ʻಸಿಎಸ್‌ಕೆ ಬಗ್ಗೆ ನನಗೆ ಯಾವುದೇ ಅನುಮಾನವಿಲ್ಲʼ-ಸೋತರೂ ತಮ್ಮ ತಂಡವನ್ನು ಬೆಂಬಲಿಸಿದ ಮೈಕ್‌ ಹಸ್ಸಿ!

ಗುವಾಹಟಿ: ರಾಜಸ್ಥಾನ್‌ ರಾಯಲ್ಸ್‌ ವಿರುದ್ಧ ಹೀನಾಯ ಸೋಲು ಅನುಭವಿಸಿದರೂ ಆಟಗಾರರು ಆತ್ಮವಿಶ್ವಾಸ ಕಳೆದುಕೊಳ್ಳಬಾರದು ಎಂದು ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದ ಬ್ಯಾಟಿಂಗ್ ಕೋಚ್ ಮೈಕ್‌ ಹಸ್ಸಿ (Mike Hussey) ಸಲಹೆ ನೀಡಿದ್ದಾರೆ. 2026ರ ಐಪಿಎಲ್ (IPL 2026) ಟೂರ್ನಿಯಲ್ಲಿ ಕೇವಲ ಒಂದು ಪಂದ್ಯದಿಂದ ಯಾವುದೇ ಸಂಶಯಕ್ಕೆ ಅವಕಾಶ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದರು. ತಂಡವು ತನ್ನ ಬ್ಯಾಟಿಂಗ್ ವಿಭಾಗದ ಮೇಲೆ ನಂಬಿಕೆಯನ್ನು ಮುಂದುವರಿಸಿಕೊಂಡೇ ಇರುತ್ತದೆ ಮತ್ತು ಈ ಫಲಿತಾಂಶಕ್ಕೆ ಅತಿಯಾಗಿ ಪ್ರತಿಕ್ರಿಯಿಸುವ ಅಗತ್ಯವಿಲ್ಲ ಎಂದು ಹಸ್ಸಿ ಒತ್ತಿ ಹೇಳಿದ್ದಾರೆ.

ಸೋಮವಾರ ಗುವಾಹಟಿಯ ಬರ್ಸಪರ ಕ್ರೀಡಾಂಗಣದಲ್ಲಿ ನಡೆದಿದ್ದ ಈ ಪಂದ್ಯದಲ್ಲಿ ಸಿಎಸ್‌ಕೆ ತಂಡವು 127 ರನ್‌ಗಳಿಗೆ ಆಲ್‌ಔಟ್ ಆಗಿ, ಎಂಟು ವಿಕೆಟ್‌ಗಳ ಅಂತರದಲ್ಲಿ ಸೋಲು ಅನುಭವಿಸಿತು. ಈ ಸೋಲಿನ ಬಳಿಕ ಮಾತನಾಡಿದ ಹಸ್ಸಿ, ಈ ಫಲಿತಾಂಶದಿಂದ ತಂಡದ ಬ್ಯಾಟಿಂಗ್ ಮೇಲೆ ಇರುವ ವಿಶ್ವಾಸ ಯಾವುದೇ ರೀತಿಯಲ್ಲಿ ಕುಂದುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

IPL 2026: ʻಇವರಿಂದಲೇ ನಾವು ಸೋಲಬೇಕಾಯಿತುʼ-ಸಿಎಸ್‌ಕೆ ಸೋಲಿಗೆ ಕಾರಣ ಯಾರೆಂದು ತಿಳಿಸಿದ ಋತುರಾಜ್‌ ಗಾಯಕ್ವಾಡ್‌!

ಪಂದ್ಯದನಂತರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಮೈಕ್‌ ಹಸ್ಸಿ ಅವರು, ತಂಡದ ಮೇಲೆ ಪೂರ್ಣ ವಿಶ್ವಾಸವಿದೆ ಎಂದು ಹೇಳಿದರು.

