ಭಾರತ ಟೆಸ್ಟ್‌ ತಂಡದಲ್ಲಿ ಸ್ಥಾನ ನೀಡದ ಬಗ್ಗೆ ಚೇತೇಶ್ವರ್‌ ಪೂಜಾರ ಪ್ರತಿಕ್ರಿಯೆ!

ನವದೆಹಲಿ: ಭಾರತದ ಟೆಸ್ಟ್‌ ಸ್ಪೆಷಲಿಸ್ಟ್‌ ಚೇತೇಶ್ವರ್‌ ಪೂಜಾರ (Cheteshwara Pujara) ಆಗಸ್ಟ್‌ 24 ರಂದು ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದಾರೆ. ಸತತವಾಗಿ ಎರಡು ವರ್ಷಗಳ ಕಾಲ ಭಾರತ ತಂಡದಿಂದ (Indian Cricket Team) ದೂರ ಉಳಿದಿದ್ದ ಪೂಜಾರ, ಎಲ್ಲಾ ಸ್ವರೂಪದ ಕ್ರಿಕೆಟ್‌ಗೂ ಗುಡ್‌ ಬೈ ಹೇಳಿದ್ದಾರೆ. ಅವರ ನಿವೃತ್ತಿಗೆ ಎರಡು ಪ್ರಮುಖ ಕಾರಣಗಳನ್ನು ಕ್ರಿಕೆಟ್‌ ಅಭಿಮಾನಿಗಳು ನೀಡುತ್ತಿದ್ದಾರೆ. ಅದೇನೆಂದರೆ ಭಾರತ ತಂಡದಲ್ಲಿ ಸತತ ಅವಕಾಶ ವಂಚಿತರಾದ ಪೂಜಾರಗೆ ಇತ್ತ ದೇಶಿ ತಂಡದಲ್ಲೂ ಸ್ಥಾನ ದೊರಕಲಿಲ್ಲ. ಇನ್ನೂ ವಾಸ್ತವವಾಗಿ ನೋಡುವುದಾದರೆ ದಲೀಪ್‌ ಟ್ರೋಫಿಗೂ ಪೂಜಾರ ಅವರನ್ನು ಕಡೆಗಣಿಸಲಾಗಿತ್ತು. ಅದಕ್ಕಾಗಿಯೇ ಅವರು ಬೇಸರದಿಂದ ನಿವೃತ್ತಿ ಘೋಷಿಸಿರಬೇಕೆಂಬ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ.

2013ರಲ್ಲಿ ಆಸ್ಟ್ರೇಲಿಯಾ ವಿರುದ್ದ ಟೆಸ್ಟ್‌ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಪೂಜಾರ, ಟೀಮ್‌ ಇಂಡಿಯಾ ಪರ ಇದುವರೆಗೆ 103 ಟೆಸ್ಟ್‌ ಪಂದ್ಯಗಳನ್ನಾಡಿದ್ದು, 43.60ರ ಸರಾಸರಿಯಲ್ಲಿ 19 ಶತಕಗಳು ಮತ್ತು 35 ಅರ್ಧಶತಕಗಳನ್ನೊಳಗೊಂಡಂತೆ 7195 ರನ್ ಬಾರಿಸಿದ್ದಾರೆ. ಕೊನೆಯದಾಗಿ ಪೂಜಾರ ಆಸ್ಟ್ರೇಲಿಯಾ ವಿರುದ್ದ 2023ರ ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ನಲ್ಲಿ ಆಡಿದ್ದರು. ಈ ಪಂದ್ಯದಲ್ಲಿ ಭಾರತ ತಂಡ ಸೋಲು ಅನುಭವಿಸಿತ್ತು. ಈ ಪಂದ್ಯದಲ್ಲಿ ಪೂಜಾರ ಪ್ರಥಮ ಇನಿಂಗ್ಸ್‌ನಲ್ಲಿ 14 ರನ್ ಮತ್ತು ದ್ವಿತೀಯ ಇನಿಂಗ್ಸ್‌ನಲ್ಲಿ 27 ರನ್‌ ಕಲೆಹಾಕಿದ್ದರು. ಇದಾದ ಬಳಿಕ ಅವರಿಗೆ ಮತ್ತೆ ಭಾರತ ತಂಡದಲ್ಲಿ ಸ್ಥಾನ ಒಲಿಯಲಿಲ್ಲ.

