Lionel Messi: ರೊನಾಲ್ಡೊ ವಿಶ್ವ ದಾಖಲೆ ಮುರಿಯುವಲ್ಲಿ ಮೆಸ್ಸಿ ವಿಫಲ
2025 FIFA Club World Cup: 2009, 2011 ಮತ್ತು 2015 ರಲ್ಲಿ ಬಾರ್ಸಿಲೋನಾ ಕ್ಲಬ್ ವಿಶ್ವಕಪ್ ವಿಜಯಗಳಲ್ಲಿ ಮೆಸ್ಸಿ ಆಡಿದ್ದರು. ಮತ್ತು ಮೂರು ಆವೃತ್ತಿಗಳಲ್ಲಿ ಗೋಲು ಗಳಿಸಿದ್ದರು. ಪ್ರಸ್ತುತ ಆವೃತ್ತಿಯಲ್ಲಿ ಅವರು ಇಂಟರ್ ಮಿಯಾಮಿ ಪರ ಒಂದು ಗೋಲು ಗಳಿಸಿದರು.
Abhilash BC
Jun 30, 2025 10:04 AM
ನ್ಯೂಜೆರ್ಸಿ: 2025 ರ ಫಿಫಾ ಕ್ಲಬ್ ವಿಶ್ವಕಪ್‌ನಲ್ಲಿ(2025 FIFA Club World Cup) ಲಿಯೋನೆಲ್ ಮೆಸ್ಸಿ(Lionel Messi) ಅವರ ಅಭಿಯಾನವು ಕೊನೆಗೊಂಡಿದೆ. ಸೋಮವಾರ ನಡೆದ ಪ್ಯಾರಿಸ್ ಸೇಂಟ್-ಜರ್ಮೈನ್ (ಪಿಎಸ್‌ಜಿ) ವಿರುದ್ಧದ 16 ರ ಸುತ್ತಿನ ಹಂತದಲ್ಲಿ ಇಂಟರ್ ಮಿಯಾಮಿ(Inter Miami) 4-0 ಗೋಲುಗಳಿಂದ ಪರಾಭವಗೊಂಡಿತು. ತಂಡ ಸೋತು ಹೊರಬಿದ ಕಾರಣ ಮೆಸ್ಸಿಗೆ ಪೋರ್ಚುಗಲ್‌ನ ಸೂಪರ್‌ ಸ್ಟಾರ್‌ ಕ್ರಿಸ್ಟಿಯಾನೊ ರೊನಾಲ್ಡೊ(Cristiano Ronaldo) ಅವರ ವಿಶ್ವ ದಾಖಲೆಯನ್ನು ಮುರಿಯುವ ಅವಕಾಶ ಕೈತಪ್ಪಿತು.
ಮೊದಲಾರ್ಧದಲ್ಲಿ ಮಿಯಾಮಿ ತಂಡವು ಉತ್ತಮ ಪ್ರದರ್ಶನ ನೀಡಿದ ನಂತರ, ದ್ವಿತೀಯಾರ್ಧದಲ್ಲಿ ಮೆಸ್ಸಿ ತನ್ನ ಶ್ರೇಷ್ಠ ಪ್ರದರ್ಶನ ನೀಡಿದರೂ ಎದುರಾಳಿ ತಂಡದಿಂದ ನಾಲ್ಕೂ ಗೋಲುಗಳು ದಾಖಲಾದವು. ಮೆಸ್ಸಿ ದೊಡ್ಡ ಅವಕಾಶವನ್ನು ಸೃಷ್ಟಿಸುವುದರ ಜತೆಗೆ ಗೋಲಿನತ್ತ ಎರಡು ಹೊಡೆತಗಳನ್ನು ಹೊಡೆದರೂ ತಂಡ ಗೋಲು ಗಳಿಸುವಲ್ಲಿ ವಿಫಲವಾಯಿತು. ಮತ್ತು ಗೋಲು ಗಳಿಸದೆ ತಮ್ಮ ಅಭಿಯಾನವನ್ನು ಕೊನೆಗೊಳಿಸಿತು.
ಒಂದೊಮ್ಮೆ ಪಂದ್ಯದಲ್ಲಿ ಲಿಯೋನೆಲ್ ಮೆಸ್ಸಿ ಅವರು ಎರಡು ಗೋಲುಗಳನ್ನು ಬಾರಿಸುತ್ತಿದ್ದರೆ ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ವಿಶ್ವ ದಾಖಲೆ ಪತನಗೊಳ್ಳುತ್ತಿತ್ತು. ಕ್ಲಬ್ ವಿಶ್ವಕಪ್ ಇತಿಹಾಸದಲ್ಲಿ ರೊನಾಲ್ಡೊ ಏಳು ಗೋಲುಗಳನ್ನು ಗಳಿಸಿ ಅತ್ಯಧಿಕ ಗೋಲು ಗಳಿಸಿದ ವಿಶ್ವ ದಾಖಲೆ ಹೊಂದಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ ಕ್ರಿಸ್ಟಿಯಾನೊ ರೊನಾಲ್ಡೊ ಕ್ಲಬ್ ವಿಶ್ವಕಪ್ ಟೂರ್ನಿಯಲ್ಲಿ ಆಡದಿದ್ದರೂ ಅವರು ತಮ್ಮ ದೀರ್ಘಕಾಲದ ವಿಶ್ವ ದಾಖಲೆಯನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ರೊನಾಲ್ಡೊ ಕೊನೆಯ ಬಾರಿಗೆ ಈ ಟೂರ್ನಿಯಲ್ಲಿ ಆಡಿದ್ದು 2017ರಲ್ಲಿ.
ಇದನ್ನೂ ಓದಿ IND vs ENG 2nd Test: ದ್ವಿತೀಯ ಟೆಸ್ಟ್‌ಗೂ ಮುನ್ನ ಟೀಮ್‌ ಇಂಡಿಯಾ ಸೇರಿದ ಯುವ ಸ್ಪಿನ್ನರ್‌
2009, 2011 ಮತ್ತು 2015 ರಲ್ಲಿ ಬಾರ್ಸಿಲೋನಾ ಕ್ಲಬ್ ವಿಶ್ವಕಪ್ ವಿಜಯಗಳಲ್ಲಿ ಮೆಸ್ಸಿ ಆಡಿದ್ದರು. ಮತ್ತು ಮೂರು ಆವೃತ್ತಿಗಳಲ್ಲಿ ಗೋಲು ಗಳಿಸಿದ್ದರು. ಪ್ರಸ್ತುತ ಆವೃತ್ತಿಯಲ್ಲಿ ಅವರು ಇಂಟರ್ ಮಿಯಾಮಿ ಪರ ಒಂದು ಗೋಲು ಗಳಿಸಿದರು. ಇದು ಇಂಟರ್ ಮಿಯಾಮಿ ತಂಡವು ಎಫ್‌ಸಿ ಪೋರ್ಟೊ ವಿರುದ್ಧ ಅದ್ಭುತ ಫ್ರೀ-ಕಿಕ್ ಮೂಲಕ ಐತಿಹಾಸಿಕ ಗೆಲುವಿನ ಸಮಯದಲ್ಲಿ ಬಂದಿತು. ಒಟ್ಟಾರೆ ಮೆಸ್ಸಿ 6 ಗೋಲು ಬಾರಿಸಿದ್ದಾರೆ. ಉಳಿದಂತೆ ಕರೀಮ್ ಬೆಂಜೆಮಾ(6), ಗರೆಥ್ ಬೇಲ್(6) ಮತ್ತು ಲೂಯಿಸ್ ಸೌರೆಜ್(6) ಗೋಲು ಗಳಿಸಿದ್ದಾರೆ.