'ಜೈಸ್ವಾಲ್, ಸೂರ್ಯವಂಶಿಗೆ ಕಠಿಣ ಶಿಕ್ಷೆ ವಿಧಿಸಬೇಕು'; ಸಂಜಯ್ ಮಂಜ್ರೇಕರ್ ಮನವಿಗೆ ದೊಡ್ಡ ಗಣೇಶ್ ಬೆಂಬಲ

ಬೆಂಗಳೂರು, ಆ.26: ಮಾಜಿ ಕ್ರಿಕೆಟಿಗ ದೊಡ್ಡ ಗಣೇಶ್ ಅವರು ಸಂಜಯ್ ಮಂಜ್ರೇಕರ್ ಅವರನ್ನು ಬೆಂಬಲಿಸಿ, ಕ್ರೀಡೆಯಲ್ಲಿ ದೈಹಿಕ ವಾಗ್ವಾದಗಳಿಗೆ ಕಡಿಮೆ ಶಿಕ್ಷೆ ವಿಧಿಸುವ ಬಗ್ಗೆ ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಮತ್ತು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಗೆ ಸಲ್ಲಿಸಿರುವ ಮನವಿ ಸಂಪೂರ್ಣವಾಗಿ ಸರಿಯಾಗಿದೆ ಎಂದು ಹೇಳಿದ್ದಾರೆ.

ಯಶಸ್ವಿ ಜೈಸ್ವಾಲ್ ಮತ್ತು ವೈಭವ್ ಸೂರ್ಯವಂಶಿ ಅವರ ಮೈದಾನದ ವರ್ತನೆಗೆ ಕಡಿಮೆ ಶಿಕ್ಷೆ ನೀಡಿರುವುದನ್ನು ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಕಠಿಣವಾಗಿ ಟೀಕಿಸಿದ್ದರು.

'ಆತ್ಮೀಯ ಐಸಿಸಿ ಮತ್ತು ಬಿಸಿಸಿಐ, ಇತ್ತೀಚೆಗೆ 'ಇಂಡಿಯಾ ಎ' ತಂಡದ ವೈಭವ್ ಸೂರ್ಯವಂಶಿ ಮತ್ತು ಈಗ ಯಶಸ್ವಿ ಜೈಸ್ವಾಲ್... ಇಂತಹ ವರ್ತನೆಯನ್ನು ನೀವು ಹೀಗೆಯೇ ಮುಂದುವರಿಯಲು ಬಿಟ್ಟರೆ, ಅವರು ಅಂತಹ ವರ್ತನೆಯನ್ನೇ ಪುನರಾವರ್ತಿಸುತ್ತಾರೆ. ಇದು ಕ್ರೀಡೆಗೆ ಹಾಗೂ ಮುಖ್ಯವಾಗಿ ಅವರ ಸ್ವಂತ ಭವಿಷ್ಯಕ್ಕೂ ಒಳ್ಳೆಯದಲ್ಲ' ಎಂದು ಮಂಜ್ರೇಕರ್ ಟ್ವೀಟ್‌ ಮಾಡಿದ್ದರು.

ಮಂಜ್ರೇಕರ್ ಅವರ ಟ್ವೀಟ್‌ ಮರು ಟ್ವೀಟ್‌ ಮಾಡಿರುವ ದೊಡ್ಡ ಗಣೇಶ್‌, 'ಮಂಜ್ರೇಕರ್‌ ಹೇಳಿದ್ದು ಸಂಪೂರ್ಣವಾಗಿ ಸರಿ. ಜನರು ಅವರನ್ನು ಏಕೆ ಟ್ರೋಲ್ ಮಾಡುತ್ತಿದ್ದಾರೆ?. ರಣಜಿ ಫೈನಲ್‌ನಲ್ಲಿ ಅನೀಶ್ ವಿರುದ್ಧ ತಲೆಯಿಂದ ಹೊಡೆದ ನಂತರ ಪರಾಸ್ ಡೋಗ್ರಾ ಕೇವಲ ದಂಡದಿಂದ ಪಾರಾಗುವುದನ್ನು ನಾವು ನೋಡಿದ್ದೇವೆ ಮತ್ತು ಈಗ ಜೈಸ್ವಾಲ್ ಕೂಡ ದಂಡದಿಂದ ಪಾರಾಗಿದ್ದಾರೆ. ಇದು ನಾವು ಸ್ಥಾಪಿಸಲಿರುವ ಪೂರ್ವನಿದರ್ಶನವಾಗಿದ್ದರೆ, ಮೈದಾನದಲ್ಲಿ ಕ್ರಿಕೆಟಿಗರು ಮುಷ್ಟಿ ಕಾಳಗದಲ್ಲಿ ಭಾಗಿಯಾಗುವುದನ್ನು ನಾವು ನೋಡುವ ದಿನಗಳು ದೂರವಿಲ್ಲ. ಈ ಆಟದಲ್ಲಿ ನೀವು ದೈಹಿಕವಾಗಿ ಸದೃಢರಾಗಲು ಸಾಧ್ಯವಿಲ್ಲ' ಎಂದು ಬರೆದುಕೊಂಡು ಮಂಜ್ರೇಕರ್‌ಗೆ ಬೆಂಬಲ ಸೂಚಿಸಿದ್ದಾರೆ.