ʻದಿ ವೈಟ್‌ ವಾಕರ್‌ʼ: ಚೇತೇಶ್ವರ್‌ ಪೂಜಾರ ಬಗ್ಗೆ ಅಚ್ಚರಿ ಹೇಳಿಕೆ ನೀಡಿದ ಆರ್‌ ಅಶ್ವಿನ್‌!

ಕೌಂಟಿ ಚಾಂಪಿಯನ್‌ಶಿಪ್ ಅವಧಿಯನ್ನು ಒಳಗೊಂಡ 2024-25ರ ರೆಡ್-ಬಾಲ್ ಋತುವಿನಲ್ಲಿ 1,000 ರನ್‌ಗಳ ಹತ್ತಿರ ಗಳಿಸಿದ್ದರೂ, ಪೂಜಾರ ಅವರನ್ನು ಬಾರ್ಡರ್-ಗವಾಸ್ಕರ್ ಟ್ರೋಫಿಯಲ್ಲಿ ಕಡೆಗಣಿಸಲಾಯಿತು. ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ನಿವೃತ್ತಿಯ ನಂತರ ಭಾರತ ತಂಡ, ಶುಭಮನ್‌ ಗಿಲ್‌ ನಾಯಕತ್ವದ ಹೊಸ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಆವೃತ್ತಿಯನ್ನು ಆರಂಭಿಸಿದೆ. ಇಂತಹ ಆಟಗಾರನ ನಿವೃತ್ತಿಗೆ ಇನ್ನೂ ಕ್ರಿಕೆಟ್‌ ವಲಯದಲ್ಲಿ ಪರ ವಿರೋಧದ ಚರ್ಚೆಗಳು ಜೋರಾಗಿ ಹರಿದಾಡುತ್ತಿವೆ. ಇದರ ನಡುವೆ ಸ್ವತಃ ಪೂಜಾರ ಅವರೇ ತನ್ನ ವೃತ್ತಿಬದುಕನ್ನು ನೆನೆದು ನನಗೆ ನನ್ನ ಪ್ರದರ್ಶನದ ಬಗ್ಗೆ ತೃಪ್ತಿ ಇದ್ದು, ಯಾವುದೇ ವಿಷಾದವಿಲ್ಲ. ತಂಡದ ಪರ ನೂರು ಟೆಸ್ಟ್‌ ಪಂದ್ಯಗಳನ್ನಾಡಿರುವುದು ಹೆಮ್ಮೆಯ ವಿಷಯ ಎಂದಿದ್ದಾರೆ.

ಚೇತೇಶ್ವರ ಪೂಜಾರ ಹೇಳಿದ್ದೇನು?

ಇಂದು ( ಆಗಸ್ಟ್‌ 26) ಖಾಸಗಿ ಸುದ್ದಿ ಮಾಧ್ಯಮವೊಂದರ ಜೊತೆಗೆ ವಿಶೇಷ ಸಂವಾದದಲ್ಲಿ ಭಾಗವಹಿಸಿ ಮಾತನಾಡಿದ ಪೂಜಾರ, " 100 ಕ್ಕೂ ಹೆಚ್ಚು ಟೆಸ್ಟ್ ಪಂದ್ಯಗಳಲ್ಲಿ ಭಾರತವನ್ನು ಪ್ರತಿನಿಧಿಸುವ ಅದೃಷ್ಟ ನನ್ನದಾಗಿತ್ತು ಮತ್ತು ಕಳೆದ ಎರಡು ವರ್ಷಗಳಲ್ಲಿ ಏನಾಗಲಿಲ್ಲ ಎಂಬುದರ ಬಗ್ಗೆ ಚಿಂತಿಸುವುದಕ್ಕಿಂತ ನನಗೆ ಅದರ ಬಗ್ಗೆ ಹೆಮ್ಮೆ ಇದೆ. ನಾನು ಹಿಂತಿರುಗಿ ನೋಡಿದಾಗ, ನನಗೆ ತೃಪ್ತಿ ಅನಿಸುತ್ತದೆ. ನಾನು ದೇಶಕ್ಕಾಗಿ ನನ್ನ ಅತ್ಯುತ್ತಮ ಪ್ರದರ್ಶನ ನೀಡಿದ್ದೇನೆ ಮತ್ತು ಕೆಲವು ಉತ್ತಮ ನೆನಪುಗಳನ್ನು ಸೃಷ್ಟಿಸಿದ್ದೇನೆ ಎಂದು ನನಗೆ ತಿಳಿದಿದೆ," ಎಂದು ಹೇಳಿದ್ದಾರೆ.

