದಷ್ಟೇ ಅಲ್ಲದೆ ಪ್ರಧಾನಿ ಮೋದಿ ಸ್ವತಃ ಅದನ್ನು ಅನುಸರಿಸಿದ್ದಾರೆ. 10.65 ಕೋಟಿಗೂ ಅಧಿಕ ಇನ್‌ಸ್ಟಾಗ್ರಾಂ ಫಾಲೋವರ್ಸ್ ಹೊಂದಿರುವ ನರೇಂದ್ರ ಮೋದಿ ವಿಶ್ವದಲ್ಲೇ ಅತಿ ಹೆಚ್ಚು ಫಾಲೋವರ್ಸ್ ಹೊಂದಿರುವ ವಿಶ್ವ ನಾಯಕರಾಗಿದ್ದಾರೆ.

ಜುಲೈ 23ರಿಂದ 31ರವರೆಗೆ ಪ್ರಧಾನಿ ಮೋದಿ ಐದು ಸೆಲ್ಫಿ ಮಾದರಿಯ ಇನ್‌ಸ್ಟಾಗ್ರಾಂ ರೀಲ್ಸ್‌ಗಳನ್ನು ಹಂಚಿಕೊಂಡಿದ್ದರು. ಈ ರೀಲ್ಸ್‌ಗಳು ಒಟ್ಟಾಗಿ 120 ಕೋಟಿಗೂ ಅಧಿಕ ವೀಕ್ಷಣೆಗಳನ್ನು ಪಡೆದಿವೆ ಎನ್ನಲಾಗಿದೆ.

ಕಳೆದ ಒಂದು ತಿಂಗಳಲ್ಲಿ ಮೋದಿ ಸರಾಸರಿ ದಿನಕ್ಕೆ ಒಂದು ಪೋಸ್ಟ್‌ನಂತೆ ಒಟ್ಟು 31 ಪೋಸ್ಟ್‌ಗಳನ್ನು ಪ್ರಕಟಿಸಿದ್ದು, ಸುಮಾರು 31 ಲಕ್ಷ ಹೊಸ ಫಾಲೋವರ್ಸ್‌ಗಳನ್ನು ಗಳಿಸಿದ್ದಾರೆ. ಈ ಸಂಖ್ಯೆ ಸಂಪುಟದ ಉಳಿದ ಎಲ್ಲ ಸಚಿವರು ಒಟ್ಟಾಗಿ ಗಳಿಸಿದ ಹೊಸ ಫಾಲೋವರ್ಸ್‌ಗಳಿಗಿಂತಲೂ ಹೆಚ್ಚಾಗಿದೆ.

97% ಸಚಿವರು ಇನ್‌ಸ್ಟಾಗ್ರಾಂನಲ್ಲಿ ಸಕ್ರಿಯ

ಪ್ರಧಾನಿಯ ಸಲಹೆ ಸಚಿವರ ಮೇಲೆ ಪರಿಣಾಮ ಬೀರಿರುವುದು ಅಂಕಿ-ಅಂಶಗಳಿಂದ ಸ್ಪಷ್ಟವಾಗುತ್ತದೆ. 29 ಸಚಿವರ ಪೈಕಿ 28 ಮಂದಿ ತಮ್ಮ ಇನ್‌ಸ್ಟಾಗ್ರಾಂ ಚಟುವಟಿಕೆಯನ್ನು ಹೆಚ್ಚಿಸಿದ್ದಾರೆ. ಜೆಡಿಯು ನಾಯಕ ರಾಜೀವ್ ರಂಜನ್ ಸಿಂಗ್ (ಲಲನ್ ಸಿಂಗ್) ಮಾತ್ರ ತಮ್ಮ ಚಟುವಟಿಕೆಯಲ್ಲಿ ಹೆಚ್ಚಳ ತೋರಿಸಿಲ್ಲ.

