ಯಶವರ್ಧನ್‌ ಚೌಹಾಣ್‌ ಶತಕ, ಆಸ್ಟ್ರೇಲಿಯಾ ವಿರುದ್ಧ ಭಾರತ ಅಂಡರ್‌-19ತಂಡಕ್ಕೆ ಭರ್ಜರಿ ಜಯ!

ನವದೆಹಲಿ: ಯಶವರ್ಧನ್ ಚೌಹಾಣ್ (Yashbardhan Chauhan) ಅವರ ಭರ್ಜರಿ (122 ರನ್) ಶತಕ ಹಾಗೂ ವಿಕೆ ವಿನೀತ್ (VK Vineeth) ಅವರ (87 ರನ್‌) ಅರ್ಧಶತಕದ ನೆರವಿನಿಂದ ಭಾರತ ಅಂಡರ್‌-19 ತಂಡ, ಆಸ್ಟ್ರೇಲಿಯಾ ಅಂಡರ್‌-19 ವಿರುದ್ಧದ ಎರಡನೇ ಯೂತ್ ಏಕದಿನ ಪಂದ್ಯದಲ್ಲಿ 103 ರನ್‌ಗಳ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಮೂರು ಪಂದ್ಯಗಳ ಸರಣಿಯಲ್ಲಿ ಭಾರತ 2-0 ಅಜೇಯ ಮುನ್ನಡೆ ಸಾಧಿಸಿದೆ.

ಸೋಮವಾರ ನಿರಂಜನ್ ಶಾ ಕ್ರೀಡಾಂಗಣದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಭಾರತ ಅಂಡರ್‌-19 ತಂಡ, ಯಶವರ್ಧನ್ ಚೌಹಾಣ್ ಅವರ ಶತಕ, ವಿನೀತ್ ಅವರ ಅರ್ಧಶತಕ ಹಾಗೂ ಆರ್ಯವೀರ್ ಸೆಹ್ವಾಗ್ (47) ಮತ್ತು ಕುಶಾಗ್ರ ಓಜಾ (34) ಅವರ ಉಪಯುಕ್ತ ಕೊಡುಗೆಗಳ ನೆರವಿನಿಂದ 50 ಓವರ್‌ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 341 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು.

ಅಭಿಷೇಕ್‌ ಶರ್ಮಾರನ್ನು ಕೂರಿಸಿ ವೈಭವ್‌ ಸೂರ್ಯವಂಶಿಗೆ ಸ್ಥಾನ ನೀಡಿ ಎಂದ ಆಕಾಶ್‌ ಚೋಪ್ರಾ!

ಬೃಹತ್ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ ಅಂಡರ್‌-19 ತಂಡ 41.1 ಓವರ್‌ಗಳಲ್ಲಿ 238 ರನ್‌ಗಳಿಗೆ ಆಲೌಟ್ ಆಯಿತು. ಇದರೊಂದಿಗೆ ಭಾರತ 103 ರನ್‌ಗಳ ಭರ್ಜರಿ ಜಯ ದಾಖಲಿಸಿತು. ಮಳೆಯ ಕಾರಣ 20 ಓವರ್‌ಗಳಿಗೆ ಸೀಮಿತವಾಗಿದ್ದ ಮೊದಲ ಯೂತ್ ಏಕದಿನ ಪಂದ್ಯದಲ್ಲೂ ಭಾರತ 7 ರನ್‌ಗಳ ಗೆಲುವು ಸಾಧಿಸಿತ್ತು. ಸರಣಿಯ ಮೂರನೇ ಹಾಗೂ ಅಂತಿಮ ಯೂತ್ ಏಕದಿನ ಪಂದ್ಯ ಬುಧವಾರ ನಡೆಯಲಿದೆ. ಬಳಿಕ ಉಭಯ ತಂಡಗಳು ಎರಡು ಪಂದ್ಯಗಳ ನಾಲ್ಕು ದಿನಗಳ ಯೂತ್ ಟೆಸ್ಟ್ ಸರಣಿಯಲ್ಲಿ ಮುಖಾಮುಖಿಯಾಗಲಿವೆ.