ಎರಡನೇ ಟೆಸ್ಟ್ ಕ್ರಿಕೆಟ್ ಪಂದ್ಯದ ಮೊದಲ ದಿನ ಮೈದಾನದಲ್ಲಿ ಕಿತ್ತಾಡಿಕೊಂಡಿದ್ದ ಭಾರತದ ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್ ಮತ್ತು ಶ್ರೀಲಂಕಾ ವೇಗಿ ಅಸಿತಾ ಫರ್ನಾಂಡೊ ಅವರಿಗೆ ಪಂದ್ಯ ಶುಲ್ಕದ ಶೇ 25ರಷ್ಟು ದಂಡ ವಿಧಿಸಲಾಗಿತ್ತು.

ಮೊದಲ ಇನಿಂಗ್ಸ್‌ನಲ್ಲಿ ಭಾರತ ಬ್ಯಾಟಿಂಗ್ ಮಾಡುತ್ತಿದ್ದಾಗ 17ನೇ ಓವರ್‌ನಲ್ಲಿ ಫರ್ನಾಂಡೊ, ಜೈಸ್ವಾಲ್ ಅವರನ್ನು ಔಟ್ ಮಾಡಿದ್ದರು. ಶ್ರೀಲಂಕಾ ಆಟಗಾರರು ಸಂಭ್ರಮಿಸಲು ಮುಂದಾದರು. ಕೆರಳಿದ ಜೈಸ್ವಾಲ್‌, ಫೆರ್ನಾಂಡೊ ಅವರತ್ತ ತೆರಳಿ ವಾಗ್ವಾದಕ್ಕೆ ಮುಂದಾದರು. ಈ ವೇಳೆ ಅಸಿತಾ ಮುಂದೆ ಬಂದಾಗ ಜೈಸ್ವಾಲ್‌ ಹೆಲ್ಮೆಟ್‌ನಿಂದ ಫೆರ್ನಾಂಡೊಗೆ ತಲೆಗೆ ಒತ್ತಿದರು.

ವೈಭವ್‌ ಸೂರ್ಯವಂಶಿ, ಯಶಸ್ವಿ ಜೈಸ್ವಾಲ್‌ಗೆ ಶಿಕ್ಷೆ ನೀಡಬೇಕೆಂದು ಸಂಜಯ್‌ ಮಾಂಜ್ರೇಕರ್‌ ಆಗ್ರಹ!

‘ಇಬ್ಬರೂ ಆಟಗಾರರು ತಮ್ಮ ತಪ್ಪು ಒಪ್ಪಿಕೊಂಡಿದ್ದು, ರೆಫ್ರಿ ಆಂಡಿ ಪೈಕ್ರಾಫ್ಟ್ ಅವರು ಸೂಚಿಸಿದ ದಂಡವನ್ನು ಸ್ವೀಕರಿಸಿದ್ದಾರೆ. ಆದ್ದರಿಂದ, ಯಾವುದೇ ಔಪಚಾರಿಕ ವಿಚಾರಣೆಯ ಅಗತ್ಯ ಇರಲಿಲ್ಲ’ ಎಂದು ಐಸಿಸಿ ಹೇಳಿಕೆಯಲ್ಲಿ ತಿಳಿಸಿತ್ತು.

‘ಆಟಗಾರರು ಮತ್ತು ಸಹಾಯಕ ಸಿಬ್ಬಂದಿಗಾಗಿ ಇರುವ ಐಸಿಸಿ ನೀತಿ ಸಂಹಿತೆಯ ವಿಧಿ 2.12 ಅನ್ನು ಇಬ್ಬರೂ ಆಟಗಾರರು ಉಲ್ಲಂಘಿಸಿರುವುದು ಕಂಡುಬಂದಿದೆ’ ಎಂದು ಐಸಿಸಿ ತಿಳಿಸಿತ್ತು.