ಫಲ ನೀಡಿದ ಅಂತಿಮ ಕ್ಷಣದ ಬದಲಾವಣೆ; ಭಾರತಕ್ಕೆ ಶೂಟಿಂಗ್‌ನಲ್ಲಿ ಮೊದಲ ಚಿನ್ನ ಗೆದ್ದ ಕಮಲ್‌ಜೀತ್-ಸುರುಚಿ ಜೋಡಿ

ನಗೋಯಾ, ಸೆ.25: ಏಷ್ಯನ್ ಕ್ರೀಡಾಕೂಟದ 10 ಮೀಟರ್ ಏರ್ ಪಿಸ್ತೂಲ್ ವಿಭಾಗದಲ್ಲಿ ಭಾರತಕ್ಕೆ ಅಂತಿಮವಾಗಿ ಸಂಭ್ರಮದ ಕ್ಷಣವೊಂದು ಲಭಿಸಿತು. ಈ ಯಶಸ್ಸು ಕೊನೆಯ ಕ್ಷಣದಲ್ಲಿ ರಚನೆಯಾದ ಜೋಡಿಯಿಂದ ದಕ್ಕಿತು. ಶುಕ್ರವಾರ ನಡೆದ 10 ಮೀಟರ್ ಏರ್ ಪಿಸ್ತೂಲ್ ಮಿಶ್ರ ತಂಡದ ಸ್ಪರ್ಧೆಯಲ್ಲಿ ಸುರುಚಿ ಸಿಂಗ್ ಮತ್ತು ಕಮಲ್‌ಜೀತ್ ಜೋಡಿಯು ಅತ್ಯುತ್ತಮ ಪ್ರದರ್ಶನ ನೀಡಿ ಚಿನ್ನದ ಪದಕವನ್ನು ಗೆದ್ದುಕೊಂಡಿತು. ಮಾತ್ರವಲ್ಲದೆ ಹೊಸ ಏಷ್ಯನ್ ಕ್ರೀಡಾಕೂಟದ ದಾಖಲೆಯನ್ನೂ ನಿರ್ಮಿಸಿತು.

ಹಾಲಿ ಆವೃತ್ತಿಯ ಏಷ್ಯನ್ ಕ್ರೀಡಾಕೂಟದ ಶೂಟಿಂಗ್ ವಿಭಾಗದಲ್ಲಿ ಭಾರತಕ್ಕೆ ಲಭಿಸಿದ ಮೊದಲ ಚಿನ್ನದ ಪದಕ ಇದಾಗಿದ್ದು, ಮಹಿಳಾ ಕ್ರಿಕೆಟ್ ತಂಡವು ಭಾರತದ ಚಿನ್ನದ ಪದಕದ ಖಾತೆಯನ್ನು ತೆರೆದ ನಂತರ ದೇಶಕ್ಕೆ ಸಿಕ್ಕ ಒಟ್ಟಾರೆ ಎರಡನೇ ಚಿನ್ನದ ಪದಕ ಇದಾಗಿದೆ.

ಹಿಂದಿನ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತವು ಪುರುಷರ 10 ಮೀಟರ್ ಏರ್ ಪಿಸ್ತೂಲ್ ತಂಡದ ವಿಭಾಗದಲ್ಲಿ ಚಿನ್ನ ಹಾಗೂ ಮಹಿಳೆಯರ ವೈಯಕ್ತಿಕ ವಿಭಾಗದಲ್ಲಿ ಚಿನ್ನ ಮತ್ತು ಬೆಳ್ಳಿ ಪದಕಗಳನ್ನು ಗೆದ್ದಿತ್ತು. ಆದರೆ ಈ ಬಾರಿ ಈ ವಿಭಾಗದಲ್ಲಿ ಯಾವುದೇ ಪದಕ ಲಭಿಸಿರಲಿಲ್ಲ. ಒಲಿಂಪಿಕ್ ಪದಕ ವಿಜೇತೆ ಮತ್ತು ಭಾರತದ ಪ್ರಮುಖ ಭರವಸೆಯ ಆಟಗಾರ್ತಿಯರಲ್ಲಿ ಒಬ್ಬರಾದ ಮನು ಭಾಕರ್ ಕೂಡ, ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್ ಫೈನಲ್ ತಲುಪಿದರೂ ಪದಕ ಗೆಲ್ಲುವಲ್ಲಿ ವಿಫಲರಾಗಿದ್ದರು. ಅಲ್ಲದೆ, ಪುರುಷರ ಮತ್ತು ಮಹಿಳೆಯರ ತಂಡದ ವಿಭಾಗಗಳಲ್ಲೂ ಭಾರತಕ್ಕೆ ಪದಕಗಳನ್ನು ಗೆಲ್ಲಲು ಸಾಧ್ಯವಾಗಿರಲಿಲ್ಲ.