ಸೆಹ್ವಾಗ್ ಪುತ್ರನ ಭರ್ಜರಿ ಬ್ಯಾಟಿಂಗ್

341 ರನ್‌ಗಳ ಬೃಹತ್ ಮೊತ್ತಕ್ಕೆ ಭಾರತಕ್ಕೆ ಉತ್ತಮ ಆರಂಭ ನೀಡುವಲ್ಲಿ ಆರ್ಯವೀರ್ ಸೆಹ್ವಾಗ್ ಪ್ರಮುಖ ಪಾತ್ರ ವಹಿಸಿದರು. ಬಲಗೈ ಬ್ಯಾಟರ್ ಆರ್ಯವೀರ್ 48 ಎಸೆತಗಳಲ್ಲಿ 9 ಬೌಂಡರಿಗಳೊಂದಿಗೆ 47 ರನ್ ಗಳಿಸಿದರು. ಆರ್ಯವೀರ್ ಹಾಗೂ ನಾಯಕ ಲಕ್ಷ್ಯ ರೈಚಂದಾನಿ ಮೊದಲ ವಿಕೆಟ್‌ಗೆ 46 ರನ್‌ಗಳ ಜೊತೆಯಾಟ ನೀಡಿದರು. ಲಕ್ಷ್ಯ 11 ರನ್ ಗಳಿಸಿ ಔಟಾದ ಬಳಿಕ, ಆರ್ಯವೀರ್ ವಿಕೆ ವಿನೀತ್ ಜೊತೆಗೂಡಿ ಎರಡನೇ ವಿಕೆಟ್‌ಗೆ 55 ರನ್ ಸೇರಿಸಿದರು. ಆದರೆ ವೈಯಕ್ತಿಕ ಮೈಲುಗಲ್ಲು ತಲುಪುವ ಅವಕಾಶದಿಂದ ವಂಚಿತರಾದ ಆರ್ಯವೀರ್ ರನ್‌ಔಟ್ ಆದರು.

2026ರ ಬೆಂಗಳೂರು ಓಪನ್ ಸೆಪ್ಟೆಂಬರ್ 22ರಂದು ಕೆಜಿಎನಲ್ಲಿ ಆರಂಭ, ಒಂದು ಕೋಟಿ ಬಹುಮಾನ!

ಭಾರತದ ಮಾಜಿ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ ಆರ್ಯವೀರ್, ತಂದೆಯ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯನ್ನು ನೆನಪಿಸುವ ರೀತಿಯಲ್ಲಿ ಸ್ಫೋಟಕ ಇನಿಂಗ್ಸ್ ಆಡಿದರು. ಇನ್ನು ಮೊದಲ ಪಂದ್ಯದಲ್ಲಿ ಕೇವಲ 18 ಎಸೆತಗಳಲ್ಲಿ 38 ರನ್ ಸಿಡಿಸಿದ್ದ ರಾಹುಲ್ ದ್ರಾವಿಡ್ ಅವರ ಪುತ್ರ ಅನ್ವಯ್ ದ್ರಾವಿಡ್ ಈ ಪಂದ್ಯದಲ್ಲಿ ನಿರಾಸೆ ಮೂಡಿಸಿದರು. ವಿಕೆಟ್‌ಕೀಪರ್-ಬ್ಯಾಟರ್ ಅನ್ವಯ್ ವೇಗವಾಗಿ ರನ್ ಗಳಿಸುವ ಪ್ರಯತ್ನದಲ್ಲಿ ಕೇವಲ 9 ರನ್‌ಗಳಿಗೆ ವಿಕೆಟ್ ಒಪ್ಪಿಸಿದರು.

ಶತಕ ಸಿಡಿಸಿದ ಯಶವರ್ಧನ್ ಚೌಹಾಣ್

ಭಾರತದ ಬೃಹತ್ ಮೊತ್ತಕ್ಕೆ ಯಶವರ್ಧನ್ ಚೌಹಾಣ್ ಮತ್ತು ವಿಕೆ ವಿನೀತ್ ಪ್ರಮುಖ ಕೊಡುಗೆ ನೀಡಿದರು. ಈ ಜೋಡಿ ಮೂರನೇ ವಿಕೆಟ್‌ಗೆ 132 ರನ್‌ಗಳ ಅಮೂಲ್ಯ ಜೊತೆಯಾಟ ಕಟ್ಟಿತು. ಆಕ್ರಮಣಕಾರಿ ಬ್ಯಾಟಿಂಗ್ ನಡೆಸಿದ ಯಶವರ್ಧನ್ 100 ಎಸೆತಗಳಲ್ಲಿ 15 ಬೌಂಡರಿ ಹಾಗೂ 2 ಸಿಕ್ಸರ್‌ಗಳ ನೆರವಿನಿಂದ 122 ರನ್ ಸಿಡಿಸಿದರು. ಮತ್ತೊಂದೆಡೆ ವಿನೀತ್ 92 ಎಸೆತಗಳಲ್ಲಿ 6 ಸಿಕ್ಸರ್ ಮತ್ತು 4 ಬೌಂಡರಿಗಳೊಂದಿಗೆ 87 ರನ್ ಗಳಿಸಿದರು.