ಜುಲೈ 13ರಿಂದ 26ರವರೆಗೆ ಸಚಿವರು ಒಟ್ಟಾಗಿ 797 ಪೋಸ್ಟ್‌ಗಳನ್ನು ಹಂಚಿಕೊಂಡಿದ್ದರೆ, ಆಗಸ್ಟ್ 11ರಿಂದ 24ರ ಅವಧಿಯಲ್ಲಿ ಈ ಸಂಖ್ಯೆ 1,179ಕ್ಕೆ ಏರಿಕೆಯಾಗಿದೆ. ಅಂದರೆ ಪೋಸ್ಟ್‌ಗಳ ಸಂಖ್ಯೆಯಲ್ಲಿ ಶೇ.48ರಷ್ಟು ಹೆಚ್ಚಳವಾಗಿದೆ. ಕಳೆದ ಒಂದು ತಿಂಗಳಲ್ಲಿ ಪ್ರತಿ ಸಚಿವರು ಸರಾಸರಿ 82 ಪೋಸ್ಟ್‌ಗಳನ್ನು ಪ್ರಕಟಿಸಿದ್ದು, ಸುಮಾರು 80,993 ಹೊಸ ಫಾಲೋವರ್ಸ್‌ಗಳನ್ನು ಗಳಿಸಿದ್ದಾರೆ.

ಫಾಲೋವರ್ಸ್ ಗಳಿಕೆಯಲ್ಲಿ ಶಾ, ಜೈಶಂಕರ್ ಮುನ್ನಡೆ

ಹೊಸ ಫಾಲೋವರ್ಸ್ ಗಳಿಸುವ ವಿಚಾರದಲ್ಲಿ ಕೇಂದ್ರ ಸಚಿವರ ನಡುವೆ ಭಾರಿ ವ್ಯತ್ಯಾಸ ಕಂಡುಬಂದಿದೆ. ಗೃಹ ಸಚಿವ ಅಮಿತ್ ಶಾ ಹಾಗೂ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅತ್ಯಧಿಕ ಫಾಲೋವರ್ಸ್‌ಗಳನ್ನು ಗಳಿಸಿದವರ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿದ್ದಾರೆ.ಜುಲೈನಲ್ಲಿ ರಾಜೀನಾಮೆ ನೀಡಿದ ಧರ್ಮೇಂದ್ರ ಪ್ರಧಾನ ಕೂಡ ಈ ಅವಧಿಯಲ್ಲಿ 1.26 ಲಕ್ಷಕ್ಕೂ ಅಧಿಕ ಹೊಸ ಫಾಲೋವರ್ಸ್‌ಗಳನ್ನು ಗಳಿಸಿದ್ದಾರೆ ಎನ್ನಲಾಗಿದೆ.

ಇನ್ನೊಂದೆಡೆ, ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರ ಫಾಲೋವರ್ಸ್ ಸಂಖ್ಯೆ ಇಳಿಕೆಯಾಗಿದೆ. ಅವರ ಫಾಲೋವರ್ಸ್ ಸಂಖ್ಯೆ 66.91 ಲಕ್ಷದಿಂದ 66.65 ಲಕ್ಷಕ್ಕೆ ಇಳಿದಿದ್ದು, ಸುಮಾರು 26,080 ಫಾಲೋವರ್ಸ್‌ಗಳ ನಷ್ಟವಾಗಿದೆ. ಈ ಅವಧಿಯಲ್ಲಿ ಫಾಲೋವರ್ಸ್ ಕಳೆದುಕೊಂಡ ಏಕೈಕ ಕೇಂದ್ರ ಸಚಿವ ಗಡ್ಕರಿ ಎಂದು ಅಂಕಿ-ಅಂಶಗಳು ಸೂಚಿಸುತ್ತವೆ.

ಹೆಚ್ಚು ಪೋಸ್ಟ್ ಮಾಡಿದರೆ ಹೆಚ್ಚು ಫಾಲೋವರ್ಸ್ ಬರುತ್ತಾರೆಯೇ?