“100% ನಾವು ಇದೇ ತಂಡವನ್ನು ಬೆಂಬಲಿಸುತ್ತೇವೆ. ಅದರಲ್ಲಿ ಯಾವುದೇ ಪ್ರಶ್ನೆಯೇ ಇಲ್ಲ. ಕೆಲವರು ಹಿಂದಿರುಗಿ ನೋಡಿದಾಗ ‘ನಾನು ಸ್ವಲ್ಪ ಬೇರೆ ರೀತಿಯಲ್ಲಿ ಆಡಬಹುದಿತ್ತು’ ಎಂದು ಹೇಳಬಹುದು. ಆದರೆ ಮತ್ತೊಂದು ದಿನ ಅದೇ ಪ್ರಯತ್ನ ಯಶಸ್ವಿಯಾಗಬಹುದು ಮತ್ತು ಪಂದ್ಯಕ್ಕೆ ತಿರುವು ನೀಡಬಹುದು. ಮುಂದೆ ಹೋಗುವಾಗ ನಮ್ಮ ಬ್ಯಾಟ್ಸ್‌ಮನ್‌ಗಳು ಗೊಂದಲದಲ್ಲಿರಬಾರದು ಅಥವಾ ತಮ್ಮ ಮನಸ್ಸಿನಲ್ಲಿ ಸಂಶಯಗಳನ್ನು ಇಟ್ಟುಕೊಳ್ಳಬಾರದು. ಏಕೆಂದರೆ ಆಟಗಾರರು ತಮ್ಮನ್ನು ತಾವು ಅನುಮಾನಿಸಿದಾಗ ಅವರು ತಮ್ಮ ಅತ್ಯುತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗುವುದಿಲ್ಲ,” ಎಂದು ಮೈಕ್‌ ಹಸ್ಸಿ ತಿಳಿಸಿದ್ದಾರೆ.

ʻಪಿಂಕ್‌ ನನಗೆ ತುಂಬಾ ಚೆನ್ನಾಗಿ ಕಾಣುತ್ತಿದೆʼ: ಸಿಎಸ್‌ಕೆ ಕಾಲೆಳೆದ್ರಾ ರವೀಂದ್ರ ಜಡೇಜಾ?

“ನಾನು ಬಯಸುವುದು ಏನೆಂದರೆ, ಆಟಗಾರರು ಸ್ಪಷ್ಟ ಮನಸ್ಥಿತಿಯೊಂದಿಗೆ ಮತ್ತು ಹೇಗೆ ಆಡಬೇಕು ಎಂಬ ಸ್ಪಷ್ಟ ಯೋಜನೆಯೊಂದಿಗೆ ಕಣಕ್ಕಿಳಿಯಬೇಕು. ಪರಿಸ್ಥಿತಿಗಳನ್ನು ಬೇಗ ಅರ್ಥಮಾಡಿಕೊಂಡು, ತಮ್ಮ ಮೇಲೆ ನಂಬಿಕೆ ಇಟ್ಟುಕೊಳ್ಳಬೇಕು. ಅದು ಯಶಸ್ವಿಯಾದರೆ ಚೆನ್ನಾಗಿರುತ್ತದೆ. ಆಗದಿದ್ದರೂ ಅದು ಕ್ರಿಕೆಟ್‌ನ ಭಾಗವೇ. ಆದ್ದರಿಂದ ಈ ಪ್ರದರ್ಶನವು ನಮ್ಮ ತಂಡದಲ್ಲಿ ಸಂಶಯ ಅಥವಾ ಭಯವನ್ನುಂಟುಮಾಡಬಾರದು ಎಂದು ನಾನು ಬಯಸುತ್ತೇನೆ,” ಎಂದು ಅವರು ತಿಳಿಸಿದ್ದಾರೆ.