ಚೇತೇಶ್ವರ್‌ ಪೂಜಾರಗೂ ಮುನ್ನ ವಿದಾಯದ ಪಂದ್ಯವಾಡದ ಟಾಪ್‌ ಐವರು ಬ್ಯಾಟರ್ಸ್‌!

ಆದಾಗ್ಯೂ, ದೇಶಿ ಕ್ರಿಕೆಟ್‌ನಲ್ಲಿ ಕಳೆದ ಎರಡು ವರ್ಷಗಳಲ್ಲಿ ಭಾರತ ಪರ ಆಡಲು ತಾನು ಇನ್ನೂ ಹಂಬಲಿಸುತ್ತಿದ್ದೇನೆ ಎಂದು ಪೂಜಾರ ಒಪ್ಪಿಕೊಂಡಿದ್ದಾರೆ. ಆದರೆ ಮುಂದಿನ ಪೀಳಿಗೆಯ ಸೌರಾಷ್ಟ್ರ ಕ್ರಿಕೆಟಿಗರಿಗೆ ಅವಕಾಶ ನೀಡುವ ಸಲುವಾಗಿ ಅಂತಿಮವಾಗಿ ನಿವೃತ್ತಿ ಹೊಂದಲು ನಿರ್ಧರಿಸಿದ್ದೇನೆಂದು ತಿಳಿಸಿದ್ದಾರೆ.

"ಒಬ್ಬ ಕ್ರೀಡಾಪಟುವಿನ ಜೀವನದಲ್ಲಿ ಮುಂದುವರಿಯಬೇಕಾದ ಸಮಯ ಯಾವಾಗಲೂ ಬರುತ್ತದೆ ಎಂದು ನಾನು ಭಾವಿಸುತ್ತೇನೆ. ನನಗೆ, ಈ ಆಲೋಚನೆ ಬಂದಿದ್ದು ಸುಮಾರು ಒಂದು ವಾರದ ಹಿಂದೆ, ನಾನು ನನ್ನ ಕುಟುಂಬ ಸದಸ್ಯರೊಂದಿಗೆ ಮಾತನಾಡಲು ಪ್ರಾರಂಭಿಸಿದಾಗ. ನಾನು ಈ ಋತುವಿಗೆ ನನ್ನ ತಯಾರಿಯನ್ನು ಪ್ರಾರಂಭಿಸುವ ಹಂತದಲ್ಲಿದ್ದೆ, ಆದರೆ ನಾನು ಮುಂದುವರಿಯಬೇಕೇ ಎಂದು ನನಗೆ ಖಚಿತವಿರಲಿಲ್ಲ. ಹಾಗಾಗಿ ನಾನು ನನ್ನ ಕುಟುಂಬ, ನನ್ನ ಸ್ನೇಹಿತರು, ಕೆಲವು ತಂಡದ ಸದಸ್ಯರು ಮತ್ತು ನಾನು ಯಾವಾಗಲೂ ಸಮಾಲೋಚಿಸುವ ಹಿರಿಯ ಕ್ರಿಕೆಟಿಗರೊಂದಿಗೆ ಮಾತನಾಡಿದೆ. ಇದು ಮುಂದುವರಿಯಲು ಸರಿಯಾದ ಸಮಯ ಎಂದು ನಾನು ಭಾವಿಸಿದೆ," ಎಂದು ಹೇಳಿದ್ದಾರೆ.

ವಿರಾಟ್‌ ಕೊಹ್ಲಿ ಟೆಸ್ಟ್‌ ಕ್ರಿಕೆಟ್‌ಗೆ ವಿದಾಯ ಹೇಳಲು ಕಾರಣ ತಿಳಿಸಿದ ಮನೋಜ್‌ ತಿವಾರಿ!