ಏಷ್ಯನ್ ಗೇಮ್ಸ್ ಮಿಶ್ರ ಡಬಲ್ಸ್‌ ಟಿಟಿ, ಸ್ಕ್ವಾಶ್‌ನಲ್ಲಿ ಸೆಮಿ ಪ್ರವೇಶ; ಭಾರತಕ್ಕೆ 2 ಪದಕ ಖಾತ್ರಿ

ಆದ್ದರಿಂದ, 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯ ಅಭಿಯಾನದಲ್ಲಿ ಏನನ್ನಾದರೂ ಸಾಧಿಸಲು 'ಮಿಶ್ರ ತಂಡದ ಸ್ಪರ್ಧೆ'ಯು ಅಂತಿಮ ಅವಕಾಶವಾಗಿತ್ತು. ಈ ಸ್ಪರ್ಧೆಗೆ ಮುನ್ನ, 'ನ್ಯಾಷನಲ್ ರೈಫಲ್ ಅಸೋಸಿಯೇಷನ್ ​​ಆಫ್ ಇಂಡಿಯಾ ಒಂದು ದಿಟ್ಟ ನಿರ್ಧಾರವನ್ನು ಕೈಗೊಂಡು, ಸುರುಚಿ ಅವರೊಂದಿಗೆ ಜೋಡಿಯಾಗಿದ್ದ ಪುರುಷ ಶೂಟರ್ ಅನ್ನು ಬದಲಾಯಿಸಿತು.

ಆರಂಭದಲ್ಲಿ ಸುರುಚಿ ಅವರೊಂದಿಗೆ ಕೇದಾರ್‌ಲಿಂಗ್ ಬಾಲಕೃಷ್ಣ ಉಚಗನ್ವೆ ಅವರ ಹೆಸರನ್ನು ಪರಿಗಣಿಸಲಾಗಿತ್ತು. ಆದರೆ ಗುರುವಾರ ನಡೆದ ಪುರುಷರ ಅರ್ಹತಾ ಸುತ್ತಿನಲ್ಲಿ ಕಮಲ್‌ಜೀತ್ 580 ಅಂಕಗಳೊಂದಿಗೆ ಭಾರತದ ಪರ ಅತ್ಯುತ್ತಮ ಪ್ರದರ್ಶನ ನೀಡಿ ಒಂಬತ್ತನೇ ಸ್ಥಾನ ಪಡೆದರು (ವೈಯಕ್ತಿಕ ಫೈನಲ್ ಪ್ರವೇಶಿಸಲು ಅವರು ಕೇವಲ ಒಂದು ಅಂಕದ ಅಂತರದಿಂದ ವಂಚಿತರಾದರು). ಈ ಹಿನ್ನೆಲೆಯಲ್ಲಿ, ಅವರನ್ನು ಮಿಶ್ರ ತಂಡದ ಜೋಡಣೆಗೆ ಸೇರಿಸಿಕೊಳ್ಳಲು ಎನ್‌ಆರ್‌ಎಐ ನಿರ್ಧರಿಸಿತು.

ಕಮಲ್‌ಜೀತ್ ಮತ್ತು ಸುರುಚಿ ಅವರು 29 'ಇನ್ನರ್ 10'ಗಳ (ಗುರಿಯ ಅತ್ಯಂತ ಕೇಂದ್ರ ಭಾಗಕ್ಕೆ ಹೊಡೆದ ಶಾಟ್‌ಗಳು) ಸಹಿತ ಒಟ್ಟು 587 ಅಂಕಗಳೊಂದಿಗೆ ಅರ್ಹತಾ ಸುತ್ತಿನಲ್ಲಿ ಅಗ್ರಸ್ಥಾನ ಪಡೆಯುವ ಮೂಲಕ ಪದಕದ ಸುತ್ತಿಗೆ ಭರ್ಜರಿ ಪ್ರವೇಶ ಪಡೆದರು. ಅವರು ಆರಂಭಿಕ ಸರಣಿಯಲ್ಲಿ 196 ಅಂಕಗಳನ್ನು ಗಳಿಸಿದರು ಮತ್ತು ನಂತರದ ಸರಣಿಯಲ್ಲಿ 195 ಅಂಕಗಳನ್ನು ಸೇರಿಸುವ ಮೂಲಕ, ಇನ್ನೂ 20 ಶಾಟ್‌ಗಳು ಬಾಕಿ ಇರುವಂತೆಯೇ ಒಟ್ಟು 391 ಅಂಕಗಳನ್ನು ತಲುಪಿದರು. ಮೂರನೇ ಸರಣಿಯಲ್ಲಿ ಗಳಿಸಿದ ಮತ್ತೊಂದು 196 ಅಂಕಗಳು ಅವರನ್ನು 587 ಅಂಕಗಳ ಗಡಿ ತಲುಪುವಂತೆ ಮಾಡಿದ್ದಲ್ಲದೆ, ಫೈನಲ್‌ನಲ್ಲಿ ತಮ್ಮ ಸ್ಥಾನವನ್ನು ಖಚಿತಪಡಿಸಿಕೊಳ್ಳಲು ನೆರವಾದವು.

ಭಾರತೀಯ ಜೋಡಿಯು 484.6 ಅಂಕಗಳೊಂದಿಗೆ ಸ್ಪರ್ಧೆಯನ್ನು ಮುಕ್ತಾಯಗೊಳಿಸಿತು. 478.0 ಅಂಕಗಳೊಂದಿಗೆ ಕೊರಿಯಾ ಬೆಳ್ಳಿ ಪದಕ, ಇರಾನ್ 415.8 ಅಂಕಗಳೊಂದಿಗೆ ಕಂಚಿನ ಪದಕವನ್ನು ಪಡೆಯಿತು.