ಇನ್‌ಸ್ಟಾಗ್ರಾಂನಲ್ಲಿ ಹೆಚ್ಚು ಪೋಸ್ಟ್ ಮಾಡಿದರೆ ಹೆಚ್ಚು ಫಾಲೋವರ್ಸ್ ಗಳಿಸಬಹುದು ಎಂಬುದು ಸಾಮಾನ್ಯ ಅಭಿಪ್ರಾಯ. ಆದರೆ ಕೇಂದ್ರ ಸಚಿವರ ಅಂಕಿ-ಅಂಶಗಳು ಇದಕ್ಕೆ ವಿಭಿನ್ನ ಚಿತ್ರಣ ನೀಡುತ್ತವೆ. ಅಮಿತ್ ಶಾ 14 ಹಾಗೂ ಎಸ್. ಜೈಶಂಕರ್ 59 ಪೋಸ್ಟ್‌ಗಳನ್ನು ಪ್ರಕಟಿಸಿದ್ದರೂ ಹೆಚ್ಚಿನ ಸಂಖ್ಯೆಯ ಹೊಸ ಫಾಲೋವರ್ಸ್‌ಗಳನ್ನು ಗಳಿಸಿದ್ದಾರೆ. ಮತ್ತೊಂದೆಡೆ, ನಿತಿನ್ ಗಡ್ಕರಿ ಇವರಿಗಿಂತ ಹಲವು ಪಟ್ಟು ಹೆಚ್ಚು ಪೋಸ್ಟ್‌ಗಳನ್ನು ಮಾಡಿದ್ದರೂ ಫಾಲೋವರ್ಸ್ ಕಳೆದುಕೊಂಡಿದ್ದಾರೆ.

ಇದರಿಂದ ಕೇವಲ ಪೋಸ್ಟ್‌ಗಳ ಸಂಖ್ಯೆಯಷ್ಟೇ ಅಲ್ಲದೆ, ನಾಯಕನ ಸಾರ್ವಜನಿಕ ಇಮೇಜ್, ಕಂಟೆಂಟ್‌ನ ಗುಣಮಟ್ಟ, ವಿಷಯದ ಪ್ರಸ್ತುತತೆ ಹಾಗೂ ಪ್ರಮುಖ ರಾಷ್ಟ್ರೀಯ ಘಟನೆಗಳೂ ಫಾಲೋವರ್ಸ್‌ಗಳ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ ಎಂಬುದು ಗೋಚರಿಸುತ್ತದೆ.

ಯುವಕರನ್ನು ತಲುಪಲು ಹೊಸ ಮಾರ್ಗಗಳನ್ನು ಕಂಡುಕೊಳ್ಳಿ: ನಿತಿನ್ ನಬಿನ್ ತಂಡಕ್ಕೆ ಪ್ರಧಾನಿ ನರೇಂದ್ರ ಮೋದಿ ಸಲಹೆ

360ಕ್ಕೂ ಹೆಚ್ಚು ಪೋಸ್ಟ್‌ಗಳು, ಆದರೂ ಕಡಿಮೆ ಫಾಲೋವರ್ಸ್

ಕೇಂದ್ರ ಸಚಿವರಾದ ಡಾ. ವೀರೇಂದ್ರ ಕುಮಾರ್ ಹಾಗೂ ಗಿರಿರಾಜ್ ಸಿಂಗ್ ಸಾಮಾಜಿಕ ಜಾಲತಾಣಗಳಲ್ಲಿ ಅತ್ಯಂತ ಸಕ್ರಿಯರಾಗಿದ್ದಾರೆ. ಇಬ್ಬರೂ ಒಂದು ತಿಂಗಳಲ್ಲಿ 360ಕ್ಕೂ ಹೆಚ್ಚು ಪೋಸ್ಟ್‌ಗಳನ್ನು ಪ್ರಕಟಿಸಿದ್ದಾರೆ. ಆದರೆ ಅವರ ಫಾಲೋವರ್ಸ್ ಸಂಖ್ಯೆ ಮತ್ತು ಹೊಸ ಫಾಲೋವರ್ಸ್ ಗಳಿಕೆ ಮಾತ್ರ ಕಡಿಮೆಯಾಗಿದೆ. ವೀರೇಂದ್ರ ಕುಮಾರ್ ಸುಮಾರು 23,413 ಹೊಸ ಫಾಲೋವರ್ಸ್ ಗಳಿಸಿದ್ದರೆ, ಗಿರಿರಾಜ್ ಸಿಂಗ್ ಸುಮಾರು 7,158 ಹೊಸ ಫಾಲೋವರ್ಸ್‌ಗಳನ್ನು ಪಡೆದಿದ್ದಾರೆ ಎನ್ನಲಾಗಿದೆ.

ರೀಲ್ಸ್‌ಗಳತ್ತ ಸಚಿವರ ಗಮನ

ಪ್ರಧಾನಿ ಮೋದಿ ಅವರ ಸಲಹೆಯ ಬಳಿಕ ಕೇಂದ್ರ ಸಚಿವರು ಇನ್‌ಸ್ಟಾಗ್ರಾಂ ರೀಲ್ಸ್‌ಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿರುವುದು ಕಂಡುಬಂದಿದೆ. ಹೊಸದಾಗಿ ಕೇಂದ್ರ ಶಿಕ್ಷಣ ಸಚಿವರಾಗಿ ನೇಮಕಗೊಂಡ ಪ್ರಲ್ಹಾದ್ ಜೋಶಿ ಕೂಡ ಪ್ರಮುಖ ವಿಚಾರಗಳಲ್ಲಿ ಸರ್ಕಾರದ ನಿಲುವನ್ನು ಜನರಿಗೆ ಸುಲಭವಾಗಿ ಅರ್ಥವಾಗುವ ರೀತಿಯಲ್ಲಿ ವಿವರಿಸಲು ಇನ್‌ಸ್ಟಾಗ್ರಾಂ ರೀಲ್ಸ್‌ಗಳನ್ನು ಬಳಸುತ್ತಿದ್ದಾರೆ.

2029ರ ಚುನಾವಣೆ ಮೇಲೆ ಕಣ್ಣು?

ಸಚಿವರು ಇನ್‌ಸ್ಟಾಗ್ರಾಂನಲ್ಲಿ ಹೆಚ್ಚು ಸಕ್ರಿಯರಾಗುತ್ತಿರುವುದರ ಹಿಂದೆ 2029ರ ಲೋಕಸಭಾ ಚುನಾವಣೆ ಕೂಡ ಪ್ರಮುಖ ಕಾರಣವಾಗಿರಬಹುದು ಎಂಬ ವಿಶ್ಲೇಷಣೆ ಕೇಳಿಬರುತ್ತಿದೆ.

ನೆಪೋಲಿಯನ್‌ಕ್ಯಾಟ್‌ ಡೇಟಾ ಪ್ರಕಾರ, ಭಾರತದಲ್ಲಿ ಸುಮಾರು 55 ಕೋಟಿ ಇನ್‌ಸ್ಟಾಗ್ರಾಂ ಬಳಕೆದಾರರಿದ್ದು, ಇದು ವಿಶ್ವದಲ್ಲೇ ಅತಿ ದೊಡ್ಡ ಬಳಕೆದಾರರ ನೆಲೆಯಾಗಿದೆ. ಇವರಲ್ಲಿ ಸುಮಾರು ಶೇ.70ರಿಂದ 76ರಷ್ಟು ಮಂದಿ 35 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಎನ್ನಲಾಗಿದೆ.

2029ರ ವೇಳೆಗೆ 1997ರಿಂದ 2012ರ ನಡುವೆ ಜನಿಸಿದ ಜನರನ್ನೊಳಗೊಂಡ ಜನರೇಷನ್ Z ದೇಶದ ಪ್ರಮುಖ ವಯಸ್ಕ ಮತದಾರರ ಗುಂಪಾಗುವ ಸಾಧ್ಯತೆಯಿದೆ. 2026ರ ಜನಸಂಖ್ಯಾ ಅಂದಾಜುಗಳ ಪ್ರಕಾರ, 18ರಿಂದ 29 ವರ್ಷದವರು ದೇಶದ ಅರ್ಹ ಮತದಾರರ ಪೈಕಿ ಸುಮಾರು ಶೇ.29.2ರಷ್ಟಿರಬಹುದು. ಅಂದರೆ ಸುಮಾರು ಮೂವರಲ್ಲಿ ಒಬ್ಬ ಮತದಾರ ಯುವಜನತೆಗೆ ಸೇರಿರಲಿದ್ದಾರೆ.

ಸುದ್ದಿಗೂ ಇನ್‌ಸ್ಟಾಗ್ರಾಂ ಪ್ರಮುಖ ವೇದಿಕೆ

ಇನ್‌ಸ್ಟಾಗ್ರಾಂ ಕೇವಲ ಮನರಂಜನೆ ಅಥವಾ ಫೋಟೋ-ವೀಡಿಯೋ ಹಂಚಿಕೆಯ ವೇದಿಕೆಯಾಗಿರದೆ, ಸುದ್ದಿಯ ಪ್ರಮುಖ ಮೂಲವಾಗಿಯೂ ಬೆಳೆಯುತ್ತಿದೆ. 2025ರ ವರದಿಯೊಂದರ ಪ್ರಕಾರ, ಭಾರತದಲ್ಲಿ ಶೇ.37ರಷ್ಟು ಮಂದಿ ಸುದ್ದಿಗಾಗಿ ಇನ್‌ಸ್ಟಾಗ್ರಾಂ ಬಳಸುತ್ತಿದ್ದಾರೆ ಎನ್ನಲಾಗಿದೆ. ಯುವಜನರಲ್ಲಿ ಶಾರ್ಟ್‌ಫಾರ್ಮ್ ವೀಡಿಯೋ ಹಾಗೂ ದೃಶ್ಯಾಧಾರಿತ ಕಂಟೆಂಟ್‌ಗೆ ಹೆಚ್ಚುತ್ತಿರುವ ಆದ್ಯತೆಯ ಹಿನ್ನೆಲೆಯಲ್ಲಿ ರಾಜಕೀಯ ನಾಯಕರೂ ತಮ್ಮ ಸಂವಹನದ ಶೈಲಿಯನ್ನು ಬದಲಿಸಿಕೊಳ್ಳುತ್ತಿದ್ದಾರೆ.

ಹೀಗಾಗಿ ಕೇಂದ್ರ ಸಚಿವರಿಗೆ ಇನ್‌ಸ್ಟಾಗ್ರಾಂನಲ್ಲಿ ಸಕ್ರಿಯರಾಗುವಂತೆ ನೀಡಿರುವ ಸೂಚನೆ ಕೇವಲ ಲೈಕ್ಸ್‌ ಹಾಗೂ ಫಾಲೋವರ್ಸ್‌ಗಳಿಗಾಗಿ ಅಲ್ಲ. ಭವಿಷ್ಯದ ಯುವ ಮತದಾರರೊಂದಿಗೆ ನೇರ ಸಂಪರ್ಕ ಬೆಳೆಸುವ ರಾಜಕೀಯ ಸಂವಹನದ ಹೊಸ ತಂತ್ರದ ಭಾಗವಾಗಿಯೂ ಇದನ್ನು ನೋಡಲಾಗುತ್ತಿದೆ.