ಗುವಾಹಟಿ ಪಿಚ್‌ ಬಗ್ಗೆ ಮೈಕ್‌ ಹಸ್ಸಿ ಪ್ರತಿಕ್ರಿಯೆ

ಗುವಾಹಟಿಯ ಪಿಚ್ ಮಳೆ ಕಾರಣದಿಂದ ಕವರ್‌ಗಳಡಿ ಇದ್ದುದರಿಂದ ಆರಂಭದಲ್ಲೇ ಸೀಮ್ ಬೌಲರ್‌ಗಳಿಗೆ ಸಹಕಾರ ನೀಡಿತು. ಈ ಪರಿಸ್ಥಿತಿಯನ್ನು ರಾಜಸ್ಥಾನ್‌ ರಾಯಲ್ಸ್‌ ತಂಡ, ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಬಳಿಕ ಸಮರ್ಥವಾಗಿ ಬಳಸಿಕೊಂಡಿತು. ಈ ಕುರಿತು ಪ್ರತಿಕ್ರಿಯಿಸಿದ ಮೈಕ್‌ ಹಸ್ಸಿ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡ, ಪಿಚ್‌ಗೆ ಇನ್ನಷ್ಟು ಚೆನ್ನಾಗಿ ಹೊಂದಿಕೊಳ್ಳಬಹುದಾಗಿತ್ತು ಎಂದು ಒಪ್ಪಿಕೊಂಡರು.

“ಮತ್ತೊಮ್ಮೆ ಅವಕಾಶ ಸಿಕ್ಕಿದ್ದರೆ, ನಾವು ಪರಿಸ್ಥಿತಿಗಳಿಗೆ ಇನ್ನಷ್ಟು ಸರಿಹೊಂದಿಕೊಂಡಿರುತ್ತಿದ್ದೆವು. ಆದರೆ ಸಾಮಾನ್ಯವಾಗಿ ದೇಶದಾದ್ಯಂತ ಪಿಚ್‌ಗಳು ಬ್ಯಾಟಿಂಗ್‌ಗೆ ಅನುಕೂಲಕರವಾಗಿರುತ್ತವೆ. ಆದ್ದರಿಂದ ಮುಂದಿನ ಪಂದ್ಯಗಳಲ್ಲಿ ವಿಶೇಷವಾಗಿ ಪಿಚ್‌ಗಳು ಸಮತಟ್ಟಾಗಿದ್ದರೆ, ಉತ್ತಮ ಬ್ಯಾಟಿಂಗ್ ಪ್ರದರ್ಶನಗಳನ್ನು ನಿರೀಕ್ಷಿಸುತ್ತೇನೆ,” ಎಂದು ಅವರು ಹೇಳಿದರು.

IPL 2026: ಐಪಿಎಲ್‌ ಇತಿಹಾಸದಲ್ಲಿ ಮುರಿಯಲಾಗದ ಪಂಜಾಬ್‌ ಕಿಂಗ್ಸ್‌ನ 3 ದೊಡ್ಡ ದಾಖಲೆಗಳು!

“ಇದು ನಮಗೆ ಒಳ್ಳೆಯ ಪಾಠವಾಗಿದೆ. ಪರಿಸ್ಥಿತಿಗಳು ಸೂಕ್ತವಾಗಿಲ್ಲದಿದ್ದರೆ, ನಮ್ಮ ಆಟದ ರೀತಿಯನ್ನು ಸ್ವಲ್ಪ ಬದಲಾಯಿಸಬೇಕಾಗುತ್ತದೆ. ಬೇರೆ ಪ್ರದೇಶಗಳಲ್ಲಿ ರನ್ ಗಳಿಸುವ ಪ್ರಯತ್ನ ಮಾಡಬೇಕು. ಈ ಪಂದ್ಯದಿಂದ ಪಾಠಗಳನ್ನು ಕಲಿತು, ಇದನ್ನು ಬೇಗ ಮರೆತು ಮುಂದಕ್ಕೆ ಸಾಗಲು ನಾವು ಪ್ರಯತ್ನಿಸುತ್ತೇವೆ,” ಎಂದು ಅವರು ಸೇರಿಸಿದ್ದಾರೆ.