"ಇದು ಯುವ ಆಟಗಾರನಿಗೆ ಸೌರಾಷ್ಟ್ರ ತಂಡದ ಭಾಗವಾಗಲು, ಅನುಭವವನ್ನು ಪಡೆಯಲು ಮತ್ತು ಅವರ ವೃತ್ತಿಜೀವನದಲ್ಲಿ ಪ್ರಗತಿ ಸಾಧಿಸಲು ಆ ಪಾತ್ರಕ್ಕೆ ಹೆಜ್ಜೆ ಹಾಕಲು ಅವಕಾಶವನ್ನು ನೀಡುತ್ತದೆ. ಕಳೆದ ಎರಡು ವರ್ಷಗಳಿಂದ ನಾನು ಭಾರತೀಯ ತಂಡದ ಭಾಗವಾಗಿಲ್ಲದ ಕಾರಣ, ನನ್ನ ನಿರ್ಧಾರವು ಹೆಚ್ಚಾಗಿ ಕಿರಿಯ ಆಟಗಾರರಿಗೆ ಆ ಅವಕಾಶವನ್ನು ಒದಗಿಸುವುದರ ಬಗ್ಗೆಯಾಗಿತ್ತು,ʼ ಎಂದು ಚೇತೇಶ್ವರ್‌ ಪೂಜಾರ ತಿಳಿಸಿದ್ದಾರೆ.

"ಖಂಡಿತ, ಅಂತಿಮ ಗುರಿ ಮತ್ತೆ ದೇಶಕ್ಕಾಗಿ ಆಡುವುದಾಗಿತ್ತು. ಮತ್ತು ಅದು ಆಗಿದ್ದರೆ ನಾನು ತುಂಬಾ ಸಂತೋಷಪಡುತ್ತಿದ್ದೆ. ಆದರೆ ಅದು ಆಗದಿದ್ದರೂ ಸಹ, ನಾನು ನನ್ನ ಕ್ರಿಕೆಟ್ ಅನ್ನು ಆನಂದಿಸಲು ಬಯಸಿದ್ದೆ. ಒಂದು ನಿರ್ದಿಷ್ಟ ಹಂತದ ನಂತರ, ನೀವು ಹಲವು ವರ್ಷಗಳ ಕಾಲ ನಿಜವಾಗಿಯೂ ಕಷ್ಟಪಟ್ಟು ಕೆಲಸ ಮಾಡಿ ಆಟಗಾರನಾಗಿ ಪ್ರಬುದ್ಧರಾದ ನಂತರ, ನೀವು ಕಡಿಮೆ ಒತ್ತಡ ಮತ್ತು ಹೆಚ್ಚು ಸಂತೋಷದಿಂದ ಆಡಲು ಬಯಸುತ್ತೀರಿ. ಪ್ರಥಮ ದರ್ಜೆ ಕ್ರಿಕೆಟ್ ನಿಮಗೆ ಆ ಜಾಗವನ್ನು ನೀಡುತ್ತದೆ - ನೀವು ತಂಡದ ಸದಸ್ಯರು ಮತ್ತು ಸಹೋದ್ಯೋಗಿಗಳೊಂದಿಗೆ ಇರುತ್ತೀರಿ, ನೀವು ಒಂದೇ ರೀತಿಯ ಮಾನಸಿಕ ಹೊರೆಯನ್ನು ಅನುಭವಿಸುವುದಿಲ್ಲ, ಮತ್ತು ನೀವು ಮೈದಾನದಲ್ಲಿ ಮತ್ತು ಹೊರಗೆ ನಿಮ್ಮನ್ನು ಆನಂದಿಸಬಹುದು. ಕಳೆದ ಎರಡು ವರ್ಷಗಳಲ್ಲಿ ನಾನು ಅದನ್ನೇ ಮಾಡಿದ್ದೇನೆ ಮತ್ತು ನನಗೆ ಯಾವುದೇ ವಿಷಾದವಿಲ್ಲ" ಎಂದು ಅವರು ಹೇಳಿದರು.