ಕೊನೆಯ ಹಂತದಲ್ಲಿ ಕುಶಾಗ್ರ ಓಜಾ 20 ಎಸೆತಗಳಲ್ಲಿ 5 ಬೌಂಡರಿ ಹಾಗೂ ಒಂದು ಸಿಕ್ಸರ್ ಒಳಗೊಂಡ 34 ರನ್ ಸಿಡಿಸಿ ಭಾರತದ ಮೊತ್ತವನ್ನು 341ಕ್ಕೆ ಕೊಂಡೊಯ್ದರು. ಆಸ್ಟ್ರೇಲಿಯಾ ಪರ ಥಾಮಸ್ ವಾಸಿಯೊ 3 ವಿಕೆಟ್, ಪ್ಯಾಟ್ರಿಕ್ ಸಲಿವನ್ 2 ವಿಕೆಟ್ ಹಾಗೂ ಕಾನರ್ ಗ್ರೆಗೊರಿ ಒಂದು ವಿಕೆಟ್ ಪಡೆದರು.

India vs Japan ಏಕೈಕ ಟಿ20ಐ ಪಂದ್ಯವನ್ನು ಎಲ್ಲಿ ವೀಕ್ಷಿಸಬೇಕು? ಲೈವ್‌ ಸ್ಟ್ರೀಮಿಂಗ್‌ ವಿವರ!

ಭಾರತದ ಬೌಲರ್‌ಗಳ ಸಂಘಟಿತ ದಾಳಿ

341 ರನ್‌ಗಳ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ U-19 ಆರಂಭದಲ್ಲೇ ಮೊಹಿತ್ ಉಲ್ವಾ ಮತ್ತು ಚಿಗುರುಪತಿ ವೆಂಕಟ ಅವರ ದಾಳಿಗೆ ತತ್ತರಿಸಿತು. ಮ್ಯಾಥ್ಯೂ ಲೌಗ್ 42 ರನ್, ನಾಯಕ ಜ್ಯಾಕ್ ಕ್ಜೋಸ್ನೆಕ್ 63 ಎಸೆತಗಳಲ್ಲಿ 81 ರನ್ ಗಳಿಸಿ ತಂಡವನ್ನು ಮೇಲೆತ್ತಲು ಪ್ರಯತ್ನಿಸಿದರು. ಆದರೆ ಭಾರತದ ಬೌಲರ್‌ಗಳು ನಿಯಮಿತ ಅಂತರದಲ್ಲಿ ವಿಕೆಟ್ ಕಬಳಿಸುತ್ತಾ ಆಸ್ಟ್ರೇಲಿಯಾ ತಂಡವನ್ನು 238 ರನ್‌ಗಳಿಗೆ ಸೀಮಿತಗೊಳಿಸಿದರು.

ಭಾರತ ಪರ ಚಿಗುರುಪತಿ ವೆಂಕಟ 3 ವಿಕೆಟ್ ಪಡೆದರೆ, ಕಾವ್ಯಾ ಪಟೇಲ್ ಮತ್ತು ಯಶವರ್ಧನ್ ಚೌಹಾಣ್ ತಲಾ 2 ವಿಕೆಟ್ ಪಡೆದರು. ಮೊಹಿತ್ ಉಲ್ವಾ, ಮನಲ್ ಚೌಹಾಣ್ ಮತ್ತು ಯಶ್ವೀರ್ ಗೌಡ್ ತಲಾ ಒಂದು ವಿಕೆಟ್ ಪಡೆದರು.

ಸಂಕ್ಷಿಪ್ತ ಸ್ಕೋರ್

ಭಾರತ ಅಂಡರ್‌-19: 341/7, 50 ಓವರ್‌ಗಳು — ಯಶವರ್ಧನ್ ಚೌಹಾಣ್ 122, ವಿಕೆ ವಿನೀತ್ 87; ಥಾಮಸ್ ವಾಸಿಯೊ 3/78

ಆಸ್ಟ್ರೇಲಿಯಾ ಅಂಡರ್‌-19: 238, 41.1 ಓವರ್‌ಗಳು — ಜ್ಯಾಕ್ ಕ್ಜೋಸ್ನೆಕ್ 81; ಚಿಗುರುಪತಿ ವೆಂಕಟ 